Read Maru LAGYO: 11 Bible Online

LAGYO: 11 - Maru bible

LAGYO: 11

¹Taung bug byu qere:- Mao"So: mungdao: re khae: yu vako" ra"- ga" rure lagyo: qe we' Yuda mung" geim" mae na: ra" lam khug: ra" mo, the' gyo" ako".

²Petru Yerusalem vogaung: khyo joe" lo lao"- Taung bug byu qe au: qid lhai" ra" thung" re kham: yu ca" ga: ngaui: ra" mo, wa Petru re-

³Nao wa au: qid malhai" ra" Taung bug byu qe: yham khyo lae" ye: mung: yao: bam we' lhao" re: daga" zo: shaug' ra"- ga: qobo vhin: ako".

⁴Airumung: Petru wa boe" lo: ra" khyo re aqao: mae" athao jao: sho' yao: bam re ta" kyo" ra".

⁵Ngo wa Yopa vogaung: mae akyu" mho' na: au:- qhu" lho dalam: re the' myao:- byid khyug geim" mae zaui" ci: ra" mai pho' we' dau: ru daja: mug:gaung mae" shoe' khyo" ke' byid' rure ngo myao:. Ai: ru wa nga" nhae mae thang: jo; ra".

⁶Ai: khug khyo ngo nyang" za: qu" ke' re mai" ru we' kyao: ra" byid khyid de; ra" gug'nyhug' jham- yoe" du" lhau: ra" gug'nyhug' jham- ngho' jhid' ngho' zo: alae" jham re ngo myao:.

⁷Ai: thao re- Petru we" to" wa,- Se' zo: wa,- ga: jhau: ra" thoe re ngo the' gyo".

⁸Ngadqere: ngo wa- Asang we" dajhid' re: magai: boe"- ai: caung:pa" thung" khyo" maca' majhad' ra" ja: mangad: lao"- masan masin" ra" zo:ve re ngo khonhae" re: mazo" qu" ein: phaug' tau".

⁹Ai: thao wa- Mao"So: yang san sin" ra" gu: rere: masan masin" ein: nao data" wa, ga: mug:gaung mae" dam: jhau: thug' li" ra".

¹⁰Sam lhang airu: boe" mung: thao re- ai: rure mug:gaung khyo dam: to' yu: pye' ra".

¹¹Ai: au: re yao: Kesarea vogaung: mae" ngo jhao" nhao: ke' ra" byu sam yaug ngo na: jo; ra" yham khyo joe" li" ako".

¹²Gyang" Lho" Byo wa dajhid' re: maaug' o: lo: yao: bam: thao cao" ye" lo" nae" ngo re ta" ra". Yopa vogaung: mae" ai: lam khug: ra" byu khyaug' yaug re: ngo we' daga" Kesarea vogaung: khyo bocao" li" ako". Ngonhaung" alhab' mo, wa Koneliu yham khyo vao ye".

¹³Korneli wa- yao" yham khug mae mug: lagyo: dayaug li" ye; jo; rure the' myao: ra" khyo rere:- ai: mug: lagyo: pho" wa- Yopa vogaung: khyo byu nhao: ke' yang: Simon Petru ga: mang: ra" yaug re yekhai: jhui" yu wa,.

¹⁴Ai: yaug wa nao we' ni" yham khug: byu qe khyad' yu: ru qhug' nae" ra" mungdao: re kho" kyo" li" nae" ga: yao: re ta" ga" rure re: ngonhaung" re ta" kyo" ra".

¹⁵Amung: ngo dao: jhau: qhid we' Gyang" Lho" Byo wa qhid' phyao: ngonhaung" dao mae joe" gyo" li" ru we' dakhyo: yao: bam: dao mae re: joe" gyo" li" ra".

¹⁶Ailao"- Yohan wa qid: yang qid nyhab' kham: byid' ra"- ngad qere: naonhaung" wa Gyang" Lho" Byo: yang qid nyhab' kham: yu: li" genae"- ga: Asang ta" ra" dao: re ngo myid: beim" li" ra".

¹⁷Asang Yesu re ngonhaung" lam lao"- Mao"So ngonhaung" re byid' ra" jhaung qhu" wa ai: Taung bug byu qere re: byid' ru wa de: de: za: ngad: ra". Airumung:- ngo wa pe" ru" yaug ngad yang: Mao"So re qo" tam" nae" i? ga: ta" ra".

¹⁸Yao: bam wa ai: dao: re the' gyo: gelao"- Petru re yao: bam qobo vhin: ru thang: pye' mung:- Mao"So re caung:khin" mung:- Mao"So wa Taung bug byu qere re: myid tha" yang: kao so' qo" daui: na nae" akho: akhang" byid' to: vanhaung ga: ta: ako".

¹⁹Lam khug: ra" mo, wa- Stephan re se' ru mae" boe" li" ra" yhin" ru mathao mae phao: byo: sin" lo" ko" ra". Yao: bam daqhae: wa- Phoenikia- Kupru we' Antioki vogaung: jham khyo byo: sin" lo" mung:- ai: mungdao: re Yuda byu qere za: ta" kyo" ako".

²⁰Ngadqere: ai: lam khug: ra" mo, mae" Kupru we' Kureni mung" mae na: ra" mo, daqhae: wa Antioki vogaung: khyo joe" ye: mung:- Taung bug byu qere re: Asang Yesu ngaui bau" lau dao: re yekho" kyo" ako".

²¹Asang: nho: qam: so' yao: bam we' daga" ngad: ruyang- byu myo: sho' mo, lam mung:- Asang jhao" phaug' lo: ako".

²²Ce: lau thoe re Yerusalem vogaung: phung: byu qe the' gyo: gelao" yao: bam wa Barnaba re Antioki vogaung: khyo nhao: ke' ako".

²³Barnaba wa Antioki vogaung: khyo joe" ye: mung:- mo, byu qere Mao"So khoru: shaman" byid' to: va" rure yethe' myao lao" qu" ngaui bau: mung:- Asang re yao: bam: aung khug nhag' lam: mae tang tang zaui" ci mung: vin tang: za: phug' cao" na genae" qhid' mae" yao: bam alhab' mo, re qam: byid' ra".

²⁴Barnaba wa byugai ngad: ru we' Gyang: Lho" Byo byang" mung: lam khug: myid qi" ra" yaug ngad: ruyang byu myo: sho' mo, re Asang shad' khyo phaug' lo nhao: ra".

²⁵Ai: thao re Barnaba wa Sholu re yeqho: yu nae" qhid' mae" Tarshu vogaung: khyo ye" lo" ra".

²⁶Yao: wa Sholu re yeqho: myao lao"- Antioki vogaung: khyo jhui" lo mung:- yao: shid' zo: wa dazin: geim" ai: phung: byu qe we' zam" khug: na mung: yang: byu myo: sho' mo, re mho" shid' byid' ako". Aimung: lam khug: ra" mo, re Khristan qe ga: sao qhid' mhang" byid' ru wa Antioki vogaung: mae ngad: ra".

²⁷Ai: ayo, gyo: re lapa qe daqhae: wa Yerusalem vogaung: mae" Antioki vogaung: khyo ye" ako".

²⁸Yao: bam mae" Agabu ga: mang: ra" yaug wa to" ye, mung:- Byo qam: so' khyo" yang myid gaung dao geim" mae bao" khug' no, khug' li" zai ngad: ra"- ga: lapa pa: ra". (Ai: bao" khug' no, wa Roma Khosin" Klaudiu- pyad mae gaigai: joe" lo: ra".)

²⁹Mho"zo: qe wa yao: bam yaug khao: ngo" qo" gai: boe" ra" qhi" Yuda mung" mae na: ra" yao: bam: lam khug: ra" mao:nhaung: qere bao" thaug' ru vhin: ke' byid: nae" qhid' mae" myid: phyid' ako".

³⁰Ai: thao yao: bam wa bao" thaug' ngaui re Barnaba we' Sholu lo, khyo" phung: lau: de, qe: lo, khug khyo vhin: ke' ako".