Read Maru YOHAN 18 Bible Online

YOHAN 18 - Maru bible

YOHAN 18

¹Yesu wa airu: akyu" bin: mho' thao re yao" mho"zo: qe we' daga" ai: jo, qo mae" thug' ye" lo" mung:- Kidron qid gyaung: zo: thoete' khyo gau" de; ye" lo" ra". Aimae khyae dakhyae: jo; ra". Yesu we' yao" mho"zo: qe wa ai: khyae khug khyo vao ye" ako".

²Yesu we' yao" mho"zo: qe wa ai: jo, qo khyo myo: sho' lhang lhaung" ye" qu" vako" ruyang yao: re ab byid' pye' nae" yaug Yuda wa ai: jo, qo re ba: ra".

³Aimung: Yuda wa Roma gyezo: daphung: we'- khinjaung qi: qe we' Pharishe qeyang nhao: ke' ra" Caung:pa" Yham gug: gam gyezo: damyo" rere: jhui" li" ra". Yao: bam wa myibaung:- myidam jham we' shae lhae ci yang: ai: jo, qo khyo li" ako".

⁴Yesu wa yao: mae boe" li" na: ra" khyo alhab' re ba mung: yao: wa qhid' au: khyo qui" ye: yang:- naonhaung" khag' re qho: na ko" i? ga: yao: bam re myid' ra".

⁵Yao: bam wa Nazared mae" Yesu re qho: na: ga: tau" ako". Ailao" Yesu wa- Aiyaug wa ngo ngad va"- ga: tau" ra". Yao: re ab byid' pye' nae"yaug Yuda wa yao: bam we' daga" aimae ye; jo; ra".

⁶Yesu wa yao: bam re Ngo wa aiyaug ngad va"- ga: tau" ke' lao"- yao: bam wa naung zad: zad' lo" mung: myid gaung khyo gyang: lang" lo" ako".

⁷Yesu wa yao: bam re Naonhaung" khag' re qho: na ko" i? ga: dam: myid' ke' ra". Yao: bam wa Nazared mae" Yesu re qho: na: ga: dam: phaug' tau" ako".

⁸Ailao" Yesu wa- Aiyaug wa ngo ngad va: ein: naonhaung" re ta" va". Aimung: naonhaung" ngore qho: na ko" ru ngad: re wa ce: gatau qegu: wa phao: lo" vageshao:- ga: ta" ra".

⁹(Yao: ceru: ta" ru wa Pho" we"- nao: yang ngore ab byid' to" ra" mo, mae" dayaug re lhao" re:- ngo maci: phyaug'- ga: ta" to" ra" dao: jab byang" li" nae" qhid' mae" ta" ru ngad: ra".)

¹⁰Simon Petru wa shae dakhyae: vin: ci mung:- she: yu yang: Khinjaung Yin" nho: jeim pho" dayaug re shaqam" ke' re ai: jeim pho" nho: lo, yo shad' nokhye' qam" phyid' khyo" ke' byid' ra". Ai: Jeim pho" mang wa Malakhu ngad: ra".

¹¹Yesu wa Petru re Ni" shae re shae byao mae dam: ke' to: wa,- ngo wa nga" Pho" yang byid' to" ra" ai: dayin dayo: khyag' qhui: ra" keim re mashaug' li" nae" ein: nao jho: i? ga: ta" ra".

¹²Ai: thao re Roma gyezo: qe we' yao: bam: gyezug: pho" we' Yuda gug: gam gyezo: qe wa Yesu re taung" yu mung: taui: yang:-

¹³Anna jhao" sao qhid' jhui" ye" ako". Anna wa ai: zin mae Khinjaung Yin" kad' na: ra" Kayapha nho: yaug pho" ngad: ra".

¹⁴Amung: Kayapha wa byu alhab' mo; qhid' mae" byu dayaug za: shid: ru wa je: gai: ra"- ga: kheim: so' qo" ra" Yuda qere pha,jhi" byid' ra" yaug ngad: ra".

¹⁵Simon Petru we' gatau: mho"zo: dayaug wa Yesu thao cao" ye" ako". Gatau: mho"zo: yaug wa Khinjaung Yin" we' jho" se" mung: khinjaung yin" yham mo" vang" khug khyo Yesu we' daga" vao ye" lo" ra".

¹⁶Petru wa taung gaung shad' vang" kham: nhae mae na: jo; ra". Ailao" ai: khinjaung yin" pho" we' jho" se" ra"gatau: mho"zo: yaug wa taung gaung shad' khyo dam: thug' lo mung:- kham: dung: lhaug' ra" myiqe: nau" re ta" yang: Petru re akhug shad' khyo jhui" vao lo" ra".

¹⁷Kham: dung: lhaug' ra" myiqe: nau" wa Petru re- Nao re: aiyaug: mho"zo: qemae" dayaug ngad: ra" mangad: i? ga: ta" ra". Ailao" Petru wa ngo mangad:- ga: tau" ra".

¹⁸Daui daui mo, we' gyezo: qe wa gyo, geyang: vha: myikhyeim" mad: to: yang: myikhyeim" lhang" gam: ye; jo, mung: myi: gao: na: bam: ako". Alao" Petru wa ai: khyo ye: mung: yao: bam we' daga" ye; jo, yang: myi: yebogao: na: ra".

¹⁹Khinjaung Yin" wa Yesu re yao" mho"zo: qe: khyo re we' yao" mho" shid' ra" khyo re myid' ra".

²⁰Yesu wa Ngo wa khonhae" re: byu alhab' mo; qhid' kheim: mae de: de: za: ta" lo va". Aimung: mo,byu qe alhab' mo, zang" ham: na: ra" Tarha" Jung Yham mae we' Caung:pa" Yham mae ngo mho" shid' lo va". Ngo wa khonhae" re: anyham: avho' mae daja: re: mata" qu"-

²¹Aire naonhaung" ngore myid: ko" i? Nga" mho" dao: re tae" gyo" ra" mo,byu qere myid' qu" ge,- ngo pe" ta" lo: rure yao: bam re myid: ge,- ngo pe" ta" rure yao: bam ba: ako"- ga: tau" ra".

²²Yesu ceru: ta" lao"- gug: gam qemae" dayaug wa Yesu re bopyo' pyo' mung:- khoru: mung: nao wa Khinjaung Yin" re airu: vae" ta" i? ga: ta" ra".

²³Yesu wa yao: re- ngo dakheim: kheim: jhau: shad' re wa cemae na: ra" mo, alhab' mo; qhid' kheim: mae kho:kham shad' rure ceim" shid' la,- ngadqere: ngo ta" ra" khyo dang: ngad: re wa pe"mung: ngore pyo' i? ga: ta" ra".

²⁴Ai: thao re Anna wa airu: taui" to: lo, qo malhai: lo: Yesu re Khinjaung Yin" Kayapha jhao" dai" nhao: ke' ra".

²⁵Petru wa myi: gao yang: ai:tau mae ye; jo; ashi"- aimung: gatau damyo" wa Nao re: ai: yaug: mho"zo: qemae" dayaug ngad: ra" mangad: i? ga: ta" ako". Ngadqere: Petru wa Ngo mangad: ga: ha: pye' ra".

²⁶Petru yang nokhye' qam" phyid' khyo" pye' byid' ra" Khinjaung Yin" nho: jeim pho" we' ba nam dau: ra" jeim gayaug re:- nao re: ai: khyae khug mae yao: we' daga" na: rure ngo myao:- mangad: i? ga: ta" ra".

²⁷Petru wa Ngo mangad:- ga: dam: ha: pye' ra". Ailao"jao" qo, teim: ra".

²⁸Ne, seim no' Yesu re Kayapha yham mae" Roma mung" zug: pho" yham khyo jhui" dai" ye" ako". Kheim: so' qo" ra" Yuda qe wa Lai co' Poe myi" xeim re qo" zo: nae" qhid' mae" yao: yao" gaung re caung:pa" thung" khyo" yang san sin" jo, nug geyang: yham mo" khug khyo mavao ye: ko" ngad: ra".

²⁹Aimung: Pilad wa taung gaung khyo thug' ye: yang: naonhaung" ceyaug re pe" ja" qobo zhaug' ko" i? ga: yao: bam re myid' ra".

³⁰Yao: bam wa Ce:yaug qobo daja: ja: kad' shad' yang: mangad: re wa ni" qhid' kheim: khyo ngonhaung" jhui" li" zai mangad:- ga: tau" ako".

³¹Pilad wa Airulao" wa yao: re naonhaung" yao: jhui" lo" mung:- naonhaung" yao" tarha" jo; ru we' dakhyo:- yao: re dao: lo" kho' ge,- ga: yao: bam re ta" ra". Yao: bam wa Ngonhaung" wa byuse' nae" akhang" maqo"- ga: tau" ako".

³²(Yao: bam airu: ta" ko" ru wa Yesu yao: khoru: shid: li" nae"- ga: ta" shid' to" ra" dao: jham jab byang" li" nae" qhid' mae" ngad: ra".)

³³Pilad wa yham mo" khug khyo dam: vao lo" mung: Yesu re khai: yu yang:- nao wa Yuda qe: kho:kham ngad: i? ga: Yesu re myid' ra".

³⁴Yesu wa yao: re- Ce: dao: myid: wa naoyao" myid khyo" myid' ru i? Mangad: lao" nga" khyo re su gaje qe:yang nao re ta" kyo: vako" ra" i? ga: myid' ra".

³⁵Pilad wa Nao ngore Yuda byu dayaug ngad: ein: jho: i? Nao re nga" lo, khyo li" ab byid: ko" ra" mo, wa naoyao" amyu" qe we' khinjaung qi: qe ngad: ako"- nao pe" kad' shad' va" i? ga: phaug' tau" ra".

³⁶Yesu wa Nga" mung"dan: wa ce: mug:myid mae" mangad:- nga" mung"dan: wa ce: mug:myid mae" angad: re wa Yuda kheim: so' qo" ra" mo; lo, khug khyo ngo mavao lo" sho' nga" byu qe khe' khyad' yu: li" genae". Nga" mung"dan: wa cemae mangad:- ga: ta" ra".

³⁷Airumung: Pilad wa yao: re- Airu: ngad: re wa nao wa kho:kham ngad: i? ga: myid' ra". Yesu wa Nao wa ngore kho:kham ngad: ra"- ga: ta" ra". Ngo wa dangman" ra" khyo re ta" kyo: nae" qhid' mae" khau: li" mung: ce: mug:myid khyo joe" gyo" li" ru ngad: ra". Dangman" ru we' sin" ra" yaug khag' ngadqere: nga" dao: re tae" gyo" ra"- ga: tau" ra".

³⁸Ailao" Pilad wa dangman" ru wa pe" ngad: i? ga: myid' ra". Ai: thao Pilad wa taung gaung shad' khyo mo,byu qejhao" dam: thug' ye: mung: yao: bam re- ngo wa yao: re dao: phyid' nae" akhyo: pe" mamyao-

³⁹Ngadqere: naonhaung" thung" jo; ru we' dakhyo:- Lai co' Poe gyo: mae kyam: byu dayaug yaug re ngo wa khonhae: re: lhaung" lhoe' ke' byid' ra". Aimung: naonhaung" qhid' mae" Yuda qe: kho:kham re lhoe' ke' byid: nae" naonhaung" o ko" i? ga: myid' ra".

⁴⁰Yao: bam wa- Aiyaug re dalhoe' ke'- Baraba re lhoe' ke' byid: la,- ga: yao: re zag: hug' ako". (Baraba wa damya, ngad: ra".)