Read Maru LAGYO: 6 Bible Online

LAGYO: 6 - Maru bible

LAGYO: 6

¹Ai: thao mataung" myao" re mho"zo: qe wa myo" laug: li" mung:- Heleni myan" jhau: ra" Yuda qe we' Yuda myan" jhau: ra" Yuda qe: agyo: mae myan" myo: nae" thug' li" ra". Pe"mung:ga"re Heleni myan" jhau: ra" Yuda qe wa- yao: bam: cug' mo" myhi" qere ba khao: ngo" gae byid' ra" zao:kho ngaui o" sho' magae byid: ko"- ga: ta" ako".

²Airumung: lagyo: qe daxe: shid' yaug wa lam khug: ra" mo, phung: geim" re khai: zhang" yu mung:- Ngonhaung" wa Mao"So: mung dao: re kho" kyo: nae" mau" zo" re qhui" to: mung: Alu ngaui zam: pyo byid' ra" mau" re zaui" ru wa majo ngad: ra".

³Mao:nhaung: qe we"- Airumung: Gyang" Lho" Byo byang" ru we' pha,jhi" bo: ra" byu nhad' yaug re naonhaung" phaung mae" khyin: yu ge,- ce: mau" zo" re asang kad' yang: zaui: nae" ngonhaung" yao: bam re san: to: nae".

⁴Ngonhaung" yao: kam" wa akyu" mho' ru we' kho" kyo" ra" mau" zo" vin vo; ru mae yo, byang" ayo, byid: zai ngad:- ga: ta" ako".

⁵Lam khug: ra" mo, phung: geim" wa lagyo: qe ta" rure gyo" ngaui: ako". Ai mung: yao: bam wa lam khug: myid qi" ru we' Gyang" Lho" Byo byang" ra" Stephan ga" ra" yaug- Philib- Prokuru- Nikano- Timon- Parmena we' Nikola- bam re khyin: yu: ako". Nikola wa Antioki vogaung: mae" Yuda caung:pa" thung" khug khyo" phaug' vao lo: ra" Taung bug byu ngad: ra".

⁶Phung: byu qe wa ai: khyin: yu: to" ra" mo, re lagyo: qe: qhid' kheim: mae nha: to" ako". Lagyo: qe wa akyu" mho' mung: ai bam: dao mae lo, kai: byid' ako".

⁷Aimung: Mao"So: mungdao: wa xo' yang: xo' yang: hau" nhao" lo" ra". Yerusalem mae" mho"zo: qe wa je: je: za: myo" laug: li" mung: khinjaung qi: qe myo: sho' re: lam khug: lo: ako".

⁸Stephan wa Mao"So: yang magan: mago" ra" shaman" jeju we' qam: so' byang" sho' byid' to: mung:- mo, byu qe: qhid' kheim: mae mug' pho: ve, lho we' mug' pho: mau" zo" qi: sho' kad' qhu" byid' ra".

⁹Ngadqere: Alexanda we' Kureni vogaung: mae" Yuda byu qere: bobo: ra" loe; beim mo; tarha" jung yham phung: mae bobo: ra" mo, daqhae: wa Stephan re ngag: thaug' ako". Yao: bam we' Kiliki- Asia mang: khaung: mae" Yuda qe damyo" wa Stephan we' jho" ta" ngag: ako".

¹⁰Ngadqere: Byo wa Stephan re pha,jhi" qi: byid' to" ruyang Stephan: jhau: ke' ra" dao: re yao: bam maqo" phaug' ko" ngad: ra".

¹¹Airumung: yao: bam wa byu damyo" daqhae: re khug vag: byid: yang:- ceyaug wa Moshe rere: jung" gaui: ra" dao: jhau: na: ru ngonhaung" the' gyo: va"- ga: ta" nhao: ako".

¹²Airu: kad' mung: yao: bam wa mo, byu qe lau: de, au: jhaung qe we' Jham: tung" pho" qere lu" to" li" nhao: ako". Yao: bam wa Stephan re taung" yu mung: tarha" qe, do, phung: qe: qhid' kheim: khyo jhui" yu: to" ako".

¹³Ai: thao re yao: bam wa Stephan nho: khyo rere: mhug' yang: sagse: kham: ta" nae" byu daqhae: rere: khai: to" ako". Ai: sagse: qe wa byu ceyaug wa- ai: Gyang" Lho" ra" Caung:pa" Yham re we' Moshe Tarha" re khonhae" re: jung" gaui yang: ta" ra".

¹⁴Nazared mae" Yesu wa ai: Caung:pa" Yham re phyo' pye' mung: Moshe yang ngonhaung" re byid' to" ra" thung" tarha" alhab' re tha" pye' li" nae"- ga: ceyaug ta" rure ngonhaung" the' gyo: va"- ga: sagse: kham: ako".

¹⁵Tarha" qe, do, mae zaung: jo; ra" mo, alhab' Stephan re ceim" zhaug' qu" na ko" re- Stephan nho: myo,khung: wa mug: lagyo" nho: myo,khung: we' dau: rure myao: ako".