Read Maru LAGYO: 28 Bible Online

LAGYO: 28 - Maru bible

LAGYO: 28

¹Ngonhaung" wa gyagao: yo taung gaung khyo nyang" za: joe" ye: lao" za: ai: gagyo: kao" wa Malta ga" ru ngad: rure ngonhaung" ye: ba: bam va".

²Ai: gagyo: kao" mug: mae" byu qe wa ngonhaung" re gyai nhag' lham: khyag' ako". Mug: qu mung: gyo; ruyang yao: bam wa myi: mad mung: ngonhaung" alhab' mo, re bang" lham: tug: yu: ako".

³Alao" Polu wa thao: kyao: dadang: gaug: yu mung: myi:khyeim" mae ngha" ke' ra". Myiso' laung: li" lao"- ai: thao: dang: khug mae" lhao maui yoe" thug' li" mung:- Polu nho: lo, mae thoe" zhaung' ci yang: de; jo; ra".

⁴Airu: Polu nho: lo, mae lhao maui de; lao" jo; rure ai: mug: mae" byu qe the' myao gelao"- Byu ceyaug wa byu se' yaug ngad yao: ngad: ra"- qid panglai: mae" loe; lo ngadqere: dangman" ra" tarha" wa yao: re daui: na nae" akhang" mabyid: nhaung- ga: yao: cao: jho" ta" ako".

⁵Ngadqere: Polu wa yao" lo, mae" lhao maui re myikhyeim" khug khyo ko: ngha" zaui: ke' mung: pe" maqo lo: na: jo; ra".

⁶Yao: bam wa Polu re gaung geim" qae" li" nae"- mangad: lao"- dalhang: dae shid: lang" lo" li" nae"- ga: zhaug' qu" na: bam: ako". Ngadqere: yao: bam airu: gyai myao" sho' zhaug' qu" na gengad yang: re: Polu wa pe" re: maqo: li" rure myao gelao"- yao: bam wa myid lhai" pye' mung- Ce:yaug wa So ngad: ra"- ga: ta" ako".

⁷Aimae" mataung" va" rumae gagyo: kao" mug: agyi pho" Publiu sang: ra" yo myid dajhid' jo; ra". Ai: agyi pho" wa ngonhaung" re nyang" za: bang" lham: tug: yu mung: sam ba geim" bang" da" byid' ra".

⁸Publiu nho: yao: pho" wa noqam" we' vae: ne no mung: yab qo mae no: lang" jo; ra". Alao" Polu wa ai: yaug: qe, khyo vao ye: yang: akyu" mho' mung:- ai: yaug: dao mae yao" lo, kai: byid: yang: yao: re gai byid' ra".

⁹Ceru: bin: boe" thao re ai: gagyo: kao" mug: mae" no phyo: qhug' ra" mo, geje alhab' mo, re: Polu jhao" li" mung: yao: bam gai: shao: lo" ako".

¹⁰Yao: bam wa ngonhaung" re jhaung qhu" myo: sho' byid' ako". Ngonhaung" dam: gau" lo" nae" seim" lao" re:- ngonhaung" gyaung: khyo mae qo ca" ra" zao:kho jham re sang pho dao mae ke' byid' ako".

¹¹Lho" mo" sam khye' kyo thao re ai: gagyo: kao" mae gyo, yo, lo:khug: na: ra" Alexanda vogaung: mae" So zo:zam ga: mang: ra" sang pho dao khyo yedo; zaung yang: gau" ye" lo" bam va".

¹²Ngonhaung" wa Surakuse vogaung: khyo joe" ye" lo" mung: ai: vogaung: mae sam ba yethang: na: bam va".

¹³Ai: vogaung: mae" ngonhaung" dam: xo' gau" ye" lo" re Rhegium vogaung: khyo joe" ye" lo" bam va". Thao: ba re mug:thao la hug' lo mung: shid' ba thao re Puteoli vogaung: khyo joe" ye" lo" bam va".

¹⁴Ngonhaung" wa ai: vogaung: mae lam khug: ra" mo, damyo" re ye:myao mung: yao: bam wa- ngonhaung" re yao: bam we' daga" dalaban thang: na nae" qhid' mae" mho' ako". Ai: thao re ngonhaung" wa Roma vogaung: mo" khyo ye" lo" bam va".

¹⁵Roma vogaung: mae" lam khug: ra" mo, wa ngonhaung" khyo re the' gyo: gemung: Api gai jao: joe" sho' we' bang" khug yham sam lam:- ga" ra" jo, qo khyo joe" sho' joe" li" mung: li" tug: yu: ako". Polu wa yao: bam re myao lao"- yao: wa Mao"So: jeju re caung:khin" mung: myid qam: qi: sho' bo: li" ra".

¹⁶Ngonhaung" wa Roma vogaung: khyo joe" ye" lo" bam lao" Polu wa zaung" ra" gyezo: dayaug we' yao: yao: za: na nae" akhang" qo" ra".

¹⁷Sam ba thao re Polu wa ai: vogaung: mae" Yuda lau: de, au: jhaung qere khai: yu: ra". Yao: bam zang" li" gelao"- Nga" Israel mao: nhaung: qe we"- ngo wa ngonhaung" byumyu" qere re:- ngonhaung" phug' pho" qemae" xo' khae: yu: ra" thung" li jham rere:- shad' lhoe" yang: pe" daja: re: makad' ngadqere: Yerusalem vogaung: mae ngo re thaung: lhaung" mung: Roma byu qe: lo, khyo ab byid' pye' ako".

¹⁸Ngo re bin: myid' ca: qu" gethao re shid man" ra" qobo ngo pe" daja: re: mashad' rure yao: bam myao geyang:- Roma byu qe wa ngo re pheim: ke' nug: ako".

¹⁹Ngadqere: Yuda byu qe airu re ngag: thaug' ko" ra" au: ngo yao" byu qere pe" qobo zhaug' nae" majo, ngadqere:- ngo wa Khosin"" pho" jhao" lhai: ke' byid: genae" qhid' mae" mho' va".

²⁰Airumung: ngo wa naonhaung" we' jho" qhug' jhau nae" qhid' mae" khai: yu: ru ngad: ra". Ngo ceru: jao co" yang taui" ru qhug' ru wa Israel byumyu" qe myid: lao" na ko" ra" yaug: mathao mae ngad: ra"- ga: ta" ra".

²¹Alao" yao: bam wa Ngonhaung" wa ni" khyo we' sin: yang: Yuda mung" mae" vhin tung" dakhye' daqo: re: maqhug' yu- amung: aimae" ngonhaung" byu qe dayaug re: joe" li" mung: ni" khyo re magai: ra" lau dao: mali" ta" ko" ngad: ra".

²²Pe"mung:ga"re ce: nao bobo: ra" phung: qe khyi" khao: ngo" mae"- mo, byu qe ngag: thaug' ko" rure ngonhaung" ba:- ngadqere: nao myid: ra" khyo rere: ngonhaung" tae" gyo: nug: ra"- ga: ta" ako".

²³Airumung: yao: bam wa Polu we' ba na jho" dang: yu: ako". Jho" dang: to" ra" ba na mae Polu thang: na: ra" jo, qo khyo byu myo: sho' mo, joe" li" ako". Polu wa ne, kao mae" mug: cad' sho' yao: bam re Mao"So: mung"dan: we' sin" ra" mung dao: jham mho" kyo: byid: mung: Moshe Tarha" mae" we' lapa qe: jham: dao: jham re ngha yang: Yesu khyo re yao: bam lam" li" gesho' kho" kyo" ra".

²⁴Yao: bam mae" damyo" wa Polu ta" rure lam" ako". Ngadqere: damyo" wa malam" ko" ngad: ra".

²⁵Airumung: yao: bam yao: cao: majho" vang" lo: thug' lo" na ko" au: Polu ta" ru wa Gyang: Lho" Byo wa Lapa Esaia nhad' khyo" naonhaung" phug' pho" qere ta" ra" dao: wa gyai yao: jo: ra".

²⁶Yao: ta" ru wa- Nao wa ai: byumyu" qejhao" ye: mung: ta" kyo: wa,- Naonhaung" wa tae" gyo: gengadqere: maba: gyo: genae"- naonhaung" qu" gengadqere: mamyao genae".

²⁷Pe"mung:ga"re ce: byumyu" qe: nhag' lam: wa nhag' cad' cad' jo, mung:- yao: bam: nokhye' jham wa jid' jo; ru we' yao: bam: myo, jham cam" ci geyang: ngad: ako". Airu: mangad: ko" re wa yao: bam: myo, jham wa myao mung:- yao: bam: nokhye' jham wa the' gyo: yang: yao: bam: nhag' lam: mae ba: gyo: gemung: yao: bam wa ngo shad' khyo phaug' lo: li" genae"- ga: Mao"So ta" ra". Alao" ngo wa yao: bam re gai byid: nae" ga" ru ngad: ra"- ga: ta" ra".

²⁸Alao"- Polu wa dao: pin" khyo"- Mao"So: khyad' yu: ra" khyo mung dao: re Taung bug byu qe khyo byid' pye' mung: yao: bam wa ai: mung dao: re tae" gyo" yu: li" genae" rure naonhaung" ba: to: ge,- ga: ta" ke' ra".[3]

³⁰Polu wa shid' zin lam: lam: yao: ngho" na: ra" yham mae na yang:- yao: jhao" li" ra" mo, alhab' re bang" lham: tug: yu mung:-

³¹Yao: wa Mao"So: mung"dan: khyo re kho" kyo" ru we' Asang Yesu khyo re mazag mavae galin: gago:- mho" shid' kho" kyo" na: ra".