Read Maru LAGYO: 4 Bible Online

LAGYO: 4 - Maru bible

LAGYO: 4

¹Petru we' Yohan wa mo,byu qere airu: kho" kyo" na shiko" au: khinjaung qe daqhae:- Caung:pa" Yham gug: gam zug: qe we' Saduke qe joe" li" ako".

²Lagyo: shid' zo: wa mo,byu qere- Yesu shid: ru mae" dam: daui: to" li" va" ra" khyo mho" shid' na: ako". Airu wa shid: byaug va" ra" mo, dam: daui: li" nae" ga" ra" dao:- dang: rure sagse: kham byid' ru boe" yang: yao: bam nhag' yo" ako".

³Airumung: yao: bam wa lagyo: shid' zo: re taung" yu: ako". Ngadqere: mug:cad' lo" na: ruyang thao: ba ne, seim joe" sho' lagyo: shid' zo: re thaung: khug mae lhaung" to" ako".

⁴Ngadqere: mungdao: re the' gyo" ra" mo, myo: sho' wa lam" ako". Amung: lam khug: ra" mo, ngo" taung ko myo" laug: li" ra".

⁵Thao: ba re Yuda au: jhaung qe lau: de, qe we' jham: tung" pho" qe wa Yerusalem mae zang" ham: ako".

⁶Yao: bam wa khinjaung yin" Anna we' Kayapha - Yohan - Alexanda we' gatau Khinjaung Yin" dinkhu: khug mae bobo ko" ra" mo, we' jho" qham: ako".

⁷Yao: bam wa lagyo: shid' zo: re yao: bam: qhid' kheim: mae yhe' to: mung:- Ni" shid' zo: wa ceru re ni" shid' zo: khoru: kad' ko" i?- Pe" ja" qam: so'- khag' mang khyo" yang ceru: kad' ko" i? ga: myid' ako".

⁸Ailao" Petru wa- Gyang" Lho" Byo byang" jo, mung:- yao: bam re mo,byu qe: au: jhaung qe we' lau: de, qe we"-

⁹Khyid qeim yaug re gai kad' byid' ra" khyo we' yao: khoru: gai: shao: lo" byaug: ra" khyo we' sin: yang: nga" shid' zo: myid' ca: qu" ru qhug' ngad: re wa-

¹⁰naonhaung"- yao: re pyao: zang mae jin" se' pye' mung:- Mao"So: yang shid: ru mae" dam: daui: to" li" nhao: ra" ai: Nazared mae" Yesu Khristu mang qam: so' khyo" yang ai: khyid qeim wa nyang" za: gai: shao: lo" byaug mung: cetau naonhaung" qhid' kheim: mae ye; jo; rure naonhaung" alhab' mo, we'- Israel byumyu" qe alhab' ba: yu ge,.

¹¹Yesu wa naonhaung" yham zhaug' mo, khyin: shalhaui" pye' ra" laug baui wa je: akhyag: thao" ra" laug baui boe" lo: ra"- ga: jham: mugsug' mae ta" to" ra" yaug ngad: ra".

¹²Khyad' yu: ru wa yao: dayaug khyo" yang za: gai: qo" yu: ra". Mug:myid geim" mae yao: mae" je yang: ngonhaung" re qo" khyad' yu nae" qhid' mae" Mao"So byid' to" ra" yaug gaje khag' re: mana ngad: ra"- ga: phaug' tau" ra".

¹³Yuda tarha" qe,do, mae bobo: ra" mo, wa- Petru we' Yohan shid' zo" nho: vae" ra" myid re myao mung: yao: shid' zo: wa pha,jhi" mabo: ra" yu" yu" byu za: ngad ko" rure ba geyang: mug' hao" byaug: ako". Ai: thao re yao: bam wa Petru we' Yohan shid' zo: wa qhid' phyao: Yesu byin zam" qe ngad: rure myid: beim" ako".

¹⁴Ngadqere: khyid gai: lo" byaug: ra" yaug wa Petru- Yohan we' daga" ai: tau mae ye; jo; rure myao geyang: yao: bam pe" dakheim: re: maqo" ta" ko" ngad: ra".

¹⁵Airumung: yao: bam wa yao: shid' zo: re tarha" qe, do, mae" thug' lo" nhao mung: yao: bam yao: cao: byin phyo: jho" qham: ako".

¹⁶Ceshid' zo: re ngonhaung" pe" ru: kad' zai i?- Yao: shid' zo" yang mug' pho: ve, lho qi: sho' boe" va" rure Yerusalem vogaung: mae" mo, yaug khao: ngo" ba: ako". Ngonhaung" aire maqo" ha: pye' lo: ngad: ra".

¹⁷Ngadqere: mo,byu qe: phaung khyo ce: lau dao: je yang: mabyo: lo" vashao: ai shid' zo: re Yesu mang lao: yang: khonhae" re: khag' rere: madam: ta" genae" qhid' mae" ta" peim: gelang:- ga: ta" to" ako".

¹⁸Airumung: yao: bam wa lagyo: shid' zo: re dam: khai: vhao" yu mung: Yesu mang lao: yang: pe" re: data"- pe" re: damho" shid' ge, ga: yao: shid' zo: re ta" ako".

¹⁹Ngadqere: Petru we' Yohan wa yao: bam re- Mao"So: mho dao: re gyo: zai i? Mangad: lao" naonhaung" mho dao: re gyo: zai i? Mao"So: qhid' kheim: mae kholam: jo: rure naonhaung" yao: yao: dao: phyid' ge,

²⁰pe"mung:ga"re ngonhaung" wa- ngonhaung" yao: the' myao va" ru we' the' gyo" yu: ra" khyo jham re mata" lo: maqo" na- ga: phaug' tau" ako".

²¹Aimung: Yuda tarha" qe, do, mae" mo, wa- yao: shid' zo: re je: yang: qao: ra" khyo" ta" peim: yang: nhao: ke' ako". Pe"mung:ga"re mo, byu qe alhab' mo, wa boe" lai: lo: ra" khyo mathao mae Mao"So re caung:khin" byid' na ko" ruyang- yao: bam wa lagyo: shid' zo: re qobo dae byid: nae" magai: boe" rure ba: qu" ako".

²²Ce: mug' pho: ve, lho boe" yang: gai shao: lo" ra" yaug: apyad wa byid xe zin je ngad: ava".

²³Petru we' Yohan wa yao: shid' zo: re nhao: ke' ge we'- yao: bam: phaung khyo dam: tug' lo mung:- khinjaung qi: qe we' lau: de, au: jhaung qe yao: shid' zo: re ta" ke' ra" dao: jham re yao: bam re lodam: ta" kyo" ako".

²⁴Lam khug: ra" mo, wa ai re the' gyo: gelao"- yao: bam wa nhag' lam: dadang: za: qhan: mung: akyu" mho' ko" ru wa- Mug:gaung myid gaung qid mung" panglai: we' ai: gu: mae na: ra"- jo; ra" gu: alhab' re phan" phaug' to: yaug Asang we"-

²⁵Nao wa ni" jeim pho" ngad: ra" ngonhaung" phug' pho" Davi nhad' dao: thoe khyo" Gyang" Lho" Byo: yang ta" ra" au:- Taung bug byumyu" qe wa pe" mung: nhag' jam: yo" na ko" i? Byumyu" alhab' pe" mung: akeim mae pha,jhi" khug' khyug' na: ako" i?

²⁶Asang we' yao" yang nhao: ke' ra" Meshia re gye kad' nae" qhid' mae" Myidgaung kho:kham qe seim" nyhang" to: mung: Zug: ade, qe daga" za: zang" ham: na: ako"- ga: ta" ra".

²⁷Pe"mung:ga"re- gaigai: yao:- Herod we' Pontu Pilad wa- Taung bug byu qe we' re:- Israel byu qe we' re:- Nao: yang xau gyad yang: san: to" ra" Meshia Ni" Gyang" Lho" ra" daui daui yaug Yesu re gye kad' nae" qhid' mae" ce: vomo" khug mae jho" qham: avako".

²⁸Yao: bam wa ni" qam: so' we' ni" myid o: ra" khyo" myid: phyid' to: gau ngad: ra" boe" li" ca" ra" mau" zo" jham ja: khao: ngo" re kad' nae" qhid' mae" airu: zang" ham: ru ngad: avako".

²⁹Asang we"- ana" yao: bam kyaug' tin" ra" khyo re qu" beim: byid: la,- amung: ni" daui daui mo, re mazag mavae lo: ni" mungdao: re kho" kyo: nhao byid: la,.

³⁰No gai byid: nae" qhid' mae" ni" lo, yheim" thug' ke' wa, Ni" Gyang" Lho" ra" daui daui yaug Yesu mang khyo" yang mug' pho: we' mug' pho: ve, lho jham boe" thug' li" nhao wa,- ga: mho' ako".

³¹Yao: bam akyu" bin: mho' gelao" yao: bam phaung: na: ra" jo, qo wa laui" nan" li" ra". Yao: bam alhab' mo, wa Gyang" Lho" Byo we' byang" mung:- Mao"So: mungdao: re vae" vae" za: ta" hau" ako".

³²Lam khug: ra" mo, wa myid aung khug nhag' lam: dakhe' za: ngad: ako". Khag' re: yao: bam sang: ra" jo, nho" re nga" mae" ngad: ga: mata" gelo:- yao: bam qo" ra" gu: alhab' re daga" za: qhan" ci: ako".

³³Lagyo: qe wa Yesu dam: daui: to" li" ra" khyo re qam: so' qi: we' sagse: kham: ako". Mao"So wa yao: bam alhab' mo; dao mae shaman" jeju vhe' sheim: byid' ra".

³⁴Yao: bam: phung: mae qo ca" ru khag' re: mana ko" ngad: ra". Pe"mung:ga"re- yokhyao: yomyid qo" ra" mo, mangad: lao"- yham qo" ra" mo, wa aung" pye' mung: qo" aung" ra" ngaui re cili" mung:- lagyo: qe: lo, khug mae li" ab byid' ako".

³⁵Lagyo: qe wa ai: ngaui jham re- yaug khao: ngo" re yao: bam: qo ca" rure cao" yang: gae byid' ako".

³⁶Alao"- lagyo: qeyang Banaba ga: mhang" ra" (Banaba ga" ru wa qam: byid: yaug ga" ru ngad: ra") Kupru qid gyo: mung" mae khau: ra" Levi amyu" Yoseb wa-

³⁷yao: qo" ra" yo myid gaung re aung: mung: qo" aung" ra" ngaui jham re lagyo: qejhao" cili" mung: qhaug' byid' ra".