Read Maru ROMA 10 Bible Online

ROMA 10 - Maru bible

ROMA 10

¹Nga" Mao:nhaung: qe we"- ngoyao" byumyu" qe khyad' yu: ru qhug' genae" qhid' mae" nga" aung khug nhag'lam: alhab' we' gyai o ngaui kao bau: na mung:- yao: bam: qhid' mae" Mao"So re gyai akyu" bao" mho' ra".

²Yao: bam wa Mao"So re gyai phug' myao: kao bau mo, ngad: rure ngo naonhaung" re zhaug' za: sagse: qo" kham byid' ra". Ngadqere: yao: bam: phug' myao: kao bau: ru wa jo: ra" laba lajhao dao mae apan mato: ko" ngad: ra".

³Yao: bam wa jo: ra"- ga: Mao"So sun" yu byid' ra" khyo re maba ko" ngad: ra". Ai: atha"- yao: bam yao: kad' yu: ra" khyo re qam: ke' cao" ako". Airumung: yao: bam wa jo: ra"- ga: Mao"So sun" yu byid' ra" khyo re yao: bam makhae: yu ko" ngad: ra".

⁴Pe"mung:ga"re- lam" ra" mo, yaug khao: ngo" wa jo: ra"- ga:- Mao"So: yang sun" yu: ru qhug' yu genae" qhid' mae" Khristu wa ai: kham" to" ra" tarha" re thao" lo" nhao: ava".

⁵Moshe wa kham" to" ra" Tarha" re phug' cao" ra" khyo" yang Mao"So: yang jo: ra"- ga: sun" yu: ru qhug' ra" khyo we' sin: mung:- ai: kham" to" ra" amyin" dao: re phug' cao" ra" yaug wa kao so' daui: na: li" nae"- ga: tung" to" ra".

⁶Ngadqere: lam khug: ra" khyo" yang jo: ra"- ga: Mao"So: yang sun" yu byid' ra" khyo we' sin: mung: Jham: Mugsug' mae- mug:gaung khyo khag' do, lo" nae" i?

⁷Movo: mug: khyo khag' gyo" lo" nae" i? ein: naonhaung" yao" aung khug mae damyid ge,- ga: ta" to" ra". Amung: <lajheim: wa- Khristu re ngonhaung" jhao" khyo" yu nae" mug:gaung khyo khag' qo" do, lo" nae" i? Amung: Khristu re shid: rumae" tau: to' yu nae" movo: mug: khyo khag' qo" gyo" lo" nae" i? ga" ru ngad: ra".>

⁸Jham: dao: ta" nug: ru wa- Mao"So: mungdao: wa nao we' te' te' mae ngad: ra"- ni" nhad' qid mae we' ni" nhag' lam: khug mae ngad: ra"- aimung dao: wa ngonhaung" kho" kyo" ra" lam khug: ra" mungdao: ngad: ra".

⁹Khristu wa Asang ngad: ra"- ga: nao lhang: yu mung: Mao"So wa yao: re shid: rumae" daui: to" li" nhao: ra"- ga" rure nao lam" ngad: re wa nao wa khyad' yu: ru qhug' li" nae".

¹⁰Pe"mung:ga"re ngonhaung" wa ngonhaung" lam khug: myid khyo" yang jo: ra"- ga: Mao"So: yang sun" yu byid' ru qhug' mung:- ngonhaung" nhad' dao: thoe: yang lhang: yu: ru khyo" yang khyad' yu: ru qhug' yu: ra".

¹¹Jham: Mugsug' mae- yao: re lam" ra" yaug wa qam: gyug: qam: shan qhug' nae" mangad:- ga: ta" to" ra".

¹²Ceru wa yaug khao: ngo" re ta" ru ngad: ra"- pe"mung:ga"re Yuda byu qe we' Taung bug byu qe: gyo: mae pe" jho" shai" ru majo, ngad: ra". Mao"So wa alhab' mo; dao mae" dakhyo: za: Asang ngad mung: yao: re mho' yao: ra" mo, alhab' re magan: mathao" ra" shaman" jeju byid' ra".

¹³Jham: Mugsug' mae- Asang re bao" thaug' mho' yao: ra" mo, yaug khao: ngo" wa khyad' yu: ru qhug' li" genae"- ga: ta" to" ra".

¹⁴Ngadqere: yao: bam malam" ko" ngad: re wa- yao: bam wa Asang re khoru: qo" mho' yao genae" i? Amung: yao: bam ai: mungdao: re mathe' gyo: gere wa- yao: bam khoru: lam" genae" i? Ailao"- ai: mungdao: re makho" kyo: re- yao: bam khoru: qo" the' gyo: genae" i?

¹⁵Mungdao: kho" kyo: nae" mo, re manhao: ke' re wa- ai: mung: dao: re khoru: qo" kho" kyo: nae" i? Jham: Mugsug' mae- lau dao: gai vin: ra" lagyo: qe joe" li" ru wa khoqhi" sho' gai: ra" i? ga: ta" to" ra".

¹⁶Ngadqere: ai: Lau Dao: Gai re alhab' mo, makhae: yu ko" ngad: ra". Esaia yao: yao: re:- Asang we"- ngonhaung" mungdao: re khag' lam" ko" ra" i? ga: ta" ra".

¹⁷Airumung: lam khug: ru wa mungdao: re the' gyo" yu: ra" khyo" yang ngad mung:- aimung dao: wa Khristu ra" khyo re kho" kyo" ra" khyo" yang the' gyo" yu: ra".

¹⁸Ngadqere: yao: bam ai: mungdao: re mathe' gyo: ga" ru wa dang: i? ein: ngo myid: nug: ra". Yao: bam wa gaigai: yao: the' gyo" yu: avako"- pe"mung:ga"re Jham: Mugsug' mae- Ai: dao: re kho" kyo: ko" ra" mo; thoe wa mug: myid geim" mae byang" sheim: jo; ava". Yao: bam: nhad' dao: thoe wa myid gaung thao" sho' khyo joe" ava"- ga: ta" to" ru we' dakhyo: ngad: ra".

¹⁹Amung:- Israel byu qe maba: gyo: genhaung i? Ein: ngo dam: myid: nae"- Mao"So wa Moshe yao: khyo" yang- Ngo wa pe" mangad' ra" byumyu" re ci mung: nga" byumyu" re myid nug: nhao nae"- Atug' akhyug mung: ra" byumyu" khyo" yang Nga" byumyu" re nhag' yo: nhao nae"- ga: sao qhid' phaug' tau" ra".

²⁰Alao"- Esaia wa je: mazag mavae lo:- Ngo re maqho ko" ra" mo, wa ngore myao: ako"- Nga" khyo re mamyid: maqin" ra" mo, re nga" gaung qhu" byid: va"- ga: ta" ra".

²¹Ngadqere: Israel byumyu" we' sin: mung:- ngo wa mho dao: magyo" ru we' gye kad' ra" byumyu" re pang" yu nae" qhid' mae" nga" lo, daba gyam geim" yheim" to" ra"- ga: yao: ta" ra".