Read Maru LAGYO: 20 Bible Online

LAGYO: 20 - Maru bible

LAGYO: 20

¹Ai: mo, thaui: mo, yaug yhai: ru tae" lo" thao re Polu wa lam khug: ra" mo, re khai: zhang" yu mung: qam: byid: dao: ta" ra". Ai: thao yao: bam re au" co' mung: Makedoni mung" khyo ye" lo" ra".

²Ai: mung" khaung: khyo" su" lai: ye" lo" mung:- lam khug: ra"- mo, byu qere qam: byid: mung: dao: myo: sho' ta" ra". Ai: thao re yao: wa Akhaia mung" joe" ye: mung:-

³Ai: mae lho" mo" sam khye' yethang: na: ra". Yao: wa Suri mung" khyo ye" lo" nae" seim" na: au:- Yuda byu qe yao: re se' nae" pha,jhi" khug' khyug' yang: kung" na ko" ra" khyo re yao: ba lao"- Polu wa Makedoni mung" khyo" dam: tug' phao: lo nae" myid: phyid' pye' ra".

⁴Beria vobyu Purhu nho: yao: zo: Sopata- Thesaloni vogaung: mae" Aristaku we' Sekundu- Derbe vogaung: mae" Gaiu Asia mung" mae" Tukhiku we' Trophimu we' Timothi bam wa yao: we' daga" bocao: ye" lo" ako".

⁵Yao: bam wa qhid' khyo ye" lo" mung:- Troa vogaung: mae ngonhaung" re yelao" na: ako".

⁶Ngonhaung" wa Man" make' ra" mug Poe baui: thao re Philipi vogaung: mae" lha jui: yang: ngo" ba thao Troa vogaung: mae yao: bam we' lojho" qhug' mung: ai: vogaung: mae ngonhaung" wa dalaban thang: na: bam va".

⁷Ngonhaung" wa ban thug' khyaug' ba myi" thao re zam" khug: ra" myi" xeim zo: nae" qhid' mae" zang" ham: na: bam:- Polu wa thao: ba to" lo" nae" ngad mung: gae gaung: myi: joe" sho' phung: byu qere kho" kyo" na: ra".

⁸Ngonhaung" zabphaung: na: ra" tho' pyae: qe, mae myikaug' myo: sho' te' to" ako".

⁹Utukhu ga: mang: ra" zolau: wa bao: zo: kham: mae zaung: jo; ra". Polu dao: xo' yang: dao: jhau: na: au: Utukhu wa yab nghoe" nghoe" yang: yab: mo; lo" mung:- yao: wa lo" thao" re sam pyae myhao: ra" yham dao mae" myid gaung khyo yab: byid: gyo" lo" ra". Yao: bam yao: re lo" tau: vo; qu" ko" re Utukhu wa shid: byaug: ava".

¹⁰Ngadqere: Polu wa myid gaung khyo gyo" lo" mung:- Utukhu re lo" po: ci yang: yao: wa Dasang: kho: ge,- Yao: kao so' daui: na: ashi" ga: ta" ra".

¹¹Polu wa yham dao khyo dam: do, lo" mung: mug re khyoe' phai" yang: zo" ra". Polu wa mug: bo" sho' yao: bam we' dao: jhau: ra"- ai: thao re ai: vogaung: mae" to" lo" ra".

¹²Lam khug: ra" mo, wa kao so' daui: ra" zolau: re yham khyo jhui" lo" mung: nhag' lam: yaug yo: ru myo: sho' qhug' ako".

¹³Ngonhaung" wa lha khyo qhid' ye" lo" mung: Asu vogaung: mae Polu re lham: jhui" zhaung: yu nae" seim" to: yang:- Asu vogaung: khyo gau" ye" lo" bam:- Pe"mung:ga"re Polu yao: wa taung khyo" ai: vogaung: khyo ye: nae" seim" to: yang: ngonhaung" re ceru: kad' nae" ta" to" ra".

¹⁴Asu vogaung: mae yao: ngonhaung" re li" qhug' lao"- ngonhaung" wa yao: re lha mae jhui" zhaung: yu mung: Mitulene khyo gau" ye" lo" bam va".

¹⁵Ngonhaung" wa ai: tau mae" gau" ye" lo" mung: thao: ba re Ki- u gagyo: kao" tau" te' jo, qo khyo joe" ye: mung: thao: ba re Samo qid gyo: kao" khyo joe" ye: mung: thao: ba re Miletu vogaung: khyo joe" ye" lo" bam va".

¹⁶Polu wa Asia mung" mae ayo, ba na mazai" gan nug mung: Ephesu vogaung: nhae khyo" gau" lai: lo" nae" myid: phyid' to" ra". Gai: boe" ngad: re wa Pentikoti poe mae myhi sho' Yerusalem vogaung: khyo joe" ye: nae" yao: hin: na: ra".

¹⁷Polu wa Miletu vogaung: mae" Ephesu vogaung: khyo byu nhao: ke' mung: phung: lau: de, qere yao: jhao" li" genae" qhid' mae" khai nhao: ke' ra".

¹⁸Yao: bam joe" li" gelao"- Polu wa yao: bam re- Ngo Asia mung" khyo sao qhid' joe" lo: ra" ba na mae" naonhaung" we' daga" ngo khoru: na: lo: ra" khyo re naonhaung" ba: ako".

¹⁹Yuda byu qeyang pha,jhi" khug' khyug' mung: kad' ra" mau" mathao mae qug: khai: qhug' na: ra" gyo: mae nhag' lam: nyham: khyo" mung: ngug byid ngug nhe' gyo" yang: Asang: nho: daui daui yaug khyo" ngo mau" zaui" lai: lo va".

²⁰Mo, byu qe: qhid' kheim: mae we' naonhaung" yham jham mae ngo kho" kyo: mho" shid' byid' ra" au: naonhaung" qhid' mae" akyu" bo: ra" dao: dakheim: rere: ngo matang" to" ru re naonhaung" ba: ako".

²¹Yao: bam qobo mae" myid tha" pye' yang: Mao"So shad' khyo phaug' lo genae" we' Asang Yesu re lam: lo genae" qhid' mae" ngo wa Yuda qe we' Taung bug byu qere dakhyo: za: qam: ke' yang: ta" peim" lo va".

²²Ana"- ngo wa Gyang" Lho" Byo: mho dao: re gyo: yang: Yerusalem khyo ye" lo" zai ngad:- Ai: vogaung: mae ngo pe" yeboe" nae" rure ngo maba.

²³Thaung: laung" ru we' qug: khai: ru wa ngo re lao" na: ako"- ga: vogaung: khao: ngo" mae Gyang" Lho" Byo wa ngo re ta" peim" to" rure za: ngo ba: ra".

²⁴Ngadqere: nga" kao so' re ngo pe" o: mabyid. Ngo wa dang: to" ra" mau" zo" zaui" pin" nae" we' Asang Yesu yang ngo re byid' to" ra" mau" zo" ngad: ra" Mao"So: nhag' myan" ra" khyo Lau Dao: Gai re ta" hau" kyo" ra" mau" zo" re kyab' sho' zaui: nae" rure za: kao bau: ra".

²⁵Ngo wa Mao"So: mung"dan: khyo naonhaung" jhao" cao" kho" kyo" qin" va". Ana" wa naonhaung" mae" khag' re: ngo re khonhae" re: dam: qhug' myao logenae" mangad' rure ngo ba:.

²⁶Airumung: naonhaung" mae" dayaug yaug kao so' jeim" lo" ngad: re nga" au: dao mae qo mabo: rure ana" ba ngo naonhaung" re jhaug' za: ta" geli".

²⁷Pe"mung:ga"re ngo wa Mao"So myid: yaung: to" ra" khyo alhab' re pe" re: matang" to: lo: naonhaung" re ngo hau" kyo: byid: va".

²⁸Airumung: naonhaung" yao" gaung re we' Gyang" Lho" Byo: yang naonhaung" lo, mae ab byid' to" ra" yao kyaung" re qu" gun caung: na ge,- yao: zo" nho: sa" yang yao: sang: ra" phung: kad' yu: ra" Mao"So: phung: re lhaug' zaung" ra" yao lhaug' mo, doe; na ge,-

²⁹ngo thug' lo" thao re makhyang" ra" zag ne jham naonhaung" phaung gaung: khyo vao li" mung: yao kyaung" re phyo' zo" pye' li" genae" rure ngo ba:.

³⁰Naonhaung" phung: mae" yao:- byu damyo" wa mhug' pyag' dao: ta" mung: lam khug: ra" mo, re yao: bam: thao khyo jhui" pyag' lo" li" nae" ba na joe" lo: li" nae".

³¹Airumung: ngo naonhaung" yaug khao: ngo" re sam zin lam: lam: myi" re: na" re: ngug byid ngug nhe' myo: sho' gyo" yang: kho" kyo: mho" shid' byid' rure myid: beim: mung: lha" yang: na ge,.

³²Ana" ngo wa naonhaung" re Mao"So gun caung: ra" lo, khug mae re: naonhaung" re tau: to' qi" qhang: li" nhao: ra" Mao"So: nhag' myan" ra" mung dao: mae re: ngo ab byid' ra". Mao"So wa yao" byu qe alhab' re byid: nae" jaung: to" ra" shaman" jeju jham naonhaung" re byid' li" nae"

³³Amung: ngo wa khag' ngaui qhang mai bau: rere: myo, manyad: qu".

³⁴Ce: nga" lo; yang yao: mau" zaui: mung:- ngo yao: we' nga" mau" zaui: byin cao: qe qo ca" ci qo: ra" gu: alhab' re qho: ci: lo: rure naonhaung" yao: ba gau ngad: ako".

³⁵Ngonhaung" wa mau" zaui: qam: ke' mung: qam: nang" ra" mo, re bao" thaug' ca" ein: ra" khyo re naonhaung" re gaigai: yao: ai ru: kad' qhu" va". Alao" Asang Yesu yao:- kham: yu: ru tho' byid' ru wa je: yang: ngaui lho" ra"- ga: ta" co' ra" dao: re myid: beim: ge,- ga: ta" ra".

³⁶Polu wa ai ru: bin: ta" lao"- yao: bam we' daga" pad' thaug' thaug' yang: akyu" mho' ra".

³⁷Yao: bam alhab' mo, ngug zo" re" Polu re po yang: bobaug baug mung: au" ke' ako".

³⁸Polu wa thao phyao: yao: re yao: bam madam: the' myao lo: genae"- ga: ta" ruyang yao: bam wa je yang: nhag' kaug' ako". Airumung: yao: bam wa yao: we' daga" lha khyo ye" lo" ako".