Read Maru YOHAN 14 Bible Online

YOHAN 14 - Maru bible

YOHAN 14

¹Yesu wa yao: bam re Naonhaung" nhag' lam: damyid: ci" ge,- Mao"So re lam" ge,- ngo rere: lam" gela,-

²Nga" Pho" yham mae na jo, qo myo: sho' jo; ra"- naonhaung" qhid' mae" na jo, qo lo" nyhang" to: nae" qhid' mae" ngo lo" zai ngad: ra". Airu: mangad: re wa naonhaung" re ngo ceru: ta" nae" mangad:-

³Ngo wa naonhaung" qhid' mae" na jo, qo lo" bin: nyhang" to: mung: ngo na: ra" jo, qo mae naonhaung" qhug' na genae" qhid' mae" ngo dam: li" mung: naonhaung" re li" jhui" yu nae".

⁴Ngo lo" nae" ra" jo, qo khyo joe" ra" khyodang re naonhaung" ba: ako"- ga: ta" ra".

⁵Ailao" Thoma wa Asang we"- nao khai: khyo ye" lo" nae" rure ngonhaung" maba- Khorumung: ngonhaung" wa khyodang re qo" ba nae" i? ga: myid' ra".

⁶Yesu wa yao: re- ngo wa khyodang ngad:- Dangman" ru we' kao so' re: ngad:- ngo khyo" za: mangad: re wa Nga" Pho" jhao" khag' re: maqo" joe" ye: ngad: ra"- ga: tau" ra".

⁷Yesu wa yao: bam re Naonhaung" wa ana" ngore ba: avako"- nga" Pho" rere: naonhaung" ba: li" genae". Aimung: ana" mae" thoegu: naonhaung" wa yao: re ba mung:- myao re: the' myao: avako"- ga: ta" ra".

⁸Ailao" Philib wa Asang we"- Pho" re ngonhaung" re qhu" byid: la,- ailao" wa ngonhaung" alhab' mo, nhag' dag naeva"- ga: Yesu re ta" ra".

⁹Yesu wa Philib we"- ngo wa naonhaung" we' daga" cemyhao" joe" sho' na: lo ngadqere: ngore nao maba i? Ngo re myao: qu" va" yaug wa Pho" rere: myao: qu" va" yaug ngad: ra".

¹⁰Philib we"- ngo wa Pho" we' dadang: dalam: za: ngad mung:- Pho" re: ngo we' dadang" dalam: za: ngad: rure nao malam" i? ga: myid' ra". Yesu wa yao" mho"zo: qere Naonhaung" re ngo ta" kyo: va" mungdao: jham wa nga" mungdao: jham mangad:- ngo we' dadang: dalam: za: ngad: ra" Pho" zaui: so" ra" yao" mau" zo" ngad: ra".

¹¹Ngo wa Pho" mae Pho" wa nga" khug mae na: ein:- ngo ta" rure lam" ge,- ngo ta" rure malam" gelao" re: ngo zaui" ra" mau" zo" jham: mathao: yang lam" ge,-

¹²Naonhaung" re ngo dang za: ta" geli"- ngore lam" ra" yaug wa ngo zaui" ra" mau" zo" re qo" zaui" li" nae". Pe"mung:ga"re ngo wa Pho" jhao" phao: lo" zai ngad: ra".

¹³Yao:Zo: khyo" yang Pho" nho: phungbao bao: thug' li" nae" qhid' mae" nga" mang re lao: yang: naonhaung" mho' ra" gu: alhab' re ngo byid: nae" ngad: ra".

¹⁴Naonhaung" nga" mang re lao: yang: ngore pe" mho' gengadqere: naonhaung" re ngo byid: nae"- ga: ta" ra".

¹⁵Amung: naonhaung" ngore jhid'de; ko" ngad: re wa nga" amyin" dao: jham re naonhaung" phug' cao" li" genae".

¹⁶Ngo wa Pho" re mho' nae"- ailao" yao: wa naonhaung" we' daga" apyad ato na nae" bao" thaug' yaug gatau dayaug re naonhaung" jhao" nhao" ke' byid' li" nae".

¹⁷Ai: yaug wa Mao"So: khyo re dangman" ra" khyo" qhu" byid' ra" dangman" ra" Byo ngad: ra". Mug:myid byu qe wa yao: re mamyao maba ko" ruyang maqo" khae: yu ko" ngad: ra". Ngadqere: ai: Byo wa naonhaung" we' daga" na mung:- naonhaung" nhag' lam: khug mae yena: jo; ruyang naonhaung" wa yao: re ba: ako".

¹⁸Ngo phao: lo" lao"- naonhaung" reza: masho: majhin cug' zo: qere ru: nha: to: co' nae" mangad:- naonhaung" jhao" ngo dam: li" nae".

¹⁹Dazab zo: ngad lao" mug:myid byu qe wa ngore mathe' myao lo: genae". Ngadqere: naonhaung" wa ngore the' myao genae"- pe"mung:ga"re ngo wa daui: na: ruyang naonhaung" wa daui: na: li" genae".

²⁰Ai: ba na joe" lo lao"- ngo wa nga" Pho" we' dadang: dalam: za: ngad mung:- ngo wa naonhaung" we' dadang: dalam: za: ngad: ru we' dakhyo:- naonhaung" re: ngo we' dadang: dalam: za: ngad: rure naonhaung" ba: li" genae".

²¹Nga" amyin" dao: jham re khae: yu mung: phug' cao" ra" yaug wa ngore jhid'de; ra" yaug ngad: ra". Ngo re jhid'de; ra" yaug khag' rere: nga" Pho" yang yao: re jhid'de; li" nae". Ngo re: yao: re jhid'de; mung:- yao: re ngoyao" gaung qhu" byid: nae"- ga: ta" ra".

²²(Yuda Iskarud mangad: yaug) Yuda wa Asang we"- naoyao" gaung re mug: myid byu qere maqhu" byid: lo:- ngonhaung" re naoyao" gaung qhu" byid: nae" ru wa khoru: gai: boe" nae" i? ga: myid' ra".

²³Yesu wa ngore jhid'de; ra" yaug khag' ngadqere: nga" mho" shid' dao: re phug' cao" li" nae". Pho" wa yao: re jhid'de; li" nae". Ailao" nga" Pho" we' ngo wa yao: jhao" li" mung: yao: we' daga" na zai ngad: ra".

²⁴Ngo re majhid'de; ra" yaug khag' ngadqere: nga" mho" dao: re maphug' cao" ngad: ra". Naonhaung" the' gyo: vako" ra" mho" shid' dao: wa nga" mho" shid' dao: mangad:- ngore nhao: ke' ra" Pho" nho: mho" shid' dao: ngad: ra".

²⁵Ngo naonhaung" we' daga" na shi" au: mae" cegu: re ngo naonhaung" re ta" kyo" to: va".

²⁶Pho" yang nga" mang mae nhao: ke' byid: nae" ra" ai: bao" thaug' yaug Gyang" Lho" Byo wa naonhaung" re ja: khao: ngo" mho" byid: mung:- naonhaung" re ngo ta" to" ra" dao: alhab' re myid: beim: nhao: li" nae".

²⁷Ngo wa naonhaung" re yaug yo: ru to: byid: co'. Nga" nho: yaug yo: ruyao: ngo naonhaung" re byid'. Mug:myid: yang byid' ruru: ngo byid' ru mangad:- naonhaung" nhag' lam: damyid: ci" ge,- Gyaug re: dagyaug ge,-

²⁸Ngo wa phao: lo" nae"- ngadqere: naonhaung" jhao" ngo dam: li" nae"- ein: naonhaung" re ngo ta" to" ra" dao: re naonhaung" the' gyo" avako". Naonhaung" ngore jhid'de; ko" ngad: re wa Pho" jhao" ngo phao: lo" rure naonhaung" bau: gezai ngad: ra". Pe"mung:ga"re yao: wa ngo tho' je: qi: yaug ngad: ra".

²⁹Airu: boe" li" lao"- naonhaung" wa ngore lam" genae" qhid' mae" ai:gu: maboe" li" shimae" naonhaung" re ngo ta" kyo" to: va".

³⁰Ngo wa naonhaung" we' dao: myao" sho' maqo" jhau lo nae" ngad: ra". Pe"mung:ga"re ce: mug:myid: zug: pho" wa joe" li" na: ava"- yao: wa ngore eib nae" qam: so' bo nae" mangad:-

³¹Ngadqere: Pho" re ngo jhid'de; rure mug:myid byu qe ba ca". Ai: mathao mae ngo wa yao" yang amyin" byid' to" ru we' dakhyo:- ja: khao: ngo" re ngo zaui" ra". Sage,- cejo, qo mae" ye" lo" gelang: se,- ga: yao: re ta" ra".