Read Maru LAGYO: 7 Bible Online

LAGYO: 7 - Maru bible

LAGYO: 7

¹Khinjaung Yin" wa Stephan re- Ce: qobo zhaug' ra" dao: gaigai: dang: i? ga: myid' ra".

²Ailao" Stephan wa- Mao:nhaung: qe we' nhag' bo qe we"- Tae" gyo" qu" ge,- ngonhaung" phug' pho" Abraham wa Haran vogaung: khyo maye: na shire Mesopotamia mung" mae na shi" au: phungbao qi" qhang: ra" Mao"So wa yao: re na: qhu" mung:-

³Mao"So wa yao: re Ni" ba nam ug zo: ni" mung"dan: re to: co' mung:- nao re ngo ceim" shid' nae" ra" mung" khyo ye" lo" wa,- ga: ta" ra".

⁴Ai mung: Abraham wa yao" mung"dan: re to: co' mung:- Haran vogaung: mae yena: ra". Abraham nho: yao: pho" shid thao re Mao"So wa- ana" naonhaung" na: jo; ra" ce: mung" khyo Abraham re zaug byaung" na nhao: ra".

⁵Ai: ayo, mae Mao"So wa Abraham re ai: mung"dan: mae" mug: myid re yao" sudgan jo,nho" khyo" dalo, maug qhi" lhao" re: mabyid: ngad: ra". Ngadqere: ai: mung"dan: re yao: re we' yao" myid:zo: qere byid: nae" ga:- Mao"So wa dao:so: byid' to" ra". Mao"So ce:dao:so: re byid' ra" au: Abraham wa zo: dau dayaug re: maqo" ngad: ra".

⁶Mao"So wa Abraham re- Ni" myid:zo: qe wa taungbug: mung" mae yena mung: jeim kad' ru qhug' ru we' zin lam: byid yo- dayin dayo: yhin" ru qhug' li" genae".

⁷Ngadqere:- yao: bam re jeim kad' nhao zo" ra" byumyu" qe: dao mae ngo dao: phyid' nae". Ai: thao re yao: bam wa ai: mung"dan: mae" thug' lo" mung:- ce: jo, qo mae ngo re goe; pa" li" genae"- ga: ta" ra".

⁸Ai: thao re Mao"So wa- dao: thang" to" ra" aso: lho khyo" au: qid lhai" ra" khyo Abraham re byid' ra". Airumung: Abraham wa Isag re khau thao she' ba ein: ba Isag re au: qid lhai: khyo kad' byid' ra"- Isag wa yao: zo: Yaku re- Yaku wa lahau: qi" ra" ngonhaung" byumyu" phug' pho" qe ngad: ra" yao: zo: daxe: shid' yaug re au: qid lhai: khyo kad' byid' ra".

⁹Yaku yao: zo: qe wa yao: bam: yao: nhaung: Yoseb re myid nug: gemung: Egutu mung" khyo jeim kad' nhao: nae" qhid' mae" Yoseb re aung" ke' ako".

¹⁰Ngadqere: Mao"So wa yao: we' daga" ngad mung:- yao: re qug khai: qug: khai: ru alhab' mae" loe, nhao: ra". Mao"So wa Yoseb re Egutu kho:kham qhid' kheim: mae myo,nho nga: lao: qo" nhao: ru we' pha,jhi" byid: mung:- Egutu kho:kham wa Yoseb re mung"dan: geim" dao mae re: kho:kham kho" geim" rere: zug: kad' nhao: ra".

¹¹Ailao" Egutu mung" we' Khanan mung" khaung: geim" mae bao" khug' qi: zang thug' li" mung:- qug: khai: qhug' ko" ra". Ngonhaung" phug' pho" qere: zo:ve gan: byaug yang: zo:ve maqo" qho loko" ngad: ra".

¹²Yaku wa Egutu mung" mae gaug zo jo;- ga" ra" thoe re the' gyo: lao"- yao: wa ngonhaung" phug' pho" qe ngad ko" ra" yao: zo: qere sao qhid' lhang Egutu mung" khyo nhao: ke' ra".

¹³Shid' lhang ein: lhang re Yoseb wa yao: mao: bam re yao: khag' ngad: rure ta" kyo" ra". Alao" Egutu kho:kham pho" wa Yoseb yham byu qe: khyo re ba: li" ra".

¹⁴Aimung: Yoseb wa yao: pho" Yaku re- yham byu nhad' xe: ngo" yaug geim" alhab' Egutu mung" khyo zaug byaung" li" genae" qhid' mae" dao: pyang: ke' ra".

¹⁵Alao" Yaku wa Egutu mung" khyo yebyaung" na mung:- aimae yao: yao: we' yao: zo: qe yeshid: pye' ako".

¹⁶Yao: bam: mao gaung jham re Shekhem khyo dao: lo mung:- Hamo yao: zo: bam mae" Abraham ngaui byid: yang: vai: yu: ra" lab mae lonyhab' ako".

¹⁷Mao"So wa Abraham re byid' to" ra" dao:so: jab byang" nae" ba na joe" li" na lao"- Egutu mung" mae na: ra" ngonhaung" amyu" wa qi: sho' je" li" ko" ra".

¹⁸Lo" thao" mae Yoseb re maba mase" ra" kho:kham dayaug Egutu mung" mae kho:kham kad' ra".

¹⁹Ai: kho:kham pho" wa ngonhaung" phug' pho" qere pha,jhi" khyug' yang: yao: bam re yhin" ra". Yao: bam: zonau" qere shid nae" qhid' mae" yham taung gaung khyo maqad maqui" yeshapye' to: nhao: ra".

²⁰Ce: yo, mae gyai yaung" ra" zonau" Moshe wa khau: li" ra". Yao: re yham mae lho" mo" sam khye' khau: to: mung:-

²¹Moshe wa yao" yham mae" taung gaung khyo shapye' pye' ru qhug' lao" kho:kham myiqe: zo: wa yao: re yao: zo: khyo" khau: qhi" yu: ra".

²²Aimung: Moshe wa Egutu byu qe: pha,jhi" alhab' re mho" zhao: yu mung: nhad' dao: thoe qam: lo, mau" bo: ra" yaug boe" li" ra".

²³Moshe apyad byid xe zin ngad lao"- yao: wa yao" Israel mao:nhaung: qe khoru: qug: khai: qhug' na ko" rure qu" nae" qhid' mae" myid: phyid' ra".

²⁴Yao: wa Israel byu dayaug re Egutu byu dayaug: yang yhin" na: rure yethe' myao mung: Egutu byu re yese' pye' yang: lage, bao" phaug' byid' ra".

²⁵(Yao: bam Israel byumyu" qe: loe; beim nae" khyo mae Mao"So wa yao: re cili" nae"- ga" rure yao" byu qe ba: gyo: genae" ga:- Moshe myid: jho: ra". Ngadqere: ai re yao: bam maba: gyo: ko" ngad: ra".)

²⁶Ai: thao: ba re Israel byumyu" shid' zo: myan" myo: mung: jho" se' na ko" rure Moshe yemyao mung:- yao: shid' zo: re mo, byo, kao: yang:- tae" gyo" qu" ge,- ni" shid' zo: wa Israel mao:nhaung: yao: cao: angad: re pe" mung: airu: jho" se' na ko" i? ga: yeta" ra".

²⁷Ngadqere: byin cao: pho" re mo, byo, o: lhaung: ra" yaug wa Moshe re deim" qhui" pye' mung:- nga" shid' zo" mau" re dao: kho' nae" qhid' mae" nao re khag' yang zug: we' Tarha" agyi kad' nhao: to" i?

²⁸Nao wa Egutu byu dayaug re ayenhe' se' pye' ru we' dakhyo: ngo rere: nao se' pye' nug: i? ga: Moshe re myid' ra".

²⁹Moshe ce: dao: re the' gyo: lao"- yao: wa Egutu mung" mae" phao: thug' lo" mung:- Midian mung" mae yephao: na: ra". Yao: wa ai: mung" mae yauggai zo: shid' yaug re myhung: ra".

³⁰Zin lam: byid xe zin lai: lo" thao re Sina bam nhae din"pyad' yo mae myi: nga" na: ra" thao" paung" mae mug: lagyo: dayaug wa Moshe re na: qhu" byid' ra".

³¹Moshe wa ai re the' myao yang:- mug' hao" byaug mung: nyang" za: yequ" nae" ga: ai: thao" paung" khyo qui" ye" lo" ra".

³²Ngadqere: yao: wa- Ngo wa naonhaung" phug' pho" qenho: Mao"So- Abraham nho: Mao"So Isag nho: Mao"So Yaku nho: Mao"So ngad: ga" ra" Asang: nho: thoe re yethe' gyo" ra". Alao" Moshe wa gyaug: nin" mung: mavae" qu" ngad: ra".

³³Asang wa yao: re- Ni" khyid zhaung: khyad' pye' wa,- pe"mung:ga"re nao ye; jo; ra" jo, qo wa gyang" lho" ra" myid gaung ngad: ra".

³⁴Nga" byumyu" qe Egutu mung" mae dayin dayo: qug: khai: kham zo" na: rure ngo the' myao va"- ngo wa yao: bam: nokyang: thoe re the' gyo: va". Aimung: yao: bam re khyad' yu nae" ein: ngo joe" li" ru ngad:- ana" li" wa, nao re ngo Egutu mung" khyo nhao: ke' nae"- ga: ta" ra".

³⁵Moshe wa Israel byumyu" qeyang ngag: ha: pye' va" byu dayaug ngad: ra". Nao wa ngonhaung" dao mae agyi kad' nae" we' dao: kho' nae" tarha" zug: khag' yang kad' nhao: to" ra" i? ga: yao: bam yao: re myid' ako". Moshe wa myi: nga" na: ra" thao" paung" mae yao: re na: qhu" byid' ra" mug: lagyo" yang bao" thaug' byid' ru we' Israel byu qere eib nae" we' yao: bam re loe; beim nhao nae" qhid' mae" Mao"So: yang nhao: ke' ra" yaug ngad: ra".

³⁶Yao: wa Egutu mung" mae re: tham: ne mae re:- din"pyad' yo mae re:- zin lam: byid xe mug' pho: ve, lho we' mug' pho: mau" jham kad' qhu" yang: Israel byumyu" qere Egutu mung" mae" jhui" thug' lo" ra".

³⁷Moshe wa- Mao"So wa ngo re nhao: ke' ru we' dakhyo: lapa dayaug re naonhaung" jhao" nhao: ke' byid' li" nae". Yao: wa naonhaung" yao" byumyu" mae" ngad: li" nae"- ga: Israel byumyu" qere ta" ra" yaug ngad: ra".

³⁸Yao: wa din"pyad' yo mae Israel byumyu" qe we' daga" ham: na yang: ai: mae ngonhaung" phug' pho" qe we' re: Sina bam dao mae yao: we' dao: jhau: ra" mug: lagyo: we' daga" na: lo yaug ngad mung: ngonhaung" re au: qid lhai: byid: nae" kao so' daui: ra" Mao"So: mung dao: re qo" khae: yu: ra" yaug re: ngad: ra".

³⁹Ngadqere: ngonhaung" phug' pho" qe wa yao" mho dao: re ngag: pye' ako". Yao: bam wa Moshe re ngag: pye' mung: Egutu mung" khyo tug' lo" nug: ra" myid bo: ako".

⁴⁰Aimung: yao: bam wa Arun re- Ngonhaung" re au: jhui" she nae" ra" so jham re ngonhaung" qhid' mae" kad' byid: la,- ngonhaung" re Egutu mung" mae" jhui" thug' lo: ra" Moshe ga" ra" yaug pe" boe" byaug: rure ngonhaung" maba lo:- ga: ta" ako".

⁴¹Amung: yao: bam wa- nung: jaung lo: lho dalam: sheim: mung:- Ai: sulho re zho: byid: yang: poe kad' caung:khin" byid' ako".

⁴²Aimung: lapa qe: tung" paug' mae Israel byumyu" qe we"- Din" pyad' yo mae zin lam: byid xe geim" naonhaung" ngaui" xeim: gug'nyhug' jham se' yang: xeim: ngaui" byid: ko" ru wa ngo re byid' ru mangad: ko" ngad: ra".

⁴³Naonhaung" yao: goe; pa" nae" kad' to" ra" solho jham ngad: ra"- Moleg so phan we' naonhaung" nho: Rephan ga" ra" kyi solho re naonhaung" dao: qin" ako". Amung: ngo wa naonhaung" re Babelon lai sho' taung" jhui" lo" nhao: ke' nae"- ga: tung" to" ru we' dakhyo: Mao"So yao: bam mae" myo,khung: phaug' lo" mung: mug:gaung mae" kyi jham re goe; pa" genae" qhid' mae" yao: bam re shapye' pye' va"- ga: ta" to" ra".

⁴⁴Ngonhaung" phug' pho" qe wa din"pyad' yo mae yao: bam we' daga" Mao"So bobo: rure sagse: qhu" byid' ra" Zaung re qo" yu: ako". Moshe re Mao"So ta" ra" akhyao we' dakhyo:- ai: zaung re kad' ako".

⁴⁵Thao re yao: bam: yao: pho" qemae" ai: zaung re xo' khae: yu: ra" ngonhaung" phug' pho" qe wa- Mao"So: yang khe' pye' ra" byumyu" qe: mung"dan: khyo Yoshu we' daga" vao ye" lo" ko" ra" au: re ai: zaung re dao: ye" lo" ako". Ai: zaung wa Davi pyad joe" sho' ai: mung"dan: mae jo; jo; ra".

⁴⁶Davi kho:kham wa Mao"So: qhid' kheim: mae myo,nho qo" mung: Yaku nho: Mao"So na: jo, nae" jo, qo kad' nae" qhid' mae" Mao"So re akhang" lhaung" mho' ra".

⁴⁷Mao"So: qhid' mae" yham kad' yaug wa Sholamon kho:kham angad: ra".

⁴⁸Ngadqere: myhao: thao" ra" Mao"So wa byu: lo; yang kad' ra" yham khug mae mana ngad: ra". Ai: khyo re lapa pho" wa Mug:gaung wa nga" zaung tao"-

⁴⁹ngad mung:- myid gaung wa nga" khyid zab tao" ngad: ra". Nao nga" qhid' mae" pe" ru" ra" yham qo" kad' byid: nae" i? Nga" qhid' mae" na jo, qo khotau mae ngad: ra" i?

⁵⁰Ai: gu: alhab' re ngoyao: phan" to" mangad: i?- ga: Asang ta" ra"- ga: ta" to" ru we' dakhyo: ngad: ra".

⁵¹Stephan wa xo' yang:- Naonhaung" nhag' lam: gyai qao: ako". Naonhaung" nhag' lam: aung khug mae Mao"So mabo ko" ngad: ra". Mao"So: mung dao: re mathe' gyo" ra" nojid mo, ngad: ako". Naonhaung" wa naonhaung" phug' pho" qe we' dakhyo: Gyang" Lho" Byo re khonhae" re: ngag: pye' mo, ngad: ako".

⁵²Naonhaung" phug' pho" qeyang mayhin" qu" ra" lapa khoyaug na: ra" i? Yao: bam wa Mao"So: din:man" ra" daui daui yaug joe" lo nae" ga" rure ta" hau" kyo" ra" Mao"So: lagyo: qere se' pye' ako". Ana" naonhaung" wa ai: yaug re ab byid' pye' mung: se' pye' avako".

⁵³Naonhaung" wa mug: lagyo: qe:nhad' thoe khyo" yang Mao"So: tarha" re qo" khae: yu: ra" mo, ngad: ako". Ngadqere: naonhaung" ai re maphug' cao" ko" ngad: ra"- ga: ta" ra".

⁵⁴Yuda Tarha" Qe, Do, Phung: mae" mo, wa ai: dao: re the' gyo: gelao" yao: bam nhag' lam: zab zab zhau: li" sho' gyo" yo: mung:- Stephan re zaui kyag' kyag' yang: zhaug' qu" na: bam: ako".

⁵⁵Ngadqere: Stephan wa Gyang" Lho" Byo byang" jo, mung:- mug:gaung khyo tau: qu" ke' re Mao"So: phungbao we' Yesu wa Mao"So: lo, yo shad' mae ye; jo; rure myao: ra".

⁵⁶Ailao" Stephan wa- Qu" ge, Mug:gaung bung" li" mung: Byu: Yao: Zo: wa Mao"So: lo, yo shad' mae ye; jo; rure ngo the' myao va"- ga: ta" ra".

⁵⁷Yao: bam wa zag: hug' mung: yao: bam yao" nokhye' re lo; yang jhid' pye' yang: alhab' mo, dalhang: dae Stephan jhao" tao" ye" lo" mung:-

⁵⁸Yao: re vogaung: taung gaung khyo deim" geim: thug' lo" mung: laug baui: yang yepye' ako". Sagse: qe wa yao: bam: adao: bau: qhang jham re Sholu ga: mang: ra" Zolau: pho" re zam: nhao: ako".

⁵⁹Yao: bam airu: Stephan re laug baui: yang pye' na ko" au:- Stephan wa Asang Yesu we"- Nga" byo re khae: yu byid: la, ga:- Asang re mho' yao: ra".

⁶⁰Yao: wa pad' thaug' thaug' yang: thoe qi: we' Asang we"- yao: bam: qobo re daxam" to: byid: wa, wo"- ga: hug' ra". Ce: dao: bin: ta" lao" Stephan kao gyo" lo" ra".