Read Maru YOHAN 15 Bible Online

YOHAN 15 - Maru bible

YOHAN 15

¹Yesu wa Ngo wa sabyi naui agyang" ngad:- amung: nga" Pho" wa khyae mau" zaui: yaug ngad: ra".

²Yao: wa ngo mae ashi: mazaui" ra" akaung khao: ngo" re cu: pye' mung:- ashi: zaui" ra" akaung khao: ngo" re wa ashi: je: zaui" li" nae" qhid' mae" sho' pye' byid' ra".

³Naonhaung" wa ngo kho" kyo: byid: va" mungdao: khyo" yang gyao: gyao: za: ngad: avako".

⁴Ngo we' xo' de; jo, ge,- ngore: naonhaung" we' xo' de; jo, nae". sabyi kaung wa sabyi naui dai we' maxo' made, lo: yao: za: ashi: maqo" zaui" ru we' dakhyo:- naonhaung" re: ngo we' maxo' made, re wa naonhaung" yao: za: ashi: maqo" zaui: ko" ngad: ra".

⁵Ngo wa sabyi naui dai ngad:- aimung: naonhaung" wa sabyi akaung jham ngad: ako". Ngo we' xo' de; jo; ra" yaug khag' ngadqere: ngore: yao: we' xo' de; jo, mung:- yao: wa ashi: myo: sho' zaui" li" li" nae". Pe"mung:ga"re ngo we' gao: yang: naonhaung" pe" re: maqo" kad' ko" ngad: ra".

⁶Ngo we' maxo' made; jo; ra" yaug khag' ngadqere: akaung re we' dakhyo:- shapye' pye' ru qhug' mung: kyaug' lo" ra". Airu" ra" akaung jham re wa su: yang li" gag: vo; yu mung:- myikhyeim" mae pye' zaui: ngha" pye' ako".

⁷Naonhaung" wa ngo we' xo' de; jo, mung: nga" mungdao: re: naonhaung" khug mae bo: jo; ngad: re wa naonhaung" o: ra" ja: pe" mho' gengad yang: re: qo" yu: li" genae".

⁸Naonhaung" ashi: myo: sho' zaui" ra" khyo" yang nga" Pho" nho: phungbao bao: thug' li" ra". Cekhyo" yang naonhaung" wa nga" mho"zo: boe' lo: ako".

⁹Pho" wa ngore jhid'de; ru we' dakhyo:- ngore: naonhaung" re jhid'de; ra". Nga" jhid'de; myid mae zaug: jo, ge,-

¹⁰Ngo wa nga" Pho" nho: amyin" dao: jham re phug' cao" mung:- yao" jhid'de; myid mae zaug: jo; ru we' dakhyo:- naonhaung" re: nga" amyin" dao: jham re phug' cao" ko" ngad: re wa naonhaung" wa nga" jhid'de; myid mae zaug: jo; li" genae".

¹¹Nga" ngaui bau" ru wa naonhaung" mae bo: jo, mung:- naonhaung" ngaui bau" ru byang" li" nae" qhid' mae" ngo naonhaung" re cedao: ta" ru ngad: ra".

¹²Naonhaung" re ngo jhid'de; ru we' dakhyo:- naonhaung" re: dayaug we' dayaug jho" jhid'de; na ge,- ce wa nga" amyin" dao: ngad: ra".

¹³Yao" ba nam qe: qhid' mae" yao: yao" kao so' re dan: pye' sho' jhid'de; ru wa qi" thao" ra" jhid'de; myid ngad: ra".

¹⁴Naonhaung" re ngo amyin" byid' ru we' dakhyo:- naonhaung" kad' ko" ngad: re naonhaung" wa nga" ba nam qe ngad: ako".

¹⁵Ana" mae" thoe gu: ngo wa naonhaung" re jeim qe ein: mamhang" lo nae"- pe"mung:ga"re daui daui yaug wa asang kad' ra" mau" re maba ngad: ra". Ai: atha" ngo naonhaung" re ba nam qe ein: amhang" lo nae"- pe"mung:ga"re nga" Pho" mae" ngo the' gyo" yu: ra" gu: alhab' re ngo naonhaung" re ta" kyo: va".

¹⁶Naonhaung" wa ngore khyin: yu ko" ru mangad:- ngo yaug lam: naonhaung" re khyin: yu: ru ngad: ra". Naonhaung" thug' ye" lo" mung: gang" tang: ra" ashi: myo: sho' zaui" jo, genae" qhid' mae" naonhaung" re ngo khyin: san: to" ru ngad: ra". Aimung: nga" mang re lao: yang: naonhaung" yao: re pe" ja: mho' gengadqere: Pho" wa naonhaung" re byid' li" nae".

¹⁷Naonhaung" yao: cao: jho" jhid'de; na ge,- ein: ce: amyin" dao: ngo naonhaung" re byid' ra".

¹⁸Mug:myid: yang naonhaung" re nghang: ko" re wa ai wa ngore shi" sao qhid' nghang: va" rure naonhaung" myid: beim: ge,-

¹⁹Naonhaung" wa mug:myid dao we' sin" ra" mo, ngad ko" re wa mug:myid wa yao: yao" ba nam ug zo: qere we' dakhyo:- naonhaung" re jhid'de; li" genae". Ngadqere: ngo wa naonhaung" re ce: mug:myid dao mae" khyin: yu mung:- naonhaung" wa ce: mug:myid dao we' masin: ko" ngad: ra". Ce: mathao: yang mug:myid wa naonhaung" re nghang" ra".

²⁰Jeim wa- yao" asang tho' maje: qi: ngad: ra" ein: naonhaung" re ngo ta" rure myid: beim: ge,- yao: bam ngore yhin" ko" re wa yao: bam wa naonhaung" rere: yhin" li" genae". Amung: yao: bam nga" mho" shid' dao: re tae" gyo: ko" ngad: re wa naonhaung" mho" shid' dao: rere: tae" gyo" li" genae".

²¹Naonhaung" wa nga" byu qe ngad ko" ruyang yao: bam wa naonhaung" re airu: kad' li" genae". Pe"mung:ga"re yao: bam wa ngore nhao: ke' ra" yaug re maba yang: ngad: ako".

²²Yao: bam re ngo mali" kho" kyo: byid: ngad: re yao: bam wa qobo maqo" genae". Ana" wa yao: bam: qobo loe, khyo ta" pyo' nae" khyo mabung" lo: gengad: ra".

²³Ngo re nghang" ra" yaug khag' ngadqere: nga" Pho" rere: nghang" ra".

²⁴Yao: bam: phaung mae su gaje khag' re: makad' qu" ra" mau" re ngo makad' lo:ngad: re wa yao: bam qobo qo" nae" mangad:- ana" wa ngo kad' ra" mau" re yao: bam the' myao: yu: avako". Ngadqere: ngo rere:- nga" Pho" rere: yao: bam nghang" ako".

²⁵Ngadqere: ce wa pe" yug: mabo: rumae yao: bam ngore nghang: ko" ra"- ga: yao: bam: Tarha" mae tung" to" ra" jham: dao: jab byang" li" nae" qhid' mae" ngad: ra".

²⁶Mao"So wa dangman" ra" khyo re qhu" byid' ra". Ai: Bao" Thaug' Yaug ga" ra" Byo wa Pho" mae" joe" li" zai ngad: ra". Ngo wa yao: re Pho" mae" nhao: ke' nae"- ailao" yao: wa nga" khyo re sagse: li" kham byid' li" nae".

²⁷Naonhaung" wa sao qhid' mae" ngo we' daga" na: lo vako" rumung:- naonhaung" re: nga" khyo re sagse: kham byid' li" genae".