Read Maru YOHAN 10 Bible Online

YOHAN 10 - Maru bible

YOHAN 10

¹Yesu wa Naonhaung" re ngo dang za: ta" geli"- yao yham khyo kham: dung: khyo" mavao lo:- gatau khyo" do; lhoe" vao: ra" yaug wa khug' hab' damya, ngad: ra".

²Kham: dung: khyo" vao ye" ra" yaug wa- yao lhaug' yaug ngad: ra".

³Kham: lhaug' yaug wa yao: re kham: phung" byid' ra". Yao jham re: yao" thoe re tae" gyo: gemung: yao: wa yao" yao jham re mang lao: yang khai mung: taung gaung khyo jhui" thug' lo" ra".

⁴Yao jham re taung gaung khyo bin: jhui" thug' lo" lao"- yao: wa yao jham: qhid' au: mae ye" lo" ra". Yao jham wa yao" thoe re ba geyang: yao" thao cao" ye" lo" ako".

⁵Su gaje dayaug: thao khyo" wa yao jham macao" genae". Pe"mung:ga"re- yao jham wa aiyaug: thoe re maba gemung: yang: aiyaug mae" tao" phao: lo" li" genae"- ga: ta" ra".

⁶Yesu wa ce: dao: tau" re yao: bam re ta" kyo" ke' ra". Ngadqere: yao: bam wa dao: tau" lajheim: re maba: gyo: ko" ngad: ra".

⁷Airumung: Yesu wa Naonhaung" re ngo dang za: ta" geli"- ngo wa yao jham vao: ra" kham: dung: ngad:.

⁸Nga" qhid' re joe" li" ko" ra" gaje alhab' wa khug' hab' qe we' damya, qe ngad: ako". Yao jham wa yao: bam: thoe re matae" gyo: ko" ngad: ra".

⁹Ngo wa kham: dung: ngad:- ngo khyo" vao: ra" yaug khag' ngadqere: khyad' yu: ru qhug' nae". Yao: wa thug' thug' vao vao kad' mung: mhin: gyo, jao: myao: li" nae".

¹⁰Khug' hab' wa khug' nae" se' tam" pye' nae" qhid' mae" za: li" ra". Ngo wa naonhaung" kao so' qo" yu mung: magan: mago" ra" kaoso'mae qo" daui: na genae" qhid' mae" joe" li" ru ngad:

¹¹Ngo wa yao jham: qhid' mae" kao so' byid' pye' ra" gai: ra" yao lhaug' yaug ngad:.

¹²O:kaung wa yao lhaug' yaug mangad:- yao jham re sang yaug re: mangad: mung:- zag ne li" na: rure the' myao lao" yao: wa yao jham re to: co' mung: tao" phao: lo" ra". Airumung: ai: zag ne wa bin" cad' zo: mung:- yao jham re khe' sin" ke' ra".

¹³Okaung wa okaung za: ngad: ruyang yao jham re pe" sang: makho: lo: tao" phao: lo" ra".

¹⁴Ngo wa gai: ra" yao lhaug' yaug ngad:. Nga" Pho" wa ngore ba mung: ngo wa nga" Pho" re ba: ru we' dakhyo: ngo wa nga" yao jham re ba mung:- yao jham re: ngore ba: ako". Aimung: ngo wa yao jham: qhid' mae" kao so' byid: nae" qo" dan: pye' ra".

¹⁶Amung:- ce: yao jham mae mabo: ra" ngo sang: ra" yao gatau na shi" ra". Ngo wa ai: yao jham rere: jhui" yu ca" ra". Yao: bam wa nga" thoe re tae" gyo" li" genae". Ailao" ai: yao jham wa dakyaung" za: yao lhaug' yaug dayaug za: ngad: li" genae".

¹⁷Ngo wa kao so' re dam: qo" khae: yu genae" qhid' mae" nga" kao so' re qo" dan: pye' ruyang nga" Pho" wa ngore jhid'de; ra".

¹⁸Kao so' re khag' re: ngo mae" maqo" yu: pye' ngad: ra". Ngo wa nga" kao so' re ngoyao" myid khyo" byid' pye' ru ngad: ra". Ngo wa nga" kao so' re byid' pye' ru we' dam: tug' yu nae" akho: akhang" qo" yaug ngad:- ceru: kad' nae" nga" Pho" wa ngore amyin" byid' to: va".

¹⁹Ce: dao: jham: mathao mae mo,byu qe: phaung mae yao: cao: majho" vang" lo: dam: boe" li" ko" ra".

²⁰Yao: bam mae" myo: sho' mo, wa Yao: wa yui zaung: ra" ago ngad: ra". Naonhaung" pe"mung: yao" dao: re tae" gyo: ko" i? ga: ta" ako".

²¹Ngadqere: damyo" wa yui zaung: ra" yaug wa ceru" ra" dao: maqo" jhau ngad: ra". Yui wa myo, jid re khoru: myo, qo" myao nhao zai i? ga: ta" ko" ra".

²²Yerusalem vogaung: mae" Caung:pa" Yham re Qhaug' Byid' ra" Poe kad' na: ako". Ai: ayo, wa gyo, yo, ngad: ra".

²³Yesu wa Caung:pa" Yham mae" Sholamon zaung mae su" qin" ra".

²⁴Mo,byu qe wa Yesu lhang" gam: mae zang" ham: li" mung: Nao wa ngonhaung" re khomyhao" joe" sho' lao" nhao nae" i? Nao wa Meshia ngad: i? Ngonhaung" re de: de: za: ta" kyo: la, ga: myid' ako".

²⁵Yesu wa- Ngo naonhaung" re ta" kyo" to: gau ngad va". Ngaqere: naonhaung" ngore malam" ko" ngad: ra". Nga" Pho" kheim: so' khyo" yang ngo zaui" ra" mau" zo" jham wa nga" atha" dao: jhau: na: ako".

²⁶Ngadqere: naonhaung" wa nga" yao jham mangad: gemung: naonhaung" malam" ko" ngad: ra".

²⁷Nga" yao jham wa nga" thoe re tae" gyo" ako". Ngo wa yao: bam re ba mung:- yao: bam wa nga" thao cao" ako".

²⁸Ngo wa yao: bam re apyad ato: kao so' byid: mung: yao: bam wa khonhae" re: mashid genae". Yao: bam re nga" lo, mae" khag' re: maqo" lhad' yu genae".

²⁹Nga" Pho" yang ngore byid' to" ru wa cao jab alhab' tho' je: qi" rumung:- yao: bam re nga" pho" lo, mae" maqo" lhad' yu ko" ngad: ra".

³⁰Nga" Pho" we' ngo wa dadang: dalam: za: ngad: ga: yao: bam re ta" ra".

³¹Alao" mo, byu qe yao: re ceim" pye' genae" ga: laug baui gaug: yu: ako".

³²Yesu wa yao: bam re Ngo wa nga" Pho" kad' nhao: ra" gai: ra" mau" zo" myo: sho' re naonhaung" qhid' kheim: mae kad' va". Ai: mau" zo" kholam" mathao mae naonhaung" ngore laug baui: yang pye' se' nug ko" i? ga: myid' ra".

³³Yao: bam wa- Gai: ra" lo, mau" daja: ja" mathao: yang ngonhaung" nao re laug baui: yang pye' se' nug: ru mangad:- nao wa xao su byu angad: ru naoyao" gaung re Mao"So we' daqi" za: kad' nae" seim" yang: Mao"So re jung" dao: jhau: ruyang ngonhaung" ceim" pye' nug: ru ngad: ra"- ga: tau" ako".

³⁴Yesu wa Naonhaung" Mao"So re ngag: ako" ga: Mao"So ta" to" ra" dao: re Naonhaung" yao" Tarha" jham: paug' mae tung" to" ra".

³⁵Jham: mugsug' mae ta" to" ra" dao: jham wa dapyad daqae: dangman" jo; ga" rure naonhaung" ba: ako". Mao"So wa yao" mungdao: re byid' to" ra" mo, re so qe -ga: ta" ra".

³⁶Nga" Pho" wa ngore khyin: yu mung:- mug: myid dao khyo nhao: ke' ra". Airu: mung: ngo wa Mao"So: Yao: Zo: ngad: ein: ta" ruyang- ngo wa Mao"So re jung" dao: ta" ra" ga: naonhaung" khoru: mung: qo" ta" ko" i?

³⁷Nga" Pho" zaui: nhao: ra" mau" re- mazaui" ru ngad: re wa naonhaung" ngore dalam" ge,.

³⁸Ngadqere: ai: mau" zo" jham re ngo zaui: yang: ngad: re wa ngore malam" gesho' ngadqere: nang" thao" nga" lo, mau" jham re khalhao" lam" ge,- ailao" nga" Pho" wa nga" khug mae na mung: ngo wa nga" Pho" khug mae na: rure naonhaung" phyid' phyid' kho' kho' ba: li" genae"- ga: ta" ra".

³⁹Yao: bam wa Yesu re taung: nae" dalhang dam: seim" ako". Ngadqere: Yesu wa- yao: bam: lo, mae" phao: loe; lo" ra".

⁴⁰Ai: thao Yesu wa Yodan gyaung: thoete' mae" qhid' phyao: Yohan qid nyhab' byid' ra" jo, qo khyo dam: gau" de; ye: mung: aitau mae yena: ra".

⁴¹Mo, byu qe myo: sho' yao: jhao" joe" li" mung: yao: bam wa Yohan wa mug' pho: ve, lho jham makad' qhu" ngad: ra". Ngadqere: ceyaug we' sin: mung: Yohan ta" ru alhab' wa dang: ra"- ga: ta" ako".

⁴²Aitau mae" mo, byu qe myo: sho' Yesu re lam" ako".