Read Maru YOHAN 6 Bible Online

YOHAN 6 - Maru bible

YOHAN 6

¹Ai: thao re Yesu wa Galile tham: (Tiberia tham: ga: re: mhang" ako") thoete' khyo gau" ye"lo" ra".

²No phyo: qhug' ra" mo, re gai byid' ra" mug' pho: ve, lho jham re mo, byu qe the' myao gemung:- byu phung: mo" zang Yesu thao cao" ako".

³Yesu wa bug gaung dalam: khyo Do, ye: mung:- yao" mho"zo: qe we' daga" yezaung: jo; ra".

⁴Lai co' Poe kad' nae" ba na jhao" li" na: ava".

⁵Yesu qu" ke' re mo, byu qe ajham ataung- yao: jhao" li" na ko" rure myao mung:- Philib re ai: mo, byu qere laug: zho: nae" zo:ve ngonhaung" khai: mae yevai zai laug i? ga: myid' ra".

⁶(Yesu airu: myid' ru wa Philib re jham" qu" ru ngad: ra". Yao: wa khoru: kad' nae" rure ba: to: gau ngad: ra".)

⁷Ailao" Philib wa yaug khao: ngo" re dajhid' jhid' za: byid: zho: nae" lhao" re:- ngaui shid' yo: yang vai: re lhao" re: malaug zai ngad: ra"- ga: phaug' tau" ra".

⁸Yesu mho"zo: qemae" Simon Petru; yao: nhaung: Andre wa

⁹Bale mug ngo" khai" we' ngo: shid' dau: vin: ra" yauggai nau" dayaug cetau mae na: ra"- ngadqere: aigu" yang za: wa mo,byu qe alhab' qhid' mae" laug nae" mangad:- ga: ta" ra".

¹⁰Yesu wa Mo,byu qere zaung nhao ge,- ga: yao: bam re ta" ra". (Aimae vahau: gyai yaug: ra") Aimung: mo,byu qe alhab' zaung: jo; ako"- Yauggai qe ngo" taung ko ngad: ako".

¹¹Yesu wa ai: mug re yu: yu mung: Mao"So re jeju bin: caung: byid: lao"- aimae zaung: jo, ko" ra" mo, byu qere gae byid' ra". Ngo: rere: ai we' dakhyo: kad' ra"- Mo,byu qe wa yao: bam o: nho" zo" ako".

¹²Yao: bam alhab' mo, zo" gyi: vagelao"- Yesu wa amyid: avho: maboe" vashao:- zo" tang" ra" aje, aman" jham re gaug: zhang: yu ge,- ga: yao" mho"zo: qere ta" ra".

¹³Aimung: yao: bam wa alhab' re gaug: zhang: yu ko" re- bale mug ngo" khai" mae" mo, byu qe zo" tang" ko" ra" aje, aman" jham daxe: shid' gyan byang" sho' qo" gaug: zhang: yu: ako".

¹⁴Yesu kad' ra" ce: mug' pho: ve, lho re the' myao ko" ra" mo,byu qe wa Ceyaug wa dang za: mug:myid dao khyo joe" li" nae" ga: ta" to" ra" lapa yao: ngad nhaung? ga: ta" ako".

¹⁵Yesu wa yao: bam li" taung" yu yang:- maqad maqui" kho:kham kad' nhao: li" genae" rure ba mung:- bug gaung khyo yao: za: dam: do, ye" lo" ra".

¹⁶Myi" thao joe" lao"- Yesu mho"zo: qe wa Galile tham: khyo gyo" ye" lo" mung:-

¹⁷lha dakhye' dao yedo; zaung yang:- tham: thoete' mae" Kapena-um khyo dam: tug' gau" phao: lo" ako". Mug: cad' lo ngadqere: Yesu wa yao: bam jhao" majoe" lo shingad: ra".

¹⁸Ai: au: re la qam" hug' lo mung:- tham: mae bang: lhung" to" li" ra".

¹⁹Mho"zo: qe wa khyo sam byid man: vha" ko bin: gau" lo" gethao re- Yesu wa qid dao mae khyo su" lo: na mung:- lha khyo te' lo: na: rure yao: bam myao gelao"- yao: bam wa gyaug: din: pye' ako".

²⁰Yesu wa dagyaug ge,- ngo angad: ga: yao: bam re ta" ra".

²¹Ailao"- yao: bam wa Yesu re ngaui bau: za: lha dao khyo lham: to' yu: ako". Ailao"jao"- lha wa yao: bam thang nug: ra" jo, qo khyo joe" lo: ra".

²²Thao: ba re tham: thoete' mae thang: na geco' ra" mo,byu qe wa aitau mae lha dakhye' za: jo; rure myid: beim" li" ako". Amung: ai: lha dao mae Yesu maye: bozaung lo:- yao" mho"zo: qeza: gau" lo" ko" rure yao: bam ba: ako".

²³Ngadqere: Tiberia te' mae" lha jham wa Yesu jeju bin: caung: byid: thao re mo,byu qe mug zo" gyi: ko" ra" jo, qo nhae khyo joe" lo: ako".

²⁴Mo,byu qe wa aitau mae- Yesu re:- yao" mho"zo: qere: mana loko" ga" rure ba gelao"- yao: bam wa ai: lha jham: dao mae yedo; zaung mung:- Yesu re qho nae" qhid' mae" Kapena-um khyo gau" de; ye" ako".

²⁵Mo,byu qe wa tham: thoete' mae Yesu re yemyao gelao"- yao: bam wa Mho" pho" we"- nao cekhyo khonhae" joe" lo: i? ga: yao: re myid' ako".

²⁶Yesu wa Naonhaung" re ngo dang za: ta" geli"- naonhaung" ngore qho ko" ru wa ngo kad' qhu" ra" mug' pho: ve, lho jham: lajheim: re ba: gyo: geyang: mangad: ko" ngad: ra". Naonhaung" o: ra" nho" mug qo" zo" gyi: geyang: angad ko" ra".

²⁷Bab: qeim: lo" ba: ra" zo:ve qhid' mae" qam: dake' ge,- Mabab maqeim: lo" ra" apyad ato: kao so' zo:ve qhid' mae" qam: ke' ge,- Byu: Yao: Zo: wa ce: zo:ve naonhaung" re byid' li" nae". Pe"mung:ga"re Pho" Mao"So wa yao: myid vang" ra" aso: dazid re yao" dao mae thaung" te' to" ra".

²⁸Airumung: yao: bam wa Mao"So o: ra" mau" re qo" zaui: nae" qhid' mae" ngonhaung" khoru: kad' nae" i? ga: Yesu re myid' ako".

²⁹Yesu wa Naonhaung" re zaui: nhao: ra" Mao"So o: ra" mau" wa yao" yang nhao: ke' ra" yaug re lam" nae" qhid' mae" ngad: ra" ga: tau" ra".

³⁰Yao: bam wa Ngonhaung" nao re lam" nae" qhid' mae" nao ngonhaung" re pe" ve, lho kad' qhu" nae" i? Nao pe" mau" kad' nae" i? ga: phaug' tau" ako".

³¹Jham: mugsug' mae Mao"So wa yao: bam re mug:gaung mae" mug byid: zho" ra"- ga: ta" to" ru we' dakhyo:- ngonhaung" phug' phyid' qe wa din"pyad' yo mae Mana mug zo: vako" ra" ga: phaug' tau" ako".

³²Yesu wa Ngo naonhaung" re dang za: ta" geli"- Moshe naonhaung" re byid' ru wa mug:gaung mae" mug mangad:- ngadqere: nga" Pho" wa naonhaung" re mug:gaung mae" mug agyang" byid: yaug ngad: ra".

³³Pe"mung:ga"re Mao"So byid' ra"ai: zo:ve agyang" wa mug:gaung mae" gyo" li" mung:- Myid gaung byu qere kao so' byid' ra" yaug ngad: ra"- ga: ta" ra".

³⁴Yao: bam wa Nhag' bo we"- ngonhaung" re ce: mug khonhae" re: byid' na la,- ga: mho' ako".

³⁵Yesu wa yao: bam re Ngo wa kao so' zo:ve ngad:- ngojhao" li" ra" yaug wa khonhae" re: vae: mamoe; nae"- ngore lam" ra" yaug wa khonhae" re: qid mashab' nae"-

³⁶Ngadqere: naonhaung" wa ngore myao gengadqere: malam" genae"- ein: ngo naonhaung" re ta" va".

³⁷Nga" Pho" yang ngore byid' to" ra" mo, yaug khao: ngo" ngojhao" li" li" genae". Ngo jhao" li" ra" yaug khag' rere: ngo khonhae" re: manhao: tug' ke' nae".

³⁸Pe"mung:ga"re ngo wa ngoyao: myid o: ra" khyo" kad' nae" qhid' mae" mug:gaung khyo" gyo" li" ru mangad:- ngore nhao: ke' ra" yaug: myid o: ra" khyo" kad' nae" qhid' mae" gyo" li" ru angad:-

³⁹Ngo re nhao: ke' ra" yaug myid o: ru wa yao" yang ngore byid' to" ra" mo, alhab' mae" dayaug rere: majeim: nhao lo:- lo" thao" ra" ba na mae shid: rumae" dam: daui: to" li" nhao nae" qhid' mae" ngad: ra".

⁴⁰Pe"mung:ga"re nga" Pho" myid o: ru wa Yao:Zo: re myao: ra" mo, alhab' wa lam" mung: apyad ato: kao so' qo" yu genae" qhid' mae" ngad: ra". Amung: ngo wa lo"thao" ra" ba na mae shid: rumae" kao so' daui: to" li" nhao nae"- ga: ta" ra".

⁴¹Ailao" Yesu wa ngo wa mug:gaung mae" gyo" li" ra" mug ngad:- ga: ta" ra" dao" yang mo,byu qe wa nyhung: li" ako".

⁴²Aimung: yao: bam wa ceyaug wa Yoseb: yao: zo: Yesu mangad: i? Yao: pho" yao: myhi" tao rere: ngonhaung" ba: mangad: i? Aire khoru: mung: ngo wa mug:gaung mae" gyo" li" yaug ngad: ga: yao: ta" i? ga: ta" ako".

⁴³Yesu wa naonhaung" yao: cao: nyhung: na: ru thang: pye' ge,.

⁴⁴Ngo re nhao: ke' ra" Pho" yang ngojhao" malao" te' byid: re khag' re: ngojhao" maqo" te' li" ngad: ra". Ngo wa ngojhao" li" ra" yaug re lo" thao" ra" ba na mae shid: rumae" daui: to" li" nhao nae"-

⁴⁵Byu yaug khao: ngo" wa Mao"So: yang mho" byid' ru qhug' li" genae"- ga: lapa qe tung" to" ako". Nga" Pho" ta" ra" dao: re the' gyo: mung:- zhao: yu: ra" yaug wa ngojhao" li" ra".

⁴⁶Ceru: ta" ru wa Mao"So re myao: qu" byu dayaug yaug na: ein: khyo" ngo ta" nug: ru mangad:- Mao"So mae" joe" li" ra" yaug za: Pho" re myao: qu" ra".

⁴⁷Naonhaung" re ngo dang za: ta" geli"- Lam" ra" yaug wa apyad ato: kao so' qo" ra".

⁴⁸Ngo wa kao so' mug ngad:-

⁴⁹Naonhaung" phug' phyid' qe wa din"pyad' yo mae Mana mug re zo: gengad yang: re:- yao: bam shid: lo" byaug: ako".

⁵⁰Ngadqere: mug:gaung mae" gyo" li" ra" ce: mug re zo" ra" yaug wa mashid nae".

⁵¹Ngo wa mug:gaung mae" gyo" li" ra" kao so' mug ngad:- ce: mug re zo" ra" yaug wa apyad ato kao so' daui: na: li" nae"- ngo byid: nae" ra" mug wa myid gaung byu qe daui: na nae" qhid' mae" nga" gaung sho: ngad: ra"- ga: ta" ra".

⁵²Ailao" yao: bam wa- ngonhaung" re yao" gaung sho: khoru: qo" byid: zho: nae" ga" laug i? ga: ta" mung: yao: bam yao: cao: ayo: athaung" jho" ta" ngag: qhid: li" ako".

⁵³Yesu wa yao: bam re- Naonhaung" re ngo dang za: ta" geli"- naonhaung" wa Byu:Yao:Zo" nho: gaung sho: re mazo:- yao" sa: re mashaug' ko" re wa naonhaung" yao" khug mae kao so' mabo genae"-

⁵⁴Nga" gaung sho: re zo: mung:- nga" sa: re shaug' ra" yaug khag' ngadqere: apyad ato: kao so' qo" ra". Aimung: lo" thao" ra" ba na mae ngo wa yao: re shid: rumae" daui: li" nhao nae".

⁵⁵Pe"mung:ga"re nga" gaung sho: wa zo:ve agyang" ngad:- nga" sa: re: shaug' ja: agyang" ngad:-

⁵⁶Nga" gaung sho: re zo: mung:- nga" sa: re shaug' ra" yaug khag' ngadqere: yao: wa nga" khug mae kao so' daui mung:- ngore: yao: mae kao so' daui: na: ra".

⁵⁷Daui: na: ra" nga" Pho" wa ngore nhao: ke' mung: yao" mathao: yang ngo wa kao so' daui: na: ru we' dakhyo:- nga" gaung sho: re zo" ra" yaug khag' ngadqere: nga" mathao: yang kao so' daui: na: li" nae".

⁵⁸Ce: mug wa mug:gaung mae" gyo" li" ra" zo:vae ngad: ra"- naonhaung" phug' phyid' qe zo: mung:- thao re shid: lo" ba: ra" ai: mug ru" ru mangad:- ce: mug re zo" ra" yaug wa apyad ato kao so' daui: na: li" nae"- ga: ta" ra".

⁵⁹Ceru wa Kapena-um vogaung: mae" Tarha" Jung Yham mae mho" shid' na: ra" au:- Yesu ta" ra" dao: ngad: ra".

⁶⁰Yao" thao cao" ra" mo, myo: sho' wa cedao: re the' gyo: gelao"- ce: mho" shid' khyo wa saung" qug' ra"- Khag' qo" kham: yu nae" i? ga: ta" ako".

⁶¹Yao: bam airu: nyhung: na ko" rure Yesu ba mung: yao: bam re- Ce: dao" yang naonhaung" qam: shan vako" i?

⁶²Byu:Yao:Zo: wa azhao yao: na: ra" jo, qo khyo dam: do, lo" rure naonhaung" myao gelao"- khoru: ein genae" i?

⁶³Kaoso' daui nhao: ru wa Mao"So: Byo ngad: ra"- Byu: qam: so' yang pe" maqo" kad' ngad: ra". Naonhaung" re ngo ta" kyo" ra" mungdao: jham wa kao so' daui nhao: ra" Mao"So: Byo re qo" nhao: ra".

⁶⁴Ngadqere: naonhaung" mae" damyo" wa malam" ko" ngad: ra"- (Malam" ra" mo, khobam ngad ko" ru we' yao: re ab byid' pye' nae" yaug khag' ngad: rure re:- Yesu yao: sao qhid' mae" ba: to: va" ra".)

⁶⁵Byu dayaug re Pho" yang ngojhao" li" nae" khyo" makad' byid: ngad: re wa khag' re: ngojhao" qo" li" genae" mangad:- ein: naonhaung" re ngo ta" ru wa cemung: yang: ta" ru ngad: ra"- ga: Yesu xo' ta" ra".

⁶⁶Ce: dao: thoe: yang Yesu nho: thao cao" mo, myo: sho' wa dam: phaug' phao: lo" gemung:- yao" thao macao" lo: gengad: ra".

⁶⁷Aimung: Yesu wa mho"zo: daxe: shid' yaug re- Naonhaung" re: phao: lo" nug ko" i? ga: myid' ra".

⁶⁸Simon Petru wa Asang we"- ngonhaung" khag' jhao" ba: lo" nae" i? Nao wa apyad ato kao so' daui nhao: ra" mungdao: qo" yaug ngad: ra".

⁶⁹Nao wa Mao"So mae" joe" li" ra" Gyang" Lho" ra" yaug ngad: rure ana" ngonhaung" lam" mung: ba: bam va"- ga: ta" ra".

⁷⁰Yesu wa Naonhaung" daxe: shid' yaug re ngo khyin: yu: mangad: i? Ngadqere: naonhaung" mae" dayaug wa Min: Yui ngad: ra"- ga: phaug' tau" ra".

⁷¹Yesu wa Simon Iskarud yao: zo: Yuda; khyo re ta" na: ru ngad: ra". Pe"mung:ga"re Yuda wa mho"zo: daxe: shid' yaug mae" dayaug ngad sho' ngadqere:- yao: re ab byid: nae" yaug ngad: ra".