Read Maru YOHAN 4 Bible Online

YOHAN 4 - Maru bible

YOHAN 4

¹Yesu wa Yohan tho' mho"zo: je: qo" poe" yu mung:- qid nyhab' byid' na: ra" ga" rure Pharishe qe the' gyo" ako".

²Gaigai: yao: Yesu yao: yao: wa dayaug rere: qid nyhab' mabyid: ngad: ra". Yao" mho"zo: qeza: byid' ako".

³Airu Pharishe qe the' gyo: vako" ra" ga" rure Yesu yao: dam: the' gyo: lao"- yao: wa Yuda mung" mae" thug' lo" mung:- Galile mung" khyo dam: tug' lo" ra".

⁴Yao" gyaung: khyo wa Samari mung" khyo" su" lai: lo" ca" ra".

⁵Yesu wa Samari mung" mae" Sukha ga" ra" vogaung: khyo joe" lo: ra". Ai: vogaung: wa ganhae" pyad re Yaku yang yao: zo: Yoseb re byid' to" ra" yo myid nhae mae" Samari vogaung: dalam: ngad: ra".

⁶Ai: mae Yaku nho: qid thaung: jo; ra". Yesu wa khyo su" myaung: yang: qid thaung: nhae mae zaung: jo; ra". Amung: ayo, wa na" gaung ba khaung tau yo, ko ngad: ra".

⁷Samari myiqe: dayaug wa qid khae nae" ga: joe" li" ra". Ailao" Yesu wa Ngo re qid byid: jhaug' la,- ga: yao: re mho' ra".

⁸(Yao" mho"zo: qe wa zo:ve vai nae" qhid' mae" vogaung: khug khyo vao ye" lo" byaug: ako".)

⁹Samari myiqe: wa Nao wa Yuda byu ngad mung:- ngo wa Samari byu ngad:- Khorumung: nao ngore shaug' qid mho' i? ga: ta" ra". (Pe"mung:ga"re Yuda byu qe wa- Samari byu qe ci: ra" keim kang: re malhaung" ci ko" ngad: ra".)

¹⁰Ailao" Yesu wa Mao"So byid' ra" jhaung qhu" we' nao re qid mho' shaug' na: ra" yaug khag' ngad: rure nao ba: ngad: re wa- nao wa yao: re mho' mung:- yao: wa nao re daui: ra" kao so' qid byid' li" nae"- ga: yao: re phaug' tau" ra".

¹¹Ai: myiqe: wa- Nhag' bo we"- nao wa qid khae nae" qid pung" re: maqo" ngad: ra"- aimung: qid thaung: re: gyai no; ra"- ai: kao so' qid nao khai: mae" qo" yu nae" i?

¹²Ce: qid thaung: wa ngonhaung" phug' pho" Yaku yang ngonhaung" re byid: co' ra" qid thaung: ngad: ra". Phug' pho" Yaku yao: yao: re:- yao: zo: qere:- yao" gug'nyhug'jham re: ce: qid thaung: mae" shaug' lai: lo" vako" ra"- nao wa Yaku tho' je: qi" i? ga: yao: re ta" ra".

¹³Yesu wa ce: qid shaug' ra" yaug khag' ngadqere: qid dam: shab' shinae"-

¹⁴Ngo byid: nae" ra" qid re shaug' ra" yaug kam" wa khonhae" re: qid madam: shab' nae"- yao: re ngo byid: nae" ra" qid wa yao" khug mae kao so' qid thug' boe" mung:- ai wa yao: re kao so' qid we' apyad ato: kao so' byid' li" nae" ga: tau" ra".

¹⁵Ai: myiqe: wa Nhag' bo we"- ngo wa qid madam: shab' nae" we'- cekhyo qid mali" khae ca" nae" qhid' mae" ngore ai: qid byid: la,- ga: ta" ra".

¹⁶Yesu wa yao: re Ni" yham sang pho" re lo" khai: yu yang: dam: li" ri:- ga: ta" ra".

¹⁷Ai: myiqe: wa Ngo yham sang pho" maqo" ga: tau" ra". Yesu wa yao: re- ngo yham sang pho" maqo" ga:- nao ta" ru wa jo: ra".

¹⁸Nao wa yham sang pho" ngo" yaug qo" qu" va"ra"- ana" nao we' daga" na: ra" yaug wa ni" yham sang pho" mangad: ngad: ra"- nao wa ngore dang: ru ta" ava"- ga: ta" ra".

¹⁹Ai: myiqe: wa Nhag' bo we"- nao wa lapa ngad: rure ngo ba va"- ga: ta" ra".

²⁰Nga" phug' pho" qe wa ce: bam dao mae Mao"So re caung:pa" lo: ako". Ngadqere: naonhaung" Yuda byu qe wa Yerusalem vogaung: mae caung:pa" ca" ga: ta" ako"- ga: ta" ra".

²¹Yesu wa yao: re Myiqe: we"- nga" dao: re lam" wa,- ce: bam dao mae re: mangad:- Yerusalem vogaung: mae re: mangad: lo:- Pho" re caung:pa" nae" ayo, joe" lo: li" nae".

²²Naonhaung" Samari byu qe wa naonhaung" yao: maba: ra" yaug re caung:pa" ako"- ngadqere: ngonhaung" Yuda byu qe wa ngonhaung" yao: ba: ra" yaug re caung:pa" na:- pe"mung:ga"re khyad' yu: ru wa Yuda byu qemae" joe" li" ra".

²³Byu qe wa Mao"So: Byo qam: so' khyo" yang Pho" re dangman" ra" khyo" caung:pa" nae" ra" ayo, joe" lo: na: ra"- ana" lhao" joe" ava". Mao"So wa airu: caung:pa" mo, re o ngaui: ra".

²⁴Mao"So wa Byo ngad: ra". Amung: yao: re caung:pa" ra" mo, wa Mao"So: Byo qam: so' khyo" yang za: dangman" ra" khyo" yao: re qo" caung:pa" ako"- ga: ta" ra".

²⁵Ai: myiqe: wa Yesu re- Meshia joe" li" nae" rure ngo ba: ra"- yao: joe" li" lao"- ngonhaung" re khyo ja: cao jab li" ta" kyo" li" nae"- ga: tau" ra".

²⁶Yesu wa Nao we' jhau: na: ra" yaug ngo wa yao: ngad va"- ga: yao: re ta" ra".

²⁷Ai: ayo, mae mho"zo: qe dam: tug' joe" lo: ako". Yao: bam wa Yesu re myiqe: dayaug we' jho" jhau: na: rure lomyao gemung:- gyai mug' hao" byaug: ako". Ngadqere: ai: myiqe: re Nao pe" o: i? ga: re:- Yesu re Nao ai: myiqe: we' pe"mung: dao: jho" jhau ko" i? ga: re:- khag' re: yao: bam mavae" myid: ngad: ako".

²⁸Ailao" ai: myiqe: wa yao" qid yae: re to: co' mung:- vogaung: khyo dam: tug' lo" yang: vobyu qere-

²⁹Ngo zaui" lai: lo: ra" khyo alhab' re ngore ta" kyo: yaug re li" qu" geri:- yao: wa Meshia ngad nae" laug? ga: lo" ta" ra".

³⁰Airumung: vobyu qe wa vogaung: mae" Yesu jhao" thug' ye" lo" ako".

³¹Ai: au: re mho"zo: qe wa Asang we"- zozo: wa,- ga: Yesu re ta" ako".

³²Ngadqere: Yesu wa naonhaung" maba: ra" zo:ve ngo qo"- ga: yao: bam re phaug' tau" ra".

³³Airumung: mho" zo:qe wa byu dayaug yaug; yang yao: re zo:ve li" byid: vasam" ra" i? ga: yao: bam yao: cao: jho" myid' na: ako".

³⁴Yesu wa yao: bam re- Nga" zo:ve wa ngore nhao: ke' ra" yaug myid o: ra" khyo re phug' cao" nae" we' yao: zaui: nhao: to" ra" mau" zo" re kyab' sho' zaui: nae" ru ngad: ra".

³⁵Naonhaung" wa gaug yad yo, joe" nae" lho" byid khye' ca" shi" ga: ta: na: ako" mangad: i? Ngadqere: ngo naonhaung" re ta" geli"- Gaug yo khyo nyang" za: qu" ke' ge,- Gaug wa yad: yu nae" ana" yao: mhang" jo; ava".

³⁶Yad: ra" yaug wa aphug' qo" khae: yu mung:- apyad ato: kao so' ga" ra" gaug zo re qo" jham" yu: ra". Airu: mung: qho: yaug we' yad: yu yaug wa daga" za: ngaui bau" li" genae".

³⁷Dayaug wa qho: mung: dayaug wa yad: yu: ra"- ga" ra" dao:khyo: wa dang: ra".

³⁸Ngo wa naonhaung" re- naonhaung" yao: masin: maqho" ra" yo mae" gaug zo re yad: yu nae" qhid' mae" nhao: ke' va". Gatau damyo" wa ai: yo mae qho: mung:- yao: bam: lo, mau" akyu" mae" naonhaung" qo" kham: yu: ako"- ga: ta" ra".

³⁹Pe"mung:ga"re yao: wa Ngo kad' lo: ra" khyo alhab' re ngore ta" kyo: yaug ngad: ra"- ga: ai: myiqe: myhi" yang ta" ruyang ngad: ra". Ai: vogaung: mae" Samari byu qe myo: sho' mo, Yesu re lam" ako".

⁴⁰Airumung: Samari byu qe Yesu jhao" joe" li" gelao"- yao: bam wa Yesu re yao: bam we' daga" thang: na nae" qhid' mae" mho' ako". Aimung: Yesu wa ai: vogaung: mae shid' ba thang: na: ra".

⁴¹Yesu mungdao" yang yao: re lam" ra" mo, je: myo" lo: ako".

⁴²Aimung: yao: bam wa ai: myiqe: re Ana"- ngonhaung" lam" va"- Aiwa nao ta" yang: mangad:- yao" mungdao: re ngonhaung" yao: the' gyo" yu va" rumung: lam" ru angad:- yao: wa gaigai: yao: mug:myid dao: mae" khyad' yu: Asang ngad: rure ngonhaung" ba va" ga: ta" ako".

⁴³Ai: vogaung: mae shid' ba bin: na co' thao- Yesu wa ai: vogaung: mae" Galile mung" khyo ye" lo" ra".

⁴⁴Pe"mung:ga"re lapa wa yao: yao" mug; mae nga: maye, ngad: ra"- ga: Yesu yao: yao: ta" to" ra".

⁴⁵Galile mug: khyo Yesu joe" ye: lao"- Galile mang: byu qe wa yao: re lham: tug: yu: ako". Pe"mung:ga"re yao: bam wa Yerusalem mae kad' ra" Lai co' Poe mae yeleim mung:- ai: poe ba na gyo: mae Yesu kad' ra" mau" ja: khao: ngo" re yao: bam the' myao: ako".

⁴⁶Ai: thao Yesu wa qid re sabyi qang: boe" nhao: ra" Galile mung" mae" Kana vogaung: khyo dam: ye" ra". Ai: vogaung: mae" Asuya mang: zug: dayaug: yauggai zo: wa Kapena-um vogaung: mae no: na: ra".

⁴⁷Yesu wa Yuda mung" mae" Galile mung" khyo joe" lo: ra"- ga" rure ai: zug: pho" the' gyo: lao"- yao: wa Yesu jhao" ye: mung:- Kapena-um vogaung: mae no yang: shid: lo" na: ra" yao" yauggai zo: re yegai byid: nae" qhid' mae" Yesu re mho' ra".

⁴⁸Yesu wa yao: re- Naonhaung" wa ve, lho we' mug'pho: za: mamyao gere wa khag' re: lam" genae" mangad:- ga: ta" ra".

⁴⁹Ai: zug: pho" wa Nhag' bo we"- nga" zo: mashid shire li" wa,- ga: phaug' tau" ra".

⁵⁰Yesu wa yao: re- Lo" wa,- ni" yauggai zo: wa daui nae"- ga: ta" ra". Ailao" yao: wa Yesu dao: re lam" yang: dam: lo" ra".

⁵¹Yao: phao: lo" na: au:- yao" daui daui mo, joe" li" mung:- ni" zo: daui: na: ra" ga: li" ta" kyo" ako".

⁵²Amung: yao: wa yao: bam re- yao" yauggai zo: khoyo, mae" gai: li" rure myid' ra". Daui daui mo, wa ayenhe' myi" thao dayo, qug ko re yao: wa no gai: lo" byaug: ra"- ga: tau" ako".

⁵³Ailao" yao: pho" wa ai: ayo, wa- Ni" yauggai zo: wa daui nae"- ga: yao: re Yesu ta" ra" ayo, yao: ngad: rure myid: beim" ra". Airumung: yao: we' yao" yham byu qe alhab' Yesu re lam" ako".

⁵⁴Ceru wa Yuda mung" mae" Galile mug: khyo joe" lo thao re shid' lhang ein: lhang Yesu zaui" ra" mug: pho: ve,lho ngad: ra".