Read Maru LAGYO: 16 Bible Online

LAGYO: 16 - Maru bible

LAGYO: 16

¹Polu wa Derbe we' Lustra vogaung: khyo ye" lo" ra". Lustra vogaung: mae Timothi ga" ra" Khristan byu dayaug na: ra". Yao: myhi" wa Yuda byumyu" Khristan ngad mung: yao: pho" wa Greeg byu ngad: ra".

²Timothi wa Lustra vogaung: we' Ikoni vogaung: mae na ko" ra" lam khug: ra" mo, alhab' yang khin" ko" ra" yaug ngad: ra".

³Polu wa Timothi re yao: we' daga" jhui" qin" nug yang: yao: re au: qid lhai" ra" thung" kad' byid' ra". Pe"mung:ga"re yao: pho" wa Greeg byu ngad: rure ai: khaung: mae" mo, ba geyang:- Polu airu: kad' byid' ru ngad: ra".

⁴Yao: bam wa vogaung: jham khyo lai: jao" ye: mung:- Yerusalem vogaung: mae na: ra" lagyo: qe we' phung: lau: de, qeyang qham: phyid' to" ra" lam khug: ra" mo, phug' cao" nae" tarha" re yao: bam re byid: mung:- ai: tarha" jham re phug' cao" nae" ta" ako".

⁵Airumung: phung: byu qe wa ai: lam khug: ra" khyo mae je: gang" tang: li" mung:- ba khao: ngo" phung: byu qe myo" laug: li" ako".

⁶Alao"- Gyang" Lho" Byo yao: bam re Asia mung" khaung: mae mung dao: kho" kyo: byid: nae" ahkang" mabyid' ruyang yao: bam wa Phrugi mung" we' Galile mung" khaung: khyo" su" lai: ye" lo" ko" ra".

⁷Yao: bam wa Musia mung" mug: kyo: khyo joe" ye: gelao"- Bithunia mung" khyo ye" lo" nae" seim" ako". Ngadqere: Yesu nho: Byo wa yao: bam re ahkang" mabyid: ngad: ra".

⁸Aimung: yao: bam wa Musia mung" re lai: ye" lo" mung: Troa vogaung: khyo joe" ye" ako".

⁹Polu wa myi" re qhu" lho mae Makedoni byu dayaug wa ye; jo, yang:- Makedoni mung" khyo gau" li" mung: ngonhaung" re li" bao" yu la,- ga: mho' na: rure yao: myao: ra".

¹⁰Polu ce: qhu" lho re bin: myao we' ai jao"- ngonhaung" Makedoni mung" khyo ye" lo" nae" qhid' mae" nyhang" seim" bam va"- Pe"mung:ga"re Makedoni mung" mae na ko" ra" mo, re lau dao: gai kho" kyo: byid: nae" qhid' mae" Mao"So wa ngonhaung" re khai: yu: ru ngad va" ein: ngonhaung" myid: jho yang: ngad: ra".

¹¹Amung: ngonhaung" wa lha khyo" Troa mae" Samothrake qid gyo: kao" khyo din: za: gau" phyid' ye" lo" mung:- Thao: ba re Neapoli vogaung: khyo joe" ye" lo" bam va".

¹²Ngonhaung" wa ai: vogaung: mae" Roma qe eib: ra" Makedoni mung" nho: vomo" ngad: ra" Philipi vogaung: khyo taung khyo" ye" lo" va".

¹³Dugno: Ba mae ngonhaung" wa- Yuda byu qe zang" ham yang: akyu" mho' ra" jo, qo jo, nae" ein: myid: jho: ra" vogaung: taung gaung qid yae khyo thug' ye" lo" mung:- yezaung: jo, yang:- aimae zang" ham: li" ko" ra" myiqe: qere kho" kyo: byid' bam va".

¹⁴Ai bam: phaung mae Thuatira vogaung: mae" Pin: ne phaga: kad' ra" Ludia ga: mang: ra" myiqe: dayaug bobo: ra". Yao: wa Mao"So re caung:pa" ra" myiqe: dayaug ngad mung: Polu kho" kyo" na: ra" mung dao: re nhag' lam: myid zaug zaug za: tae" gyo" yu nae" qhid' mae" Asang wa yao" nhag' lam: myid kham: re phung" byid' ra".

¹⁵Yao: we' yao" yham byu qe Qid nyhab' kham bin: kham: yu thao re Ludia wa- Ngo wa Asang re gaigai: yao: lam khug: ra" ein: naonhaung" myid: lam ko" ngad: re wa nga" yham khyo bang" li" khug: na geri:- ga: ngonhaung" re lhaung: ra". Aimung: yao: wa ngonhaung" re qo" ngaug: aung: yu: ra".

¹⁶Daba na mae ngonhaung" wa ai: akyu" mho' jo, qo khyo ye" lo" na: au:- makhyang" ra" yui vao: jaung" mung:- geim phan" qo" phan" ra" jeim myhi" dayaug we' ngonhaung" jho" qhug' bam:- yao: wa geim phan" phan" yang: jeim sang re ngaui myo: sho' kaung byid' na: yaug ngad: ra".

¹⁷Yao: wa Polu we' ngonhaung" thao mae cao" mung:- Cebam wa myhao: thao" ra" Mao"So: daui daui mo, ngad: ako"- yao: bam wa ngonhaung" khoru: khyad' yu: ru qo" yu nae" khyo re ta" hau" kyo" ra" mo, ngad: ako"- ga: zag: hug' ra".

¹⁸Ai: myiqe: nau" wa airu: myo: sho' ba kad' na: ruyang Polu wa nhag' gyai yo" li" mung:- lhang: lo yang: Yesu Khristu mang re lao: mung:- ngo nao re amyin" byid: li"- yao" khug mae" phao: thug' lo" wa,- ga: ai: makhyang" ra" yui re ta" ke' ra". Ailao" jao" ai: yui wa myiqe: nau" khug mae" phao: thug' lo" byaug: ra".

¹⁹Ai: myiqe: nau: nho: jeim sang wa yao: ngaui qho khyo jid' byaug va" rure ba lao"- yao: bam wa Sila we' Polu shid' zo: re taung" yu mung:- gai jao: mae na ko" ra" kheim: so' qo" ra" mo, jhao" jhui" she: khyad' ye" lo" ako".

²⁰Yao: bam wa- yao: shid' zo: re Roma zug: qe: qhid' kheim: khyo jhui" vao ye: mung:- Ceshid' yaug wa Yuda byu qe ngad mung:- yao: shid' yaug wa ngonhaung" vogaung: byu qere aqug: akhai: boe" nhao: na: ako".

²¹Ngonhaung" tarha" re gye doe, nhao: ra" thung" li jham re yao: shid' zo: mho" shid' na: ako". Ngonhaung" wa Roma mung" byu qe ngad mung:- ce: thung" li jham re maqo" khae: yu maqo" phug' cao"- ga: ta" ako".

²²Ailao"- mo, byu qere: ai bam: thao bode, mung: Polu we' Sila re gye kad' mung: lhe" ako". Airumung: zug: qe wa Polu we' Sila shid' zo: re mai bau: lao" khyad' pye' byid: yang: qam thaung" yang be, nae" qhid' mae" amyin" byid' ke' ako".

²³Airu: yao: shid' zo: re dae xo sho' bin: be, gethao re thaung: khug mae yelhaung" to" ako". Yao: shid' zo: re tang za: pyid' lhaung" to: nae" qhid' mae" yao: bam: thaung: agyi pho" re amyin" khyo" to" ako".

²⁴Thaung: agyi pho" wa ai: amyin" re qo" yu lao"- yao: shid' zo: re thaung: yham akhug qe, mae ke' mung: khyid kyam: ke' yang: lhaung" to" ra".

²⁵Gae gaung: myi: ko re- Polu we' Sila shid' zo: wa- akyu" mho' mung: Mao"So re caung: nghaui" na: ako". Thaung: byu gaje qe wa ai re tae" gyo: yang: na: ako".

²⁶Alao" nyag din taung" myid lab: qi: sho' lab' li" mung:- thaung: yham apan laui" nan" li" ra". Ailao" jao"- kham: dung: alhab' bung" li" mung:- thaung: byu qe alhab' mo, mae" jao cao: taui: jham gyad: gyo" lo" byaug: ra".

²⁷Thaung: agyi pho" wa yab: jo; ru mae" so" li" mung: thaung: yham kham: dung: jham bung" jo; rure li" the' myao lao"- yao: wa thaung: byu qe alhab' mo, phao: thug' lo" byaug va" ga: myid: jho yang:- yao" shae pyang: she: yu mung: yao: yao: thug' shid nae" seim" ra".

²⁸Ngadqere: Polu wa- yao" thoe myhao: thao" mae" zag: hug' mung:- Nao yao" gaung re pe" dakad' wa,- ngonhaung" alhab' mo, cetau mae ana: bam:- ga: ta" ra".

²⁹Thaung: gyi pho" wa myi:dam mho' yu mung: tao" vao li" yang:- Polu we' Sila shid' zo" khyidqao: mae ko, ko, nin" ru li" goe; ra".

³⁰Ai: thao re yao: wa yao: shid' zo: re taung gaung khyo jhui" thug' lo mung: Nhag' bo shid' zo: we"- ngo khyad' yu: ru qhug' nae" qhid' mae" pe" ja: kad' ca" i? ga: myid' ra".

³¹Yao: shid' zo: wa- Asang Yesu re lam wa,- Ailao" nao we' ni" yham khug: byu qe alhab' mo, khyad' yu: ru qhug' genae"- ga: phaug' tau" ako".

³²Ai: thao re yao: shid' zo: wa yao: re we' yao" yham byu qe alhab' mo, re Asang: mung dao: kho" kyo" ako".

³³Ai: myi re yao:- thaung: gyi pho" wa yao: shid' zo: re jhui" yu mung:- yao: shid' zo" dae khu jham re cid' san: pye' byid' ra". Yao: we' yao" yham byu qe alhab' mo, wa ai jao" yao: qid nyhab' kham: yu: ako".

³⁴Ai: thao re yao: wa Polu we' Sila shid' zo: re yao" yham khyo jhui" lo" mung: zo:ve da" zho" ra". Thaung: gyi pho" we' yao" yham byu qe wa Mao"So re qo" lam va" ruyang gyai ngaui bau" ako".

³⁵Thao: ba ne, kao re Roma kheim: so' qo" ra" mo, wa pya: da: zug: pho" qere ai shid' zo: re lhoe' ke' wa, ga" ra" amyin" we' daga" nhao: ke' ako".

³⁶Airumung: ai: thaung: agyi pho" wa Polu re zug: qe wa nao we' Sila re lhoe' ke' nae" amyin" khyo" ke' avako". Airumung: ni" shid' zo: yaug yo za: phao: lo" ge,- ga: ta" ra".

³⁷Ngadqere: Polu wa- ai: pya:da: zug: qere- Nga" shid' zo: wa Roma mung"dan: byu qe ngad:- yao: bam wa nga" shid' zo: re pe" qobo maqo" ceim: gelo:- mo, byu qe: qhid' kheim: mae qam thaung" yang be, yang: thaung: khug mae lhaung" ke' geli"- amung: ana" ngad lao" wa- yao: bam wa nga" shid' zo: re sae za: nhao: ke' nug genhaung i? Khai: mae" gai nae"- Roma zug: qe yao: bam yao: cekhyo li" mung: nga" shid' zo: re li" phoe' yu geshao:- ga: ta" ra".

³⁸Pya:da: zug: qe wa ai: dao: re Roma zug: qere lo" ta" kyo" ako". Yao: bam wa Polu we' Sila shid' zo: wa Roma mung" byu ngad: ko" rure the' gyo: gelao"- gyo" gyaug: ako".

³⁹Ailao: yao: bam wa ye: mung: Polu we' Sila shid' zo: re thaung: khug mae" yejhui" thug' yu mung:- ai: vogaung: mae" phao: lo" nae" qhid' mae" yao: shid' zo: re mho' ako".

⁴⁰Polu we' Sila shid' zo: wa thaung: mae" thug' lo" mung: Ludia nho: yham khyo ye" lo" ako". Ai mae lam khug: ra" mo, we' jho" qhug' mung:- yao: bam re qam: byid: dao: bin: ta" lao"- yao: shid' zo: wa- ai: vogaung: mae" thug' lo" ako".