Read Maru YOHAN 2 Bible Online

YOHAN 2 - Maru bible

YOHAN 2

¹Ai: thao shid' ba kyo thao re Kana vogaung: mae lo, xo' poe dalam: jo, mung:- Yesu yao: myhi" wa ai: poe mae leim: na: ra".

²Yesu we' yao" mho"zo: qere re: ai: lo, xo' poe khyo khai: ako".

³sabyi qang: gan: byaug lao"- Yesu yao: myhi" wa Yao: bam sabyi qang: gan: byaug: avako"- ga: yao: re ta" ra".

⁴Yesu wa Ngo pe" kad' ca" rure- nao ta" maqo- Nga" ayo, majoe" shi:- ga: ta" ra".

⁵Ailao" Yesu yao: myhi" wa daui daui mo, re yao: naonhaung" re nhao: ra" ja: alhab' re kad' ge,- ga: ta" ra".

⁶Yuda qe wa yao: bam: caung:pa" thung" we' sin" ra" cid' san: ra" thung" qo" gemung:- ai: qhid' mae" soe: dayo ko ko vao: ra" laug qid yae: khyaug' lam: aitau mae zhaung: to" ako".

⁷Yesu wa ai: daui daui mo, re ai: yae: jham mae qid byang" sho' khae: zaui ge,- ga: ta" ra". Yao: bam wa yae: nhad' joe" sho' khae: zaui: ako".

⁸Amung: Yesu wa yao: bam re- Ai: yae: mae" qid dajhid' khau" yu mung:- poe eib pho" re lo" byid: ge,- ga: ta" ra". Yao: bam re: lo" byid' ako".

⁹Poe eib pho" wa sabyi boe" lo: ra" qid re shaug' tau" qu" ra". Daui daui mo, wa ai: sabyi qang: khai: mae" qo" rure ba: ako"- ngadqere: poe eib pho" wa maba ngad: ra". Aimung: yao: wa pho" sag' re khai: yu yang:-

¹⁰Yaug khao: ngo" wa myho' thao" ra" sabyi qang: re shi" sao qhid' lhaung" byid: jhaug' ko" ra"- Shaug' gyi: gethao reza: mataung" myho' ra" sabyi qang: lhaung" byid: jhaug' ako"- ngadqere: nao wa myho' thao" ra" sabyi qang: re ana" joe" sho' zam" to" ra"- ga: ta" ra".

¹¹Yesu wa Galile mung" Kana vogaung: mae sao qhid' mug'pho: mau" re kad' mung:- yao" phungbao re aimae qhu" byid' ra". Aimung: yao" mho"zo: qe wa yao: re lam" ako".

¹²Ai: thao re Yesu wa yao: myhi"- yao: nhaung:- yao" mho"zo: qe we' Kapena-um vogaung: khyo ye: mung:- aimae dayo, zo: yena: ra".

¹³Lai co' Poe joe" li" na mung:- Yesu wa Yerusalem khyo ye" lo" ra".

¹⁴Yesu wa Caung:pa" Yham mae nung: jaung- yao- phaung" kyug' aung: mo, we' ngaui tha" zo: mo, yao: bam: zoboe" mae zaung: jo, ko" rure ye:myao: ra".

¹⁵Ailao" Yesu wa taui" yang vose: dalam: kad' ci mung:- yao we' nung: jaung- gug'nyhug' jham alhab' re caung:pa" Yham mae" khe' thug' pye' ra"- amung: ngaui tha" zo: mo; ngaui thaung jham rere: gaug: sin" pye' byid: yang:- zaboe" gai" jham re tau: phaug' sin" pye' byid' ra".

¹⁶Phaung" kyug' aung: mo, rere: aijham alhab' re cetau mae" yu: thug' lo" ge,- nga" Pho" Yham mae gai jao: dakad' ge,- ga: amyin" byid' ra".

¹⁷Ailao" Yao" mho"zo: qe wa Mao"So we"- ni" yham re kao bau nhag' taui" ru wa nga" aung khug mae myi: ru: nga" na: ra"- ga" ra" jham dao: re myid: beim" ako".

¹⁸Yuda kheim: so' qo" ra" mo, wa nao ce: mau" zo" re kad' nae" akho: akhang" qo" yaug ngad: rure ba nhao nae" qhid' mae" ngonhaung" re pe" ja" mug' pho: qo" kad' qhu" nae" i? ga: ta" ako".

¹⁹Yesu wa tau: mung:- ce: caung:pa" Yham re phyo' pye' ge,- sam ba: agyo: mae ngo dam: kad' nae"- ga: ta" ra".

²⁰Yao: bam wa Yesu re- Ce: caung:pa" Yham wa byid xe: khyaug' zin lam: lam: zhaug' lo: ra" yham ngad: ra". Nao wa sam ba: agyo: maeza: ce: caung:pa" Yham re dam: qo" zhaug' nae" i? ga: myid' ako".

²¹Ngadqere: Yesu ta" ra" caung:pa" yham wa- yao" gaung re qang yang: ta" ru ngad: ra".

²²Airumung: yao" mho" zo" qe wa Yesu shid: rumae" dam: daui: to" li" ru qhug' thao re yao: ta" to" ra" cedao: re myid: beim: mung:- yao: bam wa jham: mugsug' rere: Yesu ta" ra" dao: rere: lam" ako".

²³Ai: Lai co' Poe ba na gyo: Yesu wa Yerusalem mae na: au:- byu myo: sho' mo, wa yao: kad' ra" mug' pho: mau" re the' myao gemung: yao: re lam" ako".

²⁴Ngadqere: Yesu wa yao: bam alhab' mo; khyo re ba: ruyang yao: bam re malam ngad: ra".

²⁵Yao: bam: khyo re khag' yang re: yao: re ta" kyo: maqo ngad: ra"- pe"mung:ga"re yao: bam yao" aung khug nhag' lam: mae pe" bo: rure yao: yao: ba gau ngad: ra".