Read Maru YOHAN 16 Bible Online

YOHAN 16 - Maru bible

YOHAN 16

¹Naonhaung" lam khug: myid mabyo; lo" genae" qhid' mae" ngo wa naonhaung" re cegu: ta" to: va".

²Naonhaung" wa Tarha" Jung Yham jham mae" khe' thug' pye' ru qhug' li" genae". Aimung: naonhaung" re se' ra" yaug wa yao: naonhaung" re se' ru wa Mao"So: mau" re vin vo; na: ru ngad: ga:- myid: jho: yu nae" ra" ba na joe" lo: li" nae".

³Yao: bam wa Pho" rere: maba ko" ruyang naonhaung" re airu: kad' li" genae".

⁴Ngadqere: airu: kad' nae" yao: bam: ba na joe" lo lao" naonhaung" wa ngo ta" to" rure myid: beim: genae" qhid' mae" ngo naonhaung" re cedao: ta" to: byid: va". Qhid' phyao: wa ngo naonhaung" we' daga" za: na: jo, shiyang: aijham re ngo mata" kyo" qu"-

⁵Ana" kam" wa ngore nhao: ke' ra" yaug jhao" ngo phao: lo" zai ngad: ra". Ngadqere: ngo khokhyo phao: lo" nae" rure naonhaung" mae" khag' re: ngore mamyid: ko" ngad: ra".

⁶Ana" wa ngo naonhaung" re ta" kyo: va" rumung: naonhaung" nhag' lam: khug mae nhag' kaug' ru byang" sheim: jo; avako".

⁷Ngadqere: naonhaung" re ngo dang za: ta" geli"- ngo phao: lo" ru wa naonhaung" qhid' mae" je: gai: ra". Pe"mung:ga"re ngo maphao: lo" re wa ai: Bao" Thaug' Yaug re: naonhaung" jhao" joe" li" nae" mangad:. Ngadqere: ngo phao: lo" lao" kam" wa ai: Bao" Thaug' Yaug re naonhaung" jhao" ngo lo" nhao: ke' byid: nae".

⁸Ai: Bao" Thaug' Yaug joe" li" lao"- yao: wa mug:myid byu qere qobo we' sin: yang: yao: bam myid: shad' ra" khyo rere:- Din:man" ra" khyo rere:- Mao"So: dao: kho' ra" khyo rere:- li" ceim" shid' byid' li" nae".

⁹Yao: bam: qobo we' sin: yang: shad' ko" ru wa yao: bam wa ngore malam" geyang: ngad: ako".

¹⁰Yao: bam jo: ru we' sin: yang: yao: bam shad' ko" ru wa- ngo wa Pho" jhao" lo" nae" ngad mung:- naonhaung" ngore mamyao lo nae" ngad: ruyang ngad: ra".

¹¹Dao: kho' ru we' sin: yang: yao: bam shad' ko" ru wa ce: mug:myid dao: zug: pho" wa dao: kho' ru qhug' va" ruyang ngad: ra".

¹²Naonhaung" re ngo ta" nae" khyo myo: sho' jo, shi"- ngadqere: ana" naonhaung" aire maqo" khae: yu shiko" ngad: ra".

¹³Ngadqere: Mao"So: dangman" ra" khyo re qhu" byid' ra" ai: Byo joe" li" lao"- yao: wa dangman" ra" khyo alhab' khyo re naonhaung" re jhui" ye" li" nae". Yao: wa yao: yao" kheim: so' khyo" majhau nae"- yao: wa yao: the' gyo" ra" gu: re jhau mung:- thao phyao: boe" li" nae" ra" khyo jham naonhaung" re ta" kyo" li" nae".

¹⁴Yao: wa nga" mungdao: re gaug: yu yang: naonhaung" re ta" kyo" li" nae"- aimung: yao: wa nga" phungbao re bao: thug' li" nhao nae".

¹⁵Nga" Pho" qo" ra" gu: alhab' wa nga" mae" ngad: ra". Aimung: ai: Byo wa nga" mungdao: re gaug: yu mung: naonhaung" re ta" kyo" li" nae"- ein: ngo ta" ru ngad: ra".

¹⁶Dazab zo: ngad lao"- naonhaung" wa ngore mamyao lo: genae". Amung: dazab kyo thao re naonhaung" wa ngore dam: myao: li" genae"- ga: ta" ra".

¹⁷Yao" mho"zo: qemae" damyo" wa dazab zo: ngad lao" yao: re mamyao lo: genae"- amung: dazab zo: kyo thao re ngonhaung" yao: re dam: myao genae"- ga: yao: ngonhaung" re ta" ra". Aiwa- Pho" jhao" ngo lo" yang: ngad: ra"- ga: re: yao: ngonhaung" re ta" ra". Ceru wa pe" re ta" nug: laug i? ga: yao: bam yao: cao: jho" myid' ako".

¹⁸Dazab zo: ngad lao"- ga" ru wa pe" re ta" nug: ru laug i? Yao: pe" ja" khyo re ta" na: rure ngonhaung" maba: gyo: ga: jho" ta" ako".

¹⁹Yesu yao" mho"zo: qe yao: re dao:myid: myid; nug ko" rure ba mung: yao: bam re- Naonhaung" yao: cao: jho" myid' na ko" ru wa dazab zo: ngad lao"- naonhaung" ngore mamyao lo: genae"- amung: dazab zo: kyo thao re naonhaung" ngore dam: myao: li" genae"- ein: naonhaung" re ngo ta" ra" khyo mangad: i?

²⁰Naonhaung" re ngo dang za: ta" geli"- naonhaung" wa ngugbyid ngugnhe' we' kaug' ngug: li" genae"- ngadqere: mug:myid byu qe wa ngaui bau" li" genae"- naonhaung" wa kaug' li" genae"- ngadqere: naonhaung" kaug' ru wa ngaui bau: ngaui lho" ru dam: tha" lo" li" nae".

²¹Myiqe: dayaug wa zo:khau nae" ba na loe" lao"- zo:khau no no: rure kham zo: nae" yo, qug joe" lo yang: nhag' kaug' nhag' ngai: ra". Ngadqere: zo: bin: khau lao"- ce: mug:myid dao khyo zonau" dayaug re qo" myhung: ke' va" ruyang ngaui bau: mung: yao: kham zo" lo: ra" zo:khau no re yao: to"myhid' pye' ra".

²²Ai we' dakhyo: naonhaung" re: ana" wa kaug' na: ako". Ngadqere: ngo wa naonhaung" we' dam: jho" myao mung: naonhaung" nhag' lam: wa ngaui bau: ngaui lho" ru byang" sheim: jo; li" genae". Ai: ngaui bau: ngaui lho" rure khag' re: naonhaung" mae" maqo" yu: pye' byid: genae".

²³Ai: ba na joe" lo lao"- naonhaung" wa ngore pe" re: mho' lo: genae" mangad:- naonhaung" re ngo dang za: ta" geli"- naonhaung" wa nga" mang re lao: yang: yao: re pe" mho' gengadqere: Pho" wa naonhaung" re byid' li" nae".

²⁴Ana" joe" sho' nga" mang re lao: yang: naonhaung" wa pe" daja: re: mamho' shiko" ngad: ra"- naonhaung" ngaui bau" ru jab byang"li" nae" qhid' mae" mho' ge,- mho' ru we' dakhyo: qo" khae: yu: li" genae".

²⁵Cegu: re ngo wa naonhaung" re dao: tau" khyo" ta" kyo" ru ngad: ra"- Dao: tau" khyo" mangad: lo: Pho" khyo re de: de: za: naonhaung" re ta" kyo: nae" ra" ba na joe" lo: li" nae".

²⁶Ai: ba na joe" lo lao"- naonhaung" wa nga" mang re lao: yang: yao: re mho' li" genae". Ngadqere: naonhaung" gaung tha" Pho" re ngo mho' byid: nae"- ein: ngo ta" to" ru mangad:

²⁷Pe"mung:ga"re Pho" yao: yao: re: naonhaung" re jhid'de; ra". Naonhaung" wa ngore jhid'de; ko" ru we' ngo wa Mao"So mae" joe" li" yaug ngad: rure naonhaung" lam" vako" ruyang yao: wa naonhaung" re jhid'de; ru ngad: ra".

²⁸Ngo wa Pho" mae" ce: mug:myid dao khyo joe" li" ru ngad: ra". Aimung: ana" ngo wa ce: mug:myid dao mae" thug' lo" yang: Pho" jhao" dam: phao: lo" zai ngad: ra".

²⁹Ailao" yao" mho"zo: qe wa Yesu re- ana" wa dao: tau" maci lo:- de: de: za: nao ta" na: ava"-

³⁰Nao wa ja: khao: ngo" alhab' re ba yaug ngad: rure ana" ngonhaung" ba va". Nao re khag' yang re: dao: myid: mamyid: ca" lo:ngad: ra". Aimung: nao wa Mao"So mae" joe" li" yaug ngad: rure ngonhaung" lam" va"- ga: ta" ako".

³¹Yesu wa yao: bam re- Ana" naonhaung" lam" vako" i?

³²Naonhaung" alhab' mo, wa yao: yao" yham khyo phao: byo: sin" lo" gemung: ngore naonhaung" alhab' yang phao: cug' to: co' li" genae" ra" ba na joe" lo: li" nae". Ana" lhao" joe" jo; ava". Ngadqere: ngo wa gaigai: ngoyao: za: mangad:- pe"mung:ga"re Pho" wa ngo we' daga" na: ra".

³³Naonhaung" wa ngo we' dadang: dalam: za: ngad: na: ra" khyo" yang ngaui pyo: yaug yo: rure naonhaung" qo" yu genae" qhid' mae" ngo naonhaung" re ce: dao: ta" ru ngad: ra". Naonhaung" wa mug:myid dao mae khyag' qhui: ru kham zo: qo: li" genae"- ngadqere: nhag'lam: dagyug: ge,- ngo wa ce: mug:myid re aung: pye' va"- ga: ta" ra".