Read Maru YOHAN 8 Bible Online

YOHAN 8 - Maru bible

YOHAN 8

¹(Ai: thao yao: bam alhab' mo, yao: yao" yham khyo phao: lo" ako". Ngadqere: Yesu wa Zhan:lun: bam khyo ye" lo" ra".

²Thao: ba ne, seim no' mae" Yesu wa Caung:pa" Yham khyo dam: ye" lo" ra". Mo,byu qe alhab' mo, wa Yesu jhao" zang" ham: li" gemung:- Yesu wa zaung: jo, yang: yao: bam re mho" shid' byid' ra".

³Jham: Tung" Pho" qe we' Pharishe qe wa- su: lao we' shad' na: au: the' taung" yu: ra" myiqe: dayaug re jhui" li" mung:- yao: bam alhab' mo; qhid' kheim: mae ai: myiqe: re yhe' to" ako".

⁴Aimung: yao: bam wa Yesu re- Mho" pho" we"- ce: myiqe: wa su: lao we' shad' na: au: yao: khyag' myao yang: taung" to" ako".

⁵Airu" ra" myiqe: re wa laug baui: yang pye' se' pye' ca"- ga: Moshe wa Kham" To" Ra" Tarha" mae amyin" byid' to" ra"- ana" nao wa khoru: ein: ta" nae" i? ga: myid' ako".

⁶Yao: bam ceru: ta" ko" ru wa Yesu re qobo qo" zhaug' nae" qhid' mae" ta" ru ngad: ako". Yesu kam wa gam" mung: yao" lo,nyhug' yang myid gaung mae khyang" tung" na: ra".

⁷Ai: tau mae ye; jo; ra" mo, wa Yesu re dao: myid: paug' myid: mung: kad' ako". Ailao" Yesu wa tau: qu" ke' mung:- yao: bam re Naonhaung" mae" qobo mashad' ra" yaug: yang shi" sao qhid' ai: myiqe: re laug baui: yang pye' ge,- ga: ta" ra".

⁸Ai: thao Yesu wa dam: gam" lo" mung: myid gaung mae thug' khyang" na: ra".

⁹Yao: bam wa cedao: re the' gyo: gelao"- qi: mo, shi" sao qhid' ai:tau mae" thug' lo" mung:- yao: bam alhab' mo, dayaug: thao dayaug thug' lo" byaug: ako". Yesu za: dang: jo, mung:- ai: myiqe: wa aimae ye; jo; ra".

¹⁰Ailao" Yesu wa tau: qu" ke' mung: myiqe: re- yao: bam khai: lo" vako" ra" i? Nao re dao: phyid' nae" dayaug re: mana i? ga: myid' ra".

¹¹Ai: myiqe: wa Nhag' bo we"- dayaug re: mana ga: tau" ra". Ailao" Yesu wa Ngo re:- nao re dao: maphyid' nae"- Lo" se,- qobo dadam: kad' lo- ga: ai: myiqe: re ta" ke' ra".)

¹²Yesu wa Pharishe qere Ngo wa mug:myid dao: nho: bo" bao ngad:- nga" thao cao" ra" yaug khag' ngadqere: kao so' bo" bao qo" yu mung:- mug:cad' mae khonhae" re: masu: nae"- ga: ta" ra".

¹³Ailao" Pharishe qe wa Yesu re- Nao wa naoyao" khyo re sagse: kham: na: ra"- aimung: ni" sagse: kham: ru wa tarha" mavao ngad: ra"- ga: ta" ako".

¹⁴Yesu wa Ngo wa- ngoyao" khyo re ngoyao: sagse: kham ngadqere: nga" sagse: kham dao: wa tarha"vao: ra"- pe"mung:ga"re ngo khai: mae" li" ru ngad: ru we' khai: khyo lo" zai ngad: rure ngo ba:- naonhaung" wa ngo khai: mae" joe" li" mung:- Khai: khyo lo" nae" rure maba ngad: ako".

¹⁵Naonhaung" wa xao su byu: li khyo" za: dao: kho' ako"- ngo wa khag' rere: dao: maphyid'-

¹⁶Ngadqere: ngo dao: phyid' ngad: re wa ngo dayaug za: dao: phyid' ru mangad:- ngore nhao: ke' ra" Nga"Pho" we' daga" dao: phyid' ru ngad mung:- nga" dao: phyid' ru wa dangman" ra".

¹⁷Sagse: shid' yaug: dao: jho" zhaung: lao" wa Tarha" vao:- ga: naonhaung" tarha" mae tung" to"ako".

¹⁸Ngo wa ngoyao" khyo re sagse: kham: ra"- amung: ngore nhao: ke' ra" Nga"Pho" re: nga" khyo re sagse: kham: ra"- ga: ta" ra".

¹⁹Yao: bam wa Ni" pho" khai: mae i? ga: yao: re myid' ako". Ailao" Yesu wa naonhaung" ngo rere:- nga"Pho" rere: maba ngad: ako"- naonhaung" ngore ba ko" ngad: re wa Nga" Pho" rere: naonhaung" ba genae" ngad: ra"- ga: yao: bam re tau" ra".

²⁰Ce: dao: jham alhab' wa Yesu Caung:pa" Yham mae" alu: ngaui ban" jham zhaung: to: ko" ra" qe, mae mho" shid' na: ra" au: ta" ra" dao: jham ngad: ra". Yao" ayo, majoe" shiyang: yao: re khag' yang re: mataung: ko" ngad: ra".

²¹Aimung: Yesu yao: bam re dam: ta" ru wa- ngo wa phao: lo" zai ngad:- naonhaung" wa ngore qho: li" genae"- ngo ye" lo" ra" jo, qo khyo naonhaung" maqo" ye: ko" ngad: ra"- ga: ta" ra".

²²Airumung: kheim: so' qo" ra" Yuda qe wa Ngo ye"lo" ra" jo, qo khyo naonhaung" maqo" joe" genae" ga: yao: ta" ra". Ce wa yao: yao" gaung re yao: yao: se' shid nae"- ga: ta" nug: ru laug i? ga: ta" ako".

²³Yesu wa Naonhaung" wa ce: o: gye, mug:myid we' sin" ra" mo, ngad: ako"- ngo kam" wa tho' mae" joe" li" ru ngad:- naonhaung" wa ce: mug:myid mae" mo, ngad: ako". Ngadqere: ngo wa ce: mug:myid mae" mangad:-

²⁴Aimung: naonhaung" wa yao: yao" qobo mae shid: li" genae"- ein: naonhaung" re ngo ta" va". Ngo wa Ngo- ga: yaug ngad: rure naonhaung" malam" ko" re wa naonhaung" wa yao: yao" qobo mae shid: li" genae"- ga: ta" ra".

²⁵Yao: bam wa Nao khag' ngad: i? ga: yao: re myid' ako". Ailao" Yesu wa yao: bam re Naonhaung" re ngo sao qhid' mae" ta" kyo" to: gau ngad va"- ga: tau" ra".

²⁶Naonhaung" khyo re ngo ta" nae" khyo myo: sho' jo; ra"- naonhaung" re dao: phyid' nae" rure: myo: sho' jo; ra". Ngadqere: ngore nhao: ke' ra" yaug wa dangman" ra" yaug ngad mung:- ngo wa yao: mae" the' gyo" yu: ra" gu: reza: mug:myid byu qere ta" kyo" ru ngad:- ga: ta" ra".

²⁷Yesu wa Pho" khyo re ta" kyo" na: rure yao: bam maba: gyo: ko" ngad: ra".

²⁸Airumung: yao: wa Byu: Yao: Zo: re naonhaung" tau: to' to: gelao"- Ngo wa Ngo ga: yaug ngad: rure naonhaung" ba: li" genae". Ailao" ngo wa Nga"Pho" yang mho" byid' to" gu: reza: ta" mung:- ngo wa ngoyao" kheim: so' khyo" yang pe" daja: re: makad' rure ba: li" genae"- ga: yao: bam re ta" ra".

²⁹Amung: ngore nhao: ke' ra" yaug wa ngo we' daga" ngad: na: ra"- ngo khonhae" re: yao: o ngaui: rure zaui" na: ruyang yo: wa ngoyao: reza: mashapye' to: ngad: ra"- ga: ta" ra".

³⁰Yesu ta" ra" dao: aijham re the' gyo" ra" mo, myo: sho' wa yao: re lam" ako".

³¹Airumung: Yesu wa yao: re lam" ko" ra" mo, re- Naonhaung" nga" mho" shid' dao: re phug' cao" ko" re wa naonhaung" wa nga" mho"zo: gyang" qe ngad: ako".

³²Naonhaung" wa ai: dangman" rure ba: li" genae"- amung: ai: dangman" ru wa naonhaung" re lhoe' ke' byid' li" nae"- ga: ta" ra".

³³Ailao" yao: bam wa Ngonhaung" wa Abraham nho: myid:zo: qe ngad: ra"- ngonhaung" wa khag' jeim re: madoe; qu"- aire naonhaung" re lhoe' ke' byid' li" nae"- ga: nao ta" ru wa pe" re ta" nug: i? ga: myid' ako".

³⁴Yesu wa yao: bam re Naonhaung" re ngo dang za: ta" geli"- Qobo kad' ra" yaug khag' ngadqere: qobo: nho: jeim ngad: ra".

³⁵Jeim wa dinkhu: mae khonhae" re: maqo" na ngad: ra"- yao: zo: kam" wa khonhae" re: qo" na: ra".

³⁶Yao: zo" yang naonhaung" re lhoe' ke' byid' ngad: re wa loe; beim: li" genae".

³⁷Naonhaung" wa Abraham: nho: yao: zo: qe ngad: rure ngo ba:- ngadqere: naonhaung" wa nga" mho dao: re makhae: yu nug gemung: yang: ngore se' pye' nae" seim" na: ako".

³⁸Ngo wa Pho" yang ngore qhu" byid' ra" gu: re ta" ra"- naonhaung" kam" wa naonhaung" yao: pho" yang ta" ra" gu: re kad' ako"- ga: ta" ra".

³⁹Yao: bam wa Ngonhaung" pho" wa Abraham ngad:- ga: yao: re tau" ako". Yesu wa naonhaung" wa Abraham nho: myid:zo: qe gaigai: yao: ngad ko" ngad: re wa Abraham kad' ra" mau" jham re naonhaung" kad' li" genae".

⁴⁰Ngo kad' ra" gu: alhab' wa Mao"So mae" the' gyo" yu: ra" khyo re naonhaung" re ta" kyo" na: ru ngad: ra"- ngadqere: naonhaung" wa ngore se' pye' nae" seim" na: ako". Abraham wa airu: makad' lai: lo ngad: ra".

⁴¹Naonhaung" wa naonhaung" yao: pho" kad' lai: lo: ru we' dakhyo:- kad' na: ako"- ga: ta" ra". Yao: bam wa- Mao"So yao:za: nganhaung" nho: dayaug za" Pho" ngad mung: ngonhaung" wa yao" yauggai zo: agyang" qe ngad:- ga: phaug' tau" ako".

⁴²Ailao" Yesu wa yao: bam re- Mao"So wa naonhaung" yao: pho" ngad: re wa ngore jhid'de; genae" ngad: ra". Pe"mung:ga"re ngo wa Mao"So mae" joe" li" mung:- ana" cemae ngad va"- ngo wa ngoyao" akho: akhang" khyo" joe" li" ru mangad:- Mao"So wa ngore nhao: ke' ra".

⁴³Ngo ta" ra" dao: re naonhaung: pe"mung: maba: gyo: ko" i? Pe"mung:ga"re aiwa nga" mungdao: naonhaung" maqo" tho' tae" gyo" yu geyang: ngad: ako".

⁴⁴Naonhaung" wa naonhaung" yao: pho" ai: min:yui: nho: myid:zo: qe ngad gemung:- naonhaung" yao: pho" myid: o: ra" khyo re cao" nug mo, ngad: ako". Yao: wa sao qhid maqhid mae" byu se' yaug ngad: ra". Yao: mae dangman" ru mabo: ruyang yao: wa dangman" ra" shad' mae khonhae" re: mana: qu" ngad: ra". Yao: mungdao: ta" lao" yao: wa yao" ave, ngad: ru we'dakhyo:- kad' na: ru ngad: ra"- pe"mung:ga"re yao: wa mhug' hab' ngad mung: mhug' hab' qe alhab' mo; yao: pho" ngad: ra".

⁴⁵Ngadqere: ngo wa dangman" ru ta" mung: ai: mathao: yang naonhaung" ngore malam" ko" ngad: ra".

⁴⁶Ngo wa qobo qo" yaug ngad: rure naonhaung" mae" khoyaug lam: sagse: qo" kham ko" i? Ngo wa dangman" ru ta" re pe"mung: naonhaung" ngore malam" ko" i?

⁴⁷Mao"So mae" ngad: ra" yaug wa Mao"So: dao: jham re tae" gyo" ra"- ngadqere: naonhaung" wa Mao"So mae" mangad: gemung: naonhaung" matae" gyo: ngad: ako".

⁴⁸Ailao" yao: bam wa Nao wa Samari byu ngad: ra"- amung: yui zaung: ra" yaug ngad: ein: ngonhaung" ta" ru wa dang: mangad: i? ga: myid' ako".

⁴⁹Yesu wa Ngo wa yui zaung yaug mangad:- ngo wa Nga"Pho" re phug' te' yaug ngad: ra"- ngadqere: naonhaung" wa ngore phug' mate' ko" ngad: ra".

⁵⁰Ngo wa ngoyao" gaung re phug' te' byid: genae" rure qho: na yaug mangad:- ngadqere: aire qho byid' na yaug we' nga" bo: de, yang: dao: kho' byid' na ru dayaug na: ra".

⁵¹Naonhaung" re ngo dang za: ta" geli"- nga" mho" shid' dao: re phug' cao" ra" yaug wa khonhae" re: mashid nae"- ga: tau" ra".

⁵²Ailao" yao: bam wa Nao wa gaigai: yao: yui zaung yaug ngad: rure ngonhaung" ana" khyag' za: ba va". Abraham wa shid: byaug va"- Lapa qere: shid: byaug vako" ra"- ngadqere:nao wa nga" mho" shid' dao: re phug' cao" ra" yaug wa khonhae" re: mashid nae"- ga: ta" ra" ga: ta" ako".

⁵³Ngonhaung" yao: pho" Abraham wa shid: byaug: ava"- nao wa Abraham tho' je: qi: yaug ngad: i? Lapa qere: shid: byaug: avako"- nao wa khag' ngad: ein: myid: i? ga: myid' ako".

⁵⁴Yesu tau: mung:- ngo wa ngo yao" gaung re phug' te' nga: yhe' byid' ngad: re wa ai: phug' te' byid' ru wa akeim ngad: ra"- ngore nga: yhe' byid: yaug wa nga" Pho" ngad: ra"- aiyaug reyao: ngonhaung" Mao"So ngad: ga: naonhaung" ta" ako".

⁵⁵Ngadqere: naonhaung" wa yao: re maba ko" ngad: ra"- ngo kam" wa yao: re ba:- ngo wa yao: re maba ein: ta" ngad: re wa ngo wa naonhaung" we' dakhyo: mhug' hab' ngad: li" nae". Ngadqere: ngo wa yao: re ba mung:- yao" dao: re ngo phug' cao" ra".

⁵⁶Naonhaung" yao: pho" Abraham wa ngo joe" li" nae" ba na re the' myao nae" rure ngaui: ra"- yao: wa aire the' myao mung: ngaui bau" ra"- ga: ta" ra".

⁵⁷Yao: bam wa Yesu re Nao wa apyad ngo" xe zin lhao" re: madau shingad: ra"- Abraham re nao myao va" ga" o? ga: ta" ako".

⁵⁸Yesu wa- Naonhaung" re ngo dang za: ta" geli"- Abraham mana shimae" ngo na va"- ga: tau" ra".

⁵⁹Ailao" yao: bam wa Yesu re pye' nae" ga: laug baui jham gaug: yu: ako"- ngadqere: Yesu wa phao: vho' mung: Caung:pa" Yham mae" thug' lo" ra".