Read Maru MHO" PEIM: 6 Bible Online

MHO" PEIM: 6 - Maru bible

MHO" PEIM: 6

¹Cejham wa naonhaung" re mho" shid' byid: nae" qhid' mae" naonhaung" Mao"So ASANG: yang ngore amyin" byid' ra" tarha" alhab' ngad: ra". Naonhaung" vao ye: mung: yesang: na genae" ngad: ra" mung" mae aijham re yephug' cao" ge,.

²Nao kao so' daui: na: ra" myhao" nao we' ni" myid:zo: qe wa naonhaung" Mao"So ASANG re nga: yhe' byid: mung:- ngo naonhaung" re byid' na: ra" yao" tarha" alhab' re phug' cao" ge,- airulao"- naonhaung" wa ai: mung" mae myao" sho' daui: na: li" genae".

³Israel byu qe we"- aijham re tae" gyo: mung: phug' cao" ge,- ailao" naonhaung" na: dai: li" genae". Ngonhaung" nho: phug' pho" qe: Mao"So ASANG dao:so: byid' to" ru we' dakhyo:- naonhaung" wa qam: bo: ra" byumyu" boe" li" mung: ai: myid xau bo: ra" mug: ai: myid xau bo: ra" mung" gai mae qo" na: li" genae".

⁴Israel qe we"- ceru re beim: ge,- ASANG ngad: ra". ASANG dayaug za: ngonhaung" Mao"So ngad: ra".

⁵Ni" Mao"So ASANG re ni" aung khug nhag' lam: alhab' we' ni" myid nyan alhab' we' ni" kao so' alhab' we' jhid'de; wa,-

⁶Ana" ba ngo nao re byid' ra" ce: amyin" dao: jham re khonhae" re: dato" myhid' wa,-

⁷Ni" zo: qere mho" byid: wa,- nao yham mae na: au:- nao su" lo" au:- nao dug no" na: au:- nao mau" zaui" na: au: ngadqere:- aijham re paug' yang: yang: mho" byid: wa,.

⁸Aijham re ni" lo,pau" mae taui" te' ci mung: peim: byid' ra" zai khyo" ni" nga: lao: mae taui" te' ci wa,.

⁹Ni" yham kham: baung mae we' kham: dung: mae tung" te' to: wa,.

¹⁰Naonhaung" Mao"So ASANG wa naonhaung" phug' pho" qe ngad ko" ra" Abraham- Isag- Yaku bam re dao:so: byid' to" ru we' dakhyo:- yao: wa naonhaung" mate" ra" qi: mung: jo,nho" dai kham bo: ra" vomo" jham we' daga" mung"dan: re byid' li" nae".

¹¹Yham jham wa naonhaung" make' to" ra" zai gai jham we' byang" sheim: jo; li" nae". Aimae naonhaung" madau" ra" qid thaung: jham jo; li" nae". Naonhaung" maqho" ra" sabyi khyae we' zhanlun khyae jo; li" nae". ASANG naonhaung" re ce: mung" khyo jhui" lo lao"- naonhaung" o: ja: alhab' qo" zo" li" genae".

¹²Naonhaung" jeim doe; na ko" ra" Egutu mung" mae" khyad' yu: ra" ASANG re naonhaung" mato" myhid' pye' nae" lha" ge,.

¹³Naonhaung" Mao"So ASANG re nga: yhe' ge,- yao: re za: caung:pa" ge,- yao" mang re lao: yang: za: naonhaung" dao:so: to: ge,.

¹⁴So gatau jham re dacaung:pa" ge, naonhaung" lhang" gam: mae na ko" ra" byumyu" qenho: so jham pe" ja: rere: dacaung:pa" ge,.

¹⁵So gatau jham re naonhaung" caung:pa" ko" re wa- ASANG: nhag' yo" ru wa naonhaung" re gye kad' nae" qhid' mae" myi: we' dakhyo: joe" li" mung:- naonhaung" re baui: sho' se' tam" pye' li" nae". Pe"mung:ga"re naonhaung" we' daga" na: ra" naonhaung" Mao"So ASANG wa- mai jho" qhi" ra" mo, re maqo" zang: kham ngad: ra".

¹⁶Naonhaung" Masa jo, qo mae kad' ko" ru we' dakhyo: naonhaung" Mao"So ASANG re dajham" qu" ge,.

¹⁷Yao: naonhaung" re byid' to" ra" tarha" alhab' re phug' cao" ca" ako".

¹⁸ASANG ta" ru wa jo: ru we' gai: ru ngad mung: aire kad' ge,- naonhaung" re na: dai nhao: li" nae". Naonhaung" phug' pho" qere ASANG: yang dao:so: byid' to" ra" myid xau gai: ra" mung"dan: re qo" sang: yu mung:-

¹⁹Yao: dao:so: byid' to" ru we' dakhyo:- naonhaung" gyevo qere qo" khe' thug' pye' li" genae".

²⁰Thao phyao: naonhaung" yao: zo: qe wa ngonhaung" Mao"So ASANG wa ce: tarha" alhab' re phug' cao" nae" qhid' mae" pe"mung: ngonhaung" re amyin" byid' to" ra" ga: naonhaung" re myid' li" genae".

²¹Ailao" yao: bam re- Ngonhaung" wa Egutu mung" mae jeim doe; na mung: ASANG wa yao" qi" qhang: ra" phung qam: so' yang ngonhaung" re khyad' yu: lo: ra".

²²Egutu byu qere re: yao: bam: kho:kham we' yao" zug: alhab' mo, rere: mug' pho: mau" we' gyaug: din ja: mau" kad' qhu" rure ngonhaung" yao" myo; yang yao: the' myao: bam va".

²³Ngonhaung" re cekhyo jhui" lo mung: yao: byid: nae" ga: ngonhaung" phug' pho" qere yao: dao:so: byid' to" ru we' dakhyo:- ce: mung" re byid: nae" qhid' mae" Egutu mung" mae" ngonhaung" re lhoe' ke' byid' ra".

²⁴Ai: thao ngonhaung" Mao"So ASANG wa ce: yao" tarha" alhab' re phug' cao" nae" we' yao: re nga: yhe' byid: nae" qhid' mae" ngonhaung" re amyin" byid' ra". Ngonhaung" airu: kad' ngad: re- yao: wa ngonhaung" amyu" re khonhae" re: lhaug' zaung" byid: mung: na: dai: jo,nhao nae".

²⁵Ngonhaung" wa Mao"So: yang ngonhaung" re amyin" byid' to" ru ja: khao: ngo" re jhaug' zaug za: phug' cao" yang: ngad: re- yao: ngonhaung" re ngaui: li" nae" ein: ta" kyo: ge,.