Read Maru YOHAN 3 Bible Online

YOHAN 3 - Maru bible

YOHAN 3

¹Pharishe phung: mae bobo: ra" Nikodi ga: mang: ra" Yuda au: jhaung dayaug na: ra".

²Damyi re yao: wa Yesu jhao" ye: mung:- Rabai we"- nao wa Mao"So: yang nhao: ke' ra" mho" pho" dayaug ngad: rure ngonhaung" ba:- nao zaui" qhu" na: ra" mug' pho: ve, lho jham wa Mao"So mabo ngad: re khag' re: maqo" kad' ngad: ra"- ga: ta" ra".

³Yesu wa nao re ngo dang za: ta" li"- Dam: khau: ra" yaug mangad: re wa khag' re: Mao"So: mung"dan: re maqo" myao genae"- ga: yao: re tau" ra".

⁴Nikodi wa Qi: thao re khoru: dam: gai: khau nae" i? ga: myid' ra". Gaigai: yao: yao: wa yao: myhi" aung khyo magai: vao ye" ru we' shid' lhang madam: gai: khau ngad: ra"- ga: ta" ra".

⁵Ailao" Yesu wa Nao re ngo dang za: ta" li"- Qid we' Byo: yang khau: ke' ra" yaug mangad: re wa Mao"So: mung"dan: khug khyo khag' re: maqo" vao ye: ngad: ra".

⁶Gaung sho" yang khau: ke' ru wa gaung sho: ngad mung:- Byo: yang khau: ke' ru wa byo ngad: ra".

⁷Ngonhaung" alhab' mo, dam: khau ca"- ein: nao re ngo ta" ra" dao: re dagyo" mug'-

⁸La wa yao: nug: ra" shad' khyo hug' ra"- La hug' thoe re nao the' gyo: ngadqere: khokhyo" hug' lo: ru we' khokhyo hug' lo" nae" rure nao maba ngad: ra"- Byo: yang khau: ra" mo, yaug khao: ngo" re: ai we' dau: ra"- ga: ta" ra".

⁹Ailao" Nikodi wa ceru wa khoru: gai: boe" nae" i? ga: myid' ra".

¹⁰Yesu wa tau: mung:- nao wa Israel amyu mho" pho" aqi: dayaug ngad: to: mung:- cekhyo re nao maba i?

¹¹Nao re ngo dang za: ta" li"- ngonhaung" wa ngonhaung" yao: ba: ru ta" mung:- ngonhaung" yao: the' myao va" khyo re dam: ta" kyo: byid: ngadqere: ngonhaung mungdao: re naonhaung" khag' re: manug: khae: yu ngad: ako".

¹²Naonhaung" re ce: mug:myid dao: akhyo re ngo ta" kyo" re lhao"- ngo ta" rure malam" ko" ngad: re wa mug:gaung dao: akhyo re ngo ta" lao"- naonhaung" khoru: lam" genae" i?

¹³Mug:gaung dao mae" gyo" li" ra" Byu: Yao: Zo: mae" je yang: mug:gaung dao khyo khag' re: mado, lo" qu" shingad: ra".

¹⁴Yao: re lam: ra" mo, yaug khao: ngo" apyad ato: kao so' qo" yu nae" qhid' mae" Moshe wa din" pyad yo mae gyid: bo" lhao maui lho re zang au: mae to' to" ru we' dakhyo:- Byu: Yao: Zo: re: to' to" ru qhug' nae" ngad: ra".

¹⁶Pe"mung:ga"re Mao"So wa- mug:myid byu qere gyai jhid'de; mung:- yao: zo: re lam" ra" mo, yaug khao: ngo" wa mashid lo:- apyad ato: kao so' qo" yu genae" qhid' mae" yao" zote: zo: re byid' pye' ra".

¹⁷Pe"mung:ga"re mug:myid byu qere dao: kho' nae" qhid' mae" Mao:So wa yao: zo: re mug:myid dao khyo nhao: ke' ru mangad:- Mug:myid byu qere khyad' yu nae" qhid' mae" nhao: ke' ru ngad: ra".

¹⁸Mao"So: Yao: Zo: re lam" ra" yaug khag' ngadqere: dao: kho' ru maqhug' ngad: ra". Ngad yang: re: malam" ra" yaug kam" wa Mao"So: zote: zo: re malam: ruyang dao: kho' ru qhug' ava".

¹⁹Dao: kho' ra" khyo wa ceru: mung: ngad: ra"- Bo" bao wa mug:myid dao khyo joe" li" va" ngadqere:- byu qe wa yao: bam: makhyang" ra" mau" zo" jham: mathao: yang bo" bao re tho' mug:cad' re je: jhid'de; ako".

²⁰Makhyang" ra" lo, mau" kad' ra" yaug khag' ngadqere: bo" bao re nghang" ra". Yao: yao" makhyang" ra" mau" zo" mamyao: thug' li" nhao nug: ruyang yao: wa bo" bao khyo mali" ngad: ra".

²¹Ngadqere: dangman" ra" mau" zo" re zaui" ra" yaug kam" wa yao: zaui" ra" mau" zo" wa Mao"So o: ra" khyo ngad: rure bo" bao: yang qhu" byid: shao: ga: yao: wa bo" bao khyo li" ra".

²²Ai: thao re Yesu wa yao" mho"zo: qe we' daga" Yuda mung" khaung: khyo thug' ye" lo" mung:- ai: khaung: mae mho"zo: qe we' daga" yena yang: qid nyhab' byid' ra".

²³Yohan re: Salim mae" mataung" va" ra" Aenon ga" ra" jo, qo mae qid myo: sho' jo; ruyang qid nyhab' byid: yang: na: ra". Byu qe wa- yao: jhao" ye: mung:- Yohan wa- yao: bam re qid nyhab' byid' na: ra".

²⁴(Ce wa Yohan thaung: malaung" shire boe" ru ngad: ra".)

²⁵Yohan: mho"zo: qe daqhae: wa caung:pa" thung" we' sin" ra" cid' san: ra" khyo we' sin: mung:- Yuda byu dayaug we' jho" ta" ngag: ako".

²⁶Aimung: yao: bam wa Yohan jhao" ye: mung:- Mho" pho" we"- Yodan gyaung: thoete' ba thug' shad' mae nao we' daga" na mung:- nao sagse: kham byid' ra" yaug re nao mabeim: i? Yao: wa ana"- qid nyhab' byid: yang: na: ra"- Yaug khao: ngo" yao: jhao" ye" ako"- ga: ta" ako".

²⁷Yohan wa- Mao"So: yang za: mabyid: re wa khag' pe" maqo" yu ngad: ra"- ga: ta" ra"._

²⁸Ngo wa Meshia mangad:- yao" qhid' au: mae nhao: ke' ra" yaug angad: ein: ngo ta" va" ru wa naonhaung" yao: sagse: qe ngad: avako".

²⁹Myhi" sag' re sang: ra" yaug wa pho" sag' ngad: ra". Pho" sag' nho: ba nam pho" kam" wa- ayae mae ye; jo, yang:- pho" sag' thoe re tae" gyo" ra". Yao: wa pho" sag' thoe re the' gyo: lao"- gyai ngaui bau" ra". Airu: ngaui bau" ru wa ngo mae jab byang" li" va".

³⁰Yao: wa myo" laug: li" nae"- ngo kam" wa nang" lo" zai ngad:- ga: ta" ra".

³¹Mug:gaung khyo" joe" li" ra" yaug wa alhab' tho' je: qi" ra" yaug ngad: ra". Myidgaung dao mae" ngad: ra" yaug wa myidgaung byu ngad yang:- myidgaung dao we' sin" ra" khyo jham reza: ta" ra". Ngadqere: mug:gaung khyo" joe" li" ra" yaug wa alhab' tho' mae" yaug ngad: ra".

³²Yao: wa yao: the' myao va" ru we' the' gyo: va" ra" khyo re ta" ra"- ngadqere: yao" mungdao: re khag' re: makhae: yu shiko" ngad: ra".

³³Yao" mungdao: re khae: yu: ra" yaug kam" wa airu: khae: yu: ra" khyo" yang Mao"So wa dangman" ra" yaug ngad: rure jao dang byid: yaug ngad va".

³⁴Mao"So: yang nhao: ke' ra" yaug wa Mao"So: mungdao: re ta" ra"- pe"mung:ga"re Mao"So wa aiyaug re yao" Byo byang" sho' byid' ra".

³⁵Yao: Pho" wa yao: zo: re jhid'de; mung:- phung qam: so' alhab' yao" lo, mae byid' to" ra".

³⁶Mao"So: Yao: Zo: re lam: ra" yaug khag' ngadqere: apyad ato: kao so' qo" ra". Mao"So: Yao: Zo" mho dao re maphug' cao" ra" yaug khag' ngadqere: kao so' qo" nae" mangad:- yao: wa Mao"So: qobo dae byid' ra" khug mae na: jo; li" nae"- ga: ta" ra".