Read Maru ROMA 11 Bible Online

ROMA 11 - Maru bible

ROMA 11

¹Airumung:- ngo myid: nae"- Mao"So wa yao" byumyu" qere shapye' pye' va" ra" i? Gai gai: yao: mashapye' ngad: ra". Ngoyao" gaung yao: re: Israel byu dayaug ngad mung: Abraham: nho: myid:zo:- Benyamin: kaung mae bobo: ra" yaug ngad: ra".

²Mao"So wa aqhid mae" yao: khyin: yu: ra" byumyu" re mashapye' pye' ngad: ra"- Elia wa Israel byumyu" qere qobo vhin mung:

³Asang we"- yao: bam wa ni" lapa qere se' pye' avako". Ni" nho: phan jham rere: phyo' sin" pye' avako"- ngo dayaug za: adang lo"- yao: bam wa ngo rere: se' pye' nae" seim" na: ako"- ga: Mao"So re mho' yao: ra" jham: dau re naonhaung" ba: ako".

⁴Mao"So wa yao: re pe" ru: phaug' tau: byid' ra" i? So apyag' Ba la re macaung:pa" ko" ra" yauggai nhad' taung gu: re wa ngoyao" qhid' mae" tang" to: va"- ga: Mao"So phaug' tau: byid' ra".

⁵Ana" re:- ai we' dakhyo: ngad: ra"- yao" nhag' myan" ra" jeju khyo" yang yao: khyin: yu: ra" byu dajhid' zo: dang: jo; ashi"-

⁶Mao"So yao: bam re khyin: yu: ru wa- yao: bam: lo, mau" re aqao: to: mung: khyin: yu: ru mangad:- yao" nhag' myan" ra" jeju re aqao: to: mung: khyin: yu: ru ngad: ra". Pe"mung:ga"re Mao"So: khyin: yu: ru wa- byu: lo, mau" re aqao: to: mung: yang: ngad: re wa- yao" nhag' myan" ra" jeju wa agyang" mangad: ngad: ra".

⁷Airulao" wa khoru: i? Israel byumyu" qe wa yao: bam qho: ra" ja: re mamyao ko" ngad: ra".- Mao"So: yang khyin: yu: ra" mo, dajhid' za: aire the' myao: yu: ako". Dang: ra" mo, wa Mao"So khai: ra" thoe re mathe' gyo:- no: jid: jo; ako".

⁸Jham: Mugsug' mae- Mao"So wa yao: bam: myid we' nhag' lam: re vhao: lo" nhao: ra". Ana" ba joe" sho' yao: bam maqo" myao- maqo" gyo: ko" ngad: ra".

⁹Davi re:- Yao: bam: zo: shaug' poe jham wa yao: bam myi" ra" taui: we' lha" boe" vageshao:- Yao: bam lang" lo" mung: qobo dae kham zo: vageshao:-

¹⁰Yao: bam mamyao genae" qhid' mae" yao: bam: myo, jid: byaug vageshao:- Yao: bam wa yao: bam: qug' khai: qola: vin yang: khonhae" re: jang: nghaug' jo, vageshao:- ga: ta" ra".

¹¹Airumung: ngo myid: nae"- Yuda byu qe wa tha" lang: gelao" yao: bam byo; qeim: lo" vako" ra" i? Airu: dajhid' re: mangad:- Taung bug byu qere yao: bam myid nug: genae" qhid' mae" yao: bam qobo shad' lhoe" ko" ruyang khyad' yu: ru wa Taung bug byu qejhao" joe" li" va" ra".

¹²Yuda byu qe: qobo wa mug: myid byu qere magan: mago" ra" shaman" jeju kham zo: nhao: ra". Amung: yao: bam: Byo we' sin: yang: myaung sho" ru wa Taung bug byu qere magan: mago" ra" shaman" jeju kham zo: nhao: ra". Airumung: Yuda byu qe jab sho' bobo gelao" shaman" jeju wa khoqhi" sho' qi" ru ngad nae" i?

¹³Ngo wa ana" Taung bug byu qe naonhaung" re dao: jhau: na:- ngo wa Taung bug byu qejhao" nhao: ke' qhug' ra" lagyo: ngad: na: gu: mae nga" mau" zo" mae ngo nga: yu nae".

¹⁴Ngo wa ngo yao" byumyu" qere qu" myid nug: nhao yang: yao: bam mae" daqhae: khyad' yu: ru qhug' yu: re qhug' yu: li" genae".

¹⁵Pe"mung:ga"re yao: bam shapye' ru qhug' gelao"- xao su byu qere Mao"So: gyevo qe ngad: rumae" yao" ba nam qe boe" lo nhao: ra". Airumung: Yuda byu qere Mao"So dam: khae: yu lao"- khoru: ngad nae" i? Aiwa shid: ra" mo; qhid' mae" kao so' ngad: li" nae".

¹⁶Sao qhid' mae" mug je, re Mao"So re qhaug' byid: va" ngad: re wa mug akhai" geim" re: yao" ngad: ava"- amung: sag' gae agyi: re Mao"So re qhaug' byid: va" ngad: re wa- sag' kaung jham alhab' re: yao" ngad: ava"-

¹⁷Zhanlun gae agai mae" akaung jham damyo" re cu: pye' mung: zhanlun gae alae" mae" akaung re aimae xo' to" ra". Taung bug byu qe naonhaung" wa ai: zhanlun gae alae" we' dau: ako"- amung: ana" Yuda byu qenho: Byo we' sin" ra" qam: bo: ra" kao so' daui khyo re qo" bomyao: kham: yu: ako".

¹⁸Airumung: cu: khyo" pye' ra" akaung jham we' dau ko" ra" Yuda byu qere daqu" ngai ge,- naonhaung" khoru: qo" gai: phug genae" i? Naonhaung" wa akaung qeza: angad: ako"- naonhaung" wa agyi: re bao" thaug' byid: mo, mangad:- Agyi: jham wa naonhaung" re bao" thaug' byid' ako".

¹⁹Ngadqere: naonhaung" wa- ngonhaung" re xo' nae" qhid' mae" ai: akaung jham re cu: pye' ru mangad: i? ga: ta" li" genae".

²⁰Ai: ru wa dang: ra". Yao: bam malam" ko" ruyang yao: bam wa cu: pye' ru qhug' ako". Naonhaung" wa lam" gemung: yang: qo" de; jo; ako"- ngadqere: aire nhag' lam: damyid: qi: ge,- ai: atha" gyaug lha" yang: na ge,-

²¹Mao"So wa azhao: mae" yaug gau akaung gyang" ngad ko" ra" Yuda byu qere lhao" re: matang" to: ngad: ra". Mao"So wa nao re tang" to" li" nae" ein: jho: i?

²²Cemae Mao"So wa khoqhi" nhag' khyag' yaug ngad: rure we' khoqhi" thin: ra" yaug ngad: rure ngonhaung" qu" ba: yu: ra". Mao"So wa qobo shad' lhoe" ra" mo; dao mae gyai thin ngadqere: naonhaung" wa yao" nhag' khyag' ru khug mae kao so' xo' daui: na ko" re wa yao: wa naonhaung" re nhag' khyag' li" nae". Ngadqere: naonhaung" airu: kao so' madaui ko" re wa naonhaung" re: cu: pye' ru qhug' li" genae".

²³Amung: Yuda byu qe yao: bam: malam khug: ra" myid re to" pye' ko" re wa azhao: mae" yao: bam: angad mae dam: te' byid' ru qhug' li" genae". Pe"mung:ga"re Mao"So wa ai: mau" zo" re qo" kad' ra".

²⁴Zhanlun lae" qe ngad ko" ra" naonhaung" Taung bug byu qere azhao: mae" naonhaung" yao" zhanlun lae" akaung mae" cu: yu mung: azhao: mae" yao: yao: boe" jo; ra" tarha" re lhoe" yang: azhao naonhaung" yao" akaung mangad' ra" zhanlun gyang" akaung mae xo' to" ru we' dau: ra". Yuda byu qe wa ai: zhanlun agyang" gae we' dau: ako". Amung: yao: bam: agae yao: mae" cu: pye' ra" akaung jham re yao: yao" agae mae dam: xo' te' ke' byid: nae" ru wa Mao"So: qhid' mae" je" laui: ra".

²⁵Nga" mao:nhaung: qe we"- No; thao" ra" dangman" ra" khyo dalam: re ngo naonhaung" re ba nhao nug: ra". Pe"mung:ga"re ai: dangman" ra" khyo wa naonhaung" re pha,jhi" ba beim" ra" myid mabo losho' gug: gam byid' li" nae". Ai:ruwa Israel byu qenho: nhag' lam: qao: ru wa apyad ato ngad nae" mangad:- Taung bug byu qemae" Mao"So jhao" lo: ru jab yo, joe" sho' za: yao: bam: nhag' lam: qao: jo; li" genae".

²⁶Alao"- Israel byu qe alhab' mo, wa khyad' yu: rure ceru: qhug' li" genae". Jham: Mugsug' mae- Khyad' yu: Asang wa Ziun mae" thug' li" mung:- Yaku myid:zo: qera" makhyang" ra" khyo alhab' re yu: pye' li" nae".

²⁷Ngo wa yao: bam: qobo jham re yu: pye' byid: lao"- Yao: bam we' ce: dao: thang" re ngo to: nae"- ga: ta" ru we' dakhyo: ngad: ra".

²⁸Pe"mung:ga"re naonhaung" Taung bug byu qe: mathao mae Yuda byu qe wa Lau Dao: Gai re ha: pye' gemung:- yao: bam wa Mao"So: gyevo qe boe" pye' ako". Ngadqere: Mao"So: yang khyin: yu: ra" mo, ngad mung: yao: bam: phug' pho" qe: mathao mae yao: bam wa Mao"So: ba nam qe ngad: ako".

²⁹Pe"mung:ga"re Mao"So wa yao: khyin: yu mung: shaman" byid' ra" yaug we' sin: yang: yao" myid re malhai: ngad: ra".

³⁰Taung bug byu qe ngad: ra" naonhaung" wa lai: lo" ra" yo, re Mao"So: mho dao: re: magyo: mo, ngad: ako". Ngadqere: ana" wa Yuda byu qe mho dao: magyo: ko" ruyang Mao"So: nhag' khyag' shogu: rure naonhaung" qo" khae: yu: avako".

³¹Airu: Mao"So: nhag' khyag' shogu: rure naonhaung" qo" khae: yu vako" ru we' dakhyo: Yuda byu qere: Mao"So: nhag' khyag' shagu: rure qo" khae: yu genae" qhid' mae" Yuda byu qe wa ana" Mao"So: mho dao: re matae" gyo: ko"ru ngad: ako".

³²Pe"mung:ga"re Mao"So wa byu alhab' mo; re nhag' khyag' shogu: ru qo" qhu" byid: nae" qhid' mae" byu alhab' mo, re mho dao: magyo" ra" kyam: byu qe boe" nhao: pye' ra".

³³Mao"So wa khoqhi" sho' jo,nho" qo" yaug ngad: i? Yao" pha,jhi" we' laba lajhao wa khoqhi" sho' no; i? Mao"So: myid: phyid' to"rure khag' qo" sho' kyo" i? Yao" khyo re khag' qo" ba: i?

³⁴Jham: Mugsug' mae- Asang: myid re khag' ba: i? Yao: re khag' pha,jhi" qo" byid' i?

³⁵Yao" yang dam: xe' qo sho' Yao: re khag' pe" byid' qu" ko" i?

³⁶Pe"mung:ga"re cao jab alhab' wa yao" yang phan" to: mung:- cao jab alhab' wa yao: khyo" yang we' yao" qhid' mae" boe" jo; ru ngad: ra". Mao"So wa apyad ato mae phungbao qi" qhang: jo, vashao: wo"- Amen.