Read Maru LAGYO: 10 Bible Online

LAGYO: 10 - Maru bible

LAGYO: 10

¹Kesarea vogaung: mae Itali tab ga" ra" Roma gyetab datab re eib: ra" gyezug: pho" Koneliu ga: mang: ru dayaug na: ra".

²Yao: wa Mao"So: khyo re kao bau yaug ngad mung:- yao: we' yao" yham khug: byu alhab' mo, wa Mao"So re caung:pa" ako". Yao: wa myaung sho" ra" Yuda qere myo: sho' bao" thaug' byid: mung: Mao"So re abang mabyid akyu" mho' na: ra".

³Daba mae" myi" thao sam yo, qug ko re Mao"So: mug: lagyo: dayaug wa yao: jhao" li" mung:- Koneliu we"- ga: yao: re li" khai: rure qhu" lho mae de: de: za: the' myao: ra".

⁴Yao: wa gyaug: ru we' ai: mug: lagyo: re zhaug' qu" mung:- Nhag' bo we"- ai wa pe" ngad: i?- ga: myid' ra". Mug: lagyo: wa yao: re- Mao"So wa ni" akyu" mho' thoe re we' ni" aung lam Alu: gae byid' rure ngaui mung:- ni" mho' thoe re tau: byid: nae" jin" jin" ngad: ra".

⁵Amung: ana"- Yopa vogaung: khyo byu nhao: ke' mung: Simon Petru ga: mang: ra" yaug re yekhai: jhui" yu nhao wa,

⁶yao: wa panglai: yae mae" shoqid mau" kad' ra" Simon ga: mang: ra" yaug: yham mae thang: na: ra"- ga: ta" ra".

⁷Mug: lagyo: phao: lo" byaug thao re Koneliu wa yao" yham mae" daui daui o:kaung shid' yaug re we' Mao"So: khyo re kao bau: ra" yao" kao lhaug' gyezo: pho" dayaug re khai: yu mung:-

⁸boe" lai: lo" ra" khyo alhab' yao: bam re ta" kyo: yang:- yao: bam re Yopa vogaung: khyo nhao: ke' ra".

⁹Ai: thao: ba re yao: bam ye" lo" mung:- Yopa vogaung: nhae khyo joe" ye" lo" na: ako". Ba khaung tau yo, ko re Petru wa akyu" mho' nae" qhid' mae" yham khaung dao: pyae khyo do, lo" ra".

¹⁰Yao: wa vae: moe' li" mung:- zo:ve zo: nug: li" ra". Zo: ve nyhang" jaung: na: ra" au:- yao: wa qhu" lho dalam: re myao: ra".

¹¹Ai: qhu" lho mae mug:gaung bung" li" mung:- byid khyug geim" mae" zaui" ci: ra" mai pho' we' dau: ra" ru daja: myid gaung khyo shoe' khyo" ke' byid' rure yao: myao: ra".

¹²Ai: khug mae byid khyid de; ra" gug'nyhug' ja: cao jab- yoe" du" lhau: ra" gug'nyhug' ja: cao jab we' ngho' jhid' ngho' zo: ja: cao jab alhab' bo: ra".

¹³Ailao" Petru we"- To" yang: se' zo: wa,- ga: thoe dathoe jhau: thug' li" ra".

¹⁴Ngadqere: Petru wa Asang we"- dajhid' re: magai: boe" ngad: ra". Ai: maca' majhad' ja: ngo khonhae" re: mazo:- ga: tau" ra".

¹⁵Ai: thoe wa- Mao"So: yang san sin" ra" ga" rure masan masin" ein: nao data" wa,- ga: dam: jhau: thug' li" ra".

¹⁶Sam lhang airu: boe" mung:- thao re ai: rure mug:gaung khyo dam: to' yu: pye' ra".

¹⁷Petru wa ce: qhu" lho: lajheim: re myid: mug' na shi" au:- Koneliu yang nhao: ke' ra" mo, wa Simon yham re qho: myid' yu yang:- yao: bam wa yham kheim: kham: dung: mae lo: ye; jo; ako".

¹⁸Yao: bam wa- Simon Petru ga: mang: ra" bang" vo dayaug mana i? ga: yao yang: myid' ako".

¹⁹Petru ai: qhu" lho we' sin: mung: myid: qu" na: shi" au:- Gyang" Lho" Byo wa yao: re- Qu" wa,- Cetau mae byu sam yaug wa nao re qho: na: ako".

²⁰Aimung: seim" nyhang" yang: gyo" lo" wa,- pe"mung: ga"re ngoyang nhao: ke' ru ngad mung:- aug' o: myid mabo lo:- yao: bam: thao cao" ye" lo" wa,- ga: ta" ra".

²¹Airumung: Petru wa- gyo" lo" mung:- yao: bam re Naonhaung" qho: na: ra" yaug wa ngo ngad:- naonhaung" pe" mung: joe" li" ko" i? ga: myid' ra".

²²Yao: bam wa- Ngonhaung" re gyezug: pho" Koneliu yang nhao: ke' ru ngad:- Yao: wa byugai dayaug ngad mung:- Mao"So re caung:pa" ra" yaug ngad: ru we' Yuda byu qe alhab' yang phug' myao" ra" yaug ngad: ra". Ni" mung dao: re yao: qo" tae" gyo" yu nae" qhid' mae" mug: lagyo: dayaug wa nao re yao" yham khyo khai: yu nae" yao: re ta" ra"- ga: ta" ako".

²³Ailao" Petru wa yao: bam re khai: vhao" yu mung:- ai: myi yab genae" qhid' mae" yao: bam re lhaung: ra". Thao: ba re yao: wa seim" jin" yu mung: yao: bam we' daga" cao: lo" ra". Yopa vogaung: mae na: ra" lam khug: ra" mo, daqhae: re: Petru we' daga" cao" ye" lo" ako".

²⁴Ai: thao: ba re yao: wa Kesarea khyo joe" ye" ra". Aimae Koneliu wa yao" amyu" ba nam zo: qe we' yao: khai: to" ra" ba nam qe we' daga" Petru re lao" na: ra".

²⁵Petru joe" vao lo lao"- Koneliu wa yao: re yetug: yu mung: Petru: khyid qao: mae goe; gyo" lo" mung: yao: re goe; pa" ra".

²⁶Ngadqere: Petru wa- To" ye, wa,- Ngoyao: re: byu za: angad:- ga: ta" mung:- yao: re she: to" ke' ra".

²⁷Petru we' Koneliu jho" jhau zo" re" yham khug khyo vao lo" ko" re yham khug mae- mo, byu qe myo: sho' mo, zang" ham: na: rure Petru lo" myao: ra".

²⁸Petru wa yao: bam re- Yuda byu dayaug wa Taung bug byu qe we' daga" magai: na magai: zam" khug ga:- yao" caung:pa" thung" khyo" yang tam" to" rure naonhaung" yao: nyang" za: ba gau ngad: ako". Ngadqere:- khag' re ngad qere: caung:pa" thung" khyo mae masan masin" ru mangad: lao"- maca' majhad' ru ngad: ra" ga: magai: myid: rure Mao"So wa ngo re qhu" byid' ava".

²⁹Airumung:- nao ngo re khai nhao: ke' ra" au:- ngo wa pe" maha lo: cao" li" va"- amung: nao ngo re khai nhao: ke' ra" khyo re ta" kyo: la,- ga: ta" ra".

³⁰Ailao" Koneliu wa- Lai: lo" ra" sam ba mae myi" thao sam yo, qug ko re ngo wa yham khug mae akyu" mho' yang: na: au: nyag din taung"- bao qhui: ra" mai bau: ve; ra" byu dayaug nga" qhid' au: mae li" ye; jo, mung:-

³¹Koneliu we"- Ni" akyu" mho' thoe re Mao"So the' gyo" ava"- ni" aung lam Alu: gae byid' ra" mau" zo" jham rere: the' myao: ava".

³²Airumung: Yopa vogaung: khyo byu nhao: ke' yang: Simon Petru ga" ra" yaug re khai nhao: ke' wa,. Yao: wa panglai: yae mae" shoqid mau" kad' ra" Simon ga: mang: ra" yaug: yham mae bang" na: ra"- ga: ngo re ta" ra".

³³Airumung: ngo wa ailao" jao" nao jhao" byu nhao: ke' ra". Nao joe" li" mung: gyai gai va"- yao: nao re ta" nhao: ke' ra" mung dao: alhab' re tae" gyo" yu nae" qhid' mae" Mao"So: qhid' kheim: mae ana" ngonhaung" alhab' mo, cetau mae lao" na: bam va"- ga: ta" ra".

³⁴Ailao" Petru wa- Mao"So wa yaug khao: ngo" re myo, nho nga: lao: makhyin lo: dakhyo: za: kad' rure ngo ana" dang za: ba va".

³⁵Pe" ja" byumyu" ngadqere: yao: re caung:pa" mung: din: man" ra" khyo re phug' cao" ra" yaug re wa Mao"So khae: yu: ra".

³⁶Alhab' mo; Asang ngad: ra"- Asang Yesu Khristu khyo" yang Israel byumyu" qere Mao"So ta" hau: byid' ra" ngaui pyo: yaug yo: ra" Lau Dao: Gai mung dao: re naonhaung" ba: ako".

³⁷Yohan wa yao: Qid nyhab' kham mung dao: re bin: kho" kyo: thao Galile mung" mae" qhid mung: Israel mung"dan: geim" jao: sho' boe" lo: ra" mau" zo" khyo re naonhaung" ba: ako".

³⁸Amung: Nazared mae" Yesu re Mao"So wa Gyang" Lho" Byo we' qam: so' khoru: vhe' sheim: byid' ra" khyo rere: naonhaung" ba: ako". Pe"mung:ga"re Mao"So wa yao: we' daga" ngad mung:- yao: wa jo, qo khyi" khao: ngo" khyo cao" du" qin" yang: gai: ra" mau" zo" re kad' mung:- yui: qam: so' qao: mae na: ra" mo, alhab' re cao" gai byid' ra".

³⁹Yerusalem vogaung: mae we' Israel mung"dan: geim" Yesu kad' ra" lo, mau" alhab' we' sin: yang:- ngonhaung: wa sagse: qe ngad:. Ai: thao yao: bam wa Yesu re pyao: zang mae jin" se' pye' ako".

⁴⁰Ngadqere: sam ba kyo thao re Mao"So wa yao: re shid: ru mae" daui: to" li" nhao mung: yaug khao:ngo" re mangad: lo:-

⁴¹Sagse: qe ga:- Mao"So: yang khyin: to" ra" mo,- yao: dam: daui: to" li" thao yao: we' daga" zo: shaug' ra" ngonhaung" re za: qhu" byid' ra".

⁴²Yao: wa byu alhab' mo, re Ngaui Bau" Lau Dao: kho" kyo: byid: nae" we' yao: wa kao so' daui: na: ra" mo, re dao: kho' nae" qhid' mae" Mao"So: yang san: to" ra" tarha" agyi ngad: rure sagse: kham byid: nae" qhid' nae" ngonhaung" re yao: amyin" byid' to" ra".

⁴³Yao: re lam: ra" mo, yaug khao: ngo" wa yao" mang kheim: so' khyo" yang qobo khyad' pye' byid' ru qhug' li" nae" ga:- yao" khyo we' sin: mung: lapa qe alhab' mo, ta" ako"- ga: ta" ra".

⁴⁴Airumung: Petru jhau: na shi" au:- yao" mungdao: re tae" gyo" na ko" ra" byu alhab' mo; dao mae Gyang" Lho" Byo joe" gyo" li" ra".

⁴⁵Taung bug byu qe: dao mae re: Mao"So wa yao" Gyang" Lho" Byo jhaung qhu" re vhe' sheim: byid' ruyang- Yopa vogaung: mae" Petru we' daga" joe" li" ko" ra" Yuda byumyu" lam khug: ra" mo, wa mug' hao" byaug: ako".

⁴⁶Pe"mung:ga"re yao: bam wa myan" aja: ja: jhau mung:- Mao"So nho: qi" qhang: ra" khyo qi: sho' caung:khin" byid' na: rure yao: bam the' gyo: yang:- ngad: ra".

⁴⁷Ailao" Petru wa- Cebam wa ngonhaung" we' dakhyo:- Gyang" Lho" Byo re qo" khae: yu: avako". Amung: yao: bam qid: yang qid nyhab' kham: yu nae" rure khag' qo" tam" ko" i?- ga: ta" thug' ke' ra".

⁴⁸Aimung: Petru yao: bam re Yesu Khristu mang mae qid nyhab' kham: yu genae" qhid' mae" amyin" byid' ra". Ai: thao re yao: bam wa Petru re yao: bam we' daga" dayo, zo: thang: na nae" qhid' mae" mho' ako".