Read Maru LAGYO: 2 Bible Online

LAGYO: 2 - Maru bible

LAGYO: 2

¹Pentikoti ba na joe" lao"- lam khug: ra" mo, alhab' wa dajo,qo mae za: zang" ham: na: bam: ako".

²La qam" hug' ra" thoe we' dau: ra" thoe dathoe mug:gaung mae" nyag din taung" myang: thug' li" mung: yao: bam na: ra" yham geim" mae ai:thoe byang" jo; ra".

³Ai: thao yao: bam wa nga" byo: sin" jo; ra" myishae jham we' dau: ra" myishae jham wa yao: bam yaug khao: ngo" au: dao mae de; jo; rure myao: ako".

⁴Yao: bam alhab' mo, wa Gyang" Lho" Byo byang" mung: ai: Byo: yang qo" jhau nhao: ru we' dakhyo:- gatau myan" aja: ja: jhau: thug' li" ako".

⁵Mug: myid dao mae jo; ra" mung"dan: khao: ngo" mae" joe" li" ko" ra" Mao"So re gyaug phug' ra" Yuda byu qe wa Yerusalem vogaung: mae na: bam: ako".

⁶Ceru: myang: ra" thoe re the' gyo: gelao"- mo,byu qe zang" ham: li" ako". Yao: bam yaug khao: ngo" wa lam khug: ra" mo, jhau: na: rure yao:yao" myan" khyo" ba: gyo" yu gemung:- mo, byu qe alhab' mo, din: mug' ako".

⁷Yao: bam wa mug' hao" byaug gemung:- Ceru: jhau: na: ra" mo, wa Galile byu qe ngad ko" ra" mangad: i?

⁸Aire ngonhaung" alhab' mo, wa yao: bam jhau: rure ngonhaung" yao" myan" khyo" ba: gyo" yu: ru wa khoru: i?

⁹Ngonhaung" wa Pathia mung"- Media mung"- Elam mung"- Mesopotamia mung"- Yuda mung"- Kapadokia mung"- Pontu mung"- Asia mung"-

¹⁰Phrugi mung"- Pamphulia mung"- Egutu mung"- Kureni nhae mae" Libya mung" khaung: mae" joe" li" ra" mo, ngad: ra".

¹¹Amung: ngonhaung" mae" daqhae: wa Roma mae" li" ra" Yuda qe we' Yuda caung:pa" thung" khyo" phaug' lo: ra" Taung Bug Byu qe ngad: ra". Alao" ngonhaung" mae" daqhae: wa Krete we' Arebia mung" mae" mo, ngad: ra". Ngadqere: Mao"So zaui" bin va" ra" mau" zo" jham: khyo gyo" yu: ru wa khoru: laug i? ga: ta" ako".

¹²Yao: bam alhab' mo, wa mug' hao" byaug gemung:- Ceru wa pe" ru: ga" ru ngad: ra" i? ga: yao: bam yao: cao: jho" myid' ako".

¹³Ngadqere: daqhae: wa ai: lam khug: ra" mo, re- Ai: byu qe wa yhid yid mo, ngad: ako"- ga: qi: jung" pye' ako".

¹⁴Ailao" Petru wa lagyo: daxe: dayaug we' daga" to" ye; jo, mung: thoe to' yang:- Mao:nhaung: Yuda byu qe we' Yerusalem vobyu qe alhab' mo, we"- nga" dao: re tae" gyo" yu ge,- ce: khyo we' sin: yang: naonhaung" re ta" kyo: geli".

¹⁵Ce: byu qe wa naonhaung" jho: ru we' dakhyo:- yhid yid mo, mangad: ko" ngad: ra". Ana" ne, kao gug yo, qug za: shi" angad: ra".

¹⁶Ce: khyo wa Lapa Yoela ta" to" ra" khyo ngad: ra".

¹⁷Yoela wa Mao"So ceru: ta" ra"- Ngo wa lo" thao" ra" ba na mae byu yaug khao: ngo" dao mae nga" Byo vhe' sheim: byid: nae"- naonhaung" yauggai zo: qe wa nga" mung dao: re kho" kyo" li" genae". Naonhaung" nho: zolau: qe wa ve, lho myao: li" genae"- amung: naonhaung" nho: mao: zo: qe wa yab mo, myao: li" genae".

¹⁸Ngad va"- ai: ba na mae nga" daui daui mo,- yauggai myiqe: alhab' mo; dao mae lhao" re:- nga" Byo vhe' sheim: byid: nae". Ailao" yao: bam wa nga" mungdao: re ta" hau" li" genae".

¹⁹Ngo wa mug:gaung tho' mae mug' pho: vhe, lho kad' qhu" mung:- o: myid gye, dao mae mug' pho: mau" zo" kad' qhu" nae". Sa: re:- myi: re: thau: ra" myikhug' thaui: jham re: kad' qhu" nae".

²⁰Phungbao qi" qhang: ra" Asang: Ba Na majoe" li" shimae" ba wa cad' sham: no; lo" mung:- lho" wa sa: ru: ne: lo" byaug: li" nae".

²¹Ailao"- bao" thaug' yu nae" qhid' mae" Asang re mho' yaug khag' ngadqere:- khyad' yu: ru qhug' li" nae"- ga: ta" ra".

²²Israel mao:nhaung: qe we"- ce: dao: re tae" gyo" qu" ge,- Nazared mae" vobyu Yesu wa Mao"So: kheim: so' qo" yaug ngad: rure Mao"So wa Yesu nho: lo, khyo" yang kad' ra" mug' pho: ve,lho jham we' mug'pho: mau" zo" jham khyo" yang sagse: qhu" byid' ava". Ce: khyo jham wa naonhaung" phaung mae boe" lai: lo va" ruyang naonhaung" yao: aire ba: ako".

²³Mao"So wa yao: yaung: to" ru we' dakhyo: Yesu re naonhaung" lo, khyo ab byid' pye' nae" myid: phyid' to: gau ngad: ra". Naonhaung" wa qobo jab qe: lo; yang yao: re pyao: zang mae jin" se' pye' nhao: ako".

²⁴Ngadqere: Mao"So wa yao: re shid: ra" qam: so' mae" lhoe' ke' byid: mung: shid: ru mae" dam: daui: li" nhao: ra". Pe"mung:ga"re shid: ru wa yao: re zaui" lhaung" ci nae" magai: boe" ngad: ra".

²⁵Yao" khyo we' sin: yang: Davi wa- Ngo wa Asang re yo, khyin: khao: ngo" nga" qhid' kheim: mae the' myao: na: ra" Yao: wa nga" nhae mae na: jo, yang: ngo wa qug: khai" ru qhug' nae" mangad:-

²⁶Airumung: nga" aung khug mae ngaui bau" ru byang" jo; ru we' nga" nhad' dao: thoe wa ngaui bau: ngaui yao: ru byang" jo; ra". Ngo wa shid ba: ra" ja: byu ngad sho' ngadqere: myid: lao" mung: nhag' lam: myan myan za: daui: na: li" nae".

²⁷Pe"mung:ga"re nao wa ngo re shid: ra" movo: mug: mae shapye' to: nae" mangad:. Nao wa kyid: ra" ni" daui daui yaug re lab khug mae bab: jo, nhao nae" mangad: ngad: ra".

²⁸Nao wa ngo re kao so' daui: ru khyo joe" ye" ra" khyodang ceim" shid' byid' ava". Nao wa ngo we' daga" na: ruyang ngo re ngaui bau: nhao: li" nae"- ga: ta" ra".

²⁹Nga" mao: nhaung: qe we"- Suhau: qi" ra" ngonhaung" phug' pho" kho:kham Davi khyo re de: de: za: ta" kyo: geli"- Yao: wa shid: byaug mung: yao: re naonhaung" nyhab' shaung: pye' avako". Yao" lab wa ana" ba joe" sho' ce: ngonhaung" qhid' kheim: mae yao: jo; ra".

³⁰Yao: wa lapa ngad mung:- Mao"So: yang yao: re dao:so: byid' to" rure yao: ba: ra". Mao"So wa Davi kho:kham we' dakhyo:- Kho: kham kad' nae" yao" kaung mae" kho:kham thug' li" nhao nae"- ga: jham tang" to" ra".

³¹Davi wa joe" lo nae" ba na mae Mao"So pe" kad' nae" rure ba: to: mung:- Meshia shid: ru mae" dam: daui: to" li" nae" ra" khyo re Davi ta" ru wa- Yao: wa shid: ra" movo: mug: mae shapye' to: maqhug' ngad: ra"- Yao" gaung khyao re lab khug mae mabab: lo" nhao ngad: ra"- ga: ta" ra".

³²Mao"So wa ai: Yesu re yao: daui: to" li" nhao: ava"- amung: ngonhaung" wa ce: khyo we' sin: yang: sagse: qe ngad: ra".

³³Yao: wa Yao: Pho" Mao"So: lo,yo shad' mae zaung: jo, nae" tau: to' ke' ru qhug' mung: yao: pho" yang dao:so: byid' to: va" ru we' dakhyo:- yao: pho" mae" Gyang" Lho" Byo qo" khae: yu: ava". Ana" ngonhaung" myao: ru we' the" gyo" ra" ai: gyang" lho" byo re yao: wa ngonhaung" dao mae vhe" sheim: byid' ava".

³⁴Pe"mung:ga"re Davi wa mug:gaung khyo mado, lo" ngad: ra". Ngadqere: Davi wa-

³⁵Ni" gye qere ni" khyid zab tao" khyo"- ni" khyid qao: mae ngo mato: byid: byid: wa- nga" lo,yo shad' mae zaung: jo, wa, ga:- ai: Asang wa nga" Asang re ta" ra"- ga: ta" to" ra".

³⁶Airumung: naonhaung" yang pyao: zang mae jin" se' pye' ko" ra" ai: Yesu wa Mao"So: yang Asang we' Meshia khyo" san: to: va" yaug ngad: rure Israel byumyu" alhab' geim" khyag' za: ba: yu ge, wo"- ga: ta" ra".

³⁷Mo,byu qe wa ai: dao: re the' gyo: gelao"- yao: bam: nhag' lam: mae qi: sho' gyo" zao" gemung:- Petru we' lagyo: gaje qere- Mao:nhaung: qe we"- ngonhaung" pe" ru: kad' bam nae" i? ga: ta" ako".

³⁸Petru wa yao: bam re- Naonhaung" alhab' mo, myid tha" pye' ge,- naonhaung" qobo jham khyad' pye' byid' ru qhug' genae" qhid' mae" Yesu Khristu mang mae naonhaung" yaug khao: ngo" qid nyhab' kham: yu ge,. Airu:lao"- Mao"So: jhaung qhu" Gyang" Lho" Byo re naonhaung" qo" khae: yu: li" genae".

³⁹Pe"mung:ga"re Gyang" Lho" Byo byid: nae" ga" ra" Mao"So: dao:so: wa naonhaung" qhid' mae" re:- naonhaung" nho: myid:zo: qe: qhid' mae" re:- va: mae na ko" ra" ngonhaung" Asang Mao"So yao" yang khai: yu: ra" mo, alhab' qhid' mae" re: byid' to" ra".

⁴⁰Ailao" Petru wa gatau: dao: thoe myo: sho' we' yao: bam re ta" peim: ta" kyang: byid: zo" re"- naonhaung" wa ce: makhyang" ra" byu qe: dao mae joe" li" na: ra" qobo dae mae" loe; beim ge,- ga: ta" peim: byid' ra".

⁴¹Mo,byu qemae" myo: sho' mo, wa Petru kho" kyo" ra" mungdao: re lam" yang: Qid nyhab' kham yu gemung:- ai: ba na mae lam khug: ra" mo, sam taung ai: phaung mae laung" lo: ako".

⁴²Yao: bam wa lagyo: qe: dao: re zhao: yu- daga" za: bozam" khug: na- mug khyoe' phai" ra" khyo re kad'- daga" za: akyu" mho' mung:- yo, khyin: ba na re gan: lo" nhao: ako".

⁴³Lagyo: qe khyo" yang mug' pho: ve,lho jham we' mug'pho: mau" zo" jham re myo: sho' qhu" byid' ruyang byu yaug khao: ngo" wa gyaug: mug' byaug: ako".

⁴⁴Lam khug: ra" mo, wa daga" za: zam" khug: na mung:- yao: bam qo" ra" zai jham re daga" za: jho" ceim" myho" ci yang: na: ako".

⁴⁵Yao: bam wa yao: bam: jo, nho" zai yo jham re aung" pye' mung:- ai: ngaui re khoyaug khoru: qo ca" rure cao" yang: yao: bam yao: cao: jho" byid' ako".

⁴⁶Yao: bam wa ba khao: ba ngo" Caung:pa" Yham mae ham: phaung yang: yao: bam yao" yham khug mae mug khyoe' phai" mung:- nyham: khyo" ra" nhag' lam: we' ngaui bau: ngaui lho" daga" za: zo:ve zo" ako".

⁴⁷Yao: bam wa Mao"So re caung:khin" byid: mung:- byu alhab' mo; qhid' kheim: mae nga: ye; ako". Asang wa khyad' yu: ru qhug' ra" mo, re ba khao: ba ngo" yao: bam: phung: mae laung: byid' ra".