Read Maru LAGYO: 13 Bible Online

LAGYO: 13 - Maru bible

LAGYO: 13

¹Antioki vogaung: mae" phung: khug mae lapa qe daqhae: we' mho" pho" qe daqhae: bobo: ako". Ai bam wa Barnaba Nigara ga" ra" Simon- Kureni byu Lukai mung" zug: pho" Herod we' daga" na: lo: ra" Manaen we' Sholu bam ngad: ako".

²Yao: bam wa Asang re caung:pa" yang: zo:ve jao" yang: na ko" au:- Gyang" Lho" Byo wa yao: bam re Barnaba we' Sholu shid' zo: re nga" mau" vin vo, nae" qhid' mae" gatau khyin: san: to: ge,- ga: ta" ra".

³Alao" yao: bam wa zo:ve jao" yang: akyu" mho' mung:- yao: shid' zo" dao mae yao: bam: lo, kai: byid: yang: mau" zo" vin vo, nae" qhid' mae" yao: shid' zo: re nhao: ke' ako".

⁴Airu: Gyang: Lho" Byo: yang nhao: ke' ru we' dakhyo: Barnaba we' Sholu wa Seleukia vogaung: khyo ye" lo" mung: ai: vogaung: mae" Kupru gagyo: kao" khyo lha we' gau" ye" lo" ako".

⁵Yao: shid' zo: wa Salami vogaung: khyo joe" ye: gelao"- Tarha" jung yham mae Mao"So: mungdao: re kho" kyo: byid' ako". Yao: shid' zo: re bao" thaug' byid: nae" Yohan Marku re jhui" ye" ako".

⁶Yao: shid' zo: wa ai: gagyo: kao" re gau" lai: ye: mung:- Papho vogaung: khyo joe" ye" ako". Ai: vogaung: mae Yuda byu lapa apyag' ngad mung:- Vha" Ba: Ra" Yesu ga: mang: ra" byu dayaug re the' myao: ako".

⁷Yao: wa ai: gagyo: kao" mae" mung" zug: pho" Sergiu Polu nho: byin cao: pho" ngad: ra". Mung" zug: pho" wa nhag' lam: suzo: du" ra" yaug ngad: ra". Ai: mung" zug: pho" wa Mao"So: mungdao: re tae" gyo: nug: ruyang Barnaba we' Sholu shid' zo: re yao" qhid' kheim: khyo khai: vhao" yu: ra".

⁸Ngadqere: Greeg myan" khyo" Eluma ga: mang: ra" vha" yaug wa Yesu khyo re mung" zug: pho" malam" vashao: ga:- Barnaba we' Sholu shid' zo: re ngag: thaug' ra".

⁹Airumung: Polu ga: re: mang: ra" Sholu wa Gyang" Lho" Byo we' byang" mung:- yao: wa ai: vha" yaug re din: din: za: zhaug' qu" to: yang:-

¹⁰Yui Satan" nho: yao: zo: we"- nao wa din: man" ru we' gai: ra" ja: alhab' nho: gyevo apyag' asham" aja: ja: we' to, za: byang" jo; ra" yaug ngad: ra". Nao wa khonhae" re: Asang: nho: dangman" ra" khyo re mhug' pyag' dao: boe" sho' kad' na yaug ngad: ra".

¹¹Ana" yao: Mao"So: lo, wa ni" dao mae joe" li" mung:- ni" myo, jid: lo" byaug: li" nae"- nao wa dayo, ko ba bao re mathe' myao nae" ga: ta" ra". Ailao" jao" Eluma wa myo, jid: lo" byaug mung: dayaug yaug: yang yao" lo, mae" she yang: jhui" yu geshao: ga: soe' qho: qin" ra".

¹²Mung" zug: pho" wa airu: boe" rure myao lao" Yesu re lam" ra". Pe"mung:ga"re Asang: khyo we' sin: yang: mho" shid' byid' rure yao: wa xo sho' mug' hao" byaug: ra".

¹³Polu we' yao" byin cao: qe wa Papho vogaung: mae" lha jui: yang: Pamphulia mung" mae" Perga vogaung: khyo joe" ye" ako". Yohan Marku wa ai: vogaung: mae" yao: bam re to: co' mung:- Yerusalem khyo dam: tug' phao: lo" ra".

¹⁴Yao: bam wa Perga mae" xo' ye" lo" mung: Pisidia mung" mae" Antioki vogaung: khyo joe" ye" ako". Yao: bam wa Dugno: Ba mae Yuda tarha" jung yham khug khyo vao ye: mung:- yezaung: jo; ako".

¹⁵Moshe tarha" we' lapa qe: tung" paug' re bin: nghe' lao"- tarha" jung yham agyi qe wa- Mao:nhaung: qe we' mo, byu qere qam: byid: nae" mungdao: naonhaung" qo" ko" ngad: re wa li" ta" geri: ga: byu nhao: ke' yang: ta" nhao: ra".

¹⁶Alao" Polu wa to" ye, mung:- lo, tu" tu" yang:- Israel byumyu" qe we"- cemae na ko" ra" Mao"So re caung:pa" ko" ra" Taung bug byu qe we"- tae" gyo: ge,-

¹⁷Israel byumyu" qe: Mao"So wa ngonhaung" phug' pho" qere khyin: yu mung:- Egutu mung" mae yao: bam bang" vo khyo" na ko" ra" gyo: mae byumyu" qi: boe" li" nhao: ra". Mao"So wa yao" qam: so' mo" we' yao: bam re Egutu mung" mae" jhui" thug' lo mung:-

¹⁸Din" pyad' yo mae byid xe zin lam: lam: Mao"So wa yao: bam: dao mae zang: kham byid' ra".

¹⁹Yao: wa Khanan mung" mae na: ra" byumyu" nhad' myu" re phyo' sin" pye' mung: ai: mung"dan: re yao" byumyu" qere sang nhao: ra".

²⁰Ceru: boe" sho' zin lam: byid yo: ngo" xe zin myao" ra". Ceru: bin: boe" thao re Mao"So wa Lapa Samuela pyad joe" sho' yao: bam re tarha" agyi jham byid' to" ra".

²¹Amung: yao: bam kho:kham mho' gelao"- Mao"So wa yao: bam re Benyamin amyu" kaung mae" Kisha yao: zo: Sholu re san byid' ra". Sholu wa yao: bam: kho:kham byid xe zin kad' ra".

²²Ai: thao Mao"So wa Sholu re khyo" pye' mung:- Davi re yao: bam: kho:kham dam: kad' nhao: ra". Mao"So wa Davi we' sin: yang:- Yese yao: zo: Davi wa ngo o: ra" yaug ngo zaui: nhao: ra" mau" alhab' re zaui: nae" yaug ngad: rure ngo myao va"- ga: ta" ra".

²³Mao"So wa yao" dao:so: byid' to" ru we' dakhyo:- Davi myid:zo: qemae" ngad: ra" Yesu re Israel byumyu" qe: khyad' yu yaug boe" li" nhao: ra".

²⁴Yesu yao" mau" zo" re maqhid shire Yohan wa Israel byumyu" alhab' mo, re yao: bam: qobo mae" myid tha" lo mung: qid nyhab' kham: yu genae" qhid' mae" kho" kyo: byid' ra".

²⁵Amung: Yohan wa yao: re nhao: to" ra" mau" zo" re bin: zaui" lo" na lao"- mo, byu qere Ngo khag' ngad: ra" ein: naonhaung" jho ko" i? ngo wa ai: naonhaung" lao" na: ra" yaug mangad:- Yao: wa nga" thao mae joe" li" zai ngad: ra". Ngo wa yao" khyid zhaung: re khyad' byid: nae" lhao" re: maman: qi" ngad: ra"- ga: ta" ra".

²⁶Abraham myid:zo: qe ngad: ra" nga" mao: nhaung: Israel byumyu" qe we"- Cemae na: ra" Mao"So re caung:pa" ko" ra" Taung bug byu qe we'- ce: khyad' yu: ra" khyo mungdao: re Mao"So wa ngonhaung" jhao" vhin ke' ava".

²⁷Yerusalem mae na: ra" mo, we' yao: bam: au: jhaung qe wa- Yesu wa khyad' yu: ra" yaug ngad: rure maba- Dugno: Ba ba khao: ngo" yao: bam nghe' ra" lapa qe: jham: dao: jham rere: yao: bam maba: gyo: ko" ngad: ra". Ngadqere: yao: bam wa Yesu re dao: phyid' ra" khyo" lapa qe: jham: dao: jham re jab byang" li" nhao: ra".

²⁸Yao: bam wa yao: re shid man" ra" qobo dae dao: phyid' nae" akhyo mamyao gengadqere: yao: re se' pye' nae" qhid' mae" yao: bam wa Pilad re mho' ako".

²⁹Yao: bam wa yao: we' sin: yang: jham: mug sug' mae bo: ru we' dakhyo: alhab' yao: re bin: kad' gelao"- yao: bam wa yao: re pyao: zang dao mae" khyo" yu mung: lab dalam: khug mae yeke' to" ako".

³⁰Ngadqere: Mao"So wa yao: re shid: rumae" daui: to" li" nhao mung:-

³¹Galile mung" mae" Yerusalem vogaung: khyo yao: we' daga" ye" lo" ko" ra" mo, re yao" khyo re sagse: kham byid' ra" sagse: qe ngad: ako".

³²Caung: khin" mugsug' aqi: shid' lam: mae- Nao wa nga" Zo: ngad: ra"- ana" ba ngo wa ni" Pho" boe" lo va"- ga: tung" to" ru we' dakhyo:- Mao"So wa Yesu re daui: to" li" nhao: ra" khyo" yang ngonhaung" phug' pho" qere byid' to" ra" dao:so: wa yao: bam: myid:zo: qe ngad: ra" ngonhaung" re zaui: byid' ava". Amung: ngonhaung" wa ce: lau dao: gai re naonhaung" re ta" kyo: nae" qhid' mae" ce: jo, qo khyo joe" li" ru ngad: ra".

³³

³⁴Yao: khonhae" re: madam: shid lo nae"- ga" rure shid: rumae" Yao: re dam: daui: to" li" nhao: ru we' sin: yang: Mao"So wa- Ngo Davi re byid: nae" ein: dao:so: byid: to" ra" gyang" lho" ru we' gang" tang: ra" shaman" jeju ngo naonhaung" re byid: nae"- ga: ta" ra".

³⁵Gatau caung:khin" dalam: mae re:- Nao wa dao:so: dang: ra" ni" daui daui yaug re lab khug mae bab: qeim: lo" nhao nae" mangad:- ga: ta" to" ra".

³⁶Davi wa yao: daui: na: ra" gu: mae Mao"So myid: yaung: to" ra" mau" zo" jham re zaui: so: mung:- shid: lo" byaug: ra". Yao: wa yao" phug' pho" qe: lab nhae mae nyhab' shaung: pye' ru qhug' mung:- yao" mao gaung wa lab khug mae bab: qeim: lo" byaug: ra".

³⁷Ngadqere: Mao"So: yang shid: rumae" dam: daui: to" li" nhao: ra" yaug wa airu: maba: qeim: lo" ngad: ra".

³⁸Airumung:- nga" Israel mao: nhaung: qe we"- ai: Yesu khyo" yang qobo khyad' byid' ru qhug' ra" khyo we' sin: mung:- naonhaung" re kho" kyo" na: rure- Yesu re lam: ra" mo, alhab' wa Moshe tarha" yang maqo" lhoe' ke' ra" qobo alhab' mae" qo" loe, beim: ra" khyo rere: naonhaung" re ngonhaung" ba nhao nug: ra".

³⁹

⁴⁰Aimung:- Qu" ge,- Jung" gaui mo, we"- mug' yang: shid: lo" ge,- pe"mung:ga"re ana" ba ngo kad' nae" mau" zo" dalam: re dayaug yaug: yang naonhaung" re ta" sho' kyo: byid: sho' ngadqere: naonhaung" ai re lam" genae" mangad:- ga: lapa qe ta" to" ra" jham: dao: wa naonhaung" mae maboe" li" nae" qhid' mae" lha" ge,- ga: kho" kyo: ra".

⁴¹

⁴²Polu we' Barnaba shid' zo: wa tarha" jung yham mae" thug' lo" na ko" au: mo, byu qe wa- thao: Dugno: Ba mae re: dam: li" mung: ai: khyo we' sin: yang: li" dam: kho" kyo: byid: nae" qhid' mae" yao: shid' zo: re mho' ako".

⁴³Ham phaung mae"- mo, byu qe byo: lo" gethao re Yuda byu qe myo: sho' mo, we' Yuda caung:pa" thung" shad' khyo phaug' vao lo vako" ra" Taung bug byu qe myo: sho' mo, wa Polu we' Barnaba thao cao" ako". Polu we' Barnaba shid' zo: wa Mao"So nhag' myan" ra" khug mae xo' yang: kao so' daui: na genae" qhid' mae" yao: bam re qam: byid: dao: ta" ako".

⁴⁴Ai: thao Dugno: Ba mae Mao"So: mungdao: re tae" gyo: nae" qhid' mae" vobyu alhab' ein nae" qhi" joe" li" ako".

⁴⁵Yuda byu qe wa ai: mo, byu qere li" the' myao gelao"- yao: bam wa myid nug: gemung: Polu kho" kyo" ra" mungdao: re ngag mung: yao: re maphug' makhyad' roe" yang: ta" ako".

⁴⁶Ngadqere: Polu we' Barnaba shid' zo: wa je yang: mazag mavae- Mao"So: mungdao: naonhaung" re shi" sao qhid' ta" kyo: nae" wa khyo ang: ra". Ngadqere: naonhaung" wa ai: mungdao: re ha: pye' mung:- ai: apyad ato: kao so' we' maman: qi" ga: naonhaung" yao: yao: dao: phyid' yu gemung: nga" shid' zo: wa naonhaung" re to: co' mung: Taung bug qejhao" ye" lo" zai ngad:-

⁴⁷pe"mung:ga"re Asang wa ngonhaung" re Myidgaung dao mae na: ra" mo, alhab' khyad' yu: ru qhug' yu genae" qhid' mae" naonhaung" re Taung bug qe: qhid' mae" bo" bao boe" nhao va"- ga: amyin" byid' to" ra"- ga: ta" ako".

⁴⁸Taung bug byu qe wa ce: dao: re the' gyo: gelao"- gyo" ngaui ko" ru we' Mao"So: mung dao: re caung:khin" byid' ako". Apyad ato kao so' qo" yu nae" qhid' mae" khyin: yu: to: qhug' va" mo; gu: Yesu re lam khug: lo: ako".

⁴⁹Mao"So: mungdao: wa ai: mung" geim" mae hau" nhao" lo" ra".

⁵⁰Ngadqere: Yuda qe wa Mao"So re caung:pa" mo, ngad: ra" byuna azhao" myhao: ra" Taung bug byu myiqe: qere we' ai: vogaung: mae" au: jhaung kad' mo, re lhau: zhung" to" ke' ako". Alao" yao: bam wa Polu we' Barnaba shid' zo: re yhin" mung: yao: shid' zo: re yao: bam: mung" mae" khe' thug' ke' ako".

⁵¹Polu we' Barnaba shid' zo: wa yao: bam re ngag: ha: pye' ra" ave, khyo" yao: shid' zo" khyid vo: mae" phalhug jham re ko: khyo" co' mung:- Ikoni vogaung: khyo ye" lo" ako".

⁵²Antioki vogaung: mae na: ra" lam khug: ra" mo, wa gyai ngaui bau" ru we' gyang" lho" Byo we' byang" jo; ako".