Read Maru YOHAN 20 Bible Online

YOHAN 20 - Maru bible

YOHAN 20

¹Laban ba ne, seim no' myo, mamyao shire- Magadala Mari wa lab khyo ye" lo" ra". Yao: wa lab nhad' mae" laug zang tau: qhui" pye' to: va" rure yemyao: ra".

²Aimung: yao: wa Simon Petru we' Yesu jhid'de; ra" gatau: mho"zo: jhao" tao" ye: mung:- yao: bam wa Asang re lab mae" yu: pye' vagenhaung- Khai: mae yeto" pye' vako" laug? Ngonhaung" maba lo: ga: yeta" ra".

³Ailao" Petru we' ai: gatau: mho"zo: qe wa lab khyo ye" lo" ako".

⁴Yao: shid' zo: shid' zo" geim" tao" ye" lo" ako". Ngadqere: gatau: mho"zo: yaug wa Petru tho' je: qao mung:- lab khyo qhid' joe" ye" ra".

⁵Yao: gam" qu" ke' re jid:mo" pin: lung: jham bam: jo; rure myao: ra". Ngadqere: yao: wa lab khug khyo mavao ye: ngad: ra".

⁶Simon Petru wa yao" thao mae joe" li" mung:- lab khyaung khug khyo khyao za: vao ye" lo" ra". Yao: wa jid: mo" pin: lung: jham bam: jo; rure we' Yesu au: mae thab' ra" pin: dau re yemyao: ra".

⁷Yesu au: mae thab' ra" pin: dau wa jid:mo" pin: lung: jham we' daga" majo, lo:- yao: yao: za: gatau mae kheim" bam: jo; ra".

⁸Ai: thao re lab khyo sao qhid' joe" ye" ra" gatau: mho"zo: re:- lab khug khyo vao ye" lo" mung:- ai:rure yao: yao: yemyao yang: lam" ra".

⁹(Yesu wa shid: rumae" dam: daui: to" li" ca"- ga" jham: dao: re yao: shid' zo: maba: gyo: shiko" ngad: ra".)

¹⁰Ai: thao mho"zo: shid' yaug wa yham khyo phao: lo" ko" ra".

¹¹Mari wa lab taunggaung shad' mae ngug: ye; jo; ra". Yao: wa airu: ngug zo" re" lab khyaung khug khyo gam" qu" ke' re-

¹²Mai bau: phyu ve; ci: ra" mug: lagyo: shid' yaug re Yesu nho: mao gaung mhao" to" ra" jo, qo mae- au: tho' shad' mae dayaug- khyid thao shad' mae dayaug zaung: jo, ko" rure myao: ra".

¹³Lagyo: shid' zo: wa Myiqe: we"- nao pe"mung: ngug: na: i? ga: myid' ako". Ailao" Mari wa Yao: bam wa nga" Asang re yu: pye' mung:- khai: mae yeto" pye' ko" rure ngo maba yang: ngad:- ga: yao: shid' zo: re tau" ra".

¹⁴Airu: ta" mung: lhang: lo: re Yesu aimae ye; jo; rure myao: ra". Ngadqere: Yesu ngad: rure yao: maba ngad: ra".

¹⁵Yesu wa Myiqe: we"- nao pe"mung: ngug: na: i? ga: yao: re myid' ra". Ailao" Mari wa Yesu re khyae lhaug' yaug ngad: ga: jho mung:- Nhag' bo we"- yao" mao gaung re nao vo; yu: pye' ngad: re wa nao khai: mae yeto" rure ngore ta" kyo: la,- ngo wa yao: re yeyu: yu nae"- ga: ta" ra".

¹⁶Yesu wa yao: re Mari we"- ga: yao: ra". Mari wa Yesu shad' khyo lhang: lo mung: Hebre myan" khyo" Raboni ga: tau" ra". (Raboni ga" ru wa mho"pho"- ga" ru ngad: ra".)

¹⁷Yesu wa yao: re- ngore dazaui: la,- pe"mung:ga"re ngo wa Pho" jhao" mado, lo" shi:- ngadqere: nga" mao:nhaung: qejhao" lo" mung:- yao: bam re- ngo wa nga" Pho" we' yao: bam: Yao: Pho" ngad: ra" nga" Mao"So we'yao: bam: Mao"So jhao" dam: do, lo" nae" ngad: ra"- ein: lo" ta" kyo: byid: la,- ga: ta" ra".

¹⁸Aimung: Magadala Mari wa lo" yang: Asang re yao: the' myao va" ru we' Asang yao: re pyang: ke' ra" dao: jham re mho"zo: qere yeta" kyo" ra".

¹⁹Laban ba myi" thao mug: sham" sham" cad' lo" yo, re mho"zo: qe wa Yuda kheim: so' qo" mo, re gyaug geyang: yham khug mae kham: pyid' pye' mung: zang" ham: na: bam: ako". Ailao" Yesu wa joe" li" mung: yao: bam: phaung gaung: mae li" ye; jo, yang:- naonhaung" ngaui pyo: yaug yo vageshao:- ga: ta" ra".

²⁰Airu: bin: ta"lao"- Yesu wa yao" lo, we' nae dan: re yao: bam re qhu" byid' ra". Ailao" mho"zo: qe wa Asang re the' myao gemung:- gyai ngaui bau" ako".

²¹Yesu wa yao: bam re- Naonhaung" ngaui bau: yaug yo vageshao:- Pho" wa ngore nhao: ke' ru we' dakhyo:- ngore: naonhaung" re nhao: ke' ra" ga: dam: ta' ra".

²²Ai: thao Yesu wa mho"zo: qe: dao mae so' she: ke' mung:- Gyang" Lho" Byo re khae: yu ge,-

²³Qobo qo" ra" mo, re naonhaung" qobo khyad' byid: ko" re wa yao: bam wa qobo khyad' byid' ru qhug' li" genae"- naonhaung" qobo makhyad' byid: ko" re wa yao: bam wa qobo khyad' byid' ru maqhug' genae"- ga: ta" ra".

²⁴Yesu li" ra" au: re mho"zo: daxe: shid' yaug mae bobo: ra" (zozam ga: mang: ra") Thoma wa mho"zo: qe we' daga" mana: ang ngad: ra".

²⁵Aimung: gatau: mho"zo: qe wa ngonhaung" wa Asang re myao va"- ga: ta" kyo" ako". Ailao" Thoma wa ngo wa yao" lo, mae" ze,jin" khu re myao mung:- ai: dae khu jham re nga" lo, nyhug' yang yao: soe' qu" yang:- nga" lo; yang yao: yao" nae dan: re maqo" soe' re wa ngo malam" nae"- ga: yao: bam re tau" ra".

²⁶Dalaban kyo thao re mho"zo: qe wa yham khug mae dam: zang" ham: na: bam: ako". Thoma re: yao: bam we' daga" na: jo; ra". Kham: jham re pyid' to" ako"- ngadqere: Yesu wa joe" li" mung:- yao: bam: phaung gaung: mae li" ye; jo, yang:- naonhaung" ngaui pyo" na vageshao:- ga: ta" ra".

²⁷Ai: thao Yesu wa Thoma re- Ni" lo, nyhug' yang nga" lo, re tin" qu" wa,- nga" lo, rere: qu" wa,- amung: ni" lo, yheim" ke' yang: nga" nae dan: mae re: soe' qu" wa,- Aug' o: myid dabo- lam" wa,- ga: ta" ra".

²⁸Thoma wa Yesu re- Nga" Asang we' Nga" Mao"So- ga: ta" ra".

²⁹Yesu wa yao: re- Nao wa ngore the' myao yang: lam" i? Ngo re mathe' myao lo:- ngore lam" mo, wa ngaui lho" ko" ra"- ga: ta" ra".

³⁰Ce: jham: paug' mae mabo: tung" to" ra" gatau mug' pho: ve, lho jham myo: sho' re: Yesu wa yao" mho"zo: qe: qhid' kheim: mae zaui" qhu" ra".

³¹Ngadqere: Yesu wa Mao"So: yao: Zo: Meshia ngad: rure naonhaung" lam" genae" qhid' mae" we' yao: re lam khug: ra" khyo" yang naonhaung" wa kao so' qo" yu genae" qhid' mae" ce: jham: paug' re tung" to" ru ngad: ra".