Read Maru LAGYO: 22 Bible Online

LAGYO: 22 - Maru bible

LAGYO: 22

¹Myhi" pho" mao:nhaung: qe we"- ngo naonhaung" qhid' kheim: mae ta" qid' yu: ra" dao: re tae" gyo" yu ge,- ga: ta" ra".

²Yao: bam wa Hebre myan" khyo" yao: bam re jhau: rure the' gyo: gelao" je yang: tae" lo" ko" ra"- alao" Polu wa xo' yang:-

³Ngo wa Kiliki mung" Tarshu vogaung: mae khau: li" ra" Yuda byu dayaug ngad:- ngadqere: ce: Yerusalem vogaung: mae Gamale nho: jung nau" dayaug khyo" na: qi" li" yaug ngad:- ngonhaung" phug' pho" qe: Tarha" khug mae thin: ra" khyo" mho" shid' rure ngo kham: yu: lo va". Ana" ba cemae na ko" ra" naonhaung" alhab' mo, we' dakhyo:- ngo re: Mao"So: qhid' mae" kao bau: lo yaug ngad:.

⁴Ngo wa Khyo ce:khe' re cao" ra" mo, re shid sho' yhin" lo: ra" byu dayaug ngad:. Ngo wa yauggai myiqe: qere taung" yu mung: thaung: lhaung" lo yaug ngad:-

⁵Ngo ta" na: ra" dao: thoe dang: rure Khinjaung Yin" pho" we' Tarha" Qe, Do, geim" mae" mo, sagse: qo" kham: ako". Ngo wa yao: bam: lo, mae" Damasku vogaung: mae na ko" ra" Yuda mao: nhaung: qere tung" vhin: ke' ra" mug sug' re khae: yu mung: ai: mae na ko" ra" mo, re qobo dae byid: nae" taung" yu mung: Yerusalem vogaung: khyo taui" she: lo nae" qhid' mae" ngo wa Damasku vogaung: khyo ye" lo" va".

⁶Ngo airu: ye" lo" na: au:- Damasku vogaung: khyo jhao" li" lao" ba khaung tau ayo, ko re mug:gaung mae" bao qhui: ra" bo" bao dalam: wa nyag din taung" nga" avai: ayae mae bao: li" ra".

⁷Alao" ngo wa myid gaung khyo gyang: lang" lo" mung:- Sholu- Sholu- Nao ngo re pe" mung: yhin" ra" i?- ga: ngo re jhau: ra" thoe re the' gyo: va".

⁸Ngo wa- Asang we"- Nao khag' ngad: i?- ein: myid' ke' lao"- yao: wa- Ngo wa nao yhin" na: ra" Nazared mae" Yesu ngad:- ga: ngo re ta" ra".

⁹Ngo we' daga" ngad: ra" mo, wa ai: bo" bao re the' myao gengad yang: re: ngo re dao: jhau: na: ra" yaug: thoe mathe' gyo: ko" ngad: ra".

¹⁰Alao"- ngo wa Asang we"- ngo pe" ru: kad' zai i?- ein: myid' ke' lao" Asang wa- To" mung: Damasku vogaung: khug khyo vao ye" lo" wa,- nao kad' nae" qhid' mae" Mao"So san: to" ra" mau" zo" alhab' ai: vogaung: mae nao re ta" kyo" li" genae"- ga: ngo re ta" ra".

¹¹Ai: bao qhui: ra" bo" bao: yang ngo wa myo, jid: lo" byaug mung: nga" byin cao: qe wa ngo re lo; yang she mung: Damasku vogaung: khug khyo jhui" she: vao ye: ko" ra".

¹²Ngonhaung" Tarha" re phug' cao" yaug we' Mao"So: khyo re kao bau yaug ngad mung: ai: vogaung: mae na ko" ra" Yuda byu qe alhab' mo; yang re: phug' myao: ko" ra" Anania ga:- mang: ra" byu dayaug wa ngo jhao" li" ra".

¹³Yao: wa nga" nhae mae li" ye; jo, mung:- Mao:nhaung: pho" Sholu we"- ni" myo, dam: myao: li" vashao:- ga: ta" ra". Ailao" jao"- nga" myo, dam: myao: li" mung: yao: re qu" ke' re-

¹⁴Anania wa- Nao wa ngonhaung" phug' pho" qe: Mao"So: myid o: ra" khyo re ba nae" re:- Mao"So: din:man" ra" daui daui yaug re the' myao nae" re:- yao" jhau thoe re the' gyo: nae" qhid' mae" re:- Mao"So wa nao re khyin: yu: to" ava".

¹⁵Pe"mung:ga"re nao wa nao yao: the' myao va" ra" khyo we' the' gyo: va" ra" dao: re byu yaug khao: ngo" re ta" kyo: byid: nae" ai: Asang: qhid' mae" sagse: boe" lo: li" nae".

¹⁶Nao ana" pe" mung: yam" na: i? To" mung: qid nyhab' kham: yu wa,- ni" qobo cid' shao: pye' ru qhug' nae" qhid' mae" Asang re akyu" mho' wa,- ga: ngo re ta" ra".

¹⁷Ngo wa Yerusalem khyo dam: joe" lo mung:- Caung:pa" Yham mae akyu" mho' yang: na: au:- qhu" lho dalam: re ngo myao:-

¹⁸Ai: qhu" lho mae Asang re ngo the' myao mung:- Yao: wa ngo re- Nao Yerusalem vogaung: mae" phyad za: thug' lo" wa,- Pe"mung:ga"re ce: vogaung: mae" mo, byu qe wa nga" khyo we' sin: yang: nao sagse: kham: ra" dao: re makhae: yu genae"- ga: ta" ra".

¹⁹Alao" ngo wa Asang we"- ngo wa tarha" jung yham jham khyo vao ye: mung: Nao re lam khug: ra" mo, re taung" yu yang: be, yaug ngad: rure yao: bam ba: ako".

²⁰Amung: ni" sagse: pho" Stephan re se' ra" au: rere: ngoyao: re: aimae na mung: bocao: myid vang" ru we' yao: re se' ra" mo; mai bau: jham re bo:zam: byid' lo va"- ein: phaug' tau" ke'.

²¹Alao" Asang wa- Ye" lo" wa,- pe"mung:ga"re ngo nao re Taung bug byu qe na: ra"- va" ra" mung" khyo nhao: ke' nae"- ga: ta" ra"- ga: ta" ra".

²²Mo, byu qe wa ceru: ta" ru joe" sho' tae" gyo" yu: ako". Ngadqere: ai: thao re yao: bam wa yao: re yu: pye' ge,- Se' pye' ge,- yao: wa daui: na nae" maman: ngad: ra"- ga: yao: bam: thoe myhao: thao" mae" zag: hug' to" li" ako".

²³Yao: bam wa zag: hug' ru we' yao: yao" mai bau: jham re vhag' mung:- phalhug gag: sin: yang: na: ako".

²⁴Ailao"- Roma gyezug: mo" wa Polu re gyetab khug khyo jhui" vao lo" mung:- yao: re ceru: Yuda byu qe gye kad' yang: zag: hug' na ko" ra" khyo ba nae" qhid' mae" Polu re be, yang: myid: nae" qhid' mae" yao" byu qere amyin" byid' ke' ra".

²⁵Yao: bam Polu re be, genae" ga: taui: gelao"- Polu wa ayae mae ye; jo; ra" gyezug: pho" re- Roma mung"dan: byu dayaug re qobo mamyid' ca: qu" lo: be, nae" qhid' mae" tarha" vao: i? ga: myid' ke' ra".

²⁶Ce: dao: re gyezug: pho" the' gyo: lao"- yao: wa gyezug: mo" jhao" ye" lo" mung:- Zug: mo" we"- Nao pe" nam kad' na: ru ngad: i? Byu ceyaug wa Roma mung"dan: byu dayaug ngad:- ga: ta" ra".

²⁷Airumung: gyezug: mo" wa- Polu jhao" lo mung: yao: re- Nao Roma mung"dan: byu ngad: i? ngo re ta" kyo: la,- ga: myid' ra". Polu wa ngad: ga: tau" ra".

²⁸Gyezug: mo" pho" wa- Ngo wa ngaui myo: sho' byid: yang: Roma mung"dan: byu boe" lo yaug ngad:- ga: ta" lao"- Polu wa ngo wa khau: li" mae" boe" va"- ga: tau" ra".

²⁹Ailao" jao"- yao: re myid' ca: qu" nae" ga: seim" mo, wa naung zad: zad' lo" ako". Gyezug: mo" wa Polu wa Roma mung"dan: byu ngad: ga" rure ba lao"- yao: re jao co: vhe' shad' va" ruyang gyaug: din: pye' ra".

³⁰Gyezug: mo" wa Polu re Yuda byu qe pe" khyo" yang qobo zhaug' ko" ra" khyo re khyag' za: ba nug: ra". Airumung: yao: wa thao: ba re Polu re taui" to" ra" jao co: pheim: pye' nhao mung: khinjaung qi: qe we' Yuda tarha" qe, do, phung: mae bo: ra" mo, alhab' re zang" ham: na genae" qhid' mae" amyin" khyo" ke' ra". Ai: thao re yao: wa Polu re jhui" lo mung: yao: bam: qhid' kheim: mae yhe' to" ra".