Read Maru ROMA 16 Bible Online

ROMA 16 - Maru bible

ROMA 16

¹Kenkhrea vogaung: phung: mae caung da" byid' na: ra" ngonhaung" nhae: mo" Phobe ra" khyo re ngo naonhaung" re bobao" thaug' ta" ke' ra".

²Mao"So: byu qe kad' ang: ru we' dakhyo:- Asang: mang mae naonhaung" yao: re lham: pang" yu mung:- yao: qo ca" ra" gu: mae yao: re bao" thaug' byid: ge,. Pe"mung:ga"re yao: wa byu myo: sho' mo, re bao" thaug' byid: yaug ngad: ru we' ngo rere: bao" thaug' byid: yaug ngad: ra".

³Yesu Khristu mau" zo" mae nga" mau" vin cao: qe ngad ko" ra" Priskila we' Akula shid' tao re ngo au" ke' ra".

⁴Yao: shid' tao wa yao: shid' tao: nho: kao so' re nga" qhid' mae" dan: pye' yang: ngore khyad' yu: qu" va" ru tao ngad: ako". Ngo dayaug za: yao: shid' tao re jeju beim: so" ru mangad. Taung bug byu qe: phung: jham alhab' re: yao: shid' tao re jeju beim: so" ako".

⁵Yao: shid' tao: yham mae zang" ham yang: caung:pa" na ko" ra" phung: byu qere re: ngo au" ke' ra" khyo re ta" kyo: ge,- Amung: Asia mung" mae Khristu re sao qhid' lam" yaug ngad: ra" ngo jhid'de; ra" Epaenetu rere: au" ke' ra".

⁶Naonhaung" qhid' mae" qam: ke' yang: mau" zaui: byid' ra" Mari re au" byid: gela,-

⁷Ngo we' daga" thaung: laung" lo: ra" Yuda mao:nhaung: tao ngad: ra" Androniku we' Yunia shid' zo: rere: au" ke' ra". Yao: shid' yaug wa lagyo: qe: phaung mae mang qi" ru we' nga" qhid' re Khristan boe" lo: ra" shid' yaug ngad: ako".

⁸Asang: khug mae ngo jhid'de; ra" ba nam pho" Ampliatu re au" ke'ra".

⁹Khristu mau" zo" mae ngonhaung" mau" vin cao: ngad: ra" Obanu re we' ngo jhid'de; ra" Staku rere: au" ke' ra".

¹⁰Khristu shad' mae vin tang: ngad: jo; ra" Apele re au" ke" ra"- amung: Aristobulu nho: yham byu qere au" ke' ra".

¹¹Nga" Yuda amyu" Herodion re au" ke' ra". Nakisu nho: yham byu qemae" Khristan mao:nhaung: qere au" ke' ra".

¹²Asang: mau" zo" re zaui: so: ko" ra" Truphaena we' Truphosa re au" ke' ra:. Amung: Asang: qhid' mae" mau" myo: sho' zaui" lo yaug ngad: ra" nga" jhid'de; ra" ba nam pho" Persia re au" ke' ra".

¹³Asang: mau" zo" vin vo; rumae baug thug' yaug ngad: ra" Rufu re we' ngore yao: zo: dayaug rere" ru: gun caung: ra" ai: yao: myhi" rere: ngo au" ke' ra".

¹⁴Asunkristu- Phlegon- Herme- Patroba- Herma- bam we' yao: bam we' daga" ngad ko" ra" Khristan mao:nhaung: alhab' mo, re au" ke' ra".

¹⁵Alao"- Philologu- Yulia- Nereu we' yao: nhae: mo" rere:- Olumpa we' yao: bam we' daga" ngad: ra" Mao"So: byu qe alhab' mo, re au" ke' ra".

¹⁶Naonhaung" yao: cao: dayaug we' dayaug mao:nhaung: jhid'de; myid we' bobaug baug yang: jho" au" ge,- Khristu nho: phung: jham alhab' wa naonhaung" re au" ke' ko" ra".

¹⁷Nga" mao:nhaung: qe we"- naonhaung" kham: yu: ci vako" ra" mho" shid' ra" khyo re ngag: thaug' mung:- phung: kho' lo" nhao: ru we' lam khug: ra" khyo mae" khyonghung: nghung" lo" nhao: ra" mo, re lha" yang: jao" pye' genae" qhid' mae" ngo naonhaung" re jhan" ke' ra".

¹⁸Pe"mung:ga"re airu: kad' ra" mo, wa ngonhaung" Asang Yesu Khristu re caung da" byid: mo, mangad: ko" ngad: ra". Yao: bam: nhad' re za: myid mo, ngad: ako". Yao: bam: dao: yaung"- nhad' cug: ra" dao: thoe jham khyo" yang pe" maba: ra" mo, re yao: bam mhug' pyag' pye' ako".

¹⁹Ai: Ngaui Bau" Lau Dao: re vin tang: za: naonhaung" lam" na ko" ra" khyo re yaug khao: ngo" the' gyo" avako"- Airumung: ngo wa naonhaung" khyo re ngaui bau: nhao: ra". Ngo wa naonhaung" re gai shab: rumae pha,jhi" ba: ra" mo,- makhyang" rumae wa qobo maqo" mo, boe" nhao nug: ra".

²⁰Amung: ngonhaung" nho: ngaui pyo: yaug yo: ru ajhaung ngad: ra" Mao"So wa mataung" myao" re Satan re naonhaung" khyid qao: mae zab: khyoe' pye' li" nae". Ngonhaung" nho: Asang Yesu nho: nhag' myan" ra" jeju wa naonhaung" we' daga" ngad: jo, vashao: wo"-

²¹Nga" nho: mau" vin byin cao: Timothi we' nga" Yuda amyu" ngad ko" ra" Lukai- Yason we' Sosipata bam wa naonhaung" re au" ke' ko" ra".

²²Ce: vhin tung" re tung" yaug ngo Tertiu wa Asang: khug mae naonhaung" re au" ke' ra".

²³Nga" bang" sang pho ngad mung: phung: byu qe zang" ham yang: caung:pa" ko" ra" yham mae" yham sang re: ngad: ra" Gaiu wa naonhaung" re au" ke' ra". Vomo" mae" ngaui zam: yaug ngad: ra" Erastu we' ngonhaung" mao:nhaung: pho" Kuatu shid' zo: re: naonhaung" re au" ke' ako". (Lo, tung" jham: Mugsug' daqhae: mae adau ngai

²⁴mae- ngonhaung" Asang Yesu nho: nhag' myan" ra" jeju wa- naonhaung" alhab' mo, we' daga" ngad: jo, vashao: wo"- Amen ga: tung" laung" to" ako".)

²⁵Ngonhaung" wa Mao"So re phungbao caung: byid: gelang:- Yesu khyo we' sin: yang: ngo kho" kyo" ra" Lau Dao: Gai re cao" yang: re:- daba ganhae" gaco' pyad mae nyham" to" ra" no; thao" ra" dangman" ra" khyo re qhu" byid' rumae cao" yang: re: Mao"So wa naonhaung" lam khug: rumae gang: tang za: qo" ye; jo, nhao: ra".

²⁶Ngadqere: ana" wa ai: nyham" to" ra" dangman" ru wa lapa jham: paug' jham khyo" yang de: de: za: qhu" byid' ava". Byumyu" cao jab Mao"So re lam" mung: yao" mho dao: re tae" gyo: genae" qhid' mae" apyad ato daui: na: ra" Mao"So: amyin" khyo" yang byumyu" alhab' re ba nhao: ava".

²⁷Date: za: ngad mung: Pha,jhi" bo: thao" yaug ngad: ra" Mao"So wa Yesu Khristu khyo" yang apyad ato phungbao jo; jo, vashao: wo"- Amen.