Read Maru LAGYO: 24 Bible Online

LAGYO: 24 - Maru bible

LAGYO: 24

¹Ai: thao- ngo" ba re Khinjaung Yin" Anania wa- lau: de, au: jhaung qe daqhae: we' daga" tarha" zug: Tertulu ga" ra" yaug re jhui: mung: Kesarea vogaung: khyo ye" lo" ra". Yao: bam wa Felig qhid' kheim: khyo vao ye: mung:- Polu re qobo zhaug' ra" khyo re ye:kug: ako".

²Ailao" Polu re khai: vhao" yu mung:- Tarha" zug: pho" Tertulu qobo zhaug' dao: ta" ru wa- Phug' myao: tho' ra" zug: pho" Felig we"- pha,jhi" kung: ra" ni" au: she: ra" aqab mae ngonhaung" wa zin na myao" sho' ngaui pyo: yaug yo za: qo" na: bam va"- Nao wa ngonhaung" mung"dan: qhid' mae" qo ca" ra" gai: ra" mau" zo" myo: sho' re kad' byid' na yaug ngad: ra".

³Amung: ngonhaung" wa ceru re jo, qo khyi" khao: ngo" mae khonhae" re: kham: yu mung:- nao re jeju gyai beim: so" na:-

⁴Ngo wa zug: pho" ni" yo, khyin: re myo: sho' mayu nug. Airumung: lang" ra" khyo" ngonhaung" ta" ra" dao: re tae" gyo: byid: nae" qhid' mae" mho' ra".

⁵Byu ceyaug wa aqug: akhai: boe" nhao yaug ngad: ru we' mug: myid geim" mae" Yuda byu qere mo, thaui: mo, yaug boe" nae" poe yaug ngad mung: Nazared phung: mae" au: jhaung dayaug ngad: rure ngonhaung" the' myao va".

⁶Yao: wa Caung:pa" Yham rere: masan masin" boe" nhao nae" seim" na: ruyang ngonhaung" yao: re taung" yu: ru ngad:.

⁸Asang nao yao: byu ceyaug re myid' ca: qu" re wa- Ngonhaung" yao: re qobo zhaug' ra" khyo alhab' nao yao: the' gyo" li" nae"- ga: ta" ra".

⁹Yuda byu qe wa ce: dao: alhab' dang: ra"- ga: ceim" ta" ako".

¹⁰Alao" ai: mang: zug: pho" wa lo, tu" tu" yang: Polu re dao: jhau nhao: ke' ra". Polu wa Zug: pho" nao wa ce: byumyu" qe: dao mae zin na myo: sho' dao: kho' yang: na: lo: rure ngo ba:. Amung: ngo wa ni" qhid' kheim: mae ngo yao" gaung re qo" ta" vha: yu yang: gyai ngaui bau" ra".

¹¹Ngo wa Yerusalem vogaung: khyo Mao"So re caung:pa" nae" qhid' mae" ye" ru ana" daxe: shid' ba maje shi" rure zug: pho" naoyao: qo" gai: qin" yu: ra".

¹²Ngo wa Caung:pa" Yham mae dayaug we' re: jho" ta" ngag: na: rure aimae na: ra" mo, mamyao ko" ngad: ra". Ai: tho' mago" Yuda tarha" jung yham mae re: vogaung: khug mae re: mo, byu qe lu" to" li" nhao nae" qhid' mae" poe: na: rure: yao: bam mathe' myao ko" ngad: ra".

¹³Yao: bam wa ana" ni" qhid' kheim: mae qobo zhaug' na ko" ra" khyo rere: sagse: maqo" ceim" shid' ko" ngad: ra".

¹⁴Yao: bam shad' nghung" ra"- ga: jho ko" ra" khyo khyo" yang ngonhaung" phug' pho" qe Mao"So re caung:pa" ra" khyo celam: re wa ni" qhid' kheim: mae ngad va" ein: ngo tau" yu: ra". Ngadqere: ngo wa Moshe kham" to" ra" Tarha" dao: alhab' re we' Lapa qe: jham: paug' mae tung" to" ra" gu: alhab' rere: ngo lam: ra".

¹⁵Ngo wa yao: bam we' dakhyo:- xao su byu qe alhab' mo, wa gai: ra" mo, magai: ra" mo, alhab' dakhyo: za: shid: rumae" dam: daui: to" li" nae" ngad: ein:- Mao"So mae myid: lao" na yaug ngad:.

¹⁶Airumung: ngo wa Mao"So: qhid' kheim: mae re: byu: qhid' kheim: mae re:- nhag' lam: gyang: gyang: za: ngad nae" qhid' mae" khonhae" re: gai: boe" qhi" qam: ke' na: ru ngad:.

¹⁷Ngo wa Yerusalem vogaung: mae" thug' lo: ru myo: sho' zin ngad thao re- nga" byumyu" qe: qhid' mae" Alu: ngaui vin: ye: nae" qhid' mae" we' Mao"So re xeim: ngaui" byid: nae" qhid' mae" ai: vogaung: khyo joe" lo va".

¹⁸Yao: bam wa ngo kyang" san: ra" khyo bin: kad' thao- Caung:pa" Yham mae xeim: ngaui" byid' na: au: re- ngo re the' myao: ako". Ai: au: re ngo we' daga" mo, byu qe- mo, thaui: mo, yaug pe" maboe" ngad: ra".

¹⁹Ngadqere: ai: tau mae Asia mung" mae" joe" li" ra" Yuda byu qe daqhae: na: ako". Yao: bam ngore qobo zhaug' nae" daja: ja: jo, ko" ngad: re wa yao: bam yao" gaung yao: ni" qhid' kheim: khyo vao li" mung: yao: bam: qobo zhaug' ra" khyo re li" ta" genae" ang: ra".

²⁰Mangad: lao" re:- ana" cemae na ko" ra" byu qe ana" gyo: ngo wa Tarha" Qe, Do, phung: qhid' kheim: mae ye; jo; ra" au:- yao: bam ngo re pe" ja" qobo myao ko" ngad: re wa- ai re ta" vageshao:-

²¹Ai: phaung mae yao: bam: qhid' kheim: mae ngo ye; jo; au: ana" ba ngo wa- shid: ra" mo, dam: daui: to" li" ko" ra" ga" ra" lam khug: ra" khyo mathao mae ngo dao: kho' ru qhug' na: ra"- ein: ru kam" wa ngo hug' ta" va"- ga: ta" ra".

²²Ai: thao re Felig wa ai: khyo we' sin: yang: nyang" za: ba: to: yaug ngad mung: myid' ca: qu" ra" khyo re thang: pye' ra". Alao" yao: wa gyezug: mo" Lusia joe" lo lao"- ngo naonhaung" mau" re dao: phyid' byid: nae"- ga: yao: bam re ta" ra".

²³Amung: mang: zug: pho" wa Polu re zaung" ngadqere: gyai ajhe' ajhin: mangad: lo:- yao" ba nam byin cao: qe:yang yao: qo ca" ra" gu: re li" caung da" byid: ko" rure akhang" byid: nae" qhid' mae" gyezug: pho" re amyin" byid: ke' ra".

²⁴Dayo, kyo thao re Felig wa Yuda myiqe: Drusila ga: mang: ra" yao" yham sang myhi" we' daga" joe" li" ra". Yao: wa Polu re khai: yu nhao mung: Yesu Khristu re lam khug: ra" khyo we' sin: yang: Polu kho" kyo" ra" mung dao: re tae" gyo" yu: ra".

²⁵Ngadqere: Polu wa gai shab: ra" khyo- yao: yao" gaung re khang" ra" khyo- joe" li" nae" ra" dao: kho' ra" ba na we' sin" ra" khyo re kho" kyo: byid: lao"- Felig wa gyaug: li" mung:- Ana" nao lo" se,- thao phyao: agu yo" lao"- ngo nao re dam: khai nae"- ga: ta" ra".

²⁶Polu wa yao: re khug vag: byid' li" maba ga:- myid: lao" mung:- Felig wa Polu re dazab: makyo khai: yu nhao mung: dao: jhau: ra".

²⁷Ai: thao shid' zin lao"- mang: zug: pho" Felig khu mae Poku Festu ga: yaug mang: zug: dam: tha" kad' ra". Felig wa Yuda byu qere myo, nho qo" nhao nug mung: yao: wa- Polu re thaung: mae nha: to: co' ra".