Read Maru LAGYO: 8 Bible Online

LAGYO: 8 - Maru bible

LAGYO: 8

¹Sholu wa Stephan re se' ru mae bomyid vang" ra". Ai: ba mae Yerusalem mae na: ra" lam khug: ra" phung: byu qe wa dayin dayo: yhin" ru qi: sho' qhug' ako". Lagyo: qemae" je yang: lam khug: ra" mo, alhab' wa Yuda mung" we' Samari mung" khaung: khyo gam: sho' phao: byo: sin" lo" ako".

²Lam khug: myid kao bau: ra" mo, daqhae: wa Stephan re yenyhab' shaung: pye' mung: yao" mathao mae gyai kaug' ngug: ako".

³Ngadqere: Sholu wa phung: re phyo' qheim" pye' nae" qhid' mae" qam: ke' ra". Yao: wa dayham bin dayham khyo cao" vao ye: mung:- lam khug: ra" mo, myiqe: yauggai alhab' re yeshe: khyad' thug' yu yang: yao: bam re thaung: mae lhaung" to" ra".

⁴Jo, qo khao: ngo" khyo byo: sin" lo" ra" lam khug: ra" mo, wa- joe" ra" jo, qo khao: ngo" mae mung dao: re cao" kho" kyo" ako".

⁵Philib wa Samari mung" mae" vomo" khyo ye: mung: ai: vobyu qere Meshia khyo we' sin: yang: yekho" kyo" ra".

⁶Mo, byu qe wa Philib ta" ra" dao: re tae" gyo: yang:- yao: kad' qhu" ra" mug' pho: ve, lho jham re myao gelao"- yao: bam wa nhag' lam: zaug zaug za: yao" mung dao: re tae" gyo" yu: ako".

⁷Makhyang" ra" yui jham wa mo, byu qe myo: sho' mae" gyi: hug' yang: phao: thug' lo" ko" ra". Amung: gaung jam: shid mo, myo: sho' we' khyid qeim mo, myo: sho' mo, gai shao: lo" byaug: ako".

⁸Ai mung: vomo" khug mae" byu qe gyai ngaui bau" ako".

⁹Ai: vogaung: mae Simon ga: mang: ra" byu dayaug wa yao" vha" ra" pha,jhi" yang Samari byu qere mug' nhao: ra".

¹⁰Simon yao: yao" gaung re gyai boe" yaug ngad: ga: phug: ta" to: yang: byu angai aqi: alhab' mo, yao" dao: re nhag' lam: zaug zaug za: tae" gyo" ako". Yao: wa qi" ra" qam: so' ga" ra" Mao"So: qam: so' qo" yaug ngad: ra" ga: yao: bam ta" ako".

¹¹Yao: wa yao" vha" ra" pha,jhi" yang yao: bam re mug' nhao: lo: ru myao" va" ru: yang yao: bam wa airu: yao: re nhag' lam: zaug zaug za: tae" gyo" ako".

¹²Ngadqere: Mao"So: mung"dan: Lau Dao: Gai we' Yesu Khristu khyo we' sin: yang: Philib kho" kyo" ra" mung dao: re yao: bam lam" gemung:- yao: bam wa myiqe: yauggai alhab' mo, Qid nyhab' kham yu: ako".

¹³Simon yao: re: lam" mung: Qid nyhab' kham bin: kham: yu thao re Simon wa Philib thao cao" mung:- Philib kad' ra" mug' pho: ve, lho jham re we' mug' pho: mau" jham re the' myao lao"- yao: wa gyai mug' hao" byaug: ra".

¹⁴Yerusalem mae na: ra" lagyo: qe wa Samari byu qe Mao"So: mung dao: re khae: yu vako" ra" ga" ra" thoe re the' gyo: gelao"- yao: bam wa Petru we' Yohan shid' zo: re yao: bam jhao" nhao: ke' ako".

¹⁵Yao: shid' zo: joe" ye: gelao:- lam khug: ra" mo, Gyang" Lho" Byo qo" khae: yu genae" qhid' mae" yao: shid' zo: wa yao: bam: qhid' mae" akyu" mho' byid' ako".

¹⁶Pe"mung:ga"re yao: bam dayaug: dao mae re: Gyang" Lho" Byo majoe" gyo" li" shi: ngad: ra". Yao: bam wa Asang Yesu mang mae qid nyhab' kham: yu: to" ru shi" za: angad ko" ra".

¹⁷Aimung: Petru we' Yohan shid' zo: wa yao: bam: dao mae yao: shid' zo" lo, kai: byid: mung:- yao: bam wa Gyang" Lho" Byo qo" khae: yu: ako".

¹⁸Lagyo: shid' zo" lo, yao: bam: dao mae kai: byid: lao"- lam khug: ra" mo, Gyang" Lho" Byo qo" khae: yu ko" rure Simon the' myao lao"- yao: wa Petru we' Yohan shid' zo: re ngaui byid: mung:-

¹⁹Nga" lo, kai: byid' ra" yaug khag' ngadqere: Gyang" Lho" Byo qo" khae: yu nae" qhid' mae" ai: qam: so' ngo rere: byid: gela, ga:- mho' ra".

²⁰Ngadqere: Petru wa yao: re- Nao wa Mao"So: jhaung qhu" re ngaui: yang qo" vai nae" ga: myid: jho: na: ruyang- nao we' ni" ngaui wa myiqid tham: khyo vao ye: geshao: ga: phaug' tau" ra".

²¹Ni" nhag' lam: wa Mao"So: qhid' kheim: mae madin" ruyang ngonhaung" mau" zo" mae maqo" bo ngad: ra".

²²Aimung:- ce: makhyang" ra" lo, mau" mae" myid tha" wa,- airu: myid: jho: shad' ra" qobo re khyad' pye' byid: nae" qhid' mae" Asang re akyu" mho' wa,-

²³pe"mung:ga"re nao wa myid nug: myid khyad' ru xo sho' we' qobo: yang taui" jab: to" ra" byu dayaug ngad: rure ngo qu" myao: ra"- ga: ta" ra".

²⁴Simon wa Petru we' Yohan shid' zo: re- Ni" shid' zo: ta" ra" gu: pe" daja: re: nga" au: dao mae majoe" li" vashao:- nga" qhid' mae" Mao"So re akyu" bao" mho' byid: gela,- ga: ta" ra".

²⁵Yao: shid' zo: wa Yesu khyo we' sin: yang: sagse: kham: kyo: mung: Asang: mung dao: re bin: kho" kyo: lao"- Petru we' Yohan wa Yerusalem khyo dam: phao: lo" ako". Yao: shid' zo: wa phao khyo mae jo; ra" Samari vogaung: jham myo: sho' mae Lau Dao: Gai cao" kho" kyo" lo: ako".

²⁶Asang: Mug: Lagyo: dayaug wa Philib re- To" wa,- Yerusalem mae" Gaza khyo joe" ra" khyo khyo" qid bang: shad' khyo ye" lo" wa,- ga: ta" ra". (Ce: khyodang wa din"pyad' yo khyodang ngad: ra".)

²⁷Ai mung: Philib wa to" ye" lo" ra". Ana" Ethiopia mung"dan: re eib: na: ra" kho:kham myhi" Kandake nho: jo, nho" alhab' re zam" ra" au: jhaung: zug: pho"- unug re: ngad: ra" Ethiopia zug: pho" dayaug wa yao" yham khyo phao: lo" na: ra". Yao: wa Yerusalem khyo ye: mung: Mao"So re ye:caung:pa" bin yang: yao" myao: lhin" dao mae zaung: jo, mung: lapa Esaia jham: paug' re nghe' na: ra".

²⁹Gyang" Lho" Byo wa Philib re ai: myao: lhin" khyo te' te' ye" lo" wa, ga: ta" ra".

³⁰Philib tao" ye" lo" re ai: zug: pho" wa lapa Esaia jham: paug' mae" jham: dau re nghe' na: rure yao: yethe' gyo: mung:- Philib wa ai: zug: pho" re- Nao nghe' na: ra" jham: dao: re nao ba: gyo" i?- ga: myid' ra".

³¹Ai: zug: pho" wa Lajheim: pheim: kyo: yaug mana re- ngo khoru: qo" ba: gyo: nae" i?- ga: tau: mung:- myao: lhin" khug khyo do, li" mung: yao: we' daga" li" zaung nae" qhid' mae" Philib re lhaung: ra".

³²Yao: nghe' na: ra" jham dau wa- Se' pye' nae" yao re we' dakhyo:- Yao: re jhui" she: ye" lo" ako". Yao mug' qaug: ra" au: sae za: tae" to" ra" yao nau" we' dakhyo:- yao: wa dao: dakheim: re: majhau ngad: ra".

³³Yao: wa nyham: khyo" pye' ru qhug' mung:- madin: man" ra" khyo" dao: kho' ru qhug' ra". Yao" kao so' re myid gaung dao mae" yu: pye' byid: yang: yao" myid:zo: byuxag' re khag' re: maqo" she' ngad: ra"- ga" ru ngad: ra".

³⁴Ailao" ai: zug: pho" wa Philib re- Lapa pho" wa khoyaug: khyo re ta" ru ngad: ra" i?- Yao: yao" khyo re i?- Mangad: lao" gatau dayaug: khyo re ta" ru ngad: ra" i?- ngo re ta" kyo: la, ga: ta" ra".

³⁵Ai: thao Philib wa- ai: jham: dau mae" qhid mung: Yesu khyo we' sin: yang: Ngaui Bau" Lau Dao: Gai yao: re kho" kyo: byid' ra".

³⁶Yao: shid' zo: airu: su" gyo" lo ko" au: qid jo; ra" jo, qo khyo joe" lo: ako". Ailao" ai: zug: pho" wa- Qu" wa, cetau mae qid jo; ra"- Ngo qid nyhab' kham: yu nae" ru mae kham" to: nae" pe" ja: jo; ra" i?- ga: myid' ra".

³⁷(Philib wa yao: re nao wa Yesu Khristu re ni" nhag' lam: aung khug alhab' we' lam va" ngad: re wa nao Qid nyhab' kham gai: kham: yu: ra" ga: ta" ra". Ailao" ai: zug: pho" wa- Yesu Hkristu wa Mao"So: Yao: Zo: ngad: rure ngo lam" ra"- ga: tau" ra".)

³⁸Ailao" ai: zug: pho" wa myao: lhin" re thang nae" amyin" byid: mung:- yao: shid' zo" geim" qid khyo gyo" ye: mung:- Philib wa ai: zug: pho" re qid nyhab' kham: byid' ra".

³⁹Yao: shid' zo: qid mae" do, lo lao"- Asang: Byo wa Philib re jhui" lo" byaug: ra". Ai: zug: pho" wa Philib re madam: myao lo:ngad: ra". Yao: wa ngaui bau" ru we' yao" gyaung: khyo mae dam: xo' phao: lo" ra".

⁴⁰Philib wa Azotu vogaung: mae lo" joe" rure myao: ra". Amung: yao: wa Kesarea khyo ye" lo" ra" gyaung: khyo cao" yang: vogaung: khao: ngo" mae Ngaui Bau" Lau Dao: Gai re cao" kho" kyo: byid' ra".[1]