Read Maru YOHAN 9 Bible Online

YOHAN 9 - Maru bible

YOHAN 9

¹Yesu khyo su" lo" na: ra" au:- khau: mae" myo, jid: ra" byu dayaug re yao: myao: ra".

²Yao" mho"zo: qe wa yao: re Mho" Pho" we"- Aiyaug khau: mae" myo, jid: ru wa khag' qobo: yang i? Yao: yao" qobo: yang ngad: ra" i? Mangad: lao" yao: myhi" yao: pho" nho: qobo ngad: ra" i? ga: myid' ako".

³Yesu wa Yao: myo, jid: ru wa yao" qobo: yang re: mangad:- yao: myhi" yao: pho" tao: qobo: yang re: mangad:- yao: myo, jid: ru wa Mao:So: qam: so' myao: thug' li" nae" qhid' mae" ngad: ra".

⁴Ngo re nhao: ke' yaug: mau" re na" ngad shi" au:- ngonhaung" zaui: ca" ra". Khag' re: mau" magai: zaui" ra" myi" ayo, joe" lo: li" nae".

⁵Ngo wa mug:myid dao mae na: jo; au:- mug:myid: dao: nho: bo" bao ngad:- ga: ta" ra".

⁶Ceru: bin: ta" lao"- Yesu wa myid gaung mae khata: phoe" mung: tham: bab dajhid' lhag' yu yang:- ai: myo, jid pho" nho: myo,jid' re gyad byid: mung:-

⁷Siloam qid tham: mae ni" myo,khung: yecid' pye' wa,- ga: ta" ra". (Siloam ga" ru wa nhao: ke'- ga" ru ngad: ra.) Airumung: ai: myo, jid pho" wa yao" myo,khung: yecid' yu yang: myo, myao mung: dam: phao: lo" ra".

⁸Ailao" yao" yham kyo: cao: qe we' qhid' phyao: yao: mho' zo" na: rure myao: qu" va" ra"- mo,byu qe wa Ceyaug wa lhaung" mho' zo" zaung: jo, yaug mangad: i? ga: ta" ako".

⁹Damyo" wa Ngad: ra"- ga: ta" mung: gatau damyo" wa Ceyaug mangad:- yao: we' dau yaug ngad: ra-" ga: ta" ako". Aimung: aiyaug wa yao: yao:- ngo wa ai: myo,jid yaug ngad va"- ga: ta" ra".

¹⁰Yao: bam wa nao ana" khoru: myo, qo" myao: lo: i? ga: myid' ako".

¹¹Yao: wa Yesu ga: mang yaug wa tham: bab dajhid' lhag' yu yang: nga" myo,jid' re gyad byid: mung:- Siloam qid tham: mae nga" myo,khung: yecid' pye' nhao: ra"- ngore: ye" lo" mung:- myo,khung: yecid' pye' we' nga" myo, myao: li" ra"- ga: tau" ra".

¹²Yao: bam wa Yao: wa khai: mae ngad: ra" i? ga: myid' ako". Ailao" yao: wa Ngo maba- ga: tau" ra".

¹³Ailao" yao: bam wa qhid' phyao: myo, jid: ra" yaug re Pharishe qejhao" jhui" ye" ako".

¹⁴Yesu tham: bab lhag' yu mung: ai: myo, jid pho" re myo, myao nhao: ra" ba na wa Dugno: Ba ngad: ra".

¹⁵Pharishe qe wa ai: myo, myao: li" va" yaug re yao" myo, dam: myao: li" ra" khyo re dam: myid' ako". Aimung: yao: wa yao: bam re Yao: wa nga" myo,jid' mae tham: bab: gyad byid' ra"- nga" myo,khung: yecid' pye' lao"- nga" myo, myao: li" ra"- ga: ta" ra".

¹⁶Pharishe qemae" damyo" wa Ai: yaug wa Dugno: Ba: tarha" re phug' cao" yaug mangad' ruyang Mao:So mae" joe" li" ra" yaug wa magai: boe" ngad: ra"- ga: ta" mung: gatau damyo" wa Qobo qo" ra" byu dayaug wa airu" ra" mug' pho: ve,lho jham re khoru: qo" kad' nae" i? ga: ta" ako". Aimung: yao: bam yao: cao: myid majho" vang" ngad: ako".

¹⁷Aimung: Pharishe qe wa ai: myo, myao: li" ra" yaug re- yao: wa ni" myo,jid' re myao nhao: ra"- ga: nao ta" ra". Yao" khyo re nao khoru: ein: ta" nae" i? ga: dalhang dam: myid' ako". Ailao" yao: wa Aiyaug wa lapa ngad: ra" ga: tau" ra".

¹⁸Ngadqere: kheim: so' qo" ra" Yuda qe wa aiyaug qhid' phyao: myo, jid yaug ngad: ga" rure we' ana" yao: myo, myao: li" rure manug: lam" ko" ngad: ra".

¹⁹Aimung: yao: bam wa yao: myhi" we' yao: pho" tao re khai: yu yang:- ceyaug wa ni" shid' tao: nho: yauggai zo: ngad: i? Khau: mae" myo, jid ngad: ga: ni" shid' tao ta" ako"- aire ana" yao: khoru: myo, myao: li" ra" i? ga: yao: shid' tao re myid' ako".

²⁰Yao: myhi" yao: pho" tao wa Yao: wa nga" shid' tao: nho: yauggai zo: ngad: ru we' khau: mae" myo,jid ngad: rure nga" shid' tao ba:.

²¹Ngadqere: yao: ana" khoru: myo, myao: li" ra" khyo we' yao" myo,jid' re khag' yang myao nhao: rure wa nga" shid' tao maba- yao: re: apyad qi: va"- aimung: yao: re myid: ge,- yao" khyo re yao: yao: qo" ta" naeva"- ga: tau" ako".

²²Yao: myhi" yao: pho" tao ceru: tau: ko" ru wa kheim: so' qo" ra" Yuda qere gyaug geyang: ngad: ako". Pe"mung:ga"re Yesu re Meshia ngad: ra" ga: lam" ra" yaug khag' re ngadqere: Tarha" Jung Yham mae" phoe' pye' nae" qhid' mae" kheim: so' qo" ra" Yuda qe myid vang" to: vako" ra".

²³Ce: mathao: yang yao: myhi" yao: pho" tao wa Yao: re: apyad qi: va"- yao: re myid' qu" ge,- ga: ta" ru ngad: ako".

²⁴Yao: bam wa ai: khau: mae" myo, jid: ra" yaug re shid' lhang ein: lhang dam: khai: yu gemung:- Mao"So: qhid' kheim: mae dangman" ra" dao: ta" wa,- nao re myo, myao nhao: ra" yaug wa qobo qo" ra" yaug ngad: rure ngonhaung" ba:- ga: ta" ako".

²⁵Ailao" aiyaug wa Yao: wa qobo qo" yaug- maqo" yaug ngad: rure ngo maba- Ana" ngo myo, myao va"- ein: ce daja: za: ngo aba: ga: tau" ra".

²⁶Yao: bam wa Yao: wa nao re pe" kad' byid' ra" i? Ni" myo,jid' re khoru: kad' yang: myao nhao: ra" i? ga: myid' ako".

²⁷Ailao" aiyaug wa Naonhaung" re ngo ta" kyo: gau ngad va"- naonhaung" manug: tae" gyo: ko" ngad: ra". Naonhaung" pe"mung: dam: gyo: nug ko" i? Ngo qu" re naonhaung" re: yao" mho"zo: qe boe" nug gesam" ra"- ga: ta" ra".

²⁸Yao: bam wa aiyaug re Nao yaug lam: aiyaug: mho"zo: ngad: ra"- ngonhaung" kam" wa Moshe nho: mho"zo: qe ngad:-

²⁹Mao"So wa Moshe re mungdao: byid' rure ngonhaung" ba:- ngadqere: aiyaug re wa yao: khai: mae" li" yaug ngad: rure lhao" re: ngonhaung" maba ga: ta" mung:- yao: re jung" ako".

³⁰Ai: myo, myao: li" yaug wa Yao: wa ngore myo, myao: li" nhao: ra" yaug ngad: ra"- ngadqere: naonhaung" wa yao: khai: mae" joe" li" rure maba ko" ru wa mug' ja: yao: ngad: ra".

³¹Mao"So wa qobo jab qe: akyu" mho' thoe re matae" gyo: ngad: ra". Yao: re phug' myao" ra" mo, we' yao: myid o: ra" khyo" phug' cao" ra" mo; akyu" mho' thoe re wa Mao"So tae" gyo: byid' rure ngonhaung" ba: ra".

³²Khau: mae" myo, jid: ra" yaug re myo, myao: li" nhao: ra" byu dayaug na:- ga" rure mug: myid dao mae mug: thug' sao peim mae" ana" joe" sho' magyo" qu" shi:-

³³Ceyaug wa Mao"So mae" joe" li" yaug mangad: re wa yao: wa pe" daja: re: maqo" kad' nae" ngad: ra" ga: tau" ra".

³⁴Ailao" yao: bam wa- Nao ru" qobo khug mae khau mung: qi" li" ra" yaug: yang ngonhaung" re mho" shid' nae" seim" na: i? ga: ta" mung: yao: bam wa yao: re Tarha" Jung Yham mae" khe' thug' pye' ako".

³⁵Ai: myo, myao: li" ra" yaug re airu: khe' thug' pye' ko" rure Yesu the' gyo" ra". Yesu wa yao: re myao lao"- Byu: Yao: Zo: re nao lam" i? ga: yao: re myid' ra".

³⁶Aiyaug wa Nhag' bo we"- ngo wa yao: re qo" lam" sho' yao: khag' ngad: rure ngore ta" kyo: la,- ga: tau" ra".

³⁷Yesu wa yao: re Nao wa yao: re myao: qu" ava"- yao: wa ana" nao we' jho" jhau: na: ra" yaug yao: ngad: ava"- ga: ta" ra".

³⁸Aiyaug wa Asang we"- ngo lam" va"- ga: pad' thaug' thaug' yang: Yesu re goe; pa" ra".

³⁹Yesu wa Ngo wa myo, jid qe myo, myao: li" genae" re:- myo, myao mo, myo, jid: lo" genae" qhid' mae" re:- ce: mug:myid dao khyo dao: kho' nae" qhid' mae" joe" li" ru ngad:- ga: ta" ra".

⁴⁰Ai: mae bo: ra" Pharishe qe damyo" wa ce: dao: re the' gyo: gelao"- ngonhaung" re: myo, jid qe ngad ko" ra" ein: nao ta" nug: i? ga: myid' ako".

⁴¹Yesu wa Naonhaung" myo, jid qe ngad ko" ngad: re wa naonhaung" qobo qo" mo, mangad: genae"- ngadqere: ana" naonhaung" wa ngonhaung" myo, myao: ga: ta" ko" ruyang naonhaung" wa qobo qo" jo; ako"- ga: ta" ra".