Read Maru LAGYO: 14 Bible Online

LAGYO: 14 - Maru bible

LAGYO: 14

¹Ikoni vogaung: mae re: gatau vogaung: mae we' dakhyo: boe" ra". Polu we' Barnaba shid' zo: wa Ikoni vogaung: mae re: tarha" jung yham khug khyo vao ye: mung: ai we' dakhyo: kho" kyo: gelao" Yuda byu qe myo: sho' mo, we' Taung bug byu qe myo: sho' mo, wa Yesu re lam: lo: ako".

²Ngadqere: malam ko" ra" Yuda byu qe wa Taung bug byu qere lhau: zhung" to" ke' mung: lam khug: ra" mo, re gye doe, nhao: ako".

³Polu we' Barnaba shid' zo: wa ai: vogaung: mae dajhid' myao" sho' thang: na mung:- ASANG: khyo re mazag mavae ta" kyo" ako". ASANG wa yao: shid' zo" lo, khyo" yang mug: pho" mau" zo" jham we' mug' pho: ve, lho jham re kad' qhu" nae" qam: so' byid: mung:- yao" nho: nhag' myan" ru we' sin" ra" mungdao: wa dangman" ru ngad: rure sagse: qhu" byid' ra".

⁴Ai: vogaung: byu qe wa shid' phung: jho" kho' lo" mung:- damyo" wa Yuda byu qe shad' khyo de, mung: damyo" wa lagyo: shid' zo: shad' khyo de; ako".

⁵Aimung: taung bug byu qe Yuda byu qe we' yao: bam: au: jhaung qe wa- lagyo: shid' zo: re yhin" nae" we' laug baui: yang pye' nae" qhid' mae" myid: phyid' ako".

⁶Lagyo: shid' zo: wa ai: khyo re ba gelao"- Lukaonia mung"- Lustra vogaung: we' Derbe vogaung: avai: ayae jo, qo jham khyo phao: ye" lo" ako".

⁷Yao: shid' zo: wa ai: jo, qo khaung: mae Lau Dao: Gai re kho" kyo" ako".

⁸Lustra vogaung: mae khau: mae" khyid qeim mung: khyo khonhae" re: maqo" su" ra" byu dayaug na: ra".

⁹Yao: wa zaung: jo, mung: Polu kho" kyo" ra" mungdao: re tae" gyo" na: ra". Polu wa ai: yaug wa yao: gai shao: lo" nae" qhi" lam khug myid bo yaug ngad: rure ba: qu" mung:- Polu wa ai: khyid qeim yaug re zhaug' qu" to: mung:-

¹⁰To" mung: din: za: ye, wa,- ga: ai: yaug re thoe qi: we' ta" ke' ra". Alao"- ai: khyid qeim yaug wa byae: to" li" mung:- khyo su" qin" ra".

¹¹Mo, byu qe wa Polu kad' ru re the' myao gelao"- yao: bam wa yao: bam: Lukaoni myan" khyo" So jham wa byu doe, mung:- ngonhaung" jhao" joe" gyo" li" va" ra"- ga" zag: hug' ako".

¹²Yao: bam wa Barnaba re Zeu au: she yang: kho" kyo: yaug ngad mung: Polu re wa Herma ga: mhang" byid' ako".

¹³Ai: vogaung: taung gaung mae jo; ra" Zeu so yham mae" khinjaung pho" wa nung: jaung lo: we' bin: kheim" jham re vogaung: kham: zang khyo cili" ra". Pe"mung:ga"re yao: we' mo, byu qe wa Lagyo: shid' zo: re xeim: ngaui" byid: nug: ako".

¹⁴Yao: bam airu: xeim: ngaui" byid: nae" seim" na ko" rure Polu we' Barnaba shid' zo: the' gyo: gelao"- yao: shid' zo: wa yao: shid' zo" mai bau: lao" cad' pye' yang: mo, byu qe: phaung gaung: khyo tao" vao ye" lo" mung:-

¹⁵Byu naonhaung" we"- pe" mung: naonhaung" ceru: kad' na ko" i? Nga" shid' zo: wa naonhaung" we' dakhyo:- xao su byu za: angad:- ai: akyu" mabo: ra" ja: jham re caung:pa" byid' rumae mug:gaung we' myidgaung- qid panglai: we' aijham: khug mae na: ra"- jo; ra" ja: alhab' re phan" to" ra"- daui: na: ra" Mao"So shad' khyo phaug' lo genae" qhid' mae" ai: Lau Dao: Gai re naonhaung" re ta" hau" kyo: byid: nae" qhid' mae" nga" shid' zo: cekhyo joe" li" ru ngad:.

¹⁶Lai: lo" ra" pyad mae" Mao"So wa xao su byu alhab' re yao: bam yao: o: ra" khyo: kad' nae" akhang" byid' to" ra".

¹⁷Ngadqere: Mao"So wa yao: na: jo; rure khonhae" re:- gai: ra" mau" zo" kad' ra" khyo"- sagse: qhu" byid' na: ra". Yao: yao" ayo, mae yao: wa mug:gaung mae" mug: qu: li" nhao mung:- gaug zo maui: lam: re mhang" li" nhao: ra" ve, vo: re byid' to: mung: naonhaung" re zo:ve byid: yang: naonhaung" nhag' lam: re ngaui bau" ru we' byang" sheim: jo, nhao: ra"- ga: zag: hug' yang: ta" ako".

¹⁸Lagyo: shid' zo: airu: zag: hug' ta" re lhao" re:- yao: shid' zo: re xeim: ngaui" byid: nae" seim: ko" ra"- mo, byu qere lagyo: shid' zo: wa maqo" tam" pye' sho' ngad: ra".

¹⁹Pasidia mung" Antioki vogaung: we' Ikoni vogaung: mae" Yuda byu qere yao: bam shad' khyo li" qo" ngaug: te' yu: ako". Ai: thao yao: bam Polu re laug baui: yang pye' mung:- shid va" ga: jho mung: vogaung: taung gaung khyo yeshe: thug' to" ako".

²⁰Ngadqere: yao" avai: ayae mae lam khug: ra" mo, yao: re li" lhang" gam" na gelao"- yao: wa to" li" mung:- vogaung: khug khyo dam: vao lo" ra". Ai: thao: ba re Polu we' Barnaba shid' zo: wa Derbe vogaung: khyo ye" lo" ako".

²¹Polu we' Barnaba shid' zo: wa lau dao: gai re Derbe vogaung: mae kho" kyo: byid: mung:- byu myo: sho' mo, mho"zo: qe boe" lo: ako". Ai: thao re yao: shid' zo: wa Lustra vogaung:- Ikoni- Pasidia mung" mae" Antioki vogaung: khyo dam: tug' lo" ako".

²²Yao: shid' zo: wa lam khug: ra" mo, re qam: byid: yang: lam khug: ra" khyo mae din: za: ye; jo, genae" qhid' mae" we' yao: bam re ta" peim: ta" kyang: byid: mung: ngonhaung" wa- Mao"So: mung"dan: khyo vao ye: nae" qhid' mae" qug: khai" ru myo: sho' ja: re lai: phyid' ye: ca" ra"- ga: kho" kyo" ako".

²³Yao: shid' zo: wa phung: khao: ngo" mae phung: lau: de, qe san: to: mung: yao: bam lam khug: na: ra" Asang: lo, khug mae zo:ve jao" yang: akyu" bin: mho' yang: ai bam re qhaug' byid' ako".

²⁴Yao: shid' zo: wa Pisidia mung" khyo" lai: jao" lo" mung:- Pamphulia mung" khyo joe" ye" lo" ako".

²⁵Yao: shid' zo: wa Perga vogaung: mae mung dao: kho" kyo: mung: ai: thao re yao: shid' zo: wa Atali vogaung: khyo ye" lo" ako".

²⁶Yao: shid' zo: wa ai: vogaung: mae" lha jui: yang: Antioki vogaung: khyo dam: tug' lo: ako". Ai wa ana" yao: shid' zo: bin: kad' vako" ra" mau" zo" re zaui" qhid nae"- Mao"So nhag' myan" ra" jeju mae yao: shid' zo: re qhaug' byid' ra" jo, qo ngad: ra".

²⁷Yao: shid' zo: wa Antioki vogaung: khyo joe" lo gelao"- phung: byu qere khai: zhang" yu mung:- yao: shid' zo: khyo" yang Mao"So khoru: mau" zaui" ra" khyo alhab' re we' Mao"So wa Taung bug byu qere Yesu re lam: lo genae" qhid' mae" khoru: phungbao byid: va" ra" khyo alhab' rere: yao: bam re ta: kyo" ako".

²⁸Yao: shid' zo: wa ai: vogaung: mae lam khug: ra" mo, we' daga" myao" sho' thang: na: ako".