Read Maru ROMA 14 Bible Online

ROMA 14 - Maru bible

ROMA 14

¹Lam khug: ra" myid mae qam: nang" ra" yaug re pang" yu ge,- ngadqere: yao" myid: ra" khyo jham we' sin: yang: yao: we' dajho" ngag ge,-

²dayaug yaug: nho: lam khug: myid wa- zo:ve alhab' re gai: zo" ra" khyo" lam" ra". Ngadqere: lam khug: ra" myid mae qam: nang" ra" yaug wa- ao: pho' myiqui: za: zo" ra".

³Zo: ve alhab' zo" ra" yaug wa mazo" ra" yaug re daqu" jung" wa,- amung: ao: pho' myiqui: za: zo" ra" yaug re:- zo:ve alhab' re zo" ra" yaug re dao: magai: phyid' ngad: ra". Pe"mung:ga"re Mao"So wa yao: re khae: yu: ava".

⁴Nao wa khag' ngad mung: su gaje qera" daui daui yaug re dao: phyid' ra" i? Yao: myo, nho qo" nae" maqo" nae" ga" ru wa yao" Asang yao: dao: kho' li" nae". Yao: myo, nho qo" li" nae"- pe"mung:ga"re Asang wa yao: re myo, nho qo" nhao: ra".

⁵Byu dayaug yaug wa ba na daba ba re- ba na gatau myo: sho' mae tho' je: akhyag:- ga: myid: jho: ra"- amung: gatau dayaug yaug wa- ba na alhab' wa dakhyo: za: ngad:- ga: myid: jho: ra". Yaug khao: ngo" wa yao: yao" myid re tang za: myid: phyid' ci qo: ra".

⁶Ba na re jo" kho' qu" ra" yaug wa Asang re nga: yhe' byid: nae" qhid' mae" qu" ru ngad: ra". Amung: zo:ve alhab' re zo" ra" yaug re: Asang re nga: yhe' nae" qhid' mae" zo" ru ngad: ra"- pe"mung:ga"re yao: wa ai: zo:ve qhid' mae" Mao"So re jeju caung:khin" ra". Zo: ve daqhae: re jao" ra" yaug re: Asang re nga: yhe' nae" qhid' mae" airu: mazo" ru ngad: ra". Amung: yao: wa Mao"So re jeju caung:khin" byid' ra".

⁷Ngonhaung" khag' dayaug re:- yao: yao" gaung qhid' mae" za: kao so' daui: na: ru mangad:- amung: ngonhaung" khag' dayaug re: yao: yao" gaung qhid' mae" za: shid: ru mangad:-

⁸Ngonhaung" daui: na: re wa- Asang: qhid' mae" ngonhaung" daui: na: ru ngad: ra". Alao"- ngonhaung" shid: re wa- Asang: qhid' mae" ngonhaung" shid: ru ngad: ra". Airumung: ngonhaung" wa daui: na ngadqere:- shid ngadqere: ai: Asang we' sin" ra" mo, ngad: ra".

⁹Pe"mung:ga"re Khristu wa shid mo, we' daui: na: ra" mo; Asang boe" nae" qhid' mae" shid mung: dam: daui: to" li" va" ra".

¹⁰Airumung:- ao: pho' myiqui: za: zo: ko" ra" mo, naonhaung" wa naonhaung" mao:nhaung: pho" re pe"mung: dao: kho' ko" i? Amung: zo:ve alhab' re zo: ko" ra" mo, naonhaung" re: naonhaung" mao:nhaung: pho" re pe"mung: qu" jung" ko" i? Ngonhaung" alhab' mo, wa dao: kho' ru qhug' nae" qhid' mae" Mao"So: qhid' kheim: mae ye; jo; li" nae".

¹¹Pe"mung:ga"re Jham: Mugsug' mae- Asang wa- ngo dang za: daui: na: ra" Mao"So ngad: ru we' dakhyo:- Yaug khao: ngo" wa nga" qhid' kheim: mae pad' thaug' thaug' mung:- Yaug khao: ngo" wa ngo Mao"So ngad:- ga" rure- lhang: yu: li" genae"- ga: ta" to" ra".

¹²Airumung:- ngonhaung" mae" yaug khao: ngo" wa Mao"So re yao: yao" mau" zo" japhin: ta" sho' kyo: qo: li" nae".

¹³Airumung:- yao: cao: dao: jho" kho' rure ngonhaung" to" pye' gelang:. Naonhaung" mao:nhaung: pho" re tha" lang: nhao nae" mangad: lao"- qobo shad' nghung: nhao nae" ra" lo, mau" jham re khonhae" re: makad' nae" rure kam" wa naonhaung" myid: phyid' ge,.

¹⁴Asang Yesu we' dadang: dalam: za: kao so' daui yang: ngo khyag' za: ba: ra" khyo wa- zo:ve daja: ja: wa yao: yao: caung:pa" thung" khyo" masan masin" boe" ga" ru majo, ngad: ra". Ngadqere: zo:ve daqhae: wa masan masin" ngad: ga: nao lam" yang: ngad: re ai: zo:ve wa ni" qhid' mae" masan masin" ru boe" ra".

¹⁵Nao zo" ra" zo:ve daja: ja: khyo" yang ni" mao:nhaung: pho" re no nhao: ngad: re wa- nao wa jhid'de; myid khyo" kao so' daui yaug mangad: lo:ngad: ra". Khristu wa yao" qhid' mae" bin: shid kham: byid: va" ruyang nao zo" ra" zo:ve: yang yao: re dabyo; qeim: lo" nhao wa,.

¹⁶Naonhaung" gai:- ga: myid: jho: ra" ja: re dajung" pye' nhao wa,.

¹⁷Pe"mung:ga"re Mao"So: mung"dan: wa zo" ru shaug' ru we' masin: lo: Gyang" Lho" Byo khyo" yang byid' ra" din:man" ru- yaug yo: ru- ngaui bau" ru we' sin" ru ngad: ra".

¹⁸Khristu re cekhyo" caung da" byid' ra" yaug wa Mao"So re o ngaui nhao mung: su: yang re: caung:khin" ru qhug' ra".

¹⁹Airumung: ngonhaung" wa ai: ngaui pyo: yaug yo: ru boe" nhao nae" rure we' yao: cao: qam: bo nhao nae" ra" khyo jham re khonhae" re: au: qang mung: qam: ke' na ca" ra".

²⁰Zo: ve mathao: yang Mao"So kad' to" ra" mau" zo" re daphyo' pye' wa,. Zo: ve alhab' wa gai: zo: ngadqere:- su gaje qere qobo shad' nghung: nhao: ra" zo:ve re zo" ru wa shad' ra".

²¹Ni" mao:nhaung: pho" re shad' nghung: nhao nae" ngad: re wa- sho: zo" ru- sabyi qang: shaug' ru mangad: lao"- gatau pe" ja: ngadqere: jao" pye' ru wa jo ang: ra" khyo ngad: ra".

²²Ce: khyo we' sin: yang: nao lam" ru we' dakhyo: zaui" zag: ci wa,- Aiwa Mao"So we' ni" agyo: mae ngad vashao:- dayaug yaug jo: ga: khae: yu: ra" mau" re qobo qo" thoe magyo: lo: kad' ra" yaug wa ngaui lho" ra".

²³Ngadqere: aug' o" ra" myid we' zo:ve re zo" ra" yaug re Mao"So wa yao: re dao: phyid' li" nae". Pe"mung:ga"re yao" lo, mau" wa lam khug: myid re apan mato: yang: ngad: ra". Amung:- lam khug: ra" myid re apan mato: lo: kad' ra" ja: pe" ja: ngadqere: qobo ngad: ra".