Read Maru YOHAN 13 Bible Online

YOHAN 13 - Maru bible

YOHAN 13

¹Ayo, wa Lai co' Poe joe" nae" daba ca" shi" au: ngad: ra". Yesu wa ce: mug:myid dao mae" yao: Pho" jhao" phao: lo" nae" yo, khyin: joe" li" va" rure ba: ra". Yao: wa ce: mug:myid dao mae na: ra" yao" byu qere jhid'de; mung:- lo" thao" yo, joe" sho' yao: bam re jhid'de; ra".

²Yesu we' yao" mho"zo: qe wa myi"xeim zo" na: ako". Ai: yui wa Simon Iskarud yao: zo: Yuda nho: nhag' lam: khug mae Yesu re ab byid: nae" qhid' mae" myid ke' to: byid' ava".

³Yesu wa yao: Pho" yang yao: re kheim: so' alhab' ab byid' to: va" rure: yao: wa Mao"So mae" joe" li" mung: Mao"So jhao" dam: phao: lo" zai ngad: rure: ba: ra".

⁴Aimung: yao: wa vae: zo: jaung: mae" to" yang: yao" adao: bau: qhang re khyad' pye' mung: pha, jad: yang yao" phyid' dam: re yag: ra".

⁵Ai: thao Yesu wa jarung: dalam: mae qid vhe' ke' yang: mho"zo: qe: khyid re cid' byid; mung:- yao" phyid' dam: mae yag: ci: ra" pha, jad: yang sad' pye' byid' ra".

⁶Simon Petru jhao" cid' joe" lo lao"- Petru wa Asang we"- nao nga" khyid re cid' byid: nae" ein: i? ga: Yesu re myid' ra".

⁷Yesu wa Petru re- Ngo pe" kad' na: rure ana" wa nao maba: gyo: ngad: ra". Ngadqere: thao phyao: nao ba: gyo" li" nae"- ga: tau" ra".

⁸Ailao" Petru wa Nga" khyid re khonhae" re: nao maqo" cid' nae"- ga: ta" ra". Yesu wa Ni" khyid re ngo maqo" cid' ngad: re wa nao wa nga" mho"zo: mangad: lo nae"- ga: ta" ra".

⁹Ailao" Petru wa Asang we"- nga" khyid reza: mangad:- nga" lo. we' au: rere: cid' byid; la,- ga: phaug' tau" ra".

¹⁰Yesu wa Gaung bin: cid' va" yaug wa gaung geim" san sin" va" rumung: yao" khyid za: cid' qo: ra". Dayaug mae" je yang: naonhaung" alhab' mo, wa san sin" vako" ra"- ga: ta" ra".

¹¹(Yesu wa yao: re ab byid' pye' nae" yaug khag' ngad: rure ba: to: gau ngad: ruyang yao: wa dayaug mae" je yang: naonhaung" alhab' mo, wa san sin" vako" ra"- ga: ta" ru ngad: ra".)

¹²Yesu wa mho"zo: qe: khyid re bin: cid' byid: thao re yao" adao: bau: qhang dam: ve, mung:- yao" zaung jo, qo mae lo" dam: zaung: ra". Aimung: yao: wa Ana" shi" za: ngo naonhaung" re kad' ra" lo,mau" re naonhaung" ba: gyo: ko" i?

¹³Naonhaung" wa ngore Mho" Pho" we' Asang ga: mhang" ako"- ngore: ngad va" ruyang naonhaung" mhang" ko" ru wa jo: ra"-

¹⁴Ngo wa naonhaung" Asang we' Mho" Pho" ngad sho' qere: ngo lhao" re: naonhaung" khyid re cid' byid: va"- aimung: naonhaung" re: naonhaung" yao: cao: khyid jho" cid' byid: gai: ra".

¹⁵Naonhaung" re ngo kad' byid: va" ru we' dakhyo:- naonhaung" re: kad' genae" qhid' mae" ave, aso: qhu" to: byid: va".

¹⁶Naonhaung" re ngo dang za: ta" geli"- Jeim wa yao" jeim sang tho' maje: qi: ngad: ra". Aimung: lagyo: re: yao: re nhao: ke' ra" yaug tho' maje: qi: ngad: ra".

¹⁷Naonhaung" wa ce: dangman" rure ana" ba: avako". Aimung: naonhaung" aire phug' cao" ko" ngad: re wa naonhaung" wa khoqhi" sho' ngaui lho" genae" i?

¹⁸Ngo wa naonhaung' alhab' re ein: ta" na: ru mangad:- ngo khyin: yu va" mo, re wa ngo ba: ra". Ngadqere: nga" zo re bocao: zo" ra" yaug wa ngore gye tug' kad' ra"- ga" ra" jham: dao: wa jab byang" li" ca" ra".

¹⁹Airu: boe" li" lao"- Ngo wa Ngo ga: yaug ngad: rure naonhaung" lam" genae" qhid' mae" ana" maboe" li" shimae" naonhaung" re ngo ta" kyo" to: va".

²⁰Naonhaung" re ngo dang za: ta" geli"- ngo: yang nhao: ke' ra" yaug re lham: khae: yu: ra" yaug wa ngo rere: khae: yu yaug ngad: ra". Aimung: ngore khae: yu: ra" yaug wa ngore nhao: ke' ra" yaug re khae: yu yaug ngad: ra"- ga: ta" ra".

²¹Yesu wa cedao: re bin: ta" lao"- yao: wa gyai myid: ci" mung:- naonhaung" re ngo dang za: ta" geli"- naonhaung" mae" dayaug wa ngore gyevo qe: lo, khyo ab byid' pye' naemyao:- ga: de: de: za: ta" ra".

²²Mho"zo: qe wa yao: khag' re ta" nug: rure maba: gyo: myid: mug' gemung:- yao: bam yao: cao: jho" qu" ako".

²³Ailao" Yesu jhid'de; ra" mho"zo: yaug wa Yesu we' te' te' zaung: jo; ra".

²⁴Simon Petru wa Yesu khag' re ta" na: rure myid: nae" qhid' mae" aiyaug re ave, byid' ke' ra".

²⁵Aimung: ai: mho"zo: wa Yesu jhao" te' te' qui" ye: yang:- Asang we"- ai: yaug wa khag' ngad: ra" i? ga: myid' ra".

²⁶Ailao" Yesu wa Mug dakhai" re xeim: qang: khug' mae jam yang: ngo byid' ra" yaug wa ai: yaug ngad: ra"- ga: tau" ra". Aimung: Yesu wa mug dakhai" re yu: yu mung: xeim: qang: khug' mae jam yang: Simon Iskarud yao: zo: Yuda re byid' ra".

²⁷Yuda wa ai: mug re bin: yu zo: we' Satan wa yao" khug khyo vao ye" ra". Aimung: Yesu wa Nao kad' ca" ra" mau" re phyad kad' wa,- ga: yao: re ta" ra".

²⁸Yesu wa Yuda re pe"mung: ceru: ta" rure vae: zo: jaung: mae zo" na mo, dayaug re: maba: gyo: ko" ngad: ra".

²⁹Yuda wa ngaui thaung zam: yaug ngad: ruyang Yesu wa yao: re poe mae ca" ra" zai yevai nae" we' myaung sho: mo, re daja: ja: yegae byid: nae" qhid' mae" ta" ke' ru ngad: ga: mho"zo: qe damyo" jho: ako".

³⁰Yuda wa ai: mug dakhai" re yu zo: mung:- ailao" jao" taung gaung khyo thug' lo" ra". Ai: yo, khyin: wa myi" mug: cad' yo, ngad: ra".

³¹Yuda bin: thug' lo" thao re Yesu wa Byu: Yao: Zo" nho: phungbao ana" bao: jo, va"- Byu: Yao: Zo: khyo" yang Mao"So: phungbao re: ana" bao: jo; ava".

³²Mao:So wa Byu: Yao: Zo: khyo" yang yao" phungbao bao va" ngad: re wa Mao"So wa yao: khyo" yang Byu: Yao: Zo" phungbao rere: bao nhao: li" nae". Yao: wa ana" yao: jao" bao nhao: li" nae".

³³Nga" jhid'de; ra" byin cao: qe we"- ngo wa naonhaung" we' myao" sho' mana lo nae"- naonhaung" wa ngore qho: li" genae"- ngo lo" ra" jo, qo khyo naonhaung" maqo" ye: genae" ein:- kheim: so' qo" ra" Yuda byu qere ngo ta" va" ru we' dakhyo:- naonhaung" rere: ngo ta" ra".

³⁴Dayaug we'dayaug jho" jhid'de; ge,- ngo naonhaung" re jhid'de; ru we' dakhyo:- naonhaung" yao: cao: re: jho" jhid'de; ca" ra". Ce: tarha" asag' ana" ngo naonhaung" re byid' ra".

³⁵Amung: naonhaung" yao: cao: jho" jhid'de; ko" ngad: re wa naonhaung" wa nga" mho"zo: qe ngad: rure yaug khao: ngo" ba: li" genae"- ga: ta" ra".

³⁶Ailao" Simon Petru wa Asang we"- nao khai: khyo ye" lo" nae" i? ga: myid' ra". Yesu wa ngo ye" lo" ra" khyo re nao wa ana" maqo" cao" nae"- ngadqere: thao phyao: wa nao nga" thao cao" li" nae"- ga: tau" ra".

³⁷Petru wa Asang we"- ana" ngo ni" thao pe"mung: maqo" cao" zai i? Ngo wa ni" qhid' mae" shid nae" jin" jin" ngad:- ga: tau" ra".

³⁸Yesu wa- Nao wa gaigai: yao: nga" qhid' mae" shid nae" jin" jin" ngad: i? Nao re ngo dang za: ta" li"- Qo, mateim shi:re nao wa ngore maba- ga: sam lhang ha: pye' li" nae"- ga: tau" ra".