Read Maru LAGYO: 21 Bible Online

LAGYO: 21 - Maru bible

LAGYO: 21

¹Ngonhaung" wa yao: bam re au" co' mung: lha khyo" din: za: gau" ye" lo" re Kosa gagyo: kao" khyo ye" lo" bam va". Ai: thao: ba re ngonhaung" wa Rhode gagyo: kao" khyo joe" lo mung:- ai: tau mae" Patara vogaung: khyo joe" lo: bam va".

²Ai: vogaung: mae Phoenikia mung" khyo gau" ye: nae" ra" lha dakhye' re ngonhaung" myao mung: ai: lha dao mae yedo; zaung mung: gau" ye" lo" bam va".

³Ngonhaung" wa Kupru gagyo: kao" re lo" the' myao lao"- ai: gagyo: kao" mug: thao shad' khyo" gau" gyo" lo" mung:- Suri mung" khyo gau" ye" lo" bam va". Gai xan: jham re khyo" nae" qhid' mae" Ture vogaung: gau: khung: mae lothang: bam va".

⁴Ngonhaung" wa ai: vogaung: mae lam khug: ra" mo, damyo" re lothe' myao mung: yao: bam we' dalaban lothang: na: bam va". Ai: lam khug: ra" mo, wa Gyang" Lho" Byo: qam: so' khyo" yang Polu re Yerusalem khyo maye: nae" qhid' mae" ta" ako".

⁵Ngadqere: yao: bam we' qo" thang: na: ra" ayo, ba na gan lao"- ngonhaung" wa ai: tau mae" thug' mung: xo' ye" lo" bam va". Yao: bam alhab' mo, wa yao: bam: yham sang myhi" bam- yao: bam: zoshao qe we' daga" vogaung: taung gaung qid yae joe" sho' ngonhaung" re li" dai" ke' ako". Ai: tau mae ngonhaung" alhab' mo, pad' thaug' thaug' yang: akyu" mho' bam va".

⁶Ai: thao ngonhaung" wa dayaug we' dayaug yao: cao: jho" bin: au" lao"- ngonhaung" wa lha khug khyo yedo; zaung mung: yao: bam wa yham khyo dam: tug' phao: lo" ako".

⁷Ngonhaung" wa Ture vogaung: mae" xo' yang: gau" ye" lo" mung:- Ptolemai vogaung: khyo joe" lo: bam va". Ngonhaung" wa ai: vogaung: mae" lam khug: ra" mo, re bang" se" lo, zaui: zaui: mung:- yao: bam we' daba yethang: na: bam va".

⁸Ai: thao: ba re ngonhaung" wa ai: vogaung: mae" to" lo" mung:- Kesarea vogaung: khyo joe" lo: bam va". Ngonhaung" wa Yerusalem vogaung: mae bao" thaug' mo, khyo" byu nhad' yaug khyin: yu: to" rumae" dayaug ngad mung: ngaui bau" lau dao: gai kho" kyo: yaug ngad: ra" Philib yham mae yethang: bam va".

⁹Philib wa yham maqo" shiko" ra" myiqe: zo: byid yaug qo" ra". Yao: bam wa Mao"So: mung dao: re ta" hau" kyo: mo, ngad: ako".

¹⁰Ngonhaung" ai: yham mae myao" sho' thang: na thao re Yuda mung" mae" Agabu ga: mang: ra" lapa dayaug joe" lo: ra".

¹¹Yao: wa ngonhaung" jhao" joe" li" mung:- Polu nho: phyid' cui: re yu: yu mung: ai: yang yao" khyid lo, jham re taui" ra". Amung: yao: wa Ce: phyid' cui: sang re Yuda byu qe:yang Yerusalem vogaung: mae ceru: taui: mung: yao: bam wa yao: re Taung bug byu qe: lo, khyo ab byid' pye' li" genae"- ga: Gyang" Lho" Byo ta" ra"- ga: ta" ra".

¹²Ce: dao: re ngonhaung" the' gyo: lao"- ngonhaung" we' ai: tau mae na mo, damyo" wa Polu re Yerusalem vogaung: khyo maye: nae" qhid' mae" ceim" mho' bam va".

¹³Ngadqere: Polu wa Naonhaung" pe" mung: ceru: ngug mung: nga" nhag' lam: re sho:byo, nhao: na ko" i? Ngo wa Asang Yesu mathao mae Yerusalem vogaung: mae taui" ru qhug' nae" ruza: mangad:- shid nae" lhao" re: jin" jin" ngad va"- ga: tau" ra".

¹⁴Ngonhaung" wa yao: re no: vao sho' maqo" ta" lomung: Mao"So o: ra" khyo" za: ngad vashao: ein: ta" mung: sae za: na: pye' bam va".

¹⁵Dayo, zo: kyo thao re ngonhaung" nho: zai jham re seim" nyhang" mung: Yerusalem khyo ye" lo" bam va".

¹⁶Kesarea vogaung: mae" mho"zo: qe damyo" re:- ngonhaung" we' daga" cao" li" mung: no' mae" lam khug: ra" phung: byu boe" na va" ra" Kupru gagyo: kao" mae" Mnason ga: mang: ra" yaug: nho: yham khyo yethang nae" qhid' mae" ngonhaung" re jhui" vao ye" ako".

¹⁷Yerusalem vogaung: khyo ngonhaung" joe" ye: lao"- lam khug: ra" mo, wa ngaui ngaui bau: bau: za: ngonhaung" re lham: tug: yu: ako".

¹⁸Ai: thao: ba re Polu wa ngonhaung" we' daga" Yaku re yeqhug' ra". Phung: lau: de, qe alhab' mo, re: ai: tau mae na: bam: ako".

¹⁹Polu wa yao: bam re bang" se" dao: ta" mung:- yao: zaui: so" ra" mau" zo" khyo" yang Taung bug byu qe: phaung mae Mao"So kad' va" ra" mau" zo" jham ja: khao: ngo" re jab sho' lau thoe ta" kyo" ra".

²⁰Polu ta" ra" lau thoe re bin: the' gyo: gethao re- yao: bam alhab' mo, wa Mao"So re caung:khin" byid' ako". Ai: thao yao: bam wa- Polu re Mao:nhaung: Polu we"- Yuda byu qemae" lam khug: lo: ra" mo, khonho" taung ngad: rure we' yao: bam alhab' mo, wa kham" to" ra" Tarha" re khoqhi" sho' phug' cao" nae" kao bau mo, ngad ko" rure nao ba: myao gau ngad: ra".

²¹Nao wa Taung bug mung"dan: mae na ko" ra" Yuda byu alhab' mo, re yao: bam: myid:zo: qere au: qid lhai: khyo makad' genae" we' Yuda byu qe: thung" li jham re macao" genae" qhid' mae" ta" mung:- Moshe Tarha" re to" pye' genae" qhid' mae" nao mho" shid' lo: ra"- ga" rure yao: bam the' gyo" ci: avako".

²²Ana" pe" ru: kad' nae" i? Nao joe" lo va" ra"- ga" rure yao: bam gaigai: the' gyo: genaeva".

²³Airumung: ngonhaung" wa nao re ceru: kad' nhao nug: ra". Ngonhaung" tau mae Mao"So re dao:so: to" ra" byu byid yaug na: ako".

²⁴Yao: bam re jhui" lo" mung: kyang" san: ra" khyo re yao: bam we' daga" lo" kad' wa,- yao: bam au: qo" myhaug' pye' genae" qhid' mae" yao: bam: kyang" san: ra" khyo kad' ru mae gyo" ang: ra" aphug' re nao bobyid: wa,- ceru: kad' ruyang ni" khyo we' sin: yang: yao: bam the' gyo" ra" lau dao: jham wa madang nhaung ga" rure we' naoyao: yao: re: Moshe kham" to" ra" Tarha" re phug' cao" na yaug ngad nhaung ga" rure yaug khao: ngo" ba: li" genae".

²⁵Ngadqere: lam khug: lo ko" ra" Taung bug byu qe: qhid' mae" kam" wa- so solho re ngaui" byid' ra" zo:ve we' sa:- lang nhag' se' ra" gug'nyhug' sho: we' gintho' zaung: ra" khyo re jao" pye' genae" qhid' mae" ngonhaung" myid: phyid' yang: yao: bam re vhin tung" dakhye' tung" vhin: ke' bam va"- ga: ta" ako".

²⁶Airumung: Polu wa thao: ba re ai: byu byid yaug re jhui" yu mung: yao: bam we' daga" kyang" san: ra" khyo re kad' yu: ra". Ai: thao re yao: wa Caung:pa" Yham khyo vao ye: mung: kyang" san: ra" khyo kad' ra" ayo, ba na khoyo, gan zai ngad: rure we' yao: bam yaug khao: ngo" qhid' mae" ngaui" xeim: ngaui" byid: nae" khoyo, ngad nae" rure ta" kyo" to: co' ra".

²⁷Ngadqere: ba na nhad' ba byang" li" na lao"- Asia mung" mae" Yuda byu qe damyo" wa Polu re Caung:pa" Yham mae the' myao: ako". Yao: bam wa mo,byu phung: mo" geim" re lhau: pug: to" ke' mung: Polu re taung" yu: ako".

²⁸Yao: bam wa Israel byu qe we"- bao" yu gela,- byu ceyaug wa khyi" khao: ngo" cao" du" qin" yang: yaug kho: ngo" re Israel byumyu" rere: Moshe nho: Tarha" rere:- ce: Caung:pa" Yham rere:- gye kad' yang: mho" shid' byid' qin" yaug ngad: ra". Amung: ana" re: yao: wa Caung:pa" Yham khyo Taung bug byu damyo" re jhui" vao li" mung:- ce: Gyang" Lho" ra" jo, qo re masan masin" kad' pye' ava"- ga: zag: hug' ako".

²⁹(Yao: bam ceru: ta" ko" ru wa- Polu re Ephesu vobyu Trophimu ga" ra" yaug we' daga" vogaung: khug mae yao: bam the' myao geyang: ai: yaug re Caung:pa" Yham khyo jhui" vao li" ru ngad:- ga: yao: bam jho geyang: ngad: ako".)

³⁰Vogaung: geim" mae- mo, thaui: mo, yaug boe" li" yang:- mo, byu qe alhab' mo, wa tao" zang" li" mung:- Polu re zaui: yang: Caung:pa" Yham taung gaung shad' khyo she: khyad' thug' lo" ako". Ailao" jao" Caung:pa" Yham kham: dung: jham re pyid' pye' ako".

³¹Airu: mo, byu qe Polu re se' pye' nae" seim" na ko" au:- Yerusalem vogaung: geim"- mo, thaui: mo, yaug lu" na: ako"- ga" ra" lau thoe re Roma gyezug: mo" re lo" ta" kyo" ako".

³²Ailao" jao"- gyezug: mo" wa gyezug: qe damyo" we' gyezo: qere jhui: mung:- mo, byu qe na ko" ra" jo, qo khyo tao" ye" lo" ra". Mo, byu qe wa gyezug: mo" we' gyezo: qere lham: myao gelao"- yao: bam wa Polu re be; ru thang: pye' ako".

³³Gyezug: mo" wa Polu jhao" ye" lo" mung:- taung" yu yang: jao cao: shid' khe' yang taui" to: nae" qhid' mae" amyin" khyo" ke' ra". Ai: thao re gyezug: mo" wa Ceyaug khag' ngad: ra" i?- Yao: pe" kad' shad' va" ra" i?- ga: myid' ra".

³⁴Mo, byu qe wa daphung: daja: ga: zag: hug' ako". Airu: hug' yhai: na ko" ruyang gyezug: mo" wa boe" lo: ra" khyo re khyag' za: maqo" ba mung:- yao" byu qere Polu re gyetab khyo jhui" lo" genae" qhid' mae" amyin" byid' ke' ra".

³⁵Yao: bam gyetab zam thao joe" lao"- mo, byu qe se' da: be, khyad' kad' li" ko" ruyang gyezo: qe wa Polu re yao: bam: lo, phyo: mae vo; do, lo" ako".

³⁶Mo, byu qe wa- yao: re se' pye' ge,- ga: yao" thao cao" li" mung: zag: hug' ako".

³⁷Gyetab khug khyo Polu re jhui" vao lo" nae" ngad lao"- Polu wa gyezug: mo" re Nao re ngo dao: shid' dakheim: gai: jhau nae" i? ga: ta" ra". Ailao" gyezug: mo" wa- Nao Greeg myan" ba: jhau: i?

³⁸Amung: mataung" myao" shi:re geimlau to" mung: gyezo: byid taung re au: jhaung kad' yang: din"pyad' yo khyo jhui" ye" lo" ra" ai: Egutu byu mangad: i?- ga: Polu re myid' ra".

³⁹Polu wa- Ngo wa Kiliki mung" Tarshu vogaung: mae khau: ra" Yuda byu dayaug ngad:- Akhyag: ra" vogaung: qi: mae" vobyu dayaug ngad:- jeju we' mo, byu qere dao: jhau nae" akhang" byid: la,- ga: ta" ra".

⁴⁰Gyezug: mo" wa yao: re akhang" byid' ra". Airumung: Polu wa zam thao au: mae ye; jo, mung: mo, byu qere sae za: na genae" qhid' mae" lo, tu" tu" ra". Mo, byu qe tae" lo" gelao"- Polu wa yao: bam re Hebre myan" khyo"-