Read Maru LAGYO: 23 Bible Online

LAGYO: 23 - Maru bible

LAGYO: 23

¹Polu wa Yuda Tarha" qe, do, geim" mae" mo, re zhaug' qu" mung:- Nga" mao: nhaung: Israel byu qe we"- ana" ba joe" sho' ngo wa Mao"So: qhid' kheim: mae nhag' lam: gyang: gyang: za: kao so' daui: lo va"- ga: ta" ra".

²Khinjaung Yin" Anania wa Polu nhae mae ye; jo; ra" mo, re- Polu nhad' re be, byid: nae" qhid' mae" amyin" byid' ra".

³Alao"- Polu wa- Laug phyu gyad: to" ra" khinqae we"- Mao"So nao re gaigai: yao: be; li" nae"- nao wa ai: Tarha" we' dakhyo: ngo re dao: kho' nae" qhid' mae" ai: mae zaung: jo, sho' ngadqere: Tarha" re shad' lhoe" mung:- ngo re be, nae" amyin" byid' ra" ga: ta" ra".

⁴Polu nhae mae te' na: ra" mo, wa Polu re Nao wa Mao"So: Khinjaung Yin" re roe" dao: jhau: ra"- ga: ta" ako".

⁵Alao" Polu wa Mao:nhaung: Israel byu qe we"- yao: Khinjaung Yin" ngad: rure ngo maba ga: tau" ra". Jham: mugsug' mae ni" byumyu" re zug: kad' ra" yaug re magai: ra" khyo" magai: jhau- ga: ta" to" ra"- ga: phaug' tau" ra".

⁶Polu wa- Tarha" Qe, Do, phung: mae bobo: ra" mo, mae" damyo" wa Pharishe qe ngad mung:- damyo" wa Saduke qe ngad ko" rure myao lao"- Mao:nhaung: Israel byu qe we"- ngo wa Pharishe dayaug ngad mung: Pharishe dayaug: yao: zo: re: ngad:- shid: rumae" dam: daui: to" li" nae" rure ngo myid: lao" na: ra" khyo mathao: yang ngo wa cetau mae myid' ca: qu" ru qhug' na: ru ngad: ra"- ga: tarha" qe, do, mae hug' ra".

⁷Polu ce: dao: ta: ke' we'- Pharishe qe we' Saduke qe wa jho" ta" ngag: byo; thug' li" gemung: tarha" qe, do, phung: wa shid' phung: jho" kho' lo" ako".

⁸(Pe"mung:ga"re Saduke qe wa byu wa shid: rumae" dam: daui: to" li" ru majo,- mug: lagyo: qe ga" ru mana- byo jham re: mana- ga: ta" mo, ngad: ako". Ngadqere: Pharishe qe wa ai sam ja" geim" jo;- na: ga: lam: ako".)

⁹Hug' ra" thoe wa je: qi" li" mung:- Pharishe qe: shad' khyo bobo: ra" jham: tung" pho" qe daqhae: wa- to" ye; li" mung:- byu ceyaug mae pe" shad' ru ngonhaung" mamyao- Byo: yang la, mangad: lao"- mug: lagyo" yang la,- yao: re gaigai: yao: jhau: ru ngad: re gai: ngad naeva"- ga: ta" ako".

¹⁰Airu: jho" ta" ngag: ra" khyo je: xo: li" mung: Polu re adau atam" kad' pye' li" genae" rure gyezug: pho" gyaug: ra". Airumung: yao: wa yao" gyezo: qere mo, phaung khyo gyo" ye: yang: Polu re yao: bam: lo, mae" yejhui" yu mung: gyetab khug khyo jhui" lo genae" qhid' mae" amyin" khyo" ke' ra".

¹¹Ai: myi re Mao"So wa Polu nhae mae li" ye; jo, mung:- Dagyaug- Nao wa ce: Yerusalem vogaung: mae nga" khyo re sagse: qo" kham byid' ava". Ai we' dakhyo:- Roma vogaung: mae re: sagse: kham byid: ca" shi:nae" ga: ta" ra".

¹²Thao: ba ne, kao re Yuda byu qe daqhae: wa jho" qham mung: pha,jhi" khyug' ako". Yao: bam wa Polu re maqo" se' pye' pye' wa pe" re: mazo: mashaug' nae"- ga: jham tang" to" ako".

¹³Ceru: pha,jhi" khyug' ra" mo, wa byid xe zo: je ngad: ako".

¹⁴Ai: thao re- yao: bam wa khinjaung qi: qe we' lau: de, au: jhaung qejhao" ye: mung: Ngonhaung" wa Polu re maqo" se' se' wa pe" re: mazo: mashaug' nae" ein: gyai ein: jham tang" to" bam va".

¹⁵Airumung:- ngonhaung" we' Tarha" Qe, Do, Phung: qe wa Polu khyo re je yang: ba nug geim kad' yang: Polu re naonhaung" jhao" jhui" gyo" lo nae" qhid' mae" Roma gyezug: pho" re dao: pyang: ke' ge,- Naonhaung" jhao" yao: majoe" gyo" lo shire ngonhaung" wa yao: re se' nae" qhid' mae" jin" jin" lao" na: bam nae"- ga: yeta" ako".

¹⁶Ngadqere: ai: pha,jhi" khyug' to" ra" khyo re Polu yao: nhae: mo" nho: yauggai zo: the' gyo: mung:- yao: wa gyetab khyo vao ye: yang: Polu re yeta" kyo" ra".

¹⁷Airumung: Polu wa- gyezug: pho" dayaug re khai: yu mung:- Ce: zolau: re gyezug: jhao" jhui" ye: wa,- Gyezug: pho" re ta" kyo: nae" daja: yao: qo" ra"- ga: ta" ra".

¹⁸Gyezug: pho" ai: zolau: re jhui" yu yang: gyezug: mo" jhao" jhui" vao ye: mung:- Thaung: byu Polu wa ngo re khai: yu yang: ce: zolau: nau" re nao jhao" jhui" li" nhao: ra". Pe"mung:ga"re zolau: pho" wa nao re ta" kyo: nae" dao: daja: qo" ra"- ga: ta" ra".

¹⁹Alao" gyezug: mo" wa yao: re lo, mae" she yang: dadug khyo jhui" ye: mung:- Nao ngo re pe" ja: ta" kyo: nug: i?- ga: myid' ra".

²⁰Ailao"- ai: zolau: pho" wa- Yuda kheim: so' qo" ra" mo, wa- Polu khyo re je yang: ba nug geim kad' gemung: yang:- ne, kao Polu re Tarha" Qe, Do, khyo jhui" gyo" lo nae" qhid' mae" nao zug: mo" re mho' nae" ga:- jho" qham: myid vang" to" avako".

²¹Yao: bam: dao: re datae" gyo: wa,- pe"mung:ga"re byu byid' xe zo: je wa khyole; mae vho' jo, mung:- yao: re lao" na: li" genae". Yao: bam wa Polu re za: maqo" se' pye' pye' wa pe" re: mazo: mashaug' nae" ga: jham tang" to" avako". Ana" yao: bam wa Polu re se' nae" nyhang" jin" to: mung: ni" dao: phyid' reza: lao" na: bam: ako"- ga: ta" ra".

²²Gyezug: mo" wa- Nao ngo re ceru: li" ta" kyo" ra" khyo re khag' rere: data" kyo: ga: ta" mung: ai: zolau: pho" re phao nhao: ke" ra".

²³Ai: thao re gyezug: mo" wa- yao" gyezug: shid' zo: re khai: yu mung:- Kesarea vogaung: khyo ye: nae" qhid' mae" gyezo: shid' yo- myao: jui: byu nhad' xe- lhae ci gyezo:- shid' yo- ana" myi gug yo, qug re to" nae" seim" jin" to: ge,

²⁴Amung: Polu zaung nae" myao: re nyhang" byid: mung: mang: zug: pho" Felig jhao" joe" sho' gug: gug: za: yedai" ge,- ga: ta" ra".

²⁵Alao"- gyezug: mo" pho" wa- ceru: ga: vhin tung" dakhye' tung" mung: byid' ke' ra".

²⁶Phug' myao" tho' ra" mang: zug: pho" Felig re Klaudiu Lusia au" ke' ra".

²⁷Yuda byu qe wa byu ceyaug re taung" yu mung: se' pye' nae" seim" ako". Yao: wa Roma mung"dan: byu ngad: rure ngo ba mung: ngo wa nga" gyezo: qe we' ye: mung: yao: re yekhyad' yu: to: va".

²⁸Ngo wa- yao: re Yuda byu qe pe" qobo zhaug' ko" ra" khyo re ba nug yang: yao: re Yuda Tarha" Qe, Do, khyo jhui" gyo" ye: va".

²⁹Yao: re qobo zhaug' ra" khyo wa yao: bam yao" tarha" we' sin: yang: qobo zhaug' ru ngad mung:- yao: wa shid man" ra" qobo- mangad: lao" thaung: lhaung" ke' man" ra" qobo yao: pe" daja: rere: mashad' rure ngo myao:.

³⁰Amung: yao: re se' pye' nae" qhid' mae" pha,jhi" khug' khyug' na ko" ra" khyo re ngo re ta" kyo: gelao"- yao: re nao jhao" dai" ke' nae" ai jao" yao: ngo myid: phyid' va". Amung: yao: re qobo zhaug' ko" ra" mo, rere: ni" qhid' kheim: mae yejho" ta" genae" qhid' mae" yao: bam re ngo ta" ke' va"- ga: tung" ke' ra".

³¹Gyezo: jham re: amyin" we' dakhyo: kad' ako". Yao: bam wa Polu re yejhui" yu mung: ai: myi reyao:- Antipatri vogaung: joe" sho' yedai" ke' ako".

³²Ai: thao: ba re khyid tab gyezo: jham wa gyetab khyo dam: tug' lo mung:- myao: tab gyezo: qe wa Polu we' daga" ye" lo" nae" qhid' mae" nha: to: co' ako".

³³Ai: myao: tab gyezo: qe wa Polu re Kesarea vogaung: joe" sho' yedai" mung:- mang: zug: pho" lo, mae ai: vhin tung" re yedai" yang:- Polu re ye: ab byid' ako".

³⁴Mang: zug: pho" wa ai: vhin tung" re nghe' mung: Polu re- Nao kho:mung" mae" ngad: i?- ga: myid' ra". Mang: zug: pho" wa- Polu re Kiliki mung" mae" ngad: rure ba lao"-

³⁵Yao: wa- Nao re qobo zhaug' ko" ra" mo, joe" li" gelao"- ngo wa ni" nho: mau" re gyo: byid: nae"- ga: ta" ra". Ai: thao re mang: zug: pho" wa- Herod kad' ra" yham mo" khug mae zaung" ra" gug: gam gyezo: qe we' daga" Polu re nha: to: nae" amyin" byid' ke' ra".