Read Maru LAGYO: 25 Bible Online

LAGYO: 25 - Maru bible

LAGYO: 25

¹Festu wa ai: mung" khyo joe" lo thao sam ba re yao: wa Kesarea vogaung: mae" Yerusalem vogaung: khyo ye" lo" ra".

²Khin jaung qi: qe we' Yuda lau: de, au: jhaung qe wa Polu re qobo zhaug' ra" khyo myo: sho' li" ta" kyo" ako".

³Yao: bam wa Polu re khyole; mae lham: khug' se' pye' nae" pha,jhi" khyug' to: gemung:- yao: bam re jeju kad' ra" khyo" Polu re Yerusalem vogaung: khyo jhui" li" byid: nae" qhid' mae" Festu re mho' ako".

⁴Festu wa yao: bam re- Polu wa Kesarea vogaung: mae thaung: laung" jo; ra". Mataung" myao" re ngo yao: re: ai: khyo dam: tug' phao: lo" zai ngad:.

⁵Airumung: naonhaung" au: jhaung qe wa ngo we' daga" cao" li" mung:- Polu yao: daja: ja: shad' va" ngad: re wa- yao: re qobo li" zhaug' vageshao:- ga: tau" ra".

⁶Festu wa yao: bam we' daga" ba na she' ba la, daxe ba la, thang: na mung:- Kesarea vogaung: khyo phao: lo" ra". Ai: thao: ba re yao: wa dao: kho' ra" tarha" yung" mae zaung: jo, mung:- Polu re jhui" vao lo nae" qhid' mae" amyin" byid' ke' ra".

⁷Polu joe" vao lo lao"- Yerusalem mae" joe" li" ko" ra" Yuda byu qe wa- Polu re lhang" gam" to: mung:- Polu re yao: bam sagse: maqo" ceim" shid' ra" gyai qi" ra" qobo jham myo: sho' ja: zhaug' ako".

⁸Ngadqere: Polu wa- Ngo wa Yuda byu qe: tarha" rere: Caung:pa" Yham rere: Roma Kho:sin" rere: qobo shad' ru daja: re: makad' ga: yao: yao" gaung re ta" vha: yu: ra".

⁹Ngadqere: Festu wa Yuda byu qere myo, nho kad' nug mung:- Polu re- Nao wa Yerusalem vogaung: khyo lo" mung: nga" qhid' kheim: mae ce: qobo zhaug' ra" khyo jham re myid' ca: qu" nae" nug: i?- ga: myid' ra".

¹⁰Alao" Polu wa- Ngo wa ai: mae ngo re dao: kho' ang: ra" Kho:sin" pho" nho: dao: kho' ra" tarha" yung" mae ye; jo, va". Nao yao: nyang" za: ba: ru we' dakhyo:- ngo wa Yuda byu qere pe" qobo mashad' qu"-

¹¹Ngo wa tarha" re shad' lhoe" mung: shid man" ra" qobo qo" yaug ngad: re wa- loe; beim nae" qhid' mae" ngo mamho' ngad: ra". Ngadqere: yao: bam ngo re qobo zhaug' ko" ra" khyo jham madang: ru ngad: re wa loe; beim nae" qhid' mae" ngo mamho' ngadqere: yao: bam: lo, khyo ngo re khag' re: maqo" ab byid: ngad: ra". Ngo re kho:sin" pho" qhid' kheim: khyo lhai: to' ke' byid: nae" mho' ra"- ga: ta" ra".

¹²Alao" Festu wa yao" pha,jhi" byid: lau: de, qe we' bin: jho" qham thao re Nao kho:sin" pho" jhao" lhai: to' ke' byid: nae" mho' va" rumung: kho:sin" pho" jhao" nao ye: ca" li" nae"- ga: tau" ra".

¹³Dayo, kyo thao re- kho:kham Agripa we' Bernike shid' zo: wa zug: pho" Festu re bang" se" tug: yu nae" qhid' mae" Kesarea vogaung: khyo joe" lo: ako".

¹⁴Ai: vogaung: mae yao: bam myo: sho' ba na thao re- Festu wa Polu khyo we' sin: yang: kho:kham pho" re zhao: kyo" ra". Festu wa kho:kham pho" re cemae Felig yang lhaung" to: co' ra" thaung: byu dayaug na: ra".

¹⁵Ngo Yerusalem vogaung: khyo joe" ye" ra" au:- Yuda khinjaung qi: qe we' lau: de, au: jhaung qe wa yao: re qobo zhaug' mung: yao: re dao: phyid' byid: nae" qhid' mae" ngo re mho' ako".

¹⁶Ngadqere: ngo wa yao: bam re qobo zhaug' ru qhug' ra" yaug wa yao: re qobo zhaug' ko" ra" khyo we' sin: yang: yao: yao" gaung re ta" vha: ra" dao: jhau nae" akhang" mabyid: lo: khag' rere: qobo qo" ein: ab byid' ke' nae" qhid' mae" ngonhaung" Roma thung" tarha" mae majo, ein: ta" co' va".

¹⁷Airumung: yao: bam ce: vogaung: khyo joe" li" gelao"- ngo wa akhyin: mazai" kan" lo:- thao: ba re yao:- dao: kho' ra" tarha" yung" mae zaung: jo, mung: ai: yaug re khai: jhui" vao lo nae" amyin" byid' ke' va".

¹⁸Yao" nho: gyevo qe wa to" ye, mung:- yao: re qobo zhaug' ako". Ngadqere: yao: bam wa ngo myid: jho: ra" makhyang" ra" qobo jham yao: re mazhaug' ko" ngad: ra".

¹⁹Yao: bam wa yao: bam yao" caung:pa" thung" we' sin: yang: shid: byaug va" ra" Yesu ga: mang: ra" yaug we' sin: yang: za: yao: we' jho" ta" ngag: na: ru ngad: ako". Polu wa Yesu daui: na:- ga: ta" ra".

²⁰Ngo wa ce: mau" zo" we' sin: yang: khoru: mha" yu nae" rure matho' ba loyang:- Yerusalem vogaung: khyo ye: mung: ai: qobo zhaug' ko" ra" khyo re myid' ca: qu" rure yekham: yu nug: i?- ein: ngo yao: re myid'.

²¹Ngadqere: Polu wa kho:sin" pho" jhao" lhai: to' ke' byid: nae" mho' ra". Yao: wa airu: lhaung" to: mung: kho:sin" pho" yao: dao: phyid' vashao:- ga: ta" ra". Airumung: yao: re kho:sin" pho" jhao" dai" ke' ra" yo, joe" sho' yao: re lhaung" to: nae" qhid' mae" ngo amyin" byid' to: va"- ga: ta" ra".

²²Ailao" Agripa wa Festu re Ai: yaug: dao: re ngo yao: re: tae" gyo: nug: ra"- ga: ta" ra". Festu wa nao ne,kao yao" dao: re the' gyo" li" nae"- ga: tau" ra".

²³Thao: ba re Agripa we' Bernike wa gyai gyag: ra" khin khyo" gyezug: qe we' vogaung: mae" au: jhaung qe we' daga" shava phaung phaung: ra" yham mo" khug khyo vao lo: ako". Amung: Festu amyin" byid' ke' lao"- Polu re jhui" vao lo ko" ra".

²⁴Alao" Festu wa kho:kham Agripa we' cetau mae phaung: na ko" ra" mo, alhab' we"- Yerusalem vogaung: we' ce: vogaung: mae na ko" ra" Yuda byu qe qobo zhaug' yang: ngo re li" ta" kug: to: ko" ra" yaug wa ceyaug ngad: ra"- ga: ta" ra". Alao" yao: bam wa- Yao: re adaui nha: to: nae" maang ga: ta" ako".

²⁵Ngadqere: yao: wa shid man" ra" qobo pe" kad' shad' rure re: ngo mamyao- amung: yao: wa kho:sin" pho" jhao" to' ke' byid: nae" qhid' mae" mho' ruyang ngo wa yao: re dai" ke' nae" myid: phyid' to" ru ngad:.

²⁶Ngadqere: ngo wa Roma kho:sin" pho" re yao" nho: mau" we' sin: yang: nyang" za: mugsug' tung" mung: sho' kyo: nae" pe" re: majo,- airumung: ngo wa yao: re naonhaung" qhid' kheim: khyo jhui" lo: ru ngad: ra". Yao: re kho:kham pho" bin: myid' ca: qu" lao"- ngo wa kho:sin" pho" jhao" mugsug' tung" vhin: ke' nae" khyo dakheim: daqo: qo" nae" qhid' mae" je yang: kho:kham Agripa qhid' kheim: khyo jhui" lo: ru ngad: ra".

²⁷Pe"mung:ga"re thaung: byu dayaug re dai" ke' re yao: re qobo zhaug' ra" khyo jhaug' za: ceim" shid' mung: matung" ke' re wa- khyo majo nae" ein: ngo jho: ra"- ga: ta" ra".