Read Maru YOHAN 11 Bible Online

YOHAN 11 - Maru bible

YOHAN 11

¹Bethani vogaung: mae Lazaru ga: mang: ra" byu dayaug na: ra". Yao: wa no: na: ra". Bethani vogaung: wa Mari we' yao: bai: Matha tao na: ra" vogaung: ngad: ra".

²(Mari ai: yaug wa Asang: khyid mae sheim nae pyo" ra" xau gyad byid: mung:- yao" xae: yang sad' byid' ra" yaug ngad: ra". No: na yaug Lazaru wa- yao: maung ngad: ra".)

³Yao: nhae tao wa Asang we"- nao jhid'de; ra" ba nam pho" wa no: na: ra"- ga: Yesu re dao: pyang: ke' ako".

⁴Yesu wa aire the' gyo: lao"- ce: no wa shid no mangad: ngad: ra"- Mao"So: phungbao bao: thug' li" nae" qhid' mae" no: ru ngad mung:- ce: no khyo" yang Mao"So: Yao: Zo: re: phungbao bao: thug' li" nae"- ga: ta" ra".

⁵Yesu wa Matha- Mari- Lazaru maung nhae tao ho' re jhid'de; ra".

⁶Ngadqere: Yesu wa Lazaru no: na: ga" rure the' gyo: thao re yao: na: ra" jo, qo mae shid' ba jan" thang: na: ra".

⁷Ai: thao Yesu wa Ngonhaung" Yuda mung" khyo dam: tug' ye: gelang:- ga: yao" mho"zo: qere ta" ra".

⁸Mho"zo: qe wa Mho" Pho" we"- aimung" mae" mo, byu qe wa ana" gyo: za: lhao" re: laug baui: yang pye' nae" seim" ko" ra"- ana" re: aikhyo dam: ye: shinae" ein: i? ga: ta" ako".

⁹Yesu wa Daba mae daxe: shid' yo, qug bo: ra" mangad: i? Aimung: na" gaung re khyo su" ra" yaug wa ce: mug:myid dao: bo" bao re myao mung: matha" lang: ngad: ra".

¹⁰Ngadqere: mug: cad' yo mae khyo su" ngad: re wa bo" bao maqo" yang: yao: wa tha" lang" ra"- ga: ta" ra".

¹¹Yesu wa ceru: bin: ta" thao re xo' mung:- ngonhaung" ba nam pho" Lazaru wa yab: myhid' jo; ra"- yao: re yenhug' nae" qhid' mae" ngo ye: nae"- ga: ta" ra".

¹²Mho"zo: qe wa Asang we"- yao: yab: myhid' jo; ru angad: re wa yao: wa byan" so" li" li" nae"- ga: tau" ako".

¹³Yesu wa Lazaru shid va"- ga: ta" ru ngad: ra". Ngadqere: mho"zo: qe wa gaigai: yao: yab: myhid' jo; rure ta" ru ngad: ga: jho: ako".

¹⁴Aimung: Yesu wa yao: bam re Lazaru wa shid: ava".

¹⁵Ngadqere: naonhaung" lam" genae" qhid' mae" ngo ai: jo, qo mae mana: ang: ruyang naonhaung" qhid' mae" ngo bau" ra". Yao: jhao" ngonhaung" ye" lo" gelang:- ga: de: de: za: ta" ra".

¹⁶(Zozam ga" ra") Thoma wa Ngonhaung" yebocao: shid nae" qhid mae" mho"pho" we' daga" ngonhaung" alhab' mo, cao" ye: gelang:- ga: yao" byin cao: mho"zo: qere ta" ra".

¹⁷Yesu joe" ye" lo" re Lazaru re nyhab' pye' ru byid ba ngad va" rure yemyao: ra".

¹⁸Bethani vogaung: wa Yerusalem mae" khyo shid' man: ko za: va" ra".

¹⁹Yuda byu myo: sho' mo, wa Matha we' Mari shid' nhae: nho: yao: maung shid yang: yao: nhae tao re nhag' tang" byid: nae" joe" li" ako".

²⁰Yesu li" na: ra" ga" rure Matha the' gyo: lao"- yao: wa Yesu re yetug: yu nae" qhid' mae" thug' ye" lo" ra". Ngadqere: Mari wa yham khug mae na: jo; ra".

²¹Matha wa Yesu re Asang we"- nao cemae na: ngad: re wa nga" maung mashid zai ngad: ra".

²²Ana" ngadqere: Mao"So wa nao mho' ra" ja: pe" ngadqere: nao re byid' li" nae" ein: rure ngo ba:- ga: ta" ra".

²³Yesu wa- Ni" maung dam: daui: li" zai ngad:- ga: yao: re ta" ra".

²⁴Ailao" Matha wa Lo" thao" ra" ba na mae yao: dam: daui: to" li" nae" rure wa ngo ba: ga: phaug' tau" ra".

²⁵Yesu wa Ngo wa- dam: daui: to" li" ru we' kao so' ngad:. Ngo re lam" ra" yaug khag' ngadqere: yao: wa shid ngadqere: daui: na: li" nae".

²⁶Khag' ngadqere: daui: na mung: ngore lam" ra" yaug wa khonhae" re: mashid lo nae"- cedao: re nao lam" i? ga: myid' ra".

²⁷Matha wa Asang we"- ngo lam" ra"- nao wa mug:myid dao khyo joe" li" nae" ra" Mao"So: Yao:Zo: Meshia ngad: rure ngo lam" va"- ga: phaug' tau" ra".

²⁸Matha wa ceru: bin: ta" lao"- yao: wa lo" mung: yao: nhaung: Mari re sae za: lo" khai mung:- Mho" Pho" wa cetau mae li" joe" na: ra"- amung: yao: wa nao re myid' na: ra"- ga: Mari re ta" ra".

²⁹Cedao: re Mari the' gyo: lao"- yao: wa phyad za: to" li" mung: Yesu jhao" thug' ye" lo" ra".

³⁰(Yesu wa vogaung: khug khyo majoe" ye: shingad: ra"- Matha yetug: yu: ra" jo, qo mae na: jo; ashi")

³¹Yham khug mae Mari we' daga" na mung: yao: re nhag' tang" byid' na ko" ra" mo, byu qe wa Mari phyad za: to" li" mung: thug' ye" lo" rure myao gelao"- yao" thao cao" ye" ako". Pe"mung:ga"re Mari wa lab khyo yengug nae" qhid' mae" thug' ye" lo" sam" ra"- ga: yao: bam jho: ako".

³²Mari wa Yesu na: ra" jo, qo mae joe" ye: mung: yao: re myao we' Yesu khyid qao: mae goe, mung: yang:- Asang we"- nao cetau mae na: ngad: re wa nga" maung mashid: byaug zai ngad: ra"- ga: Yesu re ta" ra".

³³Yesu wa Mari ngug: rure we' yao: we' daga" cao" li" ra" mo,byu qere: ngug ko" rure the' myao lao"- Yesu wa yao" nhag' lam: mae zao" mung: nhag' lam: mamyan: makhyad' kham zo" ra".

³⁴Ailao" Yesu wa Yao: re khai: mae nyhab' to: ko" i? ga: yao: bam re myid' ra". Yao: bam wa Asang we"- li" mung: qu" qu" wa,- ga: tau" ako".

³⁵Yesu ngug byid gyo" ra".

³⁶Mo,byu qe wa Qu" ge,- yao: wa Lazaru re gyai jhid'de; nhaung- ga:" ta" ako".

³⁷Ngadqere: yao: bam mae" damyo" wa yao: wa myo, jid re myo, myao nhao: ra" yaug mangad: i? Yao: wa Lazaru rere: mashid losho' maqo" tam" to: nhaung i? ga: ta" ako".

³⁸Ailao" Yesu wa nhag' lam: mamyan: makhyad' dam: kham zo: mung: lab khyo ye" lo" ra". Ai: lab wa laug khyaung lab ngad mung:- lab nhad' mae laug zang: yang jhid' to" ako".

³⁹Yesu wa Ai: laug zang re qhui" pye' ge,- ga: amyin" byid' ra". Ailao" shid yaug: yao: bai: Matha wa Asang we"- Bab sheim nae naeva"- yao: re nyhab' to" ru byid ba ngad va"- ga: ta" ra".

⁴⁰Yesu wa- Nao lam" ngad: re wa Mao"So: phungbao re nao the' myao: li" nae" ein: nao re ngo ta" va" mangad: i? ga: ta" ra".

⁴¹Ailao" yao: bam wa ai: laug zang re yu: pye' ako". Yesu wa mug: khyo tau: qu" mung:- nga" Pho" we"- nao wa nga" akyu" mho' thoe re tae" gyo: byid' ruyang nao re jeju caung: byid' ra".

⁴²Nao wa nga" akyu" mho' thoe re khonhae" re: tae" gyo: byid' rure ngo ba:. Ngadqere: ngo wa nao: yang nhao: ke' yaug ngad: rure yao: bam lam" genae" qhid' mae" cemae na: ra" mo; akyu" mathao mae ngo ceru: ta" ru ngad: ra"- ga: ta" ra".

⁴³Yao: wa airu: bin: ta" lao"- Lazaru we"- Thug' lo wa,- ga: thoe qi: we' khai: ke' ra".

⁴⁴Ailao" Lazaru wa yao" khyid lo, mae pin: cug' yang thab' to" ru we' myo,khung: re pin: cug' yang thab' to: gau yao: thug' lo: ra". Yesu wa yao: bam re- yao: re thab' to" ra" pin: cug' jham re pheim: pye' byid: mung: nhao: ke' ge,- ga: ta"ra".

⁴⁵Aimung: Mari jhao" li" ko" ra" mo,byu qe myo: sho' mo, wa yao: kad' ra" lo, mau" re the' myao gelao"- yao: bam wa Yesu re lam" ako".

⁴⁶Ngadqere: damyo" wa Pharishe qejhao" tug' phao: lo" mung:- Yesu zaui" ra" mau" re lo" ta" kyo" ako".

⁴⁷Aimung: Pharishe qe we' khinjaung qi: qe wa Yuda Tarha" Qe, Do, Phung: zabphaung khai: qham mung:- Qu" ge,- ceyaug wa mug'pho: ve,lho jham myo: sho' kad' qhu" na: ava"- ngonhaung" pe" kad' zai i?

⁴⁸Ngonhaung" wa yao: re ceru: xo' yang: nha: to: lao" wa yaug khao: ngo" yao: re lam" byaug genae"- aimung: kheim: so' qo" ra" Roma zug: qe wa akhyag: li" yu mung: ngonhaung" nho: Caung:pa" Yham re we' ngonhaung" amyu" re li" phyo' pye' li" genae"- ga: ta" ako".

⁴⁹Yao: bam mae" aizin re Khinjaung Yin" kad' na: ra" Kayapha ga: mang: ra" yaug wa- Naonhaung" pe" ba mo, mangad:-

⁵⁰Byumyu" damyu" geim" jeim" lo" nae" tho' ai: byumyu" geim" qhid' mae" byu dayaug shid; ru wa je: gai: rure naonhaung" mamyid: beim: ko" i? ga: ta" ra".

⁵¹Yao: airu: ta" ru wa gaigai: yao: yao" myid khyo" ta" ru mangad:- yao: wa ai: zin qhid' mae" Khinjaung Yin" ngad mung:- Yesu wa Yuda byumyu" alhab' qhid' mae" shid kham" li" nae" ga" rure we'

⁵²yao: bam: qhid' mae" za: mangad:- byo: sin" na: ra" Mao"So: byumyu" qe alhab' re dadang: dalam: za: boe" nhao nae" qhid' mae" re: Yesu shid kham: byid: nae" ra" khyo re lapa pa: ru ngad: ra".

⁵³Ai: ba na mae" kheim: so' qo" ra" Yuda qe wa Yesu re se' pye' nae" qhid' mae" pha,jhi" khyug' ako".

⁵⁴Aimung: Yesu wa Yuda mung" mae de: de: za: gyaung: masu" qin" lo:ngad: ra". Din" pyad' yo nhae mae" Ephrim ga" ra" vogaung: khyo thug' ye" lo" mung:- ai: mae yao" mho"zo: qe we' yena: jo; ra".

⁵⁵Lai co' Poe ba na jhao" li" na mung:- seyo: vogaung: vojhe' khaung: mae" mo,byu qe wa poe majoe" shire yao: yao" gaung re caung:pa" thung" khyo" kyang" san: ru kad' nae" qhid' mae" Yerusalem vogaung: khyo do, ye" lo" ako".

⁵⁶Yao: bam wa Yesu re qho: na: ako". Yao: bam wa Caung:pa" Yham mae yezang" ham: na: bam gemung:- naonhaung" pe" ru: myid ko" i? Yao: wa gaigai: yao: poe khyo mali" nae" laug i? ga: yao: bam yao: cao: jho" myid' na: ako".

⁵⁷Khinjaung qi: qe we' Pharishe qe wa yao: bam Yesu re qo" taung" yu nae" qhid' mae" Yesu na: ra" jo, qo re ba yaug khag' ngadqere: lota" kyo: ca"- ga: amyin" khyo" to" ako".