Read Maru ROMA 13 Bible Online

ROMA 13 - Maru bible

ROMA 13

¹Byu yaug khao: ngo" wa mung"dan: eib khang" nae" kheim: so' qo" ra" mo; mho dao: re tae" gyo: ca" ra". Pe"mung:ga"re Mao"So: akhang" maqo" lo: eib nae" kheim: so' majo, ngad: ra"- Eib khang" nae" kheim: so' qo" ra" mo, wa Mao"So: yang san: to" ra" mo, ngad: ako".

²Khag' ngadqere: eib khang" nae" kheim: so' qo" ra" yaug re ngag: thaug' ra" yaug wa- Mao"So: yang jaung: san: to" rure ngag: thaug' ra" yaug ngad: ra"- Airu: kad' ra" yaug wa dao: phyid' ru qhug' li" nae".

³Pe"mung:ga"re- gai: ra" mau" zaui: mo, wa zug: qere gyaug maca" ngad: ra"- Makhyang" ra" mau" zaui: mo, kam" wa zug: qere gyaug ca" ako". Nao wa kheim: so' qo" ra" yaug re gyaug maca" lo:- na nug: i? Gai: ra" mau" zo" re zaui: so: wa,- Alao"- yao: wa nao re caung:khin" li" nae"-

⁴Pe"mung:ga"re yao: wa nao re gai kad' byid: nae" qhid' mae" san: to" ra" Mao"So: daui daui yaug ngad: ra". Ngadqere: nao makhyang" ra" mau" zaui" ru ngad: re wa- yao: re gyaug wa,- pe"mung:ga"re yao: wa gaigai: yao: qobo dae byid: nae" qam: so' qo" ra" yaug ngad: ra". Yao: wa Mao"So: daui daui yaug ngad mung: makhyang" ra" mau" zaui: mo, re Mao"So: qobo dae byid' ra" yaug ngad: ra".

⁵Cerumung:- naonhaung" wa eib nae" kheim: so' qo" ra" mo; mho dao: re tae" gyo: ca" ra". Mao"So: yang qobo dae byid: nae" rure gyaug yang: za: mangad:- ni" nho: aung khug nhag' lam: mae myid ba: kin yang:- kheim: so' qo" ra" mo; mho dao: re tae" gyo: ca" ra".

⁶Ai: mathao mae naonhaung" wa khang: ke' ru ngad: ako". Pe"mung:ga"re kheim: so' qo" ra" mo, yao: bam: mau" zo" re kyab' sho' zaui" ru wa- Mao"So re mau" zaui: byid' na: ru ngad: ako".

⁷Airumung:- naonhaung" wa yao: bam re byid: ca" ra" gu: re byid: ge,- khang: ke' byid: ca" ra" gu: alhab' re ke' byid: ge,- kheim: so' qo" ra" mo, alhab' re phug' myao: mung:- nga: yhe' byid: ge,-

⁸Naonhaung" yao: cao: jho" jhid'de; nae" jhin mae" je yang: khag' we' re: pe" jhin dade, ge,- Su re jhid'de; ra" yaug wa kham" to" ra" Tarha" re phug' cao" ra" yaug ngad: ra".

⁹Pe"mung:ga"re- ai: kham" to" ra" Tarha" mae su: myi:- su: lao dashad'- byu dase' wa,- dakhug' wa, su gaje qe: zai re myo, nyad o: dabyid wa,- ga" ra" tarha" jham we' gatau jo; ra" tarha" jham alhab' ni" yham kyo: cao: re naoyao" gaung re jhid'de; ru we' dakhyo: jhid'de; wa,- ga" rumae bovao: ava".

¹⁰Dayaug yaug re nao jhid'de; ngad: re wa- nao wa yao: re khonhae" re: magai: ru makad' ngad: ra"- Airu: mung: jhid'de; ru wa kham" to" ra" Tarha" alhab' geim" re phug' cao" ru ngad: ra".

¹¹Naonhaung" wa yab: myid' jo; rumae" yab so: to" li" ca" va" ra" yo, khyin: joe" va" rure ba geyang: ceru re naonhaung" phug' cao" ca" ko" ra". Pe"mung:ga"re naonhaung" khyad' yu: ru qhug' nae" ra" ba na wa- ngonhaung" sao qhid' Yesu re lam" qhid; ra" ba na tho' ana" je: jhao" li" na: ra".

¹²Myi" wa lai: lo" kaung: mung:- na" gaung wa joe" li" na: ava". Airumung: ngonhaung" wa mug: cad' we' sin" ra" mau" zo" jham re to" pye' yang: mug: bo" mae gyekhe' nae" shae lhae jham re yu: ci gelang:-

¹³Ngonhaung" wa- na" gaung mug: bo" yo mae su" ra" mo, we' dakhyo:- dau shab: ra" khyo" zaui: so: ca" ra". Zo: pyo: shaug' pyo: kad' ru- yhid yid: ru- gintho' zaung: ru- akyang qeim: ru- myan" myo: jho" byo; ru- myid nug: obyid: ru jham re jao" pye' ca" ra".

¹⁴Asang Yesu Khristu nho: shae lhae jham re yu: ci ge,- gaung sho: myid: o: ra" mau" zo" jham re we' airu re nhag' shid nhag' dag nhao: ra" mau" zo" jham re to" pye' ge,.