Read Maru YOHAN 1 Bible Online

YOHAN 1 - Maru bible

YOHAN 1

¹Sao qhid' maqhid mae mungdao: jo; ra". Aimung dao: wa Mao"So we' daga" ngad mung:- mungdao: wa Mao"So ngad: ra".

²Aimung dao: wa sao qhid' maqhid mae" Mao"So we' daga" ngad: ra".

³Mao"So wa ai: mungdao: khyo" yang cao jab alhab' re phan" to" ra". Yao: mabo lo: phan" to" ru daja: re: majo, ngad: ra".

⁴Aimung dao: wa kao so' ajhaung ngad: ra". Amung: ai: kao so' wa xao su byu qe: qhid' mae" bo" bao ngad: ra".

⁵Ai: bo" bao wa mug: cad' khug mae bao: jo, mung:- mug: cad' wa bo" bao re khonhae" re: maqo" aung: pye' ngad: ra".

⁶Mao"So wa Yohan ga: mang: ra" yaug re yao" lagyo: khyo" yang nhao: ke' ra".

⁷Alhab' mo, wa the' gyo: yang: lam" genae" qhid' mae" Yohan wa ai: bo" bao re ta" kyo: nae" joe" li" ru ngad: ra".

⁸Yao: yao: wa bo" bao mangad:- Bo" bao: khyo re ta" kyo: nae" qhid' mae" joe" li" ru ngad: ra".

⁹Ai: bo" bao wa myid gaung dao khyo joe" li" mung:- xao su byu alhab' mo; dao mae bao byid' ra" bo" bao agyang" ngad: ra".

¹⁰Aimung dao: wa mug:myid mae ngad: ra". Mao"So wa yao: khyo" yang mug:myid re phan" to: ngadqere: mug:myid wa yao: re maba ngad: ra".

¹¹Yao: wa yao: yao" mug: mang: khyo joe" li" ngadqere: yao: yao" mang: byu qe wa yao: re malham: khae: yu ko" ngad: ra".

¹²Ngad yang: re: yao: re khae: yu mung: lam" ra" mo, alhab' re Mao"So: zo: dau qo" boe" ra" akhang" byid' ra".

¹³Ai bam wa xao su byu khyo" khau: li" mung:- yao: yao: za: Mao"So: zo: dau qe boe" li" ru mangad:- Mao"So wa yao: bam: yao: pho" ngad: ra".

¹⁴Mung dao: wa xao su byu boe" li" mung:- nhag' myan" ru we' dangman" ru byang" jo, yang:- ngonhaung" phaung mae na: ra". Yao: pho" nho: zote: zo: dayaug khyo" yao: kham: yu: to" ra" yao" phungbao re ngonhaung" the' myao va".

¹⁵Yao" khyo re Yohan ta" ru wa nga" thao mae joe" li" ra" yaug wa ngo tho' je: qi: yaug ngad: ra"- ein: ngo ta" na: ra" yaug wa ceyaug ngad: ra". Pe"mung:ga"re yao: wa ngo makhau shimae" na: jo, yaug ngad: ra"- ga: ta" ra".

¹⁶Yao" nho: nhag' myan" ru byang" jo; rumae" yao: wa ngonhaung" alhab' re shaman" jeju daja: thao daja: byid' ra".

¹⁷Mao"So wa Moshe khyo" yang tarha" byid: ngadqere: nhag' myan" ru we' dangman" rure wa Yesu Khristu khyo" yang byid' ra".

¹⁸Mao"So re khag' re: mamyao: qu" ngadqere: yao: pho" tao: kheim" mae na mung:- Mao"So yao: ru" ra" zote: zo: wa Mao"So re qhu" byid' ava".

¹⁹Yerusalem mae na ko" ra" Yuda kheim: so' qo" ra" mo, wa khinjaung qere we' Levi kaung daqhae: re Yohan jhao" nhao: ke' mung:- nao khag' ngad: i? ga: myid: nhao: ke' ako".

²⁰Ailao" Yohan wa- ngo wa Meshia mangad: ga: manyham: mazug' lo: de: de: za: ta" ra".

²¹Yao: bam wa- Aire nao khag' ngad: i? Nao wa Elia ngad: i? ga: myid' ako". Yohan wa ngo mangad: ga: tau" ra". Ailao" yao: bam wa Nao wa ai: lapa yaug ngad: i? ga: myid' ako". Yohan wa Ngo mangad: ga: phaug' tau" ra".

²²Alao" yao: bam wa- Nao khag' ngad: rure ngonhaung" re ta" kyo: la,- ngonhaung" re nhao: ke' ra" mo, re lo" dam: ta" kyo: nae" dao: cilo" ca" ra"- naoyao: wa khoru: ta" nae" i? ga: myid' ako".

²³Ailao" Yohan wa ngo wa lapa Esaia ta" ru we' dakhyo:- Asang: khyo re din: din: za: nyhang" jhao" ge, ga: din"pyad' yo mae hug' na: ra" thoe ngad: ra" ga: tau" ra".

²⁴Ai: Pharishe qeyang nhao: ke' ko" ra" lagyo: qe Yohan re dam: myid: ko" ru wa-

²⁵Nao wa Meshia re: mangad:- Elia re: mangad:- ai: lapa yaug re: mangad: re wa nao wa pe"mung: qid nyhab' byid' i? ga: myid' ako".

²⁶Yohan wa- ngo wa qid mae qid nyhab' byid' ra"- ngadqere: naonhaung" phaung gaung: mae naonhaung" maba: ra" byu dayaug ye; jo; ra".

²⁷Yao: wa nga" thao mae joe" li" ra" yaug ngad: ra"- ngadqere: ngo wa- yao" khyid zhaung: taui: pheim byid: nae" lhao" re: maman: qi"- ga: ta" ra".

²⁸Ce: khyo jham wa Yohan qid nyhab' byid: yang: na: ra" Yodan gyaung: thoete' ba thug' shad' mae" Bethani vogaung: mae boe" ra" khyo jham ngad: ra".

²⁹Thao: ba re Yohan wa yao: jhao" Yesu li" na: rure myao mung:- myid gaung byu qe: qobo re yu: pye' byid' ra" Mao"So: Yao Nau" re qu" ge,-

³⁰Yao: wa nga" thao mae joe" li" yaug ngadqere: ngo tho' je: qi: yaug ngad: ra" ein: ngo ta" ra" yaug wa ceyaug ngad: ra". Pe"mung:ga"re yao wa ngo makhau shimae" na: jo, yaug ngad: ra".

³¹Qhid' phyao: yao: khag' ngad: rure ngo maba- Qhid' phyao: maba ngadqere: Israel amyu" qe yao: re ba genae" qhid' mae" ngo wa qid mae qid nyhab' byid' ru ngad:- ga: ta" ra".

³²Amung: Yohan wa Byo wa- mug:gaung mae" phaung" kyug' ru: dao" gyo" li" mung:- yao" dao mae li" no" na: rure ngo the' myao va".

³³Ngo wa yao: aiyaug ngad: rure qhid' phyao: maba- ngadqere: qid mae qid nyhab' byid: nae" qhid' mae" ngore nhao: ke' ra". Mao"So ngore ta" ru wa Byo wa gyo" li" mung:- byu dayaug: dao mae li" no" na: rure nao the' myao: li" nae"- ai: yaug wa Gyang" Lho" Byo mae qid nyhab' byid' ra" yaug ngad: ra".

³⁴Ai: rure ngo the' myao va"- Airu: mung: yao: wa Mao"So: Yao: Zo: ngad: rure naonhaung" re ngo sagse: kham: kyo" ra"- ga: ta" ra".

³⁵Thao: ba re Yohan wa yao" mho"zo: shid' yaug we' daga" ye; jo; ra".

³⁶Yao: wa Yesu lai: lo" na: rure myao lao"- Mao"So: Yao Nau" re qu" ge,- ga: ta" ra".

³⁷Yao" mho"zo: shid' yaug wa ai: dao: re the' gyo: gelao"- Yesu thao cao" ye" lo" ako".

³⁸Yesu wa lhang: qu" mung:- yao: shid' zo: yao" thao cao" lo: na ko" rure myao lao"- ni" shid' zo: pe" re qho: na ko" i? ga: myid' ra". Yao: shid' zo: wa Rabai we"- nao khotau mae na: i? ga: tug' myid' ako". (Rabai ga" ru wa mho"pho" ga" ru ngad: ra".)

³⁹Yao: wa Li" qu" geri:- ga: tau" ra". (ai: ayo, wa myi" thao byid yo,qug ko ngad: ra".) Aimung: yao: shid' zo: wa yao: we' daga"cao" ye" lo" mung:- yao: na: ra" jo, qo re yao: shid' zo: yemyao gelao"- yao: we' daga" ai: ba geim" yena: ako".

⁴⁰Ai shid' zo: mae" dayaug wa Simon Petru yao: nhaung: Andre ga: yaug ngad: ra".

⁴¹Yao: wa ailao"jao"- yao: mao: Simon re myao mung:- nga" shid' zo: Meshia re the' myao va" ga: Simon re ta" ra". (Meshia ga" ru wa Khristu ga" ru ngad: ra".)

⁴²Ai: thao yao: wa Simon re Yesu jhao" jhui"lo: ra". Yesu wa Simon re lham: qu" mung: nao wa Yohan yao: zo: Simon ngad: ra" ngadqere: nao re Kepha ga: mhang" li" genae" (Kepha we' Petru ga" ru wa dakhyo: za: ngad mung: laung: mo" baui ga" ru ngad: ra".)

⁴³Thao: ba re Yesu wa Galile mung" khyo ye" lo" nae" myid: phyid' ra". Yao: wa Philib re the' myao mung: yao: re- Nga" thao cao" wa,- ga: ta" ra".

⁴⁴(Philib wa Andre we' Petru shid' nhae na: ra" Bedsaida vogaung: mae" ngad: ra".)

⁴⁵Philib wa Nathanae re myao mung:- Moshe tarha" jham: paug' mae we' lapa qe: jham: paug' mae tung" to: ko" ra" yaug re ngonhaung" the' myao va". Yao: wa Nazared mae" Yoseb: yao: zo: Yesu ngad: ra" ga: yao: re ta" kyo" ra".

⁴⁶Ailao" Nathanae wa Nazared vogaung: mae" gai: ra" ru daja: ja: qo" thug' li" ra" i? ga: ta" ra". Philib wa li" qu" wa,- ga: tau" ra".

⁴⁷Yesu wa Nathanae yao: jhao" li" na: rure myao lao"- apyag' asham" mabo: ra" Israel byumyu" agyang" re qu" ge,- ga: ta" ra".

⁴⁸Ailao" Nathanae wa Nao ngore khoru: ba: i? ga: Yesu re myid' ra". Yesu wa- nao re Philib mali" khai shire pho' ham" gae qao: mae nao na: jo; ra" au: mae" nao re ngo myao va" ga: yao: re ta" ra".

⁴⁹Nathanae wa mho" pho" we"- nao wa Mao"So: Yao: Zo: ngad: ra"- nao wa Israel nho: kho:kham ngad: ra"- ga: tau" ra".

⁵⁰Yesu wa yao: re Pho' ham" gae qao: mae nao na: jo; ra" au: mae" nao re ngo myao va" ein: nao re ta" ruyang za: nao lam" i? Cetho' je: qi" ra" mau" re nao the' myao: li" nae"- ga:ta" ra".

⁵¹Amung: Yesu wa yao: bam re naonhaung" re ngo dang za: ta" geli"- Mug:gaung wa bung" li" mung:- Mao"So: mug: lagyo: qe wa Byu: Yao: Zo" dao mae do, do, gyo" gyo" kad' na ko" rure naonhaung" the' myao: li" genae"- ga: ta" ra".