Read Maru LAGYO: 18 Bible Online

LAGYO: 18 - Maru bible

LAGYO: 18

¹Ai: thao re Polu wa- Athen vogaung: mae" thug' lo" mung: Korinthu vogaung: khyo joe" ye" lo" ra".

²Ai: vogaung: mae Pontu mung" byu Akula ga: mang: ra" Yuda byu dayaug we' Yao" yham sang myhi" Priskila shid' tao we' yejho" qhug' ra". Yuda byumyu" qe alhab' mo, Roma vogaung: mae" thug' lo" ca"- ga: Roma Kho:sin" Klaudiu amyin" khyo" ke' ruyang yao: shid' tao wa mataung" myao" shire Itali mung" mae" joe" li" ru shid' tao ngad: ako".

³Polu wa yao: shid' tao jhao" yena mung: mau" daga" yebo: cao: zaui" ra". Pe"mung:ga"re Polu re: yao: shid' tao we' dakhyo: mug: go pin: zaung kad' zo: yaug ngad: ra".

⁴Polu wa Dugno: Ba khao: ngo" Yuda tarha" jung yham mae Yuda byu qe we' Greeg byu qe we' jho" ta" keim" mung:- yao: bam lam khug: lo gesho' ta" ngaug: yu: ra".

⁵Sila we' Timothi shid' zo: Makedoni mung" mae" joe" li" gelao"- Polu wa yao" ayo, alhab' re mung dao: kho" kyo" rumae za: qam: ke' pye' mung:- Yesu wa Meshia ngad: ra"- ga: Yuda byu qere sagse: kham byid' ra".

⁶Yao: bam wa yao: re maphug' makhyad' ngag: ta" gelao"- Polu wa yao" mai bau: jham mae" badan jham re ko: khyo" pye' mung:- Naonhaung" jeim" byaug ko" re wa naonhaung" yao" qo za: angad lo"- nga" au: dao mae pe" qo majo, lo:- ana" ba mae" thoegu: ngo wa Taung bug byu qere mung dao: kho" kyo: nae" ye" lo" naeva"- ga: ta" ra".

⁷Alao" Polu wa yao: bam mae" thug' lo" mung:- Mao"So re caung:pa" ra" Titu Yustu ga: mang: ra" Taung bug byu dayaug: yham mae yethang: na: ra". Ai: yaug: yham wa Yuda tarha" jung yham we' te' te' ngad: ra".

⁸Amung: tarha" jung yham agyi pho" Krispu we' yao" yham byu qe alhab' mo, wa Asang re lam khug: lo: ako". Korinthu vobyu qe myo: sho' mo, re: ai: mung dao: re the' gyo: gelao" lam" mung: qid nyhab' kham: yu: ako".

⁹Damyi re Polu wa qhu" lho dalam: re myao: ra". Ai: qhu" lho mae Asang wa Polu re dagyaug wa,- xo' yang: kho" kyo: wa,- qam: dashan wa,- pe"mung:ga"re ngo wa nao we' daga" ngad:.

¹⁰Nao re khag' re: dae maqo" te' genae"- Ce: vogaung: mae ngo re lam khug nae" mo, myo: sho' na: bam: ako"- ga: ta" ra".

¹¹Airumung: Polu wa ai: vogaung: mae dazin: lho" khyaug' khye' na: na mung:- mo, byu qere Mao"So: mungdao: kho" kyo" ra".

¹²Ngadqere: Galio ga" ra" yaug Akhaia mung" zug: boe" li" lao"- Yuda byu qe wa zang" phaung mung: Polu re taung" yu yang: tarha" yung" khyo jhui" ye" ako".

¹³Yao: bam wa ceyaug wa tarha" we' majho" zhaung" ra" khyo" Mao"So re caung:pa" nae" qhid' mae" mo, byu qere jhui" poe: na: ra" yaug ngad: ra"- ga: ta" ako".

¹⁴Polu phaug' tau: nae" seim" we'- Galio wa Yuda byu qere gaigai: yao: ce: mau" zo" wa makhyang" ra" mau" zo"- mangad: lao"- shad' lhoe" ra" mau" zo" ngad: re wa- ngo wa naonhaung" qobo zhaug' ra" khyo re nyang" za: tae" gyo: byid: zai ngad: ra".

¹⁵Ngadqere: ce: mau" zo" wa myan" dao: thoe we' mang we' naonhaung" yao" tarha" we' sin: yang: za: jho" ta" ngag: ra" khyo ngad: ruyang naonhaung" yao: nyhang" yu ca" ako". Ceru" ra" mau" zo" mae ngo wa tarha" agyi makad' nae"- ga: Yuda byu qere ta" ra".

¹⁶Amung: yao: wa yao: bam re tarha" yung" mae" khe' thug' ke' ra".

¹⁷Yao: bam wa Tarha" jung yham agyi pho" Sostheni re taung" yu mung: tarha" yung" qhid' au: mae be; ako". Ngadqere: Galio wa ai re pe" shui manho ngad: ra".

¹⁸Polu wa Korinthu vogaung: mae lam khug: ra" mo, we' daga" myo: sho' ba thang: na shi" ra". Ai: thao yao: bam re au" co' mung:- lha khyo" Priskila we' Akula shid' tao we' daga" Suri mung" khyo gau" ye" lo" ako". Kenkhrea vogaung: mae" qid sang pho mato" shire Polu wa Mao"So re jham tang" to: va" ruyang yao" au: xae qaug: pye' ra".

¹⁹Yao: bam Ephesu vogaung: khyo joe" ye: gelao"- Polu wa Priskila we' Akula shid' tao re ai: vogaung: mae nha: to: co' ra". Amung: yao: wa Yuda tarha" jung yham khyo ye: yang: Yuda byu qe we' dao: yejho" jhau: ra".

²⁰Mo, byu qe wa myao" sho' thang: na nae" qhid' mae" Polu re mho' ako"- Ngadqere: yao: maqad ngad: ra".

²¹Mao"So myid o: ru ngad: re wa naonhaung" jhao" dam: li" shinae"- ga: yao: bam re ta" ra". Amung: Polu wa Ephesu vogaung: mae" lha gau: mung: to" lo" ra".

²²Polu wa Kesarea vogaung: khyo gau" joe" ye: lao"- Yerusalem vogaung: khyo ye" lo" mung: phung: byu qere ye: au" co' yang:- Antioki vogaung: khyo ye" lo" ra".

²³Ai: vogaung: mae dayo, zo: yethang: na mung: aimae"- yao: wa Galati mung" we' Phrugi mung" khaung: khyo" lai: jao" ye: mung: lam khug: ra" mo, re nyhad' tang byid' ra".

²⁴Ai: yo, mae Alexanda vobyu Apolo ga: mang: ra" Yuda byu dayaug wa Ephesu vogaung: khyo joe" ye" ra". Yao: wa dao: jhau gai yaug we' jham: mugsug' gyai ba jhao: ra" byu dayaug ngad: ra".

²⁵Yao: wa Asang: khyo re zhao: yu: to: va" yaug ngad mung: Yesu nho: khyo we' sin: yang: akhyo: jo jo za: gyai kao bau taung" kho" kyo" ra". Ngadqere: yao: wa Yohan nho: Qid nyhab' kham khyo re shi" ba: ra".

²⁶Yao: wa Yuda tarha" jung yham mae mazag mavae kho" kyo" ra". Priskila we' Akula shid' tao yao" mungdao: re the' gyo: gelao"- Apolo re ai shid' tao: yham khyo khai: yu mung:- Mao"So: khyo re je yang: jo jo za: yao: re ta" sho' kyo: byid' ako".

²⁷Apolo wa Akhaia mung" khyo ye" lo" nae" myid: phyid' ra"- Aimung:- Ephesu vogaung: mae" lam khug: ra" mo, wa Akhaia mung" mae na ko" ra" lam khug: ra" mo, jhao" Apolo re lham: khae: yu nae" qhid' mae" jhan: byid' ra" bang" se" vhin tung" tung" yang: yao: re bao" thaug' byid' ako". Yao: wa Akhaia mung" khyo joe" ye: lao"- Mao"So: nhag' myan" ra" khyo" yang lam khug: lo ko" ra" byu myo: sho' mo, re gyai yebao" thaug' byid' ra".

²⁸Pe"mung:ga"re Yesu wa Meshia yao: ngad va"- ga" rure jham: mugsug' mae" sagse: jham re khyag' khyag' za: ceim" shid' byid: mung: mo, byu qe: qhid' kheim: mae Yuda byu qere ta" aung: pye' ra".