Read Maru ROMA 15 Bible Online

ROMA 15 - Maru bible

ROMA 15

¹Lam khug: ra" myid qi" ra" mo, ngonhaung" wa- lam khug: ra" myid qam: nang" ra" mo; nho: qo jham re vin nae" rure bobao" thaug' byid: nae" ang: ra". Ngonhaung" wa ngonhaung" yao" gaung re ngaui nhao nae" maang ngad: ra".

²Ai: atha" ngonhaung" wa lam khug: myid mae yao: bam re zao: to' byid: nae" qhid' mae" yao: bam yao" akyu" qhid' mae" qu" mung:- ngonhaung" nho: mao:nhaung: qere ngaui nhao nae" ang: ra".

³Pe"mung:ga"re Khristu wa yao: yao" gaung re ngaui nae" makad' yu ngad: ra". Ai: atha"- Jham: Mugsug' mae- nao re maphug' makhyad' jung" gaui: ra" dao: jham wa nga" dao mae gyo" zao" shaung" yu: ra"- ga: ta" to" ru we' dakhyo: ngad: ra".

⁴Jham: Mugsug' yang ngonhaung" re byid' to" ra" qam: byid' ru we' zang: kham: ru khyo" yang ngonhaung" wa myid: lao" ra" khyo re ngonhaung" qo" nae" qhid' mae" Jham: Mugsug' mae tung" to" ra" gu: ja: khao: ngo" wa ngonhaung" re mho" shid' nae" tung" to" ru ngad: ra".

⁵Aimung: zang: qhao" ru we' myid qam: so' byid' ra" khyo: ajhaung Mao"So wa Khristu Yesu nho: lag re qu" mung: naonhaung" yaug khao: ngo" nhag' lam: jho" vang" na nae" qam: o: byid: vashao:.

⁶Airumung: naonhaung" alhab' mo, daga" za: ngonhaung" Asang Yesu Khristu nho: Yao: Pho" ngad: ra" Mao"So re danhad' dathoe we' za: qo" caung:khin" nae" ngad: ra".

⁷Airumung: Mao"So: phungbao qhid' mae" Khristu wa naonhaung" re khae: yu va" ru we' dakhyo: naonhaung" re: yao: cao: jho" khae: yu ge,-

⁸Pe"mung:ga"re ngo naonhaung" re ta" geli"- Khristu nho: caung da" byid' ra" kao so' daui khyo wa Yuda byu qe: qhid' mae" ngad: ra". Airu wa Mao"So: dao:so: zaung: rure qhu" byid: nae" qhid' mae"- yao: bam: phug' pho" qere Mao"So: yang byid' to" ra" dao:so: jham re zaui" pyang" nae" we' Taung bug byu qere lhao" re: Mao"So: nhag' khyag' shogu: ra" jeju khyo" yang yao: re caung:khin" byid: nhao nae" qhid' mae" ngad: ra".

¹⁰Amung:- Jham: Mugsug' mae- Taung bug byu qe we" Mao"So: byumyu" we"- Ngaui bau: ge,- ga: dam: ta" ra".

¹¹Amung: Taung bug byu qe alhab' mo, we"- Asang re caung:khin" byid: ge,- Byumyu" alhab' we"- yao: re caung:khin" byid: ge,- ga: re: ta" to" ra".

¹²Ailao"- Esaia wa- Yese myid:zo: kaung mae" dayaug na: thug' li" li" nae"- Yao: wa Taung bug byumyu" re eib nae" qhid' mae" joe" li" yaug ngad: li" nae"- Amung: Taung bug byu qe wa yao: mae myid: lao" na: li" genae"- ga: dam: ta" ra".

¹³Myid: lao" ru byid' ra" yaug ajhaung ngad: ra" Mao"So wa naonhaung" lam khug: myid khyo" yang ngaui bau" ru we' yaug yo: ru byid: vashao: wo". Airulao" Gyang" Lho" Byo: qam: so' khyo" yang naonhaung" myid: lao" ru wa xo' yang: qi" qhang: li" nae" ngad: ra".

¹⁴Nga" mao:nhaung: qe we"- naonhaung" wa gai shab jab byang" jo; ru we' laba lajhao to, ngad: jo, gemung: naonhaung" yao: cao: qo" jho" mho" shid' mo, ngad ko" rure ngoyao: jhaug' za: myid: ba: ra".

¹⁵Ngadqere: ce: vhin tung" mae khyo daqhae: we' sin: yang: ngo naonhaung" re ta" peim: ta" kyang" rumae dajhid' zo:ve" vae" tung" ke' ra". Mao"So wa ngore Taung bug byu qe: qhid' mae" mau" zaui: nae" Yesu Khristu nho: daui daui yaug qo" boe" ra" akho: akhang" byid' to" ruyang airu: vae" vae" tung" ke' ru ngad: ra".

¹⁶Taung bug byu qe wa Gyang" Lho" Byo: yang Mao"So re qhaug' byid' ra" Mao"So khae: yu: ra" ngaui" xeim: qe boe" lo genae" qhid' mae" Mao"So mae" lau dao: gai re kho" kyo: byid' rumae ngo wa khinjaung dayaug ru: caung da" byid' ra".

¹⁷Airumung: ngo wa Khristu we' dagaung dasho: za: boe" na mung: Mao"So: mau" zo" re ngo qo" vin vo' ruyang ngo qo" phug: ra".

¹⁸Taung bug byu qe Mao"So: mho dao: re tae" gyo" lo genae" qhid' mae" Khristu wa ngore ci yang: mau" zaui" lo: ra" khyo re za: ngo wa phug: ta" nae".

¹⁹Khristu wa nhad' dao: thoe we' lo, mau" yang re: mug' pho: ve, lho jham we' mug' pho: ve, lho jham: nho: qam: so' khyo" yang re: Mao"So: Byo: qam: so' khyo" yang re: ngo wa Yerusalem: vogaung: mae" Iluri mung" jao: sho' du" qin" yang: Khristu nho: khyo Lau Dao: Gai re bin sho' cao" kho" kyo: byid: va".

²⁰Su gaje: yang zao: to" ra" apan aqao: dao mae paug' zao: ru maboe" vashao:- ngo kao bau: ru wa ai: Khristu nho: khyo re magyo" qu" shiko" ra" jo, qo khao: ngo" mae Lau Dao: Gai cao" kho" kyo: byid: nae" ru ngad: ra".

²¹Jham: Mug: Sug' mae- Yao" khyo re khag' yang re: makyo" qu" ko" ra" mo, wa- yao: re the' myao: li" genae". Amung: mathe' gyo" qu" ko" ra" mo, wa- ba: gyo" li" genae"- ga: ta" ru we' dakhyo: ngad: ra".

²²Airu: mung: naonhaung" jhao" ngo joe" li" nae" seim" rumae myo: sho' lhang tam" pye' ru qhug' ra".

²³Ngadqere: ana" wa- ai: mang: khaung: mae nga" mau" zo" re kyab' sho' bin: zaui: va". Amung: naonhaung" jhao" li" qhug' nae" myo: sho' zin mae" kao bau: na va" ruyang-

²⁴Ana" wa naonhaung" jhao" qo" joe" li" naeva"- ein: ngo myid: lao" ra". Ngo Spain mung" khyo ye" lo" au:- naonhaung" jhao" li" vao: qhug' co' nug: ra". Naonhaung" jhao" dayo, zo: li" thang: na yang: ngaui bau: taung" zam" khug co' mung: naonhaung" bao" thaug' ruyang Spain mung" khyo ye" lo" nug: ra".

²⁵Ngadqere: ana" ngo wa Mao"So: byu qere caung da" byid: nae" qhid' mae" Yerusalem vogaung: khyo ye" lo" nae" ngad: ra".

²⁶Pe"mung:ga"re Makedoni mung" we' Akhaia mung" mae" phung: jham wa Yerusalem mae na ko" ra" Mao"So: byu qemae" myaung sho" ra" mo, re bao" thaug' nae" aung lam Alu: byid: nae" qhid' mae" ngaui bau: taung" myid: phyid' to: vako" ruyang ngad: ra".

²⁷Aiwa yao: bam yao: yao: myid: phyid' ru ngad: ako". Gai gai: yao: re:- yao: bam wa Yerusalem mae" Mao"So: byu qere bao" thaug' byid: nae" khyo ang mo, ngad: ako". Yuda byu qe wa yao: bam: Byo we' sin" ra" shaman" jeju re Taung bug byu qere myho" gae byid: vako" ruyang Taung bug byu qere: yao: bam: jo,nho" jham: yang Yuda byu qere bao" thaug' byid: nae" ang: ako".

²⁸Amung:- ngo wa ce: mau" zo" re bin mung: yao: bam: qhid' mae" qo" gaug: yu: ra" Alu: ngaui alhab' re Yao: bam: lo, khug mae bin: ke' byid: lao"- Spain mung" khyo ye" lo" nae" au: naonhaung" jhao" li" vao: qhug' to: co' nae".

²⁹Ngo naonhaung" jhao" joe" li" lao"- ngo wa Khristu nho: shaman" jeju byang" sho' we' joe" li" nae" ngad: rure ngo ba: ra".

³⁰Mao:nhaung: qe we"- ngonhaung" Asang Yesu Khristu khyo" yang re:- Gyang" Lho" Byo: yang byid' ra" jhid'de; myid khyo" yang re:- akyu" mho' rumae ngo we' qhan: mung: nga" qhid' mae" Mao"So re qam: ke' yang: boceim" mho' byid: genae" qhid' mae" naonhaung" re jhan" ke' ra".

³¹Ngo wa Yuda mung" mae na ko" ra" Yesu re malam khug: ra" mo; lo, mae" loe; beim mung: nga" nho: caung da" bao" thaug' byid' ra" mau" zo" re Yerusalem vogaung: mae na ko" ra" Mao"So: byu qere lham: khae: yu genae" qhid' mae" akyu" mho' ge,-

³²Airumung:- Mao"So myid o: ru ngad: re wa ngo wa naonhaung" jhao" ngaui bau: ngaui yao we' byang" yang: joe" li" mung:- naonhaung" we' daga" ngaui bau: ngaui lho" taung" qo" zam" khug: na: li" nae".

³³Ngonhaung" nho: ngaui: pyo: yaug yo: ru apan ajhaung ngad: ra" Mao"So wa naonhaung" alhab' mo, we' daga" ngad: jo, vashao: wo"- Amen.