Read Maru YOHAN 19 Bible Online

YOHAN 19 - Maru bible

YOHAN 19

¹Pilad wa Yesu re jhui" thug' lo" mung:- be, nhao: ra".

²Gyezo: qe wa zau: kyao: yang ba maug: dalam: kad' yu mung: Yesu au: mae zhaung: byid' ako". Ai: thao re yao: bam wa Yesu re bau: qhang ane vhe' byid' ako".

³Yao: bam wa Yesu jhao" qui" li" mung:- Yuda qe: kho:kham we"- Kao qhang so' qhang vashao: wo"- ga: ta" yang: Yesu re bopyo' pyo' ako".

⁴Pilad wa taunggaung shad' khyo dalhang dam: thug' ye: mung: mo,byu qere- Qu" ge, Ngo wa yao: re dao: phyid' nae" akhyo pe" daja: rere: mamyao: rure naonhaung" re ba nhao nae" qhid' mae" yao: re ngo ce: jo, qo khyo jhui" thug' li" nae"- ga: ta" ra".

⁵Yesu wa zau: kyao maug zhaung:- bau: qhang ane ve; pye' yang: taunggaung shad' khyo thug' lo: ra". Pilad wa Qu" ge, Ceyaug ngad: ra" ga: yao: bam re ta" ra".

⁶Khinjaung qi: qe we' Caung:pa" Yham gug: gam qe Yesu re myao gelao" yao: bam wa Yao: re pyao:zang mae jin" se' pye' wa,- yao: re pyao:zang mae jin" se' pye' wa,- ga: zag: hug' ako". Pilad wa yao: bam re Airu: lao" wa yao: re naonhaung" jhui" lo" mung: pyao:zang mae lo" jin" se' pye' ge,- ngo wa yao: re dao: phyid' nae" akhyo pe" daja: rere: mamyao- ga: ta" ra".

⁷Alao" mo, byu qe wa- Yao: wa Mao"So: yao: Zo: ngad: ga: yao: yao" gaung re ta" na: ruyang yao: wa shid man" ra" yaug ngad: rure ngonhaung" tarha" mae ta" to" ra"- ga: dam: phaug' tau" ako".

⁸Pilad wa ai: dao: re the' gyo: lao" je yang: gyaug: li" ra".

⁹Yao: wa yham mo" khug khyo dam: vao lo" mung: Yesu re Nao khai: mae" ngad: i? ga: myid' ra". Ngadqere: Yesu wa pe" re: matau: ngad: ra".

¹⁰Alao" Pilad wa Yesu re- Nao ngore majhau nae" i? Ngo wa nao re lhoe' ke' nae" kheim: so' re:- pyao:zang mae jin" se' pye' nae" kheim: so' re: qo" yaug ngad: rure nao maba i? ga: myid' ra".

¹¹Yesu wa- Ai: kheim:so' wa Mao"So: yang nao re byid' to: yang: za: nao qo" ru ngad: ra". Aimung: ngore ni" lo, khyo ab byid' ra" yaug wa je yang: qobo qo" ra"- ga: ta" ra".

¹²Pilad wa ce:dao: re the' gyo: lao" Yesu re lhoe' ke' nae" khyo qho: ra". Ngadqere: mo, byu qe wa- Nao yao: re lhoe' ke' lao" wa Roma khosin" pho" ba nam mangad: lo:ngad: ra"- yao: Yao" gaung re kho:kham ngad: ga: ta" yaug wa Roma khosin" pho" re tau: lhan: yaug ngad: ra"- ga: hug' ako".

¹³Ai: dao: jham re Pilad the' gyo: lao" yao: wa Yesu re taunggaung shad' khyo jhui" thug' ye: mung:- Laug Myhung: Jao: ga: mhang" ra" jo, qo mae" tarha" zug: pho" zaung tao" dao mae zaung: ra". (Hebre myan" khyo" Gabatha ga: mhang" ako".)

¹⁴Ai: ayo, wa Lai co' Poe ba qhid' ba- ba khaung tau: li" na: ra" ayo, ngad: ra". Pilad wa mo,byu qere- Naonhaung" kho:kham pho" re qu" ge,- ga: ta" ra".

¹⁵Yao: bam wa Yao: re- se' pye' wa,- yao: re se' pye' wa,- yao: re pyao:zang mae jin" se' pye' wa,- ga: zag: hug' ako". Ailao" Pilad wa yao: bam re- Ngo: yang naonhaung" kho:kham re pyao:zang mae jin" se' pye' nae" rure naonhaung" nug ko" i? ga: myid' ra". Khinjaung qi: qe wa Ngonhaung" qo" ra" kho:kham wa Roma khosin" dayaug za: angad:- ga: tau" ako".

¹⁶Ai: thao Pilad wa Yesu re pyao: zang mae jin" se' pye' nae" qhid' mae" yao: bam: lo, khug khyo ab byid' ke' ra". Aimung: yao: bam wa Yesu re jhui" thug' lo" ako".

¹⁷Yesu wa Au: Gao: Gye, ga" ra" jo, qo khyo yao" pyao:zang re vo, yang: ye" lo" ra". (Hebre myan" khyo" Golgotha ga: mhang" ako".)

¹⁸Yao: bam wa ai: mae yao: re pyao:zang mae jin" se' pye' ako". Byu gatau shid' yaug rere: Yesu re agaung: mae to: mung:- dashad' mae dayaug pyao:zang mae jin" te' to" ako".

¹⁹Pilad wa aso: tung" ce' tung" mung: Yesu nho: pyao:zang dao mae te' to: nhao: ra". Aiwa- Yuda qe: kho:kham Nazared vobyu Yesu- ga" ru ngad: ra". Aso: tung" ce' re Hebre- Latin- Greeg myan" jham kkyo" tung" te' to" ako".

²⁰Yesu re pyao:zang mae jin" se' pye' ra" jo, qo wa vomo" mae" mataung" va" ruyang byu myo: sho' mo, aire myao: nghe' ako".

²¹Ailao" khinjaung qi: qe wa Pilad re- Yuda qe: kho:kham ein: datung"- ceyaug wa Ngo wa- Yuda qe: kho:kham ngad: ga:- ta" ra" ein: kam" tung" wa,- ga: ta" ako".

²²Pilad wa Ngo tung" to" ru we' dakhyo: ngad va"- ga: tau" ra".

²³Gyezo: qe wa Yesu re pyao:zang mae bin: jin" te' pye' gelao"- yao" mai bau: re yu: yu mung:- byid bam khyo" yang: dayaug dabam jho" gae: yu: ako". Yao: bam wa bau: qhang rere: yu: ako". Ai: bau: qhang wa khyab' khyo: made, lo: qo; to" ra" bau: ngad: ra".

²⁴Aimung: gyezo: qe wa ce:bau: re wa macad' gejhao"- Khag' qo" yu nae" rure pha" be, gelang:- ga: yao: cao: jho" ta" ako". Gyezo: qe airu: ta" ko" ru wa (<Yao: bam wa nga" mai bau: re yao: bam yao: cao: jho" gae: yu mung:- Nga" bau: qhang qhid' mae" pha" ce' khyo" ako"- ga" ra" jham: dao: jab byang" li" nae" qhid' mae" boe" ru ngad: ra">>. Gyezo: qere: ai we' dakhyo: kad' ako".

²⁵Yesu nho: pyao:zang nhae mae yao: myhi"- yao: myhi" nho: yao: nhaung:- Klopa nho: yham sang myhi" Mari- Magadala Mari bam ye; jo; ako".

²⁶Yesu wa yao: myhi" we' yao: jhid'de; ra" mho"zo: ai: mae ye; jo, ko" rure myao mung:- Yesu wa yao: myhi" re Yao: wa ni" zo: ngad: ra"- ga: ta" ra".

²⁷Ai: thao re Yesu wa ai: mho"zo: re- yao: wa ni" myhi" ngad: ra"- ga: ta" ra". Ai: ba mae" ai: mho"zo: wa Yesu yao: myhi" re yao" yham khyo lo" jhui" nha: to" ra".

²⁸Yesu wa mau"zo" alhab' bin va" rure ba mung:- Jham: mugsug' mae tung" to" ru we' dakhyo:- jab byang" li" nae" qhid' mae" Ngo qid shab' kyi:- ga: ta" ra".

²⁹Ai: mae sabyi qang: jhin byang" sho' bo: ra" jarung: dalam: jo; ra". Aimung: yao: bam wa sabyi qang: jhin mae qid mug sad' jam: yu yang:- Husub kaung mae thug' ze; te' mung: Yesu nhad' khyo to' byid' ako".

³⁰Yesu wa ai: sabyi qang: jhin re bin: shaug' mung:- Mau" bin va"- ga: ta" yang: yao" au: goe; lo" mung: kao gyo" lo" ra".

³¹Ai: thao kheim: so' qo" ra" Yuda qe wa pyao: zang mae jin" se' pye' ra" mo; khyid jham re khyug' pye' mung:- pyao: zang dao mae" mao gaung jham re yu: khyo" yu nae" qhid' mae" Pilad re akhang" mho' ako". Yao: bam ceru: mho' ko" ru wa ai: ba wa ban thug' ngo" ba: ba ngad mung:- Dugno: Ba re pyao:zang jham mae mao gaung jham re malao" jo, nhao nug geyang: ngad: ako". Pe"mung:ga"re ai: Dugno: Ba wa je: gyang" lho" ra" ba na ngad: ra".

³²Aimung: gyezo: qe wa ye" lo" mung:- Yesu we'daga" pyao: zang mae jin" te' to: qhug' ra" sao qhid' yaug: khyid re be; khyug' pye' mung:- thao mae" yaug: khyid rere: be; khyug' pye' byid' ako".

³³Ngadqere: yao: bam wa Yesu jhao" joe" lo gelao"- Yesu shid va" rure lomyao gemung:- yao" khyid re wa mabe; khyug' ko" ngad: ra".

³⁴Ngadqere: gyezo: dayaug wa lhae tad' yang Yesu nae dan: mae yethug' ke' we' aijao" sa: we' qid yug: thug' li" ra".

³⁵(Naonhaung" re: ce: khyo re lam" genae" qhid' mae"ceru: boe" rure yao" myo; yang yao: the' myao: ra" yaug yao: ta" ru ngad: ra". Yao: ta" ru wa dang: ra"- aimung: yao: wa dangman" ra" dao: ta" ru ngad: rure yao: yao: ba: ra".)

³⁶Ceru: boe" ru wa- yao" shoqug: dakhe' re: khyug' ru maqhug' nae"- ga: ta" to" ra" jham: dao: jab byang" li" ru ngad: ra".

³⁷Amung: jham: mugsug' gatau dalam: mae re:- yao: bam: yang lhae tad' yang thug' ra" yaug re yao: bam ceim" qu" li" genae"- ga: ta" to" ra".

³⁸Ai: thao Arimathe vogaung: mae" Yoseb wa Yesu nho: maogaung re yu: yu nae" qhid' mae" Pilad re akhang" yemho' ra". (Yoseb wa kheim: so' qo" ra" Yuda qere gyaug yang: anyham: avho' khyo" Yesu mho"zo: boe" na yaug ngad: ra".) Ailao" Pilad wa Yoseb re akhang" byid' ke' ra". Yoseb wa ye" lo" mung:- mao gaung re yeyu: yu: ra".

³⁹Qhid' phyao: myi" ayo, re Yesu jhao" li" ra" Nikodi wa Mura we' Ajho: lhag' ra" sheim nae pyo" ra" ja: sam xe: ngo" joe: ko yu: vin mung:- Yoseb we' daga" cao" ye" ra".

⁴⁰Yao: shid' zo: wa Yesu mao gaung re yu: yu mung:- Yuda byu qe: nyhab' shaung nae" mao gaung re nyhang" shaung: ra" thung" we' dakhyo:- sheim nae pyo" ra" ja: gyad mung: jid:mo" pin" yang mao gaung re thab' ako".

⁴¹Yesu re pyao: zang mae jin" se' ra" jo, qo mae khyae dalam: jo; ra". Aimung: ai: khyae mae khag' re: manyhab' qu" shi" ra" lab asag' dalam: re: jo; ra".

⁴²Ai: ba wa Dugno: Ba qhid' ba- seim" jin" ra" ba na ngad: ru we' lab re: ajhao" mae jo; ruyang yao: shid' zo: wa Yesu nho: mao gaung re ai: lab khug mae yeke' to" ako".