Read Maru YOHAN 7 Bible Online

YOHAN 7 - Maru bible

YOHAN 7

¹Ai: thao Yesu wa Galile mung" khaung: mae su" gam" qin" ra". Pe"mung:ga"re kheim: so' qo" ra" Yuda qe wa- Yesu re se' pye' nae" qhid' mae" seim" na geyang:- yao: wa Yuda mung" khaung: mae manug: su" qin" ru ngad: ra".

²Yuda qe: Zaung Khyae: Poe kad' nae" ba na jhao" li" na: ra"- aimung: Yesu yao: nhaung: bam wa-

³Nao kad' ra" mau" zo" jham re ni" mho"zo: qe the' myao: lo" genae" qhid' mae" cemung" mae" thug' mung:- Yuda mung" khyo ye" lo" wa,

⁴Mang qi: nug: ra" yaug khag' ngadqere: yao: kad' ra" mau" re anyham: avho' mae pe" re: malhaung" kad' gengad: ra"- nao wa ai: mau" jham re kad' na: ruyang ni" khyo re mug: myid byu qe alhab' mo,- ba sho' kad' wa, ga: ta" ako".

⁵(Yesu yao: nhaung: bam lhao" re:- yao: re malam" ko" ngad: ra".)

⁶Yesu wa yao: bam re- Nga" ayo, majoe" shi:- naonhaung" ayo, kam" wa khonhae" re: ngad: ako".

⁷Mug: myid byu qe wa naonhaung" re magai: nghang: ngad: ra". Ngo re kam" wa nghang" ako"- pe"mung:ga"re ngo wa yao: bam: lo, mau" magai: rure ta" na: ruyang ngad: ra".

⁸Ai: poe khyo naonhaung" ye: ge,- nga" ayo, majoe" shimung:- ngo wa poe khyo maye: nae"- ga: ta" ra".

⁹Yesu wa airu: ta" mung:- Galile mung" mae thang: na: jo; ra".

¹⁰Ai: poe khyo yao: nhaung: bam ye" lo" gethao re Yesu re: ai: poe khyo anyham: avho' kad' mung: sae za: ye" lo" ra".

¹¹Kheim: so' qo" ra" Yuda qe wa- poe mae Yesu re qho mung:- yao: khai: mae ngad: ra" i? ga: myid' ako".

¹²Mo,byu qe: phaung mae Yesu khyo re sae sae za: gyai jho" ta" na: ako". Mo,byu qe daqhae: wa Yao: wa byugai ngad: ra"- ga: ta" ako". Ngadqere: gatau daqhae: wa Byugai mangad:- yao: wa mo, byu qere khyonghung: jhui" nghung" na yaug ngad: ra"- ga: ta" ako".

¹³Ngadqere: yao: bam wa- kheim: so' qo" ra" Yuda qere gyaug geyang:- Yesu khyo re de: de: za: mata" ko" ngad: ra".

¹⁴Poe ba na agaung: ba lai lao"- Yesu wa Caung:pa" Yham khyo ye: mung:- mho" shid' qhid: na: ra".

¹⁵Yuda kheim: so' qo" ra" mo, wa qi: sho' mug' hao" byaug ko" ru we' Ceyaug wa dalhang re: mamho" zhao: yu: qu" ru khoru: mung: ceqhi" sho' ba: ra" i? ga: ta" ako".

¹⁶Yesu wa Ngo mho" shid' ra" khyo wa ngoyao" mho" shid' khyo mangad:- ai wa ngore nhao: ke' ra" Mao"So mae" li" ra" mho" shid' khyo ngad: ra".

¹⁷Mao"So myid o: ra" khyo re kad' nae" kao bau: ra" yaug khag' ngadqere:- ngo mho" shid' ru wa Mao"So mae" li" ra" mho" shid' khyo ngad: ra" i? Ngoyao" mho" shid' khyo ngad: ra" i? ga" rure ba: kho' yu: li" nae".

¹⁸Yao: yao" akho: akhang" khyo" jhau: ra" yaug wa yao: yao" phungbao qo" nae" qhid' mae" qam: ke' ra". Ngadqere: yao: re nhao: ke' ra" yaug: phungbao qo" nae" qhid' mae" myid o: ra" yaug wa din: man" ra" yaug ngad: ra"- yao: mae mhug' pyag' ru pe" mabo ngad: ra".

¹⁹Moshe wa naonhaung" re Tarha" byid' ra" mangad: i? Ngadqere: naonhaung" mae" dayaug re: ai: Tarha" re maphug' cao" ko" ngad: ra". Naonhaung" wa ngore pe"mung: se' pye' nae" seim" na ko" i? ga" ta" ra".

²⁰Ailao"- mo,byu qe wa Nao wa yui vao: jaung" yaug ngad: ra"- nao re se' pye' nae" khag' seim" na: ra" i? ga: tau" ako".

²¹Yesu wa Ngo Dugno: Ba mae mug'pho: ve,lho dalam: za: kad' qhu" re naonhaung" alhab' mo, mug' hao" byaug: ako"- ga: phaug' tau" ra".

²²Moshe wa naonhaung" yauggai zo: qere au: qid lhai: nae" qhid' mae" naonhaung" re amyin" byid' to" ra"- (gaigai: yao: ga" re wa Dugno: Ba mae au: qid lhai" ru kad' ako"- aire qhid yaug wa Moshe mangad:- naonhaung" phug' phyid' qe ngad: ako".) Airumung: naonhaung" wa Dugno: Ba mae yauggai zo: re au: qid lhai: khyo kad' byid' ako".

²³Airu: naonhaung" wa Moshe Tarha" re mashad' lhoe" nae" qhid' mae" Dugno: Ba mae yauggai nau" dayaug re au: qid lhai: khyo byid: ko" re wa ngo Dugno: Ba mae byu dayaug re no saug za: gai byid' ruyang naonhaung" wa ngore pe"mung: nhag' yo: ko" i?

²⁴Adao: pyae ave, re qu" yang: dao: dakho' ge,- Dangman" ra" khyo" dao: kho' ge,- ga: yao: bam re ta" ra".

²⁵Yerusalem mae" mo, byu qe daqhae: wa Kheim: so' qo" ra" mo, se' pye' nae" seim" ko" ra" yaug wa ceyaug mangad: i?

²⁶Qu" ge,- yao: wa de: de: za: kho" kyo" na: ra"- yao: bam wa yao: re khag' pe" maga: genhaung i? Yao: wa Meshia ngad: ra" ga" rure yao: bam gaigai: yao: ba geyang: ngad: laug i?

²⁷Ceyaug khai: mae" ngad: rure wa ngonhaung" ba: ra". Ngadqere: Meshia joe" li" re wa yao: khai: mae" joe' li" rure khag' re: maba genae"- ga: ta" ako".

²⁸Yesu wa Caung:pa" Yham mae mho" shid' na: au:- thoe qi: we' Naonhaung" ngore gaigai: yao: ba: ako"- ngo khai: mae" ngad: rure naonhaung" ba: ako". Ngo wa ngoyao" akho: akhang" khyo" joe" li" ru mangad:- ngore nhao: ke' ra" yaug wa dangman" ra" yaug ngad: ra"- naonhaung" wa yao: re maba ko" ngad: ra".

²⁹Ngadqere: ngo wa yao: mae" joe" li" yaug ngad: ru we' yao: wa ngore nhao: ke' yaug ngad: ruyang ngo wa yao: re ba: ra"- ga: ta" ra".

³⁰Ailao" yao: bam wa Yesu re taung" yu nae" seim" ako". Ngadqere: yao" ayo, majoe" shiyang: yao: re khag' re: maqo" taung: ko" ngad: ra".

³¹Mo,byu qemae" myo: sho' mo, Yesu re lam" ko" ru we' Meshia joe" li" lao"- yao: wa ceyaug kad' qhu" ra" ve,lho tho' je: myo: sho' ve,lho kad' qhu" li" li" nae" i? ga: ta" ako".

³²Mo,byu qe Yesu khyo re airu: jho" so' na: rure Pharishe qe the' gyo: ge mung:- yao: bam: khinjaung qi: qe wa Yesu re taung: nae" qhid' mae" gug: gam gyezo: qe damyo" re nhao: ke' ako".

³³Yesu wa Ngo wa naonhaung" we' dayo, zo: na mung:- ngore nhao: ke' ra" yaug jhao" dam: lo" zai ngad:-

³⁴Ailao" naonhaung" wa ngore qho: li" genae"- ngadqere: naonhaung" ngore mamyao genae"- pe"mung:ga"re ngo na: ra" jo, qo khyo naonhaung" maqo" ye: geyang: ngad: ra"- ga: ta" ra".

³⁵Kheim: so' qo" ra" Yuda qe wa- Ngonhaung" maqho: myao losho'- yao: wa khai: khyo ye: nae" ga" laug i? Ngonhaung" Yuda byu qe na: ra" Greeg vogaung: jham khyo ye: mung:- Greeg byumyu" qere yemho" shid' byid: nae" ga" laug i? ga: yao: cao: jho" myid' ako".

³⁶Yao: wa ngonhaung" yang yao: re qho ngadqere: maqhug' genae". Aimung: yao: joe" na: jo, nae" jo, qo khyo ngonhaung" maqo" ye: genae"- ga: ta" ra". Yao: pe" ga: nug: laug i? ga: jho" ta" ako".

³⁷Poe lo" thao" ba- poe mae" je: akhyag: ra" ba na mae Yesu wa to" ye, mung:- Qid shab' ra" yaug khag' ngadqere: ngojhao" lo mung: shaug' ge,

³⁸Jham: mugsug' mae tung" to" ru we' dakhyo:- ngore lam" ra" yaug khag' ngadqere: yao" aung khug nhag' lam: mae" kaoso'qid zo: gyaung: yug: thug' li" na: ra"- ga: thoe qi: we' ta" ra".

³⁹Yesu airu: ta" ru wa yao: re lam" ra" mo, qo" khae: yu genae" ra" Byo re qang yang: ta" ru ngad: ra". Ai: ayo, re Yesu wa phungbao byid' ru maqhug' shimung: yang: Byo mabyid' to: shingad: ra".

⁴⁰Mo, phaung mae" mo, byu qe damyo" wa ce: dao: re the' gyo: gelao"- ceyaug wa gaigai: yao: lapa ngad: ra"- ga: ta" ako".

⁴¹Amung: gatau damyo" wa Yao: wa Meshia ngad: ra" ga: ta" mung:- gatau damyo" wa- Dang za: Meshia wa Galile mung" mae" thug' li" nae" mangad:-

⁴²Jham: mugsug' mae Meshia wa kho:kham myid:zo: ngad: li" nae"- Davi na: lo: ra" Betlehem vogaung: mae khau: li" zai ngad:- ga: ta" to" ra" mangad: i? ga:ta" ako".

⁴³Aimung: mo,byu qe wa Yesu mathao mae majho" vang" gemung:- phung: jho" kho' lo" ako".

⁴⁴Damyo" wa Yesu re taung: nug: ako"- ngadqere: khag' re: yao: re maqo" zaui: ko" ngad: ra".

⁴⁵Gug: gam gyezo: qe dam: tug' joe" lo gelao"- khinjaung qi: qe we' Pharishe qe wa yao: bam re- yao: re naonhaung" pe"mung: mataung" lo ko" i? ga: lham: myid' ako".

⁴⁶Yao: bam wa ceyaug re" ru: khag' re: mamho" byid' qu" gengad: ra"- ga: phaug' tau" ako".

⁴⁷Ailao" Pharishe qe wa yao: bam re Naonhaung" rere: yao" yang lham: mhug' pyag' vanhaung i?

⁴⁸Kheim: so' qo" ra" mo, we' Pharishe qemae" yao: re lam" ra" byu dayaug yaug na: ga" rure naonhaung" gyo" qu" ko" i?

⁴⁹Ce: mo,byu qe wa Moshe Tarha" re maba gemung:- Mao"So: nhang: kheim: qao: mae ngad: ako"- ga: ta" ako".

⁵⁰Qhid' phyao: Yesu jhao" yeqhug' qu" ra" Nikodi ga" ra" Pharishe dayaug na: ra".

⁵¹Nikodi wa ngonhaung" tarha" jo; ru we' dakhyo: ga" re byu dayaug re sao qhid' shi" maca: qu" lo: yao: re dao: maqo" phyid' ngad: ra"- ga: ta" ra".

⁵²Yao: bam wa Nao re:- Galile byu ngad: i? Jham: mugsug' mae xeim: qu" wa,- Galile mung" mae" lapa dayaug re: mathug' li" qu" rure nao myao: li" nae"- ga: yao: re ta" ako".