Read Maru LAGYO: 1 Bible Online

LAGYO: 1 - Maru bible

LAGYO: 1

¹Phug' myao" ra" Theophilu we"- Yesu wa yao" mau" zo" re zaui" qhid: ra" ba na mae" yao: re mug:gaung khyo to' yu: ru qhug' ra" ba na joe" sho' Yesu zaui: so" lo: ru we' mho" shid' lo: ra" khyo alhab' re nga" tung" paug' sao qhid' paug' mae botung" to: va".

²Yesu wa mug:gaung khyo to' yu: ru maqhug' shimae" yao" lagyo: qe ga:- yao: khyin: yu: to" ra" mo, re yao: wa Gyang" Lho" Byo: qam: so' khyo" yang pin dao: jham byid: co' ra".

³Yao: shid kham thao byid xe ba gyo: mae yao: wa myo: sho' lhang lagyo: qejhao" yena: qhu" mung:- yao: daui: na: ra" khyo re lam ga" ra" sagse: jham qhu" byid' ra". Lagyo: qe wa Yesu re the' myao mung:- Yesu wa yao: bam re Mao"So: mung"dan: khyo re ta" kyo" ra".

⁴Yao: bam zang" ham: na ko" au:- Yesu wa lagyo: qere- Yerusalem vogaung: mae" dathug' lo" ge,- naonhaung" re ta" kyo" to: gau ngad: ra" nga" Pho" dao:so: byid' to" ra" jhaung qhu" re lao" na ge,.

⁵Yohan wa qid: yang qid nyhab' byid' ra"- ngadqere: khonho" ba mangad: re naonhaung" wa Gyang" Lho" Byo: yang qid nyhab' byid' rure qhug' li" genae"- ga: amyin" byid' ra".

⁶Lagyo: qe wa Yesu we' daga" zang" ham: na ko" au:- yao: bam wa Yesu re Asang we"- Israel byu qere ai: mung"dan: ce: akhyin: mae nao dam: te: byid: nae" i? ga: myid' ako".

⁷Yesu wa yao: bam re- Nga" Pho" yao" kheim: so' khyo" yang mhai" so" to" ra" ba na we' yo, khyin: khonhae" ngad: rure naonhaung" ba maqo ngad: ra".

⁸Ngadqere: naonhaung" dao mae Gyang" Lho" Byo joe" li" lao"- naonhaung" wa qam: so' byang" lo: li" genae". Amung: naonhaung" wa Yerusalem vogaung:- Yuda mung" geim"- Samari mung" we' myid gaung thao" sho' mae nga" khyo re sagse: kham byid: mo, ngad: li" genae"- ga: ta" ra".

⁹Ceru: bin: ta" thao lagyo: qe qu" na: reyao:- Yesu wa mug:gaung khyo to' yu: ru qhug' ra". Ai: thao yao: bam: myo,jao: mae" jham thaui: wa yao: re nghoe' cilo" ra".

¹⁰Lagyo: qe wa Yesu do, lo" na: au:- mug:gaung khyo zhaug' qu" na shiko" au: re mai bau: phyu ve; ra" byu shid' yaug nyag din taung" yao: bam: nhae mae li" ye; ke' gemung:-

¹¹Galile byu qe we"- naonhaung" ai:tau mae pe"mung: mug:gaung khyo qu" ye; jo; bam ko" i? Naonhaung" mae" mug:gaung khyo to' yu: ru qhug' ra" Yesu wa- naonhaung" myao: na: au: mug:gaung khyo do, lo" ru we' dakhyo:- airu: dam: joe" gyo" li" nae" ngad: ra"- ga: ta" ako".

¹²Ai: thao re lagyo: qe wa Yerusalem we' khyoman: agaung: daqi" ko za: jho" va" ra" Zhan:lun: bam mae" Yerusalem khyo dam: phao: lo" ako".

¹³Yao: bam wa vomo" khug khyo vao lo" mung:- Yao: bam thang: na: ra" yham- tho' pyae: qe, khyo do, lo" ako". Yao: bam wa Petru- Yaku- Andre- Philib- Thoma- Batholame- Mathe- Alphaeu yao: zo: Yaku- byumyu" jhid' myid qi" ra" Simon we' Yaku yao: zo: Yuda bam ngad: ako".

¹⁴Yao: bam wa Yesu yao: myhi" Mari we' gatau myiqe: qe we' re:- Yesu yao: nhaung: bam we' re:- dazab makyo ham: phaung mung:- akyu" mho' yang: na: ako".

¹⁵Ai: thao mataung" myao" re lam khug: ra" mo, dayo: shid' xe zo: ko zang" ham: na: bam: ako". Ailao" Petru wa to" ye, mung:-

¹⁶Nga" mao:nhaung: qe we"- Yesu re taung" ra" mo, re khyo jhui" ra" yaug Yuda we' sin: yang: Gyang" Lho" Byo wa Davi nhad' dao: thoe khyo" ta" to" ra" jham: dao: jab byang" li" nae" ngad: ra".

¹⁷Pe"mung:ga"re Yuda wa ngonhaung" we' daga" mau" zaui: nae" khyin: yu: to" ra" yaug ngad yang: yao: wa ngonhaung" phung: mae bobo: ra" yaug ngad: ra".

¹⁸(Yao: wa makhyang" ra" lo,mau" khyo" yang the' ra" ngaui: yang yo myid dakhyao: vai: yu mung: ai: yo myid mae atug' khyo" byid: gyo" shid: ra". Yao" vae: dug: baug: go; lo" mung:- au jham alhab' baug: thug' lo" byaug: ra".

¹⁹Yerusalem vogaung: mae na: ra" mo, alhab' wa ai: khyo re the' gyo" ako". Airumung: yao: bam wa ai: yo myid cug' re yao: bam yao" myan" khyo" Akeladama ga: mhang" ako". Akeladama ga" ru wa- Sa: Mug: Myid ga" ru ngad: ra".)

²⁰Pe"mung:ga"re Caung:khin" paug' mae- Yao" yham wa cae: jhug tag boe" mung: aimae khag' re: mana vageshao:- ga: re:- yao" aya: rere: gatau dayaug yu: pye' vashao:- ga: re: tung" to" ra".

²¹Aimung: Asang Yesu wa shid: ru mae" dam: daui: to" li" ra" khyo re ngonhaung" we' daga" sagse: kham nae" byu gatau dayaug ngonhaung" qo: ra". Ai: yaug wa Yohan Qid nyhab' kham byid: mung:- mungdao: kho" qhid: ra" ba na mae" ngonhaung" qhid' kheim: mae" Yesu mug:gaung khyo to' yu: ru qhug'ra" ba na joe" sho' Asang Yesu ngonhaung" we' daga" su" qin" du" qin" na: qin" rumae yo, byang" bobo: ra" yaug ngad ca" ra".

²³Aimung: yao: bam wa Yustu ga: re: mang zo: qo" mung: Barsaba ga: mang: ra" Yoseb we' Mathia tao mae" dayaug yaug re dam: khyin: yu nae" qhid' mae" dao: vhao" ako".

²⁴Ai: thao re yao: bam wa- Asang we"- Nao wa yaug khao: ngo" nho: nhag' lam: re ba yaug ngad: ra". Yuda wa yao: we' sin" ra" jo, qo khyo ye" lo" nae" to: co' ra" Yuda khu mae lagyo: dayaug khyo" mau" zo" vin vo; nae" qhid' mae" ce shid' yaug mae" khoyaug lam: re nao khyin: yu va" rure ngonhaung" re qhu" byid: la,- ga: akyu" mho' ako".

²⁶Alao" yao: bam wa ai shid' yaug mae" khyin: yu nae" pha" ce' khyo" ako". Mathia re pha" ce' ang mung: yao: wa ai: lagyo: daxe: dayaug: phaung mae bobo: ra".