Read Maru YOHAN 17 Bible Online

YOHAN 17 - Maru bible

YOHAN 17

¹Yesu wa cedao: jham re bin: ta" lao"- mug:gaung khyo tau: qu" mung:- nga"Pho" we"- yo,qug joe" lo: ava". Yao: zo: wa Yao: Pho" re phungbao byid: nae" qhid' mae" ni" zo: re phungbao byid: wa,

²Pe"mung:ga"re yao: zo: re nao byid' to" ra" mo, alhab' re apyad ato: kao so' qo" byid: nae" qhid' mae" nao wa yao: re xao su byu alhab' mo; dao mae eib: ra" kheim: so' byid' to" ava".

³Apyad ato: kao so' ga" ru wa date: za: ngad: ra" dangman" ra" Mao"So re ba: ru we' nao: yang nhao: ke' ra" Yesu Khristu re ba: ru ngad: ra".

⁴Nao ngore kad' nhao: ra" mau" zo" re ngo bin: zaui: va". Aimung: mug:myid dao mae ni" phungbao re bin: qhu" byid: va".

⁵Nga"Pho" we"- Mug:myid re maphan" shimae" ngo nao we' daga" qo" to" ra" phungbao re ni" qhid' kheim: mae ana" ngore byid: la,-

⁶Mug:myid dao mae" nao: yang ngore ab byid' to" ra" mo, nao re ba gesho' ngo qhu" byid: va". Nao wa yao: bam re sang mung: yao: bam re nao ngore byid' to" ra". Yao: bam wa ni" mungdao: re phug' cao" avako".

⁷Aimung: yao: bam wa nao: yang ngore byid' ra" gu:- ja: khao: ngo" nao mae" thug' li" ru ngad: rure ana" yao: bam ba: avako".

⁸Nao: yang ngore byid' to" ra" mungdao: re ngo wa yao: bam rere: ai: mungdao: byid: mung:- yao: bam wa ai: mungdao: re khae: yu: ako". Ngo wa nao mae" joe" li" yaug ngad: ru dang: rure re:- yao: bam lam" ako".

⁹Ngo wa yao: bam: qhid' mae" akyu" mho' ra". Ngo wa mug: myid byu qe: qhid' mae" akyu" mamho'. Ngadqere: ngore ab byid' to" ra" mo; qhid' mae" ngo akyu" mho' ra". Pe"mung:ga"re yao: bam wa nao sang: ra" mo, ngad: ako".

¹⁰Ailao" ngo qo" ra" gu: alhab' ni" mae" ngad mung:- nao qo" ra" gu: alhab' re: nga" mae" ngad: ra". Yao: bam: mathao mae nga" phungbao bao: li" ra".

¹¹Ana" ngo wa nao jhao" phao: lo nae" ngad mung:- mug:myid dao mae mana lo nae"- ngadqere: yao: bam wa mug:myid dao mae na: jo, gezai ngad: ra". Gyang" lho" ra" Pho" we"- nao we' ngo wa dadang: dalam: za: ngad: ru we' dakhyo:- yao: bam re: dadang: dalam: za: ngad genae" qhid' mae" nao ngore byid' ra" ni" mang qam: so' khyo" yang yao: bam re gug: gam byid: wa,-

¹²Ngo wa yao: bam we' daga" na shi" au:- nao ngore byid' to" ra" ni" mang qam: so' khyo" yang yao: bam re ngo gug: gam byid: va". Ngo wa yao: bam re gug: gam byid' lo va" ruyang jham: mugsug' jab byang" li" nae" qhid' mae" byaug: jeim" lo" ca" ra" dayaug mae" je yang: yao: bam mae" dayaug re: mabyaug: jeim" lo" gengad: ra".

¹³Ngo wa ana" nao jhao" phao: lo zai ngad: ra". Amung: yao: bam wa nga" ngaui bau" rure yao: bam: nhag' lam: khug mae byang" sho' qo" yu genae" qhid' mae" mug:myid dao na shi" au: re cedao: jham re ngo ta" ra".

¹⁴Ngo wa yao: bam re ni" mungdao: byid' ra". Ngo wa mug:myid we' sin" ra" yaug mangad' ru we' dakhyo:- yao: bam re:- mug:myid we' sin" ra" mo, mangad: ko" ruyang mug:myid wa yao: bam re nghang" ra".

¹⁵Yao: bam re mug:myid dao mae" jhui" yu nae" qhid' mae" ngo mamho'- ngadqere: ai: makhyang" ra" yaug: lo, mae" yao: bam re gug: gam zam: so: byid: nae" qhid' mae" ngo nao re mho' ra".

¹⁶Ngo wa mug:myid we' sin" ra" yaug mangad' ru we' dakhyo:- yao: bam re: mug:myid we' sin" ra" mo, mangad: ko" ngad: ra".

¹⁷Dangman" ru khyo" yang yao: bam re naoyao" qhid' mae" kyang" san: yu: to: wa,- ni" mungdao: wa dangman" ru ngad: ra".

¹⁸Nao wa ngore mug:myid khyo nhao: ke' ru we' dakhyo:- ngore: yao: bam re mug:myid khyo nhao: ke' va".

¹⁹Yao: bam re dang za: ni" qhid' mae" kyang" san: to" ra" mo, boe" li" genae" qhid' mae" ngoyao" gaung re ngo kyang" san: to: va".

²⁰Ngo wa yao: bam: qhid' mae" za: akyu" mho' ru mangad:- yao: bam kho" kyo" ra" mungdao: khyo" yang ngore lam" lo ko" ra" mo; qhid' mae" re:- mho' ra".

²¹Yao: bam wa dadang: dalam; za: boe" genae" qhid' mae" ngo akyu" mho' ra". Nga" Pho" we"- nao wa ngo we' dadang: dalam: za: ngad mung:- ngore: nao we' dadang: dalam: za: ngad: ru we' dakhyo:- yao: bam rere: nga" shid' pha: we' dadang: dalam: za: boe" nhao wa,- ngo wa nao: yang nhao: ke' yaug ngad: rure mug:myid byu qe lam" nae" qhid' mae" yao: bam re dadang: dalam: za: boe" nhao la,-

²²Nao we' ngo wa dadang: dalam: za: ngad: ru we' dakhyo:- yao: bam re: dadang: dalam: za: ngad genae" qhid' mae" nao: yang byid' to" ra" phungbao reyao: ngo wa yao: bam re byid: va".

²³Ngo wa yao: bam we' dadang: dalam: za: ngad mung:- nao wa ngo we' dadang: dalam: za: ngad: ruyang yao: bam wa jab byang" sho' dadang: dalam: za: boe" li" mung:- ngo wa nao: yang nhao: ke" ru ngad: rure we' nao wa ngore jhid'de; ru we' dakhyo:- yao: bam re nao jhid'de; rure mug:myid wa ba nae" ngad: ra".

²⁴Pho" we" Nao wa yao: bam re nga" lo, mae ab byid' to" ava". Nao ngore byid' to" ra" phungbao re yao: bam qu" myao genae" qhid' mae" ngo na: ra" jo, qo mae yao: bam ngo we' daga" qo" na: jo, nae" rure ngo o: ra". Pe"mung:ga"re mug:myid re maphan" shimae" nao ngore jhid'de; ra".

²⁵Din:man" ra" Pho" we' mug:myid byu qe wa nao re maba gengadqere: ngo wa nao re ba: ra". Aimung: nao: yang ngore nhao: ke' rure cebam ba: ako".

²⁶Nao ngore jhid'de; ra" jhid'de; myid wa yao: bam: khug mae bo: jo, mung:- ngore: yao: bam: khug mae qo" bo: jo, nae" qhid' mae" ngo wa ni" khyo re yao: bam re ba nhao va"- Xo' yang: re: ba nhao shinae" ngad: ra"- ga: mho' ra".