Read Maru YOHAN 5 Bible Online

YOHAN 5 - Maru bible

YOHAN 5

¹Ai: thao Yesu wa Yuda byumyu" qe: caung:pa" thung" dalam: jo, yang:- Yerusalem vogaung: khyo ye" lo" ra".

²Yerusalem vogaung: mae" Yao Kham: Dung: nhae mae Hebre myan" khyo" Bedzatha ga: mhang" ra" qid kyaung" dalam: jo; ra". Ai: qid kyaung" lhang" yang: zaung ngo" lam: kad' to" ako".

³Ai: zaung jham: akhug mae myo, jid- khyid qeim mo,- gaung jam: shid: mo,- no phyo: qhug' ra" mo, myo: sho' lang" jo; bam: ako".

⁴Ai: mae sam xe: she' zin lam: lam: no: ra" byu dayaug na: ra".

⁵

⁶Yao: airu: lang" jo; rure Yesu myao mung:- yao: no: na: ru gyai myao" va" rure Yesu ba: ra". Aimung: Yesu wa ai: no yaug re- Nao no gai: lo" nug: i? ga: myid' ra".

⁷Ai: no yaug wa Nhag' bo we"- qid lab: li" ra" au:- qid kyaung" khyo ngore jhui" vao ye: nae" byu cemae ngo maqo"- ngo vao ye: nae" seim" na: au:- nga" qhid' re su gaje dayaug yaug shi" vao ye" lo" byaug byaug mung: ra"- ga: Yesu re ta" ra".

⁸Yesu wa yao: re To" wa,- ni" yab qo re gaug: vo, yang:- su" lo" wa,- ga: ta" ra".

⁹Ailao"- aiyaug wa gai: lo" mung: yao" yab qo re gaug; vo, yang: su" lo" ra". Ai: ba wa Dugno: Ba ngad: ra".

¹⁰Aimung: kheim: so' qo" ra" Yuda qe wa ai: no gai: lo" yaug re- ana" ba wa Dugno: Ba ngad: ra"- ni" yab qo vo; ru wa ngonhaung" Tarha" re lhoe" ru ngad: ra"- ga: ta" ako".[1]

¹¹Ailao"- yao: wa Ngo re no gai byid' ra" yaug wa ni" yab qo gaug: vo, yang: su" lo" wa,- ga: ngore ta" ra"- ga: phaug' tau" ra".

¹²Yao: bam wa yao: re- Nao re ceru: kad' nae" ta" yaug wa khag' ngad: i? ga: myid' ako".

¹³Ngadqere: ai: no gai: lo" ra" yaug wa Yesu khag' ngad: rure yao: maba ngad: ra". Pe"mung:ga"re ai: jo, qo mae mo, byu qe ham: na ko" ru we' Yesu wa sae za: khug' phao: thug' lo" byaug yang: ngad: ra".

¹⁴Ai: thao Yesu wa aiyaug re caung:pa" Yham mae the' myao mung: yao: re- Tae" gyo: wa,- nao wa ana" no gai: ava"- Qobo dakad' lo: wa,- airu: mangad: re nao wa cetho' xo: ru qhug' li" nae"- ga: ta" ra".

¹⁵Ailao"- aiyaug wa thug' lo" mung:- yao: re no gai byid: yaug wa Yesu ngad: rure kheim: so' qo" ra" Yuda qere lo" ta" kyo" ra".

¹⁶Airumung: yao: bam wa Dugno: Ba mae Yesu no gai byid' ruyang yao: re yhin" qhid: li" ako".

¹⁷Yesu wa yao: bam re- Nga" Pho" wa khonhae" re: mau" zaui" na:- amung: ngore: mau" zaui: ca"- ga: ta" ra".

¹⁸Ce: dao: thoe: yang kheim: so' qo" ra" Yuda qe wa yao: re se' nae" je yang: myid: phyid' ako". Pe"mung:ga"re yao: wa Dugno: Ba: tarha" re lhoe" ruyang za: re: mangad:- Mao"So re yao: Pho" ga: ta" mung:- yao: yao" gaung re Mao"So we' daqi" ngad: ra" khyo" kad' ruyang ngad: ra".

¹⁹Airumung: Yesu wa yao: bam re Naonhaung" re ngo dang za: ta" geli"- yao:Zo: wa yao: yao" myid khyo" pe" re: maqo" kad' ngad: ra". Yao: Pho" kad' na: rure yao: myao: ra" gu: re za: yao: kad' ra"- yao:Pho" kad' rure Yao:Zo: re: kad' ra".

²⁰Pe"mung:ga"re Yao:Pho" wa Yao:Zo: re jhid'de; mung: yao: yao: kad' na: ra" mau" zo" alhab' Yao:Zo: re qhu" byid' ra". Cetho' je: qi" ra" mau" re zaui: nae" lhao" re:- yao:Zo: re qhu" byid' li" nae". Amung: naonhaung" wa mug' hao" byaug: li" genae".

²¹Yao:Pho" wa shid: ra" mo, re tau: to' yu mung:- yao: bam re kao so' byid' ru we' dakhyo:- yao:Zo: re: yao: o ngaui: ra" mo, re kao so' byid' ra".

²²Yao:Pho" yao: yao: wa khag' rere: dao: makho' ngad: ra".

²³Byu alhab' wa Yao:Pho" re phug' te' byid' ru we' dakhyo:- yao:Zo: rere: phug' te' byid: genae" qhid' mae" yao: Pho" wa dao: kho' nae: akho: akhang" alhab' Yao:Zo: re byid' to" ra". Yao: Zo: re nga: mayhe' byid: yaug khag' ngadqere: yao: Pho" re nga: mayhe' byid: ngad: ra".

²⁴Naonhaung" re ngo dang za: ta" geli"- nga" dao: thoe re gyo" yu mung:- ngore nhao: ke' ra" yaug re lam" ra" yaug wa apyad ato: kao so' qo" yu: ra"- Shid: rumae" kao so' daui: ru khyo lai: lo va" yaug ngad mung: yao: wa dao: kho' ru maqhug' nae".

²⁵Naonhaung" re ngo dang za: ta" geli"- shid: jo; ra" mo, wa Mao"So: Yao: Zo" thoe re the' gyo: nae" ayo, joe" lo: li" nae"- ai: ayo, wa ana" lhao" joe" ava". Aimung: ai: thoe re the' gyo" ra" mo, wa kao so' qo" daui: li" genae".

²⁶Yao: Pho" wa yao: yao: kao so' ajhaung ngad: ru we' dakhyo:- yao:Zo: rere: kao so' ajhaung boe" nhao: to" ra.

²⁷Yao: wa Byu:Yao:Zo: ngad: ruyang dao: kho' nae" akho: akhang" yao: re ab byid' to" ra".

²⁸Ceru re damug' ge,- shid; jo; ra" mo, alhab' wa yao" thoe re the' gyo: mung:- yao: bam: lab mae" thug' li" genae" ra" yo, khyin: joe" lo: li" nae".

²⁹Gai: ra" mau" zo" kad' ra" mo, wa kao so' daui: ra" khyo- magai: ra" mau" kad' ra" mo, wa dao: phyid' qhug' nae" ra" khyo- daui: to" li" genae".[2]

³⁰Ngo wa ngoyao" kheim: so' khyo" pe" re: maqo" kad'- Mao"So ngore ta" ru we' dakhyo: za: ngo wa dao: kho' ra". Amung: nga" dao: kho' ru wa din: vang" ra"- pe"mung:ga"re ngo wa ngoyao: myid: o: ra" khyo" kad' ru mangad:- ngore nhao: ke' ra" yaug myid o: rure za: kad' ra".

³¹Ngo wa ngoyao" gaung re sagse: kham: yu: ngad: re wa nga" sagse: kham: ra" dao: wa tarha" mavao ngad: ra".

³²Ngadqere: nga" khyo re sagse: kham byid: yaug gatau dayaug na: ra"- yao: kham: ra" sagse: dao: wa dang: rure ngo ba:.

³³Naonhaung" wa Yohan jhao" naonhaung" lagyo: nhao: ke' mung:- yao: wa dangman" rure sagse: kham byid' ra".

³⁴Aiwa nga" qhid' mae" byu dayaug yaug: yang sagse: kham byid: qo mung: mangad:- ngo ce: dao: re ta" ru wa naonhaung" khyad' yu: ru qhug' genae" qhid' mae" ngad: ra".

³⁵Yohan wa myishae de, mung: bao: jo; ra" myibaung: ngad: ra". Naonhaung" wa yao" bo" bao khug mae dazab za: pyo" na nug: ako".

³⁶Ngadqere: Yohan kham byid' ra" sagse: tho' je: qi" ra" sagse: ngo qo" ra". Ngo kad' ra" mau" wa Nga" Pho" yang ngore nhao: ra" mau" ngad mung:- aijham wa ngore Nga"Pho" yang nhao: ke' ru ngad: rure sagse: qhu" byid' ra".

³⁷Ngo re nhao: ke' ra" Nga"Pho" yao: re:- nga" khyo re sagse: kham byid' ra". Naonhaung" wa yao" thoe re khonhae" re: magyo" qu" ru we' yao" myo,khung: re mamyao: qu" ko" ngad: ra".[3]

³⁸Yao" mungdao: re: naonhaung" nhag' lam: khug mae make' to: ngad: ako". Pe"mung:ga"re naonhaung" wa yao" yang nhao: ke' ra" yaug re malam" ko" ngad: ra".

³⁹Naonhaung" wa jham: mugsug' mae apyad ato: kao so' the' myao: li" nae"- ga: myid: jho geyang: jham: mugsug' jham re nghe' xeim: ako".

⁴⁰Ai: jham: mugsug' jham yao: re:- nga" khyo re sagse: kham byid' ako". Ngadqere: naonhaung" wa kao so' qo" yu nae" qhid' mae" ngojhao" manug: li" ko" ngad: ra".

⁴¹Ngo wa byu: yang caung:khin" nae" khyo re maqho-

⁴²ngadqere: naonhaung" pe" ru" ra" byu qe ngad ko" rure ngo ba: ra". Naonhaung" aung khug mae Mao"So re jhid'de; ra" myid mabo ko" rure ngo ba:.

⁴³Ngo wa Nga"Pho" kheim: so' we' joe" li" yaug ngad:- ngadqere: naonhaung" ngore malham: khae: yu ko" ngad: ra". Dayaug yaug yao: yao" kheim: so' we' joe" li" re wa yao: re naonhaung" lham: khae: yu genae" ngad: ako".

⁴⁴Naonhaung" wa yao: cao: yao" yang caung:khin" rure kham: yu nae" o mo, ngad: ako". Ngadqere: date: za: ngad: ra" Mao"So: yang caung:khin" rure qo" kham: yu nae" wa naonhaung" qam: make' ko" ngad: ra". Airu: angad: re wa naonhaung: ngore khoru: qo" lam" genae" i?

⁴⁵Ngadqere: ngo wa naonhaung" re Nga"Pho" qhid' kheim: mae qobo zhaug' nae" yaug ngad: ein: dajho ge,- naonhaung" re qobo zhaug' nae" yaug wa naonhaung: yao: myid: lao" na ko" ra" Moshe yaug angad: li" nae".

⁴⁶Naonhaung" Moshe re gaigai: yao: lam" vako" ngad: re wa ngo rere: lam" genae" ngad: ra"- pe"mung:ga"re Moshe wa nga" khyo re tung" to" ra".

⁴⁷Moshe tung" to" rure naonhaung" malam" gere wa naonhaung" nga" dao: re khoru: qo" lam" genae" i? ga: ta" ra".