Read Maru LAGYO: 15 Bible Online

LAGYO: 15 - Maru bible

LAGYO: 15

¹Byu daqhae: wa Yuda mung" mae" Antioki vogaung: khyo joe" li" mung: lam khug: ra" mo, re- Naonhaung" wa Moshe ta" to" ra" Tarha" we' dakhyo: au: qid lhai: khyo makad' ko" re wa khyad' yu: ru magai: qhug' ngad: ra"- ga: yemho" shid' ako".

²Polu we' Barnaba shid zo: wa ce: khyo we' sin: yang: yao: bam we' gyai jho" ta" ngag: ako". Aimung:- Polu we' Barnaba shid' zo: we' gatau damyo" wa ce: khyo we' sin: yang: lagyo: qe we' phung: lau: de, qe we' jho" ta" qham nae" qhid' mae" Yerusalem vogaung: khyo ye: nae" qhid' mae" myid: phyid' ako".

³Phung: byu qe wa yao: bam re yedai" ke' ako". Yao: bam wa Phoenikia mung" we' Samari mung" khyo" su" lai: lo" zo" re"- Taung bug byu qe khoru: Mao"So shad' khyo phaug' lo ko" ra" khyo re ai: khaung: mae" mo, rere: zhao: kyo" ako". Ce: lau dao: wa lam khug: ra" mo, alhab' re gyai gyo" ngaui bau: nhao: ra".

⁴Yao: bam Yerusalem vogaung: khyo joe" ye: gelao"- aimae" phung: byu qe we' daga" lagyo: qe we' phung: lau: de, qe wa yao: bam re lham: tug: yu: ako". Alao" Polu wa yao: bam: lo, khyo" Mao"So khoru: mau" zo" zaui" na: ra" khyo alhab' re yao: bam re zhao: kyo" ra".

⁵Ngadqere: Pharishe qe: phung: mae bobo: ra" lam khug: ra" mo, damyo" wa to" ye, mung:- Taung bug byumyu" qe wa au: qid lhai: khyo kham: yu ca". Amung: Moshe Tarha" re phug' cao" nae" yao: bam re ta" ca"- ga: ta" ako".

⁶Ai mung: lagyo: qe we' phung: lau: de, qe wa ce:khyo re myid: qu" nae" qhid' mae" zabphaung kad' ako".

⁷Dazab myao" sho' bin: jho" ta"- bin: jho" myid: gethao re- Petru wa to" ye, mung: Nga" mao: nhaung: qe we"- Taung bug byumyu" qe the' gyo: mung: lam genae" qhid' mae" Mao"So wa daba myao" mae" Taung bug byu qere lau dao: gai yekho" kyo: nae" qhid' mae" ngo re naonhaung" phaung mae" khyin: yu: to: va" rure naonhaung" ba: ako".

⁸Byu yaug khao: ngo" nho: nhag' lam: aung khug re ba: ra" Mao"So wa ngonhaung" re gyang" Lho" Byo byid: va" ru we' dakhyo: Taung bug byu qere re: Gyang" Lho" Byo byid' ra" khyo" yang yao: bam rere: o ngaui: ra" khyo re qhu" byid' ava".

⁹Mao"So wa ngonhaung" we' Taung bug qe: agyo: mae gatau makho' to: ngad: ra". Yao: bam yao: re: lam khug ko" ruyang Mao"So wa yao: bam: qobo alhab' re khyad' pye' byid' ava".

¹⁰Aimung: ngonhaung" phug' pho" qere: maqo" vin- ngonhaung" yao: re: maqo" vin vo' ra" qo re lam khug: ra" mo; dao mae vhin byid' ra" khyo" yang ana" naonhaung" pe" mung: Mao"So re lag yu: qu" nug ko" i?

¹¹Ngonhaung" re: yao: bam we' dakhyo: lam" mung:- Asang Yesu nho: nhag' myan" ra" khyo" yang khyad' yu: ru qhug' va"- ga: ta" ra".

¹²Barnaba we' Polu shid' zo: wa- yao: shid' zo" lo, khyo" yang Taung bug byu qe: phaung gaung: mae Mao"So kad' qhu" ra" mug' pho: mau" zo" jham we' mug' pho: ve, lho jham: khyo re ta" kyo: byid' na: au: zab phaung: na: ra" mo, alhab' wa sae za: tae" gyo" na: ako".

¹³Yao: shid' zo: bin: jhau lao"- Yaku re: Nga" mao: nhaung: qe we"- nga" dao: re tae" gyo: ge,.

¹⁴Mao"So wa Taung bug byu qe: phaung mae" damyo" re yao" amyu" boe" nae" qhid' mae" khyin: yu: ra" khyo" yang Taung bug byu qere yao: gun caung: ra" khyo re sao qhid' khoru: qhu" byid: va" ra" khyo re Simon ta" sho' kyo" ava".

¹⁵Lapa qe ta" to" ra" mungdao: jham we' re: ceru wa alhab' jho" zhaung" ra".

¹⁶Jham: mug sug' mae Ce: thao re ngo dam: tug' li" mung: Davi nho: mung"dan: re dam: te: byid: nae"- byo; qeim: jo; rure ngo dam: nyhang" kad' nae". Amung: ai re qam: dam: bo: li" nhao nae".

¹⁷Ailao" dang: jo; ra" byu alhab' wa nga" amyu" qe boe" nae" qhid' mae" ngo mang mhang" yu: ra" Taung bug byu qe alhab' mo, wa ngo jhao" joe" li" li" genae"- ga: ta" ra".

¹⁸Ceru re daba ganhae" gaco' mae" ba nhao: na: ra" Asang wa ceru: ta" ra"- ga: ta" ra".

¹⁹Yaku xo' yang: ta" ru wa Mao"So shad' khyo phaug' lo ko" ra" Taung bug byu qere ngonhaung" aqug: akhai: magai: kad' nhao ngad: ra".

²⁰Ai: atha" So sulho re ngaui" byid: yang: caung:pa" thung" khyo" masan masin" ngad: ra" zo:ve re mazo: genae"- gintho' zaung: ru makad' nae"- lang zang: nai: se' ra" gug'nyhug' sho: we' sa: re mazo: genae" qhid' mae" kam" wa mugsug' tung" mung: yao: bam re kyo" ke' gai: ra" ein: ngo myid: ra".

²¹Pe"mung:ga"re Moshe Tarha" re Dugno: Ba khao: ngo" mae tarha" jung yham mae daba ganhae" mae" nghe' na gemung:- vogaung: khao: ngo" mae yao" tarha" re kho" kyo" na: avako"- ga: ta" ra".

²²Ailao" lagyo: qe phung: lau: de, qe we' phung: byu qe alhab' mo, wa jho" qham mung: yao: bam mae" byu damyo" re khyin: yu yang: Polu we' Barnaba shid' zo: we' daga" Antioki vogaung: khyo nhao: ke' nae" qhid' mae" myid: phyid' ako". Ai mung: yao: bam wa lam khug: ra" mo, alhab' yang phug' myao" ra" Barnaba ga: mang: ra" Yuda we' Sila shid' zo: re khyin: yu mung:- yao: shid' zo" lo, mae vhin tung" dakhye' tung" vhin: ke' ako".

²³Ai: vhin tung" mae- Naonhaung" mao: nhaung: qe ngad: ra"- ngonhaung" lagyo: qe we' phung: lau: de, qe wa- Antioki vogaung: we' Suri mung" Kiliki mung" mae na ko" ra" Taung bug byu mao: nhaung" qere au" ke' ra".

²⁴Ngonhaung" phung: mae daqhae: wa ngonhaung" yang pe" re: mapyang: ke' ru naonhaung" jhao: joe" li" mung: myid: qug: nae" dao: aja: ja: ta" yang: naonhaung" re qug: khai: jham re boe" nhao ko" ra" ga" thoe re ngonhaung" the' gyo: va".

²⁵Aimung: ngonhaung" wa jho" qham yang:- lagyo: kad' nae" byu damyo" re khyin: yu mung: naonhaung" jhao" nhao: ke' nae" qhid' mae" alhab' mo, jho" myid vang" bam va".

²⁶Yao: bam wa ngonhaung" Asang Yesu Khristu mau" zo" qhid' mae" yao: yao" kao so' re lhao" o: mabyid lo: zaui: so" lo ko" ra" ngonhaung" jhid'de; ra" Barnaba we' Polu shid' zo: we' daga" naonhaung" jhao" cao: li" li" genae".

²⁷Aimung: ngonhaung" wa Yuda we' Sila shid' zo: re naonhaung" jhao" nhao: ke' ra". Yao: shid' zo: wa vhin tung" mae ngonhaung" tung" to" ra" gu: re yao: shid' zo" nhad' yang re: naonhaung" re ta" kyo" li" genae".

²⁸So sulho re ngaui" byid: va" ra" zo:ve- sa: we' lang zang: nai: se' ra" gug'nyhug' sho: dazo: ge,- Gin tho' zaung: ra" mau" zo" re dakad' ge, ein: ru mae" je yang: naonhaung" re qo gatau mavhin nae" qhid' mae" Gyang" Lho" Byo mae ngonhaung" myid jho" vang" va".

²⁹Naonhaung" ai: rure jao" pye' gelao" wa- qao" zin" vageshao:- ga: tung" ke" ako".

³⁰Alao"- lagyo: qere airu: nhao: ke' mung: lagyo: qe wa Antioki khyo ye" lo" mung: lam khug: ra" mo, alhab' re khai: zhang" yu yang: yao: bam re ai: vhin tung" phoe' byid' ako".

³¹Ai: vhin tung" re yao: bam bin: nghe' gelao"- ai: qham: phyid' ra" mung dao: mathao mae yao: bam wa gyai ngaui bau" ako".

³²Yuda we' Sila shid' zo: wa lapa ngad mung: lam khug: ra" mo, re myao" sho' qam: byid: mung dao: ta" peim: ta" kyang: byid' ako".

³³Yao: shid' zo: wa ai: vogaung: mae dayo, zo: thang: na mung: ai: thao re lam khug: ra" mo, wa- yao: shid' zo: re yaug yo za: au" yang: dam: nhao: ke' ako". Yao: shid' zo: re nhao: ke' ra" mo, jhao" dam: tug' lo" ako".

³⁴Ngadqere: Sila wa ai: mae thang: na nae" myid: phyid' ra".[2]

³⁵Polu we' Barnaba shid' zo: wa Antioki vogaung: mae dayo, zo: na mung:- Mao"So: mungdao: re gaje qe we' daga" mho" shid' kyo: byid' ako".

³⁶Dayo, kyo thao re Polu wa Barnaba re Mao"So: mung dao: re ngonhaung" kho" kyo: co' va" ra" vogaung: khao: ngo" mae mao: nhaung: qe khoru: ngad ko" laug yekam" qu" nae" qhid' mae" nga" shid' zo: yao: bam jhao" dam: tug' ye" lo" lang:- ga: ta" ra".

³⁷Barnaba wa yao: shid' zo: we' daga" Marku ga" ra" Yohan re jhui: nug: ra".

³⁸Ngadqere: Polu wa yao: shid' zo" nho: sasana mau" mae thao" sho' mabo: zaui: lo:- yao: shid' zo: re to: co' mung: Pamphulia vogaung: mae" dam: tug' phao: lo" yaug ngad: ruyang Marku re jhui: nae" magai ga: myid: ra".

³⁹Yao: shid' zo: wa ce:khyo we' sin: yang: qi: sho' jho" ngag mung: jho" gao" lo" ko" ra". Alao" Barnaba wa Marku re jhui: yang: Kupru qid gagyo: kao" khyo lha jui: mung: ye" lo" ko" ra".

⁴⁰Polu wa Sila re khyin: yu mung: lam khug: ra" mo, wa Polu re Asang: nhag' myan" ru mae bin: qhaug' byid: gethao to" lo" ra".

⁴¹Aimung: Polu wa Suri mung" we' Kiliki mung" khyo" lai: jao" ye: mung: phung: byu qere lam khug: myid nyhad' tang byid' ra".