Read Maru LAGYO: 17 Bible Online

LAGYO: 17 - Maru bible

LAGYO: 17

¹Polu we' Sila shid' zo: wa Ampipholi we' Apoloni vogaung: re su" lai: ye" lo" mung: Thesaloni vogaung: khyo joe" ye" ako". Ai: vogaung: mae Yuda tarha" jung yham dalam: jo; ra".

²Polu wa yao: khonhae" re: lhaung" kad' ru we' dakhyo:- Yuda tarha" jung yham khyo ye" ra". Ai: mae Dugno: Ba sam ba geim" jham: mugsug' re cao" yang: mo, byu qe we' jho" ta" keim" mung:-

³Meshia wa dayin dayo: kham zo: ca" nae" khyo we' shid: rumae" dam: daui: to" li" nae"- ga" ra" khyo re jham: mugsug' re ceim" shid' yang: phyid' phyid' kho' kho' za: yao: bam re ta" sho' kyo" ra". Polu wa- Naonhaung" re ngo ta" kyo" na: ra" ce: Yesu wa Meshia yao: ngad: ava"- ga: ta" ra".

⁴Yao: bam mae" damyo" wa lam" gemung:- Polu we' Sila shad' khyo de; ako". Mao"So re caung:pa" ko" ra" Greeg byu qe myo: sho' mo, we' akhyag: ra" myiqe: au: jhaung qe myo: sho' mo, re: yao: shid' zo: shad' khyo bode; lo: ako".

⁵Ngadqere: Yuda byu qe wa myid nug: gemung:- khyodang khaung: mae" byujad: byugao: jham re khai: zhang" yu mung: byu phung: dalam: kad' yu: ako". Yao: bam vogaung: geim" re lhau: zhung" ke' gemung:- Yason ga: mang: ra" yaug: yham khyo yelhe: yang:- Polu we' Sila shid' zo: re mo, byu qe: qhid' kheim: khyo she: khyad' thug' yu nae" qhid' mae" yepoe: ako".

⁶Yao: bam maqho: myao gelao"- yao: bam wa Yason we' lam khug: ra" mo, damyo" re ai: vogaung: mae" kheim: so' qo" ra" mo; qhid' kheim: khyo she: khyad' li" mung:- Cebam wa jo, qo khyi" khao: ngo" mae qug: khai: boe" nhao: lo mo, ngad: ako". Ana" ngonhaung" vogaung: khyo re: joe" lo: avako". Yason wa yao" yham mae yao: shid' zo: re khae: yu: to" ra".

⁷Yao: bam alhab' wa Yesu ga" ra" kho:kham dayaug na:- ga: ta" mung: Kho:sin" tarha" jham re shad' lhoe" na: ako"- ga: zag: hug' ako".

⁸Ce: dao: re the' gyo: gelao" mo, byu qe we' vogaung: mae" kheim: so' qo" ra" mo, wa gyai yhai: li" ako".

⁹Kheim: so' qo" ra" mo, wa Yason we' gaje qere pakham: ngaui khyug' nhao mung: yao: bam re nhao: ke' ako".

¹⁰Mug: cad' lo we' lam khug: ra" mo, wa Polu we' Sila shid' zo: re Beria vogaung: khyo nhao: ke' ako". Ai: vogaung: khyo joe" ye: gelao"- yao: shid' zo: wa Yuda tarha" jung yham khyo ye" ako".

¹¹Beria vobyu qe wa Thesaloni vobyu qe tho' je yang: suzo: du: mo, ngad: ako". Yao: bam wa mung dao: re nhag' lam: zaug zaug za: tae" gyo" yu mung:- Polu kho" kyo" ra" mung dao: dang madang: rure ba nae" qhid' mae" ba khao: ngo" jham: mugsug' re nghe' xeim: yu: ako".

¹²Yao: bam mae" myo: sho' mo, lam" ako". Byuna azhao" myao: ra" Greeg myiqe: qe myo: sho' mo, we' Greeg yauggai myo: sho' mo, re: lam" ako".

¹³Ngadqere: Polu wa Beria vogaung: mae re: Mao"So: mungdao: re kho" kyo" na: ra"- ga" thoe re Thesaloni vogaung: mae" Yuda byu qe the' gyo: gelao"- yao: bam Beria vogaung: khyo joe" li" mung:- mo, byu qere lu" to" li" nae" poe: ako".

¹⁴Lam khug: ra" mo, wa ailao" jao"- Polu re panglai: qid yae joe" sho' yedai" ke' ako". Ngadqere: Sila we' Timothi shid' zo: wa Beria vogaung: mae thang: na: ako".

¹⁵Polu re yedai" ke' ko"mo, wa- Athen vogaung: joe" sho' Polu we' daga" cao" ye: mung:- Sila we' Timothi shid' zo: re gai: boe" ra" qhi" phyad za: yao: jhao" cao" li" nhao ge,- ga: Polu pyang: ke' ra" dao: vin yang: Beria vogaung: khyo dam: phao: lo" ako".

¹⁶Polu wa Athen vogaung: mae Sila we' Timothi re lao" na: au:- yao: wa ai: vogaung: geim" mae solho za: byang" sheim: jo; rure myao mung:- yao" nhag' lam: mae gyai mamyan ngad: ra".

¹⁷Amung: Polu wa Yuda tarha" jung yham mae Yuda byu qe we' re:- Mao"So re caung:pa" ra" Taung bug byu qe we' re:- ba khao: ngo" shava gai jao: mae su" lai: qin" ra" mo, byu qe we' re:- jho" ta" keim" ako".

¹⁸Epikuri we' Stoi myid pha,jhi" mho" pho" qe daqhae: re: Polu we' gyai jho" ta" ngag: ako". Yao: bam mae" damyo" wa ce: ba pyad' pyad' yaug pe" re ta" nug: na: laug- ga: ta" mung: gatau damyo" wa- Gatau: byumyu" qenho: so jham: khyo re ta" na sam" ra"- ga: tau" ako". Yao: bam ceru: ta" ko" ru wa- Yesu khyo re we' dam: daui: to" li" ra" khyo re Polu kho" kyo: yang: ngad: ra".

¹⁹Amung: yao: bam wa Aripagu bug gaung- vogaung" nho: tarha" yung" qhid' kheim: khyo Polu re jhui" do, ye: mung:- Nao ta" na: ra" ce: mho" shid' khyo asag' we' sin: yang: ngonhaung" ba nug: ra".

²⁰Nao mho" shid' ra" khyo jham daqhae: wa ngonhaung" qhid' mae" dao: bang" ru: ga" ra". Aijham: lajheim: re ngonhaung" ba nug: ra"- ga: ta" ako".

²¹(Pe"mung:ga"re Athen vobyu qe we' ai: mae na ko" ra" gatau: mung"dan: byu qe wa lau dao: asag' jham: khyo re ta" yang:- tae" gyo: yang: yao: bam: yo, khyin: jham re zai" lhai: ke' nug: ako".)

²²Polu wa vogaung" tarha" yung" qhid' kheim: mae ye; jo, yang:- Athen vobyu qe we"- naonhaung" wa caung:pa" thung" re gyai kao bau mo, ngad ko" rure khyo khao: ngo" re qu" yang: ngo ba: yu va".

²³Pe"mung:ga"re Ngo naonhaung" nho: vogaung: khug mae su" qin" mung: naonhaung" caung:pa" ko" ra" jo, qo jham re cao" qu" au:- Ngonhaung" maba: ra" Mao"So: qhid' mae"- ga: tung" te' to" ra" phan dalam: re ngo the' myao va". Airu: naonhaung" maba lo:- caung:pa" na ko" ra" Mao"So: khyo- ngo ana" naonhaung" re ta" kyo: geli".

²⁴Mug: myid we' ai: mae na: ra"- jo; ra" gu:- alhab' re phan" to" ra" Mao"So wa mug:gaung we' myid gaung: Asang ngad mung:- byu: lo; yang kad' to" ra" Caung:pa" Yham khug mae mana ngad: ra".

²⁵Ai: Asang yao: yao:- yaug khao: ngo" re kao so' we' so' she: ru we' gatau qo ca" ra" gu: alhab' re byid' to: yaug ngad: ruyang daja: ja: qo ca" ra" yaug reru: yao: re byu: lo; yang caung da" byid: maca" ngad: ra".

²⁶Mao"So wa xao su byu dayaug re shi" phan" mung: ai: yaug mae" byumyu" cao jab na: thug' li" nhao yang: myid gaung geim" mae na nhao: ra". Yao: bam na nae" qhid' mae" yo, khyin:- zin na we' jo, qo- mug: kyo: jham re gau: qhid' khae" yang: kyo: so" to: byid' ra".

²⁷Mao"So ceru: kad' to" ru wa- yao: bam yao: re qho mung:- yao: re myao: re myao ga: yao: re soe' qho: qin" genae" qhid' mae" ngad: ra".

²⁸Byu dayaug ta" to" ru we' dakhyo"- ngonhaung" wa yao: mae kao so' daui: na:- lab: na mung: na: jo; bam:- ga: ta" ra". Naonhaung" re: yao" myid:zo: qe ngad:- ga: dao: zham" zham" to: ko" ra".

²⁹Ngonhaung" wa Mao"So: zo: dau qe ngad: ruyang Mao"So wa byu: lo, mau" pha,jhi" yang kad' to" ra" qhang- ngaui sulho- laug sulho we' dau: ein: ra" khyo" magai: jho ngad: ra".

³⁰Mao"So wa xao su byu qe yao: re maba mabeim: lo: na: lai: lo: ra" ba na yo, khyin: gu: alhab' re qu" lhai: ke' byid' ava". Ngadqere: ana" wa- khyi" khao: ngo" mae" xao su byu qe alhab' mo, re yao: bam: makhyang" ra" mau" zo" jham mae" myid tha" genae" qhid' mae" amyin" byid: va" ra".

³¹Pe"mung:ga"re yao: khyin: yu: to" ra" yaug: lo, khyo" yang yao: wa mug: myid geim" re din: nyang: ra" khyo" dao: kho' nae" ba na re mhai" so" to" ava". Ce: khyo we' sin: mung: gaigai: yao: boe" nae" ngad: rure yaug khao: ngo" re sagse: qhu" byid' ra" khyo" yao: re shid: rumae" daui: to" li" nhao: ra"- ga: ta" ra".

³²Yao: bam wa shid: rumae" dam: daui: to" li" ra" khyo we' sin: yang: Polu ta" rure the' gyo: gelao"- Yao: bam mae" damyo" wa Polu dao: re qi: jung" pye' byid' ako". Ngadqere: damyo" wa- Ce: khyo we' sin: yang: nao ta" rure ngonhaung" dam: gyo: nug shi"- ga: ta" ako".

³³Aimung: Polu wa ai: phaung mae" phao: lo" ra".

³⁴Byu damyo" wa Polu thao cao" mung: Yesu re lam: lo: ako". Aibam mae" Dionusiu ga: mang: ra" Aripagu tarha" yung" phung: mae bobo: ra" tarha" agyi pho"- Damari ga: mang: ra" myiqe: dayaug we' byu gaje qere: bobo: ako".