Read Maru MHO" PEIM: 7 Bible Online

MHO" PEIM: 7 - Maru bible

MHO" PEIM: 7

¹Naonhaung" Mao"So ASANG wa naonhaung" yena: sang: yu genae" ngad: ra" mung" ngad: ra" mung"dan: khyo naonhaung" re jhui" vao ye: mung: yao: wa byumyu" myo: sho' re aimae" khe' thug' ke' byid' li" nae". Naonhaung" qhid' au: khyo jhin" ye" lo" ru we' dakhyo: naonhaung" tho' je: myo: mung: qam: je: bo: ra" Hiti- Girgashid- Amori- Khanan- Perizi- Hivi-Yebusi byumyu" nhad' myu" re khe' thug' pye' li" nae".

²Naonhaung" Mao"So ASANG ce: byumyu" qere naonhaung" qam: so' lo, mae byid: mung: yao: bam re aung: pye' gelao"- naonhaung" wa yao: bam alhab' re se' pye' qo: ako". Yao: bam we' ba nam dakad' ge,- nhag' khyag' myid re: daqhu" byid: ge,.

³Yao: bam mae" dayaug we' re: lo, daxo' ge,- naonhaung" yao: zo: qere re: yao: bam mae" dayaug we' re: lo, xo' daxo' nhao ge,.

⁴Pe"mung:ga"re airu: kad' lao"- yao: bam wa naonhaung" zo: dau qere so gatau jham re caung:pa" nae" qhid' mae" ASANG shad' mae" jhui" phaug' lo" nhao: li" genae". Airu: boe" ngad: re- ASANG wa naonhaung" re nhag' yo: mung:- aijao" yao: naonhaung" re se' tam" pye' li" nae".

⁵Airumung: yao: bam: phan jham re phyo' khyo" pye' ge,- yao: bam: gyang" lho" laug zang baung: jham re adau dau khyug' pye' ge,- yao: bam: Ashe so myhi" nho: solho jham re thau: khyo" pye' mung:- yao: bam: so alho jham re ngha" pye' ge,.

⁶Ceru re kad' ge,- pe"mung:ga"re naonhaung" wa naonhaung" Mao"So ASANG: yang sang: ra" mo, ngad: ako". Myidgaung dao mae na: ra" byumyu" alhab' mae" gakai: lai mung: ra" yao" byumyu" boe" nae" qhid' mae" yao: naonhaung" re khyin: yu: ra".

⁷ASANG wa naonhaung" re amyu" gatau qetho' byu myo: geyang: jhid'de; ru we' khyin: yu: ru mangad:- naonhaung" wa myidgaung dao mae ngai: thao" ra" byumyu" ngad: lo: ako".

⁸Ngadqere: ASANG wa naonhaung" re jhid'de; mung: naonhaung" phug' pho" qere byid' to" ra" dao:so: re jhau' zaug: mung: yang: ngad: ra". Ce: mathao mae- yao: wa naonhaung" re- yao" qam: so' mo" yang khyad' yu mung:- Egutu kho:kham re jeim kad' na: rumae" naonhaung" re loe; beim nhao: ra".

⁹Naonhaung" Mao"So ASANG wa date: za: ngad: ra" Mao"So ngad: ru we' yao: wa jhaug' zaug yaug ngad: rure beim: wa,- yao: wa yao" dao: thang" re zaui" pyang" mung:- yao: re jhid'de; yang: yao" amyin" dao: jham re phug' cao" ko" ra" mo, re- byuqae: dataung joe" sho' yao" mabaui mabyo; ra" jhid'de; myid re qhu" byid' li" nae".

¹⁰Ngadqere: yao: re nghang" ra" mo, re qobo dae byid: nae" kam" wa mayam" na ngad: ra".

¹¹Airumung: ana"- naonhaung" re mho" byid' to" ra" gu: re phug' cao" ge,- ana" ba ngo naonhaung" re byid' ra" tarha" jham alhab' re phug' cao" ge,.

¹²Naonhaung" ai: amyin" dao: jham re tae" gyo: mung: aijham re jhaug' zaug za: phug' cao" yang: ngad re- naonhaung" phug' pho" qere dao:so: byid' to" ru we' dakhyo: naonhaung" Mao"So ASANG wa naonhaung" we' to" ra" yao" dao: thang" re zaui" pyang" mung: yao" mabaui mabyo; ra" yao" jhid'de; myid naonhaung" re qhu" byid' li" nae".

¹³Yao: wa naonhaung" re jhid'de; mung: naonhaung" re shaman" byid' li" nae". Airulao"- naonhaung" wa myo" laug: li" mung:- zo: dau myo: sho' qo" li" genae". Yao: wa naonhaung" yo re shaman" byid' li" nae". Airulao"- naonhaung" wa gaug zo- sabyi qang:- zhanlun xau- jham qo" li" genae". Amung: yao: wa nung: we' yao myo: sho' naonhaung" re byid' ra" khyo" naonhaung" re shaman" byid' li" nae". Yao: naonhaung" re byid: nae" ga:- naonhaung" phug' pho" qere dao:so: byid' to" ra" mung"dan: mae yao: wa naonhaung" re ce: shaman" jeju alhab' byid' li" nae".

¹⁴Mug: myid dao mae naonhaung" we' dakhyo: shaman" jeju qo" ra" byu dayaug re: mana nae". Naonhaung" mae" dayaug re: bug: daung: mabo nae"- naonhaung" gug'nyhug' dadau: re: ayao" mabo nae".

¹⁵ASANG wa no aja: ja: mae" naonhaung" re gug:gam byid: nae". Amung: yao: wa Egutu mung" mae naonhaung" na ko" au: boe" ko" ra" gyaug ci" ja: no daja: re: naonhaung" mae maboe" nhao nae". Ngadqere: naonhaung" gyevo qe: dao mae kam" wa aigu: alhab' re boe" nhao nae".

¹⁶Naonhaung" Mao"So ASANG: yang naonhaung" qam: so' lo, mae byid' to" ra" byumyu" khao: ngo" re se' tam" pye' ge,. Yao: bam re nhag' khyag' myid daqhu" byid: ge,- yao: bam: so jham re dacaung:pa" ge,- airu: kad' ru wa shid khyo: ngad: li" nae".

¹⁷Ai: byumyu" wa naonhaung" tho' je: myo: mung: yao: bam re maqo" khe' thug' ein: naonhaung" yao" gaung re data" ge,-

¹⁸Yao: bam re dagyaug ge,- naonhaung" Mao"So ASANG Egutu kho:kham re we' yao" byu qere- alhab' re khoru: kad' rure myid: beim: ge,.

¹⁹Naonhaung" yao" myo; yang yao: the' myao ko" ra" qu" gyaug qu" lhaung sho' ra" qam" no we' mug' pho: ve,lho jham- mug' pho: lo, mau" jham- naonhaung" Mao"So ASANG wa qam: so' mo" we' qam: o" yang naonhaung" re lhoe' ke' byid' ra" khyo re myid: beim: ge,- Egutu byu qere yao: se' tam" pye' ru we' dakhyo:- ana" naonhaung" gyaug: na ko" ra" byumyu" alhab' rere: yao: se' tam" pye' li" nae".

²⁰Yao: wa yao: bam: phaung mae byodin byosho: lhao" re: boe" nhao mung: phao: lo, yang: vho' jo, mo, rere: yao: se' pye' li" nae".

²¹Airumung: ai: byumyu" qe re dagyaug ge,- naonhaung" Mao"So ASANG wa naonhaung" we' daga" ngad: ra". Yao: wa qi" qhang: ra" Mao"So ngad mung: gyaug tho' ra" yaug ngad: ra".

²²Naonhaung" qhid' khyo jhin" ye" lo" ko" ru we' dakhyo:- ce: byumyu" qere zo" zo" mae" yao: khe' thug' pye' li" nae". Naonhaung" wa yao: bam alhab' re dalhang: dae za: wa maqo" se' tam" pye' genae". Naonhaung" airu: kad' ko" re wa seyo: gug'nyhug' lhe: jham myo" laug: li" mung: naonhaung" re kyaug' li" genae".

²³ASANG wa naonhaung" gyevo qere naonhaung" qam: so' lo, mae byid: mung: yao: bam se' tam" pye' ru qhug' ra" ba na joe" sho' yao: bam re byodin byosho: boe" nhao: li" nae".

²⁴Yao: wa yao: bam: kho:kham qere naonhaung" qam: so' lo, mae ke' byid' li" nae" naonhaung" yao: bam re se' pye' mung:- yao: bam re to" myhid' pye' li" genae". Naonhaung" re khag' re: maqo" tam" genae". Naonhaung" wa yaug khao: ngo" re se' tam" pye' li" genae".

²⁵Yao: bam: so alho jham re ngha" pye' ge,- aijham: dao mae de; ra" ngaui- qhang re myo, danyad ge,- naonhaung" qhid' mae aijham re dayu ge,- naonhaung" yu geyang: ngad: re aiwa shid khyo ngad: li" nae"- pe"mung:ga"re ASANG wa so alho jham re caung:pa" rure nghang" ra" yaug ngad: ra".

²⁶Aijham mae" so alho daja: rere: naonhaung" yham khyo daci: lo ge, mangad: re- yao: bam: dao mae" nhang: kheim: wa dakhyo: za: naonhaung" dao mae zao" li" nae". Naonhaung" wa ai: so alho jham re nghang: mung: maphug' makhyad' kad' pye' qo: ako". Pe"mung:ga"re yao: bam wa ASANG: nhang: kheim: zao" mo, ngad: ako".