Read Maru LAGYO: 12 Bible Online

LAGYO: 12 - Maru bible

LAGYO: 12

¹Ai: ayo, mae Herod kho:kham wa phung: byu qe daqhae: re yhin" qhid: li" ra".

²Yao: wa Yohan yao: mao: Yaku re shae: yang se' pye' nhao: ra".

³Airu: kad' rure Yuda byu qe qu" ngaui ko" rure Herod myao lao" yao: wa Petru rere: taung" yu: ra". (Ceru: boe" ru wa Man" Make' Mug Poe ba na gyo: mae ngad: ra".)

⁴Herod wa Petru re bin: taung" yu lao"- thaung: khug mae lhaung" to: mung: gyezo: byid yaug bo: ra" gyezo: phung: byid phung: re zaung" nhao: to" ra". Herod wa Petru re Lai co' Poe baui: thao re mung" byu qe: qhid' kheim: mae dao: phyid' nae" seim" to" ra".

⁵Airumung: Petru wa thaung: khug mae laung" jo; ra". Ngadqere: phung: byu qe wa Petru qhid' mae" Mao"So re qam: ke' yang: akyu" mho' na: ako".

⁶Herod wa Petru re mung" byu qe: qhid' kheim: khyo jhui" thug' ye: nae" ra" qhid' myi re Petru wa gug: gam gyezo: shid' yaug: agyo: mae yab: myhid' jo; ra". Yao: re jao co: shid' khe' yang taui" to" ako". Thaung: kham: dung: mae re: gug: gam gyezo: qe zaung" na: bam: ako".

⁷Asang: mug: lagyo: dayaug wa nyag din taung" Petru nhae mae li" ye; ke' mung:- thaung: qe, geim" mae bao: jo; ra". Ai: mug: lagyo: wa Petru re lo, sin mae zaui: yang: nhug' mung:- phyad phyad to" wa, ga: ta" ra". Ailao" jao" Petru lo, mae" jao co: taui: jham beim: gyo" lo" ako".

⁸Ai: thao re mug: lagyo: wa- Phyid' cui: cui: mung: khyid zhaung: zhaung: wa,- ga: ta" ra". Petru re: mug: lagyo: ta" ru we' dakhyo: kad' ra". Alao" mug: lagyo: wa- Ni" bau: qhang gaug: ve, yang: nga" thao cao" wa,- ga: ta" ra".

⁹Petru wa thaung: qe, mae" thug' mung:- yao" thao cao" ye" lo" ra". Ngadqere: Petru wa mug: lagyo: kad' na: ra" mau" zo" wa gai gai: yao: ngad: ga" rure yao: maba ngad: ra". Yao: wa qhu" lho myao: ru ngad: ga: jho: ra".

¹⁰Yao: shid' zo: wa zaung" ra" jo, qo sao qhid' lam: we' shid' lam: ein: lam: re lai: thug' lo" mung:- vogaung: khyo joe" ra"- jo, to' kham: dung: khyo joe" thug' lo" ako". Ai: kham: dung: wa yao: za: bung" lo" ra". Yao: shid' zo: wa ai: khyo thug' lo" mung:- hau" mo" khyo dakhe' mae su" lo" na ko" au:- ai: mug: lagyo: wa nyag din taung" Petru mae" gao" lo" byaug: ra".

¹¹Ai: thao re Petru wa yao: mae boe" ra" khyo re beim" li" mung:- Mao"So wa yao" mug: lagyo: re nhao: ke' yang: Herod lo, mae" re:- Yuda byumyu" qe: myid: lao" na: ra" ja: alhab' mae" re: ngo re khyad' yu va" rure dang za: ngo ana" ba va"- ga: ta"_ ra".

¹²Yao: khoru: boe" lai: lo: rure nyang" za: beim" li" lao"- yao: wa Yohan Marku yao: myhi" Mari yham khyo vao ye" lo" ra". Ai: yham mae byu myo: sho' mo, daga" za: ham: phaung: na mung: akyu" mho' na: ako".

¹³Petru wa taung gaung shad' mae" kham: re lo" ko' ke' ra". Alao" Rhode ga: mang: ra" daui daui okaung myiqe: nau" wa kham: phung" byid: nae" qhid' mae" ye" lo" ra".

¹⁴Yao: wa Petru thoe re gyo" xam: mung:- gyai ngaui bau: yang: kham: maphung" byid: shilo:- yham khug khyo dam: tug' vao lo" mung:- Taung gaung mae Petru ye; jo; ra"- ga: lo" ta" kyo" ra".

¹⁵Yao: bam wa nao go: ava"- ga: ta" ako". Ngadqere: yao: wa dang yao: ngad: ga: kyid kyid ga: ta" ra". Airu: mung: yao: bam wa yao: re Ai wa Mug: Lagyo: ngad nae"- ga: tau" ako".

¹⁶Petru wa mathang lo: kham: ko' na: ra". Lo" thao" mae yao: bam wa kham: yephung" ke' mung:- yao: bam Petru re myao gelao"- mug' hao" byaug: ako".

¹⁷Petru wa yao: bam re sae za: na genae" qhid' mae" lo, tu" tu" mung:- Asang wa yao: re thaung: khug mae" khoru: jhui" thug' lo: ra" khyo re yao: bam re ta" kyo" ra". Alao" Petru wa Ce: khyo re Yaku we' lam khug: ra" mo, gaje qere re: ta" kyo: ge, ga: ta" mung:- yao: wa ai: tau mae" gatau khyo thug' ye" lo" ra".

¹⁸Ne, kao mug: bo" li" lao" thaung: yham zaung" ra" gug: gam gyezo: qe wa- Petru khai: lo" byaug va" laug i? ga: mo, thaui: mo, yaug gyaug: nin" na: ako".

¹⁹Herod kho:kham wa Petru re qho nae" qhid' mae" amyin" khyo" ke' ra". Ngadqere: yao: bam wa Petru re maqho: myao ko" ngad: ra". Airumung: Herod kho:kham wa ai: gug: gam gyezo: qere myid: ca: qu" mung: yao: bam re se' pye' nae" qhid' mae" amyin" khyo" ke' ra". Ai: thao re Herod kho:kham wa Yuda mung" mae" thug' lo" mung: Kesarea vogaung: mae dayo, kho yena: ra".

²⁰Herod wa Ture we' Sidon vogaung: byu qere gyai nhag' yo" ra". Aimung: ai vogaung: shid' lam: mae" mo, wa daphung: za: kad' mung: kho:kham pho" jhao" ye" lo" ako". Yao: bam wa kho:kham kho" geim" re eib: ra" Blastu re yao: bam re bao" thaug' yu nae" sao qhid' re yemho' ako". Ai: thao re yao: bam wa Herod jhao" vao ye: mung:- ngaui pyo: yaug yo khyo yemho' ako". Pe"mung:ga"re yao: bam: mung"dan: wa kho:kham mung"dan: mae" zao:kho qo" yu: na geyang: ngad: ra".

²¹Herod wa dang: to" ra" ba na mae yao" kho:kham mai bau: re ve; pye' mung: yao" kho:kham tao" khau" dao mae zaung: jo, yang: mung" byu qere dao: jhau: ra".

²²Alao" mung" byu qe wa Ce: jhau thoe wa xao su byu: jhau thoe mangad:- So jhau thoe angad: ra"- ga: hug' ta" ako".

²³Herod kho:kham wa Mao"So re nga: mayhe' byid' ruyang aijao" yao: Asang: mug: lagyo: wa yao: re be; lhang" ke' ra". Yao: wa laug daung: jham: yang zo" se' pye' ru qhug' ra".

²⁴Mao"So: mung dao: wa xo' byo: sin" lo" mung:- lam khug: ra" byu je: myo" laug: li" ra".

²⁵Barnaba we' Sholu wa yao: shid' zo: mau" zo" bin: zaui: lao" Yohan Marku re jhui: yang: Yerusalem mae" dam: phao: lo" ako".