Read Maru MHO" PEIM: 33 Bible Online

MHO" PEIM: 33 - Maru bible

MHO" PEIM: 33

¹Cegu: wa- Mao"So: byu Moshe mashid shire Israel byumyu" qere shaman" byid' ra" dao: jham ngad: ra".

²ASANG wa Sina bam mae" gyo" li" va". Yao: wa Edom dao mae ba ru: thug' mung: yao" byumyu" qe: dao mae Paran bam mae" zho bao byid' ra". Mug: lagyo: datug wa yao: we' ngad: ako". Yao" lo, yo lo, mae nga" na: ra" myishae bo: ra".

³ASANG wa yao" byumyu" re jhid'de; mung: yao" yang sang: ra" mo, re gug:gam byid' ra". Aimung: yao" khyid qao: mae ngonhaung" goe; pa" mung:- yao" amyin" dao: jham re phug' cao" na: bam: ra".

⁴Ngonhaung" re Moshe yang byid' ra" Tarha" re ngonhaung" phug' cao" ra". Aiwa ngonhaung" byumyu" nho: phug' de; thao" ra" jo,nho" ngad: ra".

⁵ASANG wa- yao" byumyu" kaung qe we' ade, au: jhaung qe daga" phaung: ham: na: au: re yao" byumyu" Israel nho: kho:kham boe" lo: ra".

⁶Moshe wa Rubin kaung we' sin: yang:- Rubin wa byu malaug qere: khonhae" re: mashid dam: vashao:- ga: ta" ra".

⁷Yao: wa Yuda kaung we' sin: yang:- ASANG we"- bao" yu nae" qhid' mae" yao: hug' yao: rure tae" gyo: byid: wa,. yao: bam re gatau: kaung boe: we' dam: zham" qhan: byid: wa,. Aimung: yao" gyevo qere yao: bam qhid' mae" khe' zin: byid' rumae bao" thaug' byid: wa,- ga: ta" ra".

⁸Levi kaung we' sin: yang:- ASANG we"- nao wa ni" myid mae o ngaui: rure Urim we' Thummim khyo" jhaug' zaug: ra" ni" daui daui mo, Levi qekhyo" qhu" byid' ra". Nao wa yao: bam re Masa mae jham" qu" ava". Aimung: Meriba qid thug' jham mae yao: bam re kyang" san: yu: ava".

⁹Yao: bam wa myhi" pho" mangad: lao" mao:nhaung: bam mangad lao" myid:zo: qere tho' mae" nao re je: jhaug' zaug: ra" khyo qhu" byid' ako". Yao: bam wa ni" nho: amyin" jham re phug' cao" ako". Aimung: ni" nho: dao: thang" re jhaug' zaug: ako".

¹⁰Yao: bam wa ni" nho: tarha" re phug' cao" nae" qhid' mae" ni" byumyu" re mho" byid' li" genae". Yao: bam wa ni" nho: phan mae xeim: ngaui" byid' li" genae".

¹¹ASANG we"- yao: bam: byumyu" kaung re qam: bo: lo nae" qhid' mae" bao" thaug' byid: wa,. Yao: bam kad' ra" mau" zo" re ngaui byid: la,. Yao: bam nho: gyevo alhab' re khyoe' pye' byid: wa,. Yao: bam re khonhae" re: dadam: to" li" nhao lo:- ga: ta" ra".

¹²Yao: wa- Benyamin kaung we' sin: yang:- Ce: byumyu" kaung wa ASANG jhid'de; mung: gug:gam byid' ra" kaung ngad: ra". Yao: wa yao: bam re dane, geim" lhaug' zaung" byid' na: ra". Aimung: yao: wa yao: bam: phaung gaung: mae bona: jo; ra".

¹³Yao: wa Yoseb kaung we' sin: yang:- ASANG wa yao: bam: mug:myid re mug: qu: yang shaman" byid: vashao:- Myidgaung gyid' mae" qid: yang re: shaman" byid: vashao:-

¹⁴Yao: bam nho: mug:myid wa ba yang lhe' mhang" ra" shi: khyo" shaman" ru qo" yu vashao:- Lho khye' ayo, khao: ngo" mae shi: myo: sho' zaui: vashao:.

¹⁵Ganhae" gaco' mae" yao: bam: bug gaung jham mae gai: thao" ra" shi: byang" vashao:.

¹⁶Yao: bam: mug myid: mae gai: ru alhab' we' byang" jo; vashao:. Myi: nga" na: ra" thao" paung" mae" jhau: ke' ra" yaug- ASANG: gai: ruyang shaman" byid: vashao:. Yoseb kaung boe: mae ce: shaman" jeju jham joe" li" vashao:. Pe"mung:ga"re- yao: wa yao: mao: yao:nhaung: bam: phaung gaung: mae" au: jhaung ngad: ra".

¹⁷Yoseb wa nung: lo:- qam: bo: ra" nung: lae" khyug jham qo" ra". Yao" khyug jham wa- Manashe nho: ataung taung we' Ephrim nho: atug tug ngad: ako". Yao: wa ai: khyug jham: yang byumyu" qe re khe' thaung" ra" aimung:- yao: bam re mug:myid thao" sho' khe' jhin" thug' pye' ra"- ga: ta" ra".

¹⁸Zebulun kaung we' Isakha kaung: ra" khyo re- Zebulun wa panglai: dao mae" yao: bam: phaga: mau" mae aung doe na: dai vashao:- Isakha nho: jo,nho" wa yao" yham mae myo" laug: lo vashao:-

¹⁹Yao: shid' zo: wa taung bug byu qere yao: shid' zo" nho: bam khyo khai: yu: mung: ai: jo, qo mae jo; ra" xeim: ngaui" byid' ako". Yao: shid' zo: wa yao: shid' zo: nho: jo,nho" re panglai: mae" we' panglai: tham: yae mae jo; ra" ma dam: mae" qo" yu: ako"- ga: ta" ra".

²⁰Yao: wa- Gad kaung we' sin: yang: yao: bam: mug:myid re ce" lu: ke' byid' ra" yaug- Mao"So re caung:khin" byid: ge,- Gad wa khang khyi we' dakhyo: lo,pau" we' au: gye, re bin" cad' kho' pye' nae" lao" na: ra".

²¹Yao: bam wa yao: bam: qhid' mae" gai: thao" ra" mug: re yu: ako". Yao: bam re- au: jhaung dayaug: nho: gae bam gae byid: va". Yao: bam wa- Israel au: jhaung qe we' daga" za: phaung: ham: na: au: re- ASANG: amyin" dao: jham we' tarha" jham re phug' cao" avako"- ga: ta" ra".

²²Yao: wa- Dan kaung we' sin: yang: Dan wa khangkhyi lo: nau" ngad: ra". Yao: wa Bashan mae" byae: thug' li" ra"- ga: ta" ra".

²³Yao: wa- Nabhtali kaung we' sin: yang:- Nabhtali wa ASANG: yang nga: yhe' byid' ra" jeju yang myo: sho' shaman" byid' ru qhug' ra". Yao: bam: mug:myid wa- Galile tham: mae" mug: thao khyo joe" li" ra"- ga: ta" ra".

²⁴Yao: wa Ashe kaung we' sin: yang: Ashe wa gakaung qe tho' je yang: shaman" jeju qo" yu: ra". Yao: wa yao: mao: yao: nhaung: bam: o ngaui: thao" yaug ngad vashao:- yao" mug: re: zhanlun gae byang" sho' yaug: jo; vashao:.

²⁵Yao" nho: vogaung: jham wa jo, to' kham: mo" jham: yang gug:gam byid' to: vageshao:- Aimung: yao: wa khonhae" re: khyao za: gug:gam taung" qo" na vashao:- ga: ta" ra".

²⁶Israel byumyu" qe we"- naonhaung" Mao"So we' dau: ra" so mana yao: wa mug:gaung byang" sho' phungbao mae zaung: lai: phyid' lo" ra". Naonhaung" re bao" thaug' yu nae" qhid' mae" jham thaui: re zaung mung: li" ra".

²⁷Mao"So wa khonhae" re:- naonhaung" re gyevha: byid: yaug ngad: lai: lo va". Yao" nho: apyad ato mae" lo,pau" wa naonhaung" bao" thaug' ru ngad: ra". Naonhaung" qhid' au: khyo jhin" vao lo: ra" au: re yao" yang naonhaung" gyevo qere khe' thug' pye' byid' mung: yao: bam alhab' re phyo' qeim" pye' nae" qhid' mae" naonhaung" re ta" ava".

²⁸Aimung: Yaku nho: myid:zo: qe wa yaug yo za: qo" na genae". Mug:gaung mae" nghin: yang myidgaung re sheim" jhug' byid' ra" jo, qo- gaug zo we' sabyi qang: byang" ra" mug:gaung- yaug yo za: qo" na: ako".

²⁹Israel we"- nao wa khonho" ngaui lho" ra" yaug ngad i? ASANG: yang khyad' yu: ru qhug' ra" naonhaung" we' dau: ru kho: byumyu" re: mana ngad: ra". ASANG yao: yao:- naonhaung" re gyevha gug:gam byid: mung:- aung doe, nhao nae" qhid' mae" naonhaung" gyego we' shae pyang: boe" byid' ra". Naonhaung" gyevo qe wa nhag' khyag' yu nae" qhid' mae" naonhaung" re li" mho' yao: li" genae". Aimung: naonhaung" wa yao: bam re qo" zab: nhae" pye' li" genae".